1 Yoni 3 - The Keyagana NT and 25 OT books

Goti mafaʼnemogifeʼmo apava gemo huʼniya gemae

¹ Afiyo, huʼna, Afotimoʼmo lagaefeʼmo aeto agufa kavaʼmo huno hau ayamopafiʼmo hauʼnigenoʼaeʼmo, Mafaʼneʼnimogitapae, huno nehigetaeʼmo lahau neʼaune. Ma mopafi vayaʼmogimo Gotiʼmo oʼageʼnayaʼmofeʼmo lagaeʼeʼmo lageʼa aeto nosae.

² Nahauʼniya vayaʼmogitapae, huʼna, hemenimo Goti mafaʼneʼamo maiʼnonanageta henagaʼamo haiya agufa vayaʼmo maisupi, huta oʼafiʼnonaʼmonanafa agaemo emineno afole aisigetaeʼmo agaekana huta maigune, huta afiʼnone. Haiya agufa vekamo maiʼnifi, huta ageta aeto hugunaʼmofeʼmo agaekana huta maigune.

³ Muki vayaʼamogimo, ani kavaʼmo afole aigiye, huʼa huteʼa agava maiʼneʼa apamogaga neʼaiya vayaʼmo apakaiʼapimo sese huʼa neʼapatae. Agaemo yaveyaveʼage aipaʼe vekamo maiʼniyanageʼa agaekana huʼa maisayafeʼmae.

⁴ Hosu kavaʼmo nehaya vayaʼmogimo Goti keʼaepa geʼamo ago amagiʼa neʼatalae. Hosu kavaʼmo Goti keʼaepa geʼamo amagiʼa neʼatalaya kavaʼmo haneʼniye.

⁵ Lapakaemo ago afiʼnayana Kalaisiʼa hosu kavatimo alino atalesiyafeʼmo emineno afole aiʼniye. Agaiʼa aipafiʼmo hosu kavaʼamo alagi ohaneʼniye.

⁶ Muki vayaʼmo agaepiʼmo alagi maiʼnaya vayaʼmogimo hosu kavaʼmo nosae. Hosu kavaʼmo nehaya vayaʼmogimo Kalaisiʼa oʼagege ageʼa aeto osuge huʼnae.

⁷ Aise mafaʼneʼnimogitapae, huʼna, fiku yanagetapa apateʼnisageʼa humi lapategae. Kalaisiʼa fatago vekamo maiʼniya kava huʼa alagepa kavaʼmo nehaya vayaʼmo fatago vayaʼmo maiʼnae.

⁸ Sataniʼa aepa faiʼniya afinatetiʼmo hosu kavakeʼmo hume hume neʼeya kava huʼa muki vayaʼmogi hosu kavaʼmo nehaya vayaʼmo Satani vayaʼamo maiʼnae. Goti Mafaʼneʼamoʼmo Satani aliʼyaʼamo alagi alino hano huno atalesiyafeʼmo emineno afole aiʼniye.

⁹ Ina lagimo Gotiʼa alino apateʼnifi Goti avina yaʼamo apaipafiʼmo haneʼniyaʼmofeʼmo hosu kavaʼmo akame nosae. Gotiʼa alino apateʼniyaʼmofeʼmo apakaemo hosu kavaʼmo alagi akame osugae.

¹⁰ Muki vayaʼmogi fatago kavaʼmo nosaya vayaʼmo Goti mafaʼneʼamo oʼmaiʼnae. Konagaʼapieʼmo nohapaiya vayaʼmogimo ani kavaʼmo huʼa Goti mafaʼneʼamo oʼmaiʼnae. Ani kavatetiʼmo Goti mafaʼnemo maiʼnafi Satani mafaʼnemo maiʼnafi huʼa apakegae.

Konagatapieʼmo lapaino, huno huʼniya gemae

¹¹ Lapakaemo aepa faiʼnaya afinatetiʼmo, konagatapieʼmo lapau lapayamopafiʼmo lapaino, huta lapa paiʼnonagetapa afiʼnae.

¹² Kenikana huta oʼmaigetao. Keniʼa hosu vekamo mafaʼneʼamo maiʼneno aganaʼamoʼmo kamitimo amagiʼnigeno faliʼniye. Na kava higeno kamitimo amagiʼniye. Keniʼa hosu kavaʼmo huʼnigeno aganaʼamoʼmo fatago kavaʼmo huʼniyaʼmofeʼmo kamitimo amagiʼnigeno faliʼniye.

¹³ Konagaʼnimogitapae, huʼna, ma mopafi vayaʼmogimo lapakaefeʼmo apaini hisayana lapau oʼaiyo.

¹⁴ Lagaemo konagatieʼmo lahau layamopafiʼmo nelahaiyaʼmofeʼmo afiʼnonana nefaliya kavategatiʼmo ago ataleta eta afaʼa neʼmaiya kavategamo maiʼnone. Konagaʼapieʼmo hapau apayamopafiʼmo nohapaiya vayaʼmo nefaliya kavategamo alagi neʼmaiye.

¹⁵ Konagaʼamofeʼmo aini hisiyana konagaʼamoʼmo kamitimo amagiʼniya vekagana huno maiʼniye. Lapakaemo ago afiʼnayana kamitimo neʼapamagiya vayaʼai apaipafiʼmo maige maige huʼa neʼmaiya yaʼmo alagi nohane.

¹⁶ Yesuʼa afaʼa neʼmaiya yaʼamo lagaetefeʼmo ataleʼniyaʼmofeʼmo lagaefeʼmo hau ayamopafiʼmo hauʼniya kavaʼamo ageʼnonanageta ani kavaʼmo huta konagatimogitefeʼmo afaʼa neʼmauna yatimo atalegaune.

¹⁷ Atalegaunaʼmonanafa mago vekamoʼmo hapa maesiya yaʼamo haneʼniya vekamoʼmo agesiyana mago konagaʼamoʼmo kafu huʼnisigeno agetenoʼaeʼmo hau huno ateteno oʼamiʼnisiyana Gotiʼa hau ayamopafiʼmo hauʼniya kavaʼamo aipafiʼmo haneʼnifiye.

¹⁸ Aise mafaʼneʼnimogitapae, huʼna, lavayaʼaletikeʼmo geʼageʼmo hutaeʼmo, lahau layamopafiʼmo nelahaiye, huta osuta alagi lama ge huno lahau layamopafiʼmo lahauʼninageta alagepa kavaʼmo higetao.

Goti aulagaleʼmo koli nosaya vayaʼaifeʼmo huʼniya gemae

¹⁹ Ani gemo avoʼmo kaeʼnova kavatetiʼmo ago ageʼnonana lama ge vayaʼamo maiʼnonaʼmofeʼmo laipamoʼmo falu huʼnisigeta Goti aulagaleʼmo atete osugune.

²⁰ Yuʼilaga mafaʼnetimoʼmo, hosu kavaʼmo nehae, huno nehisigenoʼaeʼmo Gotiʼa yuʼilaga mafaʼnetimo ago aeno agaseno muki kavatimo ageʼniye.

²¹ Nahauʼniya vayaʼnimogitapae, huʼna, Yuʼilaga mafaʼnetimoʼmo hosu kavaʼmo nehae, huno nosisiyana lagaemo Gotiʼa laha maegaiye, huta ago afiʼnone.

²² Lagaemo keʼaepa geʼamo akame nehunagenoʼaeʼmo amuse huno nelateya kavaʼmo nehunaʼmofeʼmo haoke nehunagenoʼaeʼmo nelamiye.

²³ Goti keʼaepa geʼamoʼmo hunoʼaeʼmo, mafaʼneʼnimo Yesu Kalaisi agiʼalefeʼmo lapakesamo afita fatago hutetapaeʼmo konagatapimogifeʼmo lapaino, huno laha paiʼniye.

²⁴ Muki vayaʼmo keʼaepa geʼamo akame nehaya vayaʼmo Gotipiʼmo alagi maiʼnageno apakaepiʼmo alagi neʼmaiye. Ani kavatetiʼmo ageʼnonana Gotiʼa lamiʼniya Aunemeʼaletiʼmo lagaepiʼmo alagi neʼmaiye.