1 Yoni 4 - The Keyagana NT and 25 OT books

Goti Aunemeʼaʼe hosu apauneʼapameʼefeʼmo huʼniya gemae

¹ Nahauʼniya vayaʼnimogitapae, huʼna, Asole aigofe vayaʼmogi gemo aeʼa hakalo huʼa hapa nepaiya vayaʼmo muki ma mopafiʼmo umenitata nehae. Umenitata nehayanagi lama gemo nehae, huta oʼafitapa alagepa huta alita fako hutapa afitetapaeʼmo, Gotitegatiʼmo eʼnafi oʼmeʼnafi, hutapa afiyo.

² Muki vayaʼmogimo, Yesuʼa Kalaisi vekamo maiʼneno ma mopafi vayaʼai apakufagana agufamo aliteno vayaʼmo hamaleʼniye, huʼa nehaya vayaʼmo Goti Aunemeʼamo aliʼnae. Lapakaemo ani kavatetiʼmo ageʼnayana Goti Aunemeʼamo apaipafiʼmo maiʼniye, huta agetapa aeto huʼnae.

³ Muki vayaʼmogimo, Yesuʼa Kalaisi vekamo maiʼneno ma mopafi vayaʼai apakufagana agufamo aliteno vayaʼmo hamaleʼniye, huʼa nosaya vayaʼmo Goti Aunemeʼamo oʼaliʼnae. Apakaemo Yesu kameʼamo aunemeʼamo aliʼnae. Lapakaemo, hogotetapa ani aunemeʼamo egaiye, hutapa afiʼnagenoʼaeʼmo ago eʼniye.

⁴ Aise mafaʼneʼnimogitapae, huʼna, lapakaemo Goti mafaʼneʼamo maiʼnetapaeʼmo kamemo hutapa aigofe vayaʼmo ago aeta apakaseʼnae. Lapaipafiʼmo maiʼniya Aunemeʼamoʼa ma mopafi vayaʼai apaipafiʼmo maiʼniya aunemeʼamo ago aeno agaseno maiʼniyaʼmofeʼmae.

⁵ Apakaemo ma mopafi vayaʼmo maiʼnayaʼmofeʼmo ma mopafi kavafekeʼmo ava gemo huʼa hapa nepaigeʼapaeʼmo ma mopafi vayaʼmogi neʼafiye.

⁶ Lagaemo Goti vayaʼamo maiʼnone. Gotiʼa ageʼa aeto huʼnaya vayaʼmogimo getimo neʼafiye. Goti vayaʼamo oʼmaiʼnaya vayaʼmogimo getimo noʼafiye. Ani kavatefeʼmo lama ge Aunemeʼamo agege aigofe aunemeʼamo agege hugune.

Gotiʼa hau ayamopafiʼmo hauʼniya vekaeʼmo huʼniya gemae

⁷ Nahauʼniya vayaʼmogitapae, huʼna, Hapau apayamopafiʼmo nehapaiya kavaʼmo afoʼamoʼmo Gotiʼa maiʼniyaʼmofeʼmo konagatimogifeʼmo lahau layamopafiʼmo lahaino. Muki vayaʼmo hapau apayamopafiʼmo nehapaiya vayaʼmo Gotiʼa alino apateʼnigeʼa mafaʼneʼamo maiʼneʼa Gotiʼa ageʼa aeto huʼnae.

⁸ Gotiʼa hau ayamopafiʼmo nehaiya vekamo maiʼniyaʼmofeʼmo hapau apayamopafiʼmo nohapausiya vayaʼmogimo Gotiʼa ageʼa aeto osuʼnae.

⁹ Gotiʼa Yesutetiʼmo afaʼa maisuna yaʼmo alisunafeʼmo aiya magoke mafaʼneʼamo alino ateʼnigeno ma mopafiʼmo emineʼniye. Gotiʼa ani kavatetiʼmo lagaefeʼmo hau ayamopafiʼmo hauʼniya kavaʼamo alino lave liʼniye.

¹⁰ Alopa alagepa kavaʼmo haneʼniyana lagaemo Gotifeʼmo lahau layamopafiʼmo olahauʼniyaʼmonanafa Gotiʼa lagaefeʼmo hau ayamopafiʼmo hauʼniye. Agaemo lagaefeʼmo hau ayamopafiʼmo hauʼnisigeno aipamoʼmo falu huno latesiyafeʼmo Mafaʼneʼamo alino ateʼnigeno emineno hosu kavatilefeʼmo falino miya faino lateʼniye.

¹¹ Nahauʼniya vayaʼmogitapae, huʼna, Gotiʼa lagaefeʼmo hau ayamopafiʼmo hauʼniyaʼmofeʼmo konagatimogifeʼmo lahau layamopafiʼmo lahaino.

¹² Mago vekamoʼmo Gotiʼmo mago afinaʼmo oʼageʼniye. Lagaemo konagatimogifeʼmo lahau layamopafiʼmo nelahaisiyana Gotiʼa lagaepiʼmo alagi maiʼnigeno hau ayamopafiʼmo hauʼniya kavaʼamo laipafiʼmo kosino afu leʼniye.

¹³ Gotiʼa Aunemeʼamo ago lamiʼniyaʼmofeʼmo ani kavatetiʼmo ageʼnonana agaepiʼmo alagi maiʼnonageno lagaepiʼmo alagi maiʼniye.

¹⁴ Lagaemo Afotimoʼmo Mafaʼneʼamoʼmo muki ma mopafi vayaʼai apakufamo alino katino apatesiyafeʼmo alino ateʼnigeno emineʼniye, huta agetetaeʼmo aeta hakalo huta hapa nepaune.

¹⁵ Gotiʼa muki vayaʼmogi, Yesuʼa Goti mafaʼneʼamo maiʼniye, huʼa aeʼa hakalo huʼa hapa nepaiya vayapiʼmo alagi maiʼnigeʼa apakaemo agaepiʼmo alagi maiʼnae.

¹⁶ Gotiʼa lagaefeʼmo hau ayamopafiʼmo hauʼniye, huta afitetaeʼmo ani kavafeʼmo lagesamo afita fatago nehune. Gotiʼa hau ayamopafiʼmo nehaiya vekamo maiʼniye. Hau ayamopafiʼmo hauʼniya kavapiʼmo alagi maiʼnisaya vayaʼmo Gotipiʼmo alagi maiʼnageno Gotiʼa apakaepiʼmo alagi neʼmaiye.

¹⁷ Gotiʼa agoti huno apatesiya afinaʼmo lagaemo koli osisunafeʼmo Gotiʼa lagaefeʼmo hau ayamopafiʼmo hauʼniya kavaʼamoʼmo laipafiʼmo kosino ago afu leʼniye. Hemenimo Kalaisiʼa maiʼniya kava huta ma mopafiʼmo maiʼnonaʼmofeʼmo agoti huno apatesiya afinafeʼmo koli osugune.

¹⁸ Gotiʼa lagaefeʼmo hau ayamopafiʼmo hauʼniye, huta huteta agaefeʼmo lahau layamopafiʼmo lahauʼnisiyana koli nosune. Haino hapaiʼniya hau ayamopafiʼmo hauʼniya kavaʼaletiʼmo lamoʼya neʼaiya kavatimo laipafatiʼmo alino neʼatale. Apamoʼya neʼaiya kavaʼmo aepaʼamo haneʼniyana hosu kavaʼmo nehunaʼmofeʼmo hosu miyatimo aligune, huʼa apakesamo neʼafiye. Gotiʼa hau ayamopafiʼmo hauʼniya kavaʼamoʼmo koli nehaya vayaʼai apaipafiʼmo kosino afu nole.

¹⁹ Gotiʼa hogoteno lagaefeʼmo hau ayamopafiʼmo hauʼniyaʼmofeʼmo lagaemo Gotifeʼmo lahau layamopafiʼmo nelahaiye.

²⁰ Mago vekamoʼmo hunoʼaeʼmo, Nagaemo Gotifeʼmo nahau nayamopafiʼmo neʼnahaiye, huno nehunoʼaeʼmo konagaʼamogifeʼmo aini hisiyana aigofe vekamo maiʼniye. Agaemo ageʼniya konagaʼamofeʼmo nohausiyana haiya kava huno oʼageʼniya Gotifeʼmo hau ayamopafiʼmo haugiye.

²¹ Gotiʼa mani keʼaepa geʼaeʼmo, Lapakaemo Gotifeʼmo lapau lapayamopafiʼmo lahapausigeno konagatapimogiʼefeʼmo lapau lapayamopafiʼmo lapaino, huno laha paiʼniye.