1 Yoni 2 - The Keyagana NT and 25 OT books

¹ Aise mafaʼneʼnimogitapae, huʼna, lapakaemo hosu kavaʼmo osisayafeʼmo mani gemo lapakaefeʼmo avoʼmo nekaove. Mago vekamoʼmo hosu kavaʼmo hisiyaʼmoʼmo laha maeno muki yaʼmo Afoʼamofeʼmo ge huno nelateya vekamo maiʼniye. Ani vekamo Yesu Kalaisiʼa fatago vekamo maiʼniye.

² Agaiʼamo Gotiʼa aipamoʼmo falu huno latesiyafeʼmo maiʼniye. Gotiʼa lagaefekeʼmo aipamoʼmo falu huno latesiyafeʼmo oʼmaiʼnifa muki ma mopafiʼmo maiʼnaya vayaʼefeʼmo Gotiʼa aipamoʼmo falu huno apatesiyafeʼmo maiʼniye.

³ Gotiʼa, ani kavaʼmo hiyo, ina kavaʼmo osiyo, huno huʼniya geʼamo akame c nehisunana ani kavatetiʼmo ago ageʼnonana Gotiʼa ageta alagepa huta ageʼnone.

⁴ Mago vekamoʼmo, ageʼna aeto huʼnove, huno nehunoʼaeʼmo Goti keʼaepa geʼamo akame nosisiyana agaemo aigofe vekamo maiʼnigeno lama gemo aipafiʼmo alagi ohaneʼniye.

⁵ Ohaneʼniyaʼmonanafa muki vayaʼmogi Goti geʼamo akame nehaya vayaʼmogimo Gotifeʼmo hapau apayamopafiʼmo nehapaiya kavaʼapimoʼmo uno haino hapaiʼniye. Ani kavatetiʼmo ago ageʼnonana agaepiʼmo maiʼnone.

⁶ Agaepiʼmo alagi maiʼnone, huʼa nehisaya vayaʼmogimo Yesuʼa huʼniya kavaʼmo akame huʼa hugae.

Saufa keʼaepa geeʼmo huʼniya gemae

⁷ Naganaʼnimogitapae, huʼna, nagaemo saufa keʼaepa gemo lapakaefeʼmo avoʼmo nokaofa atafa keʼaepa gemo akeyaʼvilagamo aepa faitapa afiʼnaya afinatetiʼmo afiʼnaya gemo lapakaefeʼmo avoʼmo nekaove. Lapakaemo mani atafa keʼaepa gemo aepa faiʼnaya afinatetiʼmo afime afime eʼnae.

⁸ Afiʼnayaʼmonanafa hemenimo saufa keʼaepa gemo lapakaefeʼmo avoʼmo nekaove. Mani keʼaepa gemo agaepiʼmo haneʼnigenoʼaeʼmo lapakaepiʼeʼmo haneʼniye. Hani huʼniya kavaʼmo hano hugefeʼmo nehigenoʼaeʼmo ha le yaʼmoʼa aeno ha neleyaʼmofeʼmae.

⁹ Mago vekamoʼmo hunoʼaeʼmo, ha le yategamo neʼmauve, huno huteno konagaʼaeʼmo aini huʼnisiyana hanipiʼmo maime maime neʼe.

¹⁰ Konagaʼaeʼmo hau ayamopafiʼmo nehaiya vekamoʼmo ha le yateʼmo alagi maiʼnigenoʼaeʼmo aipafiʼmo alino agoʼya faino atalesiya agufa kavaʼmo alagi ohaneʼniye.

¹¹ Ohaneʼniyaʼmonanafa konagaʼaeʼmo aini huʼnisiyana hanipiʼmo maiʼneno hanipiʼmo umenitata nehunoʼaeʼmo, haiya kateʼmo neʼufi, huno noʼage. Hani yaʼmoʼa aulagafiʼmo aino ati kaeʼniyaʼmofeʼmo kaʼmo oʼageʼniye.

Ma mopafi yafeʼmo olapaino, huno huʼniya gemae

¹² Aise mafaʼneʼnimogitapae, huʼna, Gotiʼa Kalaisi agiʼalefeʼmo hosu kavatapimo ago alino ataleʼniyaʼmofeʼmo lapakaefeʼmo mani gemo avoʼmo kaeʼnove.

¹³ Vayatama vayaʼmogitapae, huʼna, lapakaemo aepa faiʼniya afinatetiʼmo maiʼniya vekamo ago ageʼnayaʼmofeʼmo lapakaefeʼmo mani gemo avoʼmo kaeʼnove. Neya vayaʼmogitapae, huʼna, lapakaemo kame hutapa hosu vekamo aetapa agaseʼnayaʼmofeʼmo lapakaefeʼmo mani gemo avoʼmo kaeʼnove. Saufa mafaʼneʼnimogitapae, huʼna, lapakaemo muki yaʼmo Afoʼamoʼmo ago agetapa aeto huʼnayaʼmofeʼmo lapakaefeʼmo mani gemo avoʼmo kaeʼnove.

¹⁴ Vayatama vayaʼmogitapae, huʼna, lapakaemo akeyaʼvilagamo aepa faiʼniya afinatetiʼmo maiʼniya vekamo ago ageʼnayaʼmofeʼmo lapakaefeʼmo mani gemo avoʼmo kaeʼnove. Neya vayaʼmogitapae, huʼna, Lokiya vaitapa maiʼnagenoʼaeʼmo Goti geʼamo lapaipafiʼmo alagi haneʼnigetapaeʼmo kame hutapa hosu vekamo aeta agaseʼnayaʼmofeʼmo lapakaefeʼmo mani gemo avoʼmo kaeʼnove.

¹⁵ Lapakaemo ma mopafi kavafeʼmofi ma mopafi yafeʼmofi huno olapaino. Ma mopafi kavafeʼmo nehapaiya vayaʼmogimo Afotimo Gotifeʼmo hapau apayamopafiʼmo nohapaiye.

¹⁶ Muki ma mopafi kavaʼmo haneʼniyana apakufamoʼmo haʼye nehiya kavaʼmo hanege ageteʼapaeʼmo hapaʼye nehiya kavaʼmo hanege aliteʼa ala apakimo neʼaliya kavaʼmo hanege huʼniye. Ani kavaʼmo Goti kavaʼamo ohaneʼnifa ma mopafi kavaʼmo haneʼniye.

¹⁷ Ma mopafi kavaʼe ma mopafi kavafeʼmo hapaʼye nehiya kavaʼeʼmo ago hano hugefeʼmo nehiyanageno alagi hano hugiyaʼmonanafa Goti geʼamo akame nehaya vayaʼmo maige maige huʼa maigae.

¹⁸ Saufa mafaʼneʼnimogitapae, huʼna, ma mopamo hano hisiya afinaʼmo ago hogo nehiye. Lagaemo, Kalaisi kameʼamo afole aigiye, huta ago lapa paiʼnonagetapa afiʼnae. Inagi hemenimo asole kame vayaʼamo afole aiʼnayaʼmofeʼmo hano hisiya afinaʼmo ago hogo nehiye, huta afiʼnone.

Kalaisi kame vayaʼamo afole aiʼnaya gemae

¹⁹ Apakaemo ago lataleʼa uʼnayaʼmonanafa vayatimo oʼmaiʼnae. Apakaemo lagaepatiʼmo maiʼnaesinana olataleʼa lagaeʼeʼmo magokepi lokaeʼa maiʼnaesine. Ani vayapatiʼmo mago vayaʼmogi vayatimo oʼmaiʼnae, huta apakesunafeʼmo ago lataleʼa uʼnae.

²⁰ Apakaemo ataleʼa uʼnayaʼmonanafa lapakaeteʼmo aote vekamo Kalaisiʼa uvelimo lakino lapategekana huno Goti Aunemeʼamo lapamiʼnigetapa muki geʼamo afiʼnae.

²¹ Inagi lapakaemo lama gemo oʼafiʼnayaʼmofeʼmo mani gemo avoʼmo okaeʼnofa lapakaemo lama gemo ago afitetapaeʼmo aigofe gemoʼmo lama gefatiʼmo afole noʼaiye, hutapa ago afiʼnayaʼmofeʼmo lapakaefeʼmo mani gemo avoʼmo kaeʼnove.

²² Aigofe vayaʼmo ina lagimae. Yesufeʼmo Kalaisi vekamo oʼmaiʼniye, huʼa aeʼa hakalo huʼa hapa nepaiya vayaʼmo aigofe vayaʼmo maiʼnae. Apakaemo, Yesuʼa Kalaisi vekamo oʼmaiʼniye, huʼa huge Gotiʼmo Yesu afoʼamoʼmo oʼmaiʼniye, huʼa huge huʼa aeʼa hakalo huʼa hapa nepaiya vayaʼmo Kalaisi kame vayaʼamo maiʼnae.

²³ Muki vayaʼamogi, Yesuʼa Kalaisi vekamo oʼmaiʼniye, huʼa aeʼa hakalo huʼa hapa nepaiya vayaʼai apaipafiʼmo muki yaʼmo Afoʼamoʼmo avaleʼa oʼateʼnae. Muki vayaʼamogimo, Yesuʼa Kalaisi vekamo maiʼniye, huʼa aeʼa hakalo huʼa hapa nepaiya vayaʼai apaipafiʼmo muki yaʼmo Afoʼamoʼe Mafaʼneʼaʼeʼmo anavaleʼa anateʼnageʼana neʼmaiʼae.

²⁴ Ani gemo haneʼniyaʼmofeʼmo lapakaemo hogotetapa aepa faitapa afiʼnaya afinatetiʼmo afiʼnaya gemo lapaipafiʼmo alagi hanesiyafeʼmo atafauta alagi hiyo. Aepa faitapa afiʼnaya afinatetiʼmo afiʼnaya gemo lapaipafiʼmo alagi haneʼnisiyaʼmoʼmo Mafaʼneʼafiʼe Afoʼamopiʼeʼmo alagi maigae.

²⁵ Kalaisiʼa lapa maegauve, huno hu maleʼniya polomasi gemoʼa hunoʼaeʼmo, maige maige hutapa maisaya yaʼmo lapamiguve, huno laha paiʼniye.

²⁶ Nagaemo humi lapatesayafeʼmo nehaya vayaʼaifeʼmo apava gemo huʼna lapakaefeʼmo avoʼmo kaeʼnove.

²⁷ Humi lapatesayafeʼmo nehayaʼmonanafa Kalaisiʼa uvelimo lakino lapategekana huno Goti Aote Aunemeʼamo lapamiʼnigeno alagi maisiyafeʼmo lapaipafiʼmo maiʼniyaʼmofeʼmo mago vayaʼmogi aliʼa lapaya malesaya gemo ohaneʼniye. Goti Aunemeʼamoʼmo muki geʼamo ago alino lapaya maleʼniyaʼmofeʼmae. Ani gemo mago aigofe gemo ohaneʼnifa alagi lama gemo haneʼniye. Agaemo, Kalaisipiʼmo alagi maiyo, huno huteno alino lapaya maleʼniyanagetapa Kalaisipiʼmo alagi maigae.

²⁸ Aise mafaʼneʼnimogitapae, huʼna, Eminesigetaeʼmo lokiya vaita maiʼneta fala okisunageno aulagaleʼmo lavagage osisiyafeʼmo hemenimo agaepiʼmo alagi maigetao.

²⁹ Lapakaemo Gotiʼa alagepa kavaʼageʼmo nehiya vekae, hutapa ago afiʼnayaʼmofeʼmo agaemo alagepa kavaʼmo nehaya vayaʼmo hogoteno alino apateʼnigeʼa mafaʼneʼamo maiʼnae, hutapa afiʼnae.