1 Yoni 5 - The Keyagana NT and 25 OT books

Lagaemo ma mopafi kavaʼmo ago aeta agaseʼnone, huno huʼniya gemae

¹ Ina lagimo Yesuʼa Kalaisiʼmo vayaʼmo maiʼniye, huʼa huteʼa apakesamo afiʼa fatago nehafi Gotiʼa alino apateʼnigeʼa mafaʼneʼamo maiʼnae. Muki vayaʼamogimo alino apateʼniya vekaeʼmo hapau apayamopafiʼmo hapausiyana ani kava huno alino apateʼniya mafaʼneʼamogiʼefeʼmo hapau apayamopafiʼmo nehapaiye.

² Lagaemo Gotifeʼmo lahau layamopafiʼmo lahausigeta Goti keʼaepa geʼamo akame nehisunana ani kavatetiʼmo alagi ageʼnonana Goti mafaʼneʼamogifeʼmo lahau layamopafiʼmo nelahaiye.

³ Gotifeʼmo hapau apayamopafiʼmo nehapaiya kavaʼmoʼa Goti keʼaepa geʼamo ani kavaʼmo hiyo, ina kavaʼmo osiyo, huno huʼniya geʼamo akame nehaya kavaʼmo haneʼniye. Goti keʼaepa geʼamo akame hisuna kavaʼmoʼa kana osuʼniyanageta afaʼa akame hugune.

⁴ Gotiʼa alino apateʼniya mafaʼneʼamogimo ma mopafi kavaʼeʼmo kame huʼa aeʼa neʼagasae. Lagaemo Goti Mafaʼneʼaeʼmo lagesamo afita fatago huʼnona kavatetiʼmo ma mopafi kavaʼmo kame huta ago aeta agaseʼnone.

⁵ Ina lagimo ma mopafi kavaʼmo kame huʼa aeʼa agasegae. Yesuʼa Goti Mafaʼneʼamo maiʼniye, huʼa apakesamo afiʼa fatago nehaya vayaʼamogigeʼmo kame huʼa aeʼa agasegae.

Yesu Kalaisi faigoko geʼaeʼmo huʼniya gemae

⁶ Yesu Kalaisiʼa anitetiʼe kolaʼaletiʼeʼmo emineʼniye. Agaemo aniʼalefekeʼmo emiʼnoʼmeʼnifa kolaʼaleʼefeʼmo emineʼniye. Goti Aunemeʼamoʼmo lama geʼageʼmo nehiya vekamo maiʼniyaʼmofeʼmo ageteno ha maeno Kalaisifeʼmo faigoko geʼamo nehiye.

⁷ Loleʼe magoʼe vayaʼmo kokuʼnapiʼmo maiʼneʼapaeʼmo ageteʼa ha maeʼa faigoko geʼapimo nehae. Apakaemo Afotimoʼagi Goti Geʼamae huʼa agi neʼaya vekagi Aote Aunemeʼagi huʼa maiʼnayaʼmonanafa magoke Gotiʼa maiʼniye.

⁸ Loleʼe magoʼe yaʼmo ma mopafiʼmo haneʼneʼa ageteʼa ha maeʼa faigoko geʼamo nehae. Aunemeʼamoʼmogi aniʼmoʼagi kolaʼamoʼagi huʼa magoke agufa gemo huʼa ageteʼa ha maeʼa faigoko geʼamo nehae.

⁹ Ma mopafi vayaʼmogimo ageteʼa ha maeʼa faigoko gemo aeʼa hakalo nehageta afitetaeʼmo, alagi lama gemo nehae, huta nehunaʼmonanafa Gotiʼa ageteno ha maeno faigoko gemo aeno hakalo nehiya gemoʼa ma mopafi vayaʼai geʼapimo alagi aeno neʼagase. Gotiʼa Mafaʼneʼamo ageteno ha maeno faigoko gemo aeno hakalo huʼniye.

¹⁰ Mani ageteno ha maeno faigoko geʼamo Goti Mafaʼneʼaeʼmo apakesamo afiʼa fatago nehaya vayaʼai apaipafiʼmo haneʼniyaʼmonanafa Gotiʼa lama gemo nehiye, huʼa nosaya vayaʼmogimo Gotiʼa aigofe gemo nehiya vekamo maiʼniye, huʼa nehae. Apakaemo Gotiʼa Mafaʼneʼamo ageteno ha maeno faigoko gemo aeno hakalo huʼniya geʼaeʼmo apakesamo afiʼa fatago osuʼnayaʼmofeʼmae.

¹¹ Gotiʼa ageteno ha maeno faigoko gemo aeno hakalo hunoʼaeʼmo, nagaemo maige maige hutapa neʼmaiya yaʼmo lapamiʼnove, huno laha paiʼniye. Ani maige maige huʼa neʼmaiya yaʼmo mafaʼneʼafiʼmo maiʼniye.

¹² Goti Mafaʼneʼamo avaleʼa apaipafiʼmo ateʼnaya vayaʼmo maige maige huʼa neʼmaiya yaʼmo ago aliʼnae. Goti Mafaʼneʼamo avaleʼa apaipafiʼmo oʼateʼnisaya vayaʼmo maige maige huʼa neʼmaiya yaʼmo oʼaliʼnae.

¹³ Nagaemo mani gemo Goti Mafaʼneʼamo agiʼalefeʼmo lapakesamo afita fatago nehaya vayaʼmogita hutapaeʼmo, maige maige huta maisuna yaʼmo aliʼnone, hutapa afitetapa agesayafeʼmo mani gemo avoʼmo kaeʼnove. Lapakaemo afitetapa lapakesamo afita fatago hume hume visayafeʼmo avoʼmo kaeʼnove.

Afaʼa maisuna yaʼmo ago aliʼnonanageta maige maige huta maigune, huno huʼniya gemae

¹⁴ Lagaemo Gotiʼa, ani kavaʼmo huguve, huno hu maleʼniya kavatefeʼmo nunumuʼmo huta ge huta afi gesunagenoʼaeʼmo getimo afaʼa afiteno hugiye, huta agaefeʼmo lagesamo afita fatago nehune.

¹⁵ Getimo neʼafiye, huta afiʼnisunana ageʼnonana na agufa yafeʼmo haoke heta ge nehisupi lamiʼnigeta aliʼnone, huta lagesamo neʼafune.

¹⁶ Mago vekamoʼmo konagaʼamoʼmo ageʼniyana hosu kavaʼmo ofalisiya agufa hosu kavaʼmo huʼnisigeno agetenoʼaeʼmo Gotifeʼmo ge huno afi gesigenoʼaeʼmo ani konagaʼamoʼmo falisiya agufa hosu kavaʼmo osuʼniya konagaʼamoʼmo maige maige huno maisiya yaʼmo amigiye. Mago vekamoʼmo alagi falisiya agufa hosu kavaʼmo nehisiyana nunumuʼmo hutapa ateyo, huʼna nosuve.

¹⁷ Muki agufa alagepa osu kavaʼmo nehaya kavaʼmoʼa hosu kavaʼmo haneʼniyaʼmonanafa mago hosu kavaʼmoʼa alagi falisaya kavategamo alino noʼapateya hosu kavaʼmo haneʼniye.

¹⁸ Gotiʼa alino apateʼniya mafaʼneʼamogimo hosu kavaʼmo akame nosae. Gotiʼa alino apateʼniya vayaʼmogi apakaiʼapileʼmo yagaiʼa neʼapatagenoʼaeʼmo hosu vekamoʼmo alino hosu huno noʼapate.

¹⁹ Lagaemo ago ageʼnonana Goti mafaʼneʼamo maiʼnonaʼmonanafa muki ma mopafi vayaʼmogimo hosu vekamo aiyafiʼmo maiʼnageno yagaino neʼapate.

²⁰ Lagaemo ageʼnonana Goti Mafaʼneʼamo emineno lama ge Gotiʼa ageta alagepa hisunafeʼmo lagesamo afisuna yaʼmo lamiʼniye. Lagaemo lama ge vekafiʼmo maiʼnetaeʼmo Mafaʼneʼamo Yesu Kalaisipiʼmo maiʼnone. Ani vekamo lama ge Gotiʼa maiʼnenoʼaeʼmo alagepa huta maige maige huta maisuna yaʼmo afoʼamoʼmo maiʼniye.

²¹ Aise mafaʼneʼnimogitapae, huʼna, aigofe gotiʼapimogimo apakame osutapa maita halove huta maiyo. He, lama ge.