1 Timoti 6 - The Keyagana NT and 25 OT books

Aliʼyaʼmo neʼaliya vayaʼaifeʼmo huʼniya gemae

¹ Kalavusi aliʼyaʼmo neʼaliya vayaʼmogi aliʼyaʼmo afoʼamo aiyafiʼmo maiʼneʼa geʼamo afisaya kavaʼmo huʼa maiʼnae. Geʼamo afigeʼapao Goti agiʼaleʼe alita apaya neʼmalona geleʼefeʼmo huʼa faipa huʼa oʼateyo.

² Aliʼyaʼmo afoʼamoʼmo agesamo afino fatago huʼnisiya vekamoʼmo maiʼnisiyana aliʼyaʼamo neʼaliya vayaʼmogimo huʼapaeʼmo, konagatimoʼmo maiʼniyaʼmofeʼmo geʼamo oʼafigune, huʼa osuʼa, lagaemo ha maesuna vekamo agesamo afino fatago huʼniya vekamo lahauʼniya vekamo maiʼniyaʼmofeʼmo geʼamo afigune, huʼa hisaya kavaʼmo haneʼniye. Ani kavaʼmo hiyo, huka hapa paiteka alika apaya malo.

Kagemi yafeʼmo huʼniya gemae

³ Ala kava netimo Yesu Kalaisi geʼamo alagepa gemo haneʼniyaʼmofeʼmo kaitaʼmo haugekana huno ohaneʼneno vayaʼmo alino alagepa huno neʼapateya gemo haneʼniye. Mago vekamoʼmo ani gelefeʼmo hunoʼaeʼmo, he, huno osuge Gotifeʼmo mono nehaya kavaʼmo alino afole aino neʼateya gemo oʼafige hutenoʼaeʼmo alu gemo alino apaya neʼmalesiyaʼmoʼmo

⁴ ala vekamo maiʼnove, huno agesamo neʼafiya vekamoʼmo maiʼneno magoke yafeʼmo agesamo noʼafiye. Agaemo geletiʼmo kaveta hisiyafeʼmo hauʼnigeno hosu apaipa kafa hapaege kaveta huge huʼa faipa huʼa apatege hosu apaipa kaliʼa apatege nehaya kavaʼmo afole neʼaiye.

⁵ Apaipa apakesamoʼmo kasaliʼniya yakana agufa apakesamo afiteʼa lama gemo oʼaliʼa ataleʼa alu ge alu gemo huteʼapaeʼmo afa gemo nehae. Mono kavatiletiʼmo akamelegamo magoʼe yaʼmo aligune, huʼa apakesamo neʼafiye. Ani agufa vayaʼmo maika halove huka apato.

⁶ Apakesamo neʼafiyaʼmonanafa mono kavaʼmo huteʼa magoʼe huʼa kagemi yaʼmo alisayafeʼmo hapaʼye osuʼnigeno apaipamoʼmo falu nehisiya vayaʼmogi akamelegaʼamo magoʼe huʼa alopa yaʼmo aligae.

⁷ Itatimogi aliʼa nelataya afinaʼmo mago yaʼmo aliʼnita afole noʼaune. Ani kavaʼmo huta ago afiʼnonana falisuna afinaʼmo mago kagemi yatiʼeʼmo alinita afaʼa oʼugune.

⁸ Neʼyatiʼe kukenatiʼeʼmo haneʼnisiyana laipamoʼmo falu hugiye.

⁹ Kagemi yaʼapiʼe vayaʼmo maisayafeʼmo hapauʼnisiya vayaʼmo apamalageka hisiya kateʼmo neʼvagenoʼaeʼmo hosu hapaʼye kavaʼapimoʼa aneʼaifiʼmo hegekana huno neʼapatafaigeʼa alagi asagauʼa neʼaiyanageʼa ata kopiʼmo uʼa lamiʼa maigae.

¹⁰ Monieʼmo hapaʼye nehiya kavaʼmoʼa muki alu hosu alu hosu kavaʼmo aepaʼamo haneʼniye. Mago vayaʼmo magoʼe monimo alisayafeʼmo hapaʼye huʼnigeʼapaeʼmo lagesamo afita fatago nehuna gemo ataleʼnageno asole hanageke kavaʼmoʼa apaipafiʼmo hapaeʼnigeʼa asole kana yaʼmo aliʼnae.

¹¹ Apakafu nekiyaʼmonanafa kagaemo Goti vekamogae, huʼna, ani kavategatiʼmo ataleka kaune heka fatago kavanagi mono kavanagi kahau kayamopafiʼmo kahauʼniya kavanagi atafauka alagi hisana kavanagi yagu yaga kaipa kali kavanagi huka atafauka alagi hisanafeʼmo vegala ao.

¹² Kagaemo alagepa kamemo apakesamo afiʼa fatago nehaya vayaʼmogi nehaya agufa kamemo huvo. Maige maige huka maisanafeʼmo keya aeno ge huʼniyanagi ani kavateʼmo atafauka alagi huka maiyo. Keya aeno ge huʼnigekaeʼmo kagaemo muki afiʼnaya vayaʼai apaulagaleʼmo hukaeʼmo, Yesufeʼmo nagesamo afiʼna fatago huʼnove, huka alagepa gemo ago hapa paiʼnane.

¹³ Nagaemo afaʼa neʼmaiya yaʼmo neʼapamiya Goti aulagaleʼe Kalaisi Yesuʼa Ponitiyasi Pailati aulagaleʼmo alagepa gemo huteno faliʼniya vekamo aulagaleʼeʼmo maiʼneʼnaeʼmo kaha nepauve.

¹⁴ Nagaemo, huvo, huʼna kaha paiʼnova gemo afiteka magoke vaiʼmo afaʼa oʼalisanafeʼmo alagi akame hume hume neʼugenoʼao Ala kava netimo Yesu Kalaisiʼa afole aino.

¹⁵ Gotiʼa lekana pai maleʼniya afinaʼmo afole aisigenoʼaeʼmo Yesuʼmo afole aigiye. Aliʼa auleʼa neʼataya Gotiʼa Yesuʼmo alino apave ligiye. Gotiʼa magoke himamuʼaʼe vekamo maige yagaiʼa neʼapataya kini vayaʼaiteʼmo yagaino apatege kava vayaʼai kava vekaʼapimo maige huʼniye.

¹⁶ Agaiʼamo ofalino maiʼneno afaʼa neʼmaiya yaʼmo afoʼamoʼmo maiʼneno ha le yategamo maiʼniyanageʼa vayaʼmo alagi oʼvisaya agufa ha le yategamo maiʼniye. Muki vayaʼmogi oʼageʼnayanageʼa afaʼa oʼagegae. Ala agiʼamo amisageno himamuʼaletiʼmo muki afinaʼmo yagaige yagaige huno yagaino maino. He, lama ge.

Kagemi yaʼapimo haneʼniya vayaʼaifeʼmo hapa paisiya gemo ha paiʼniya gemae

¹⁷ Ma mopafi kagemi yaʼapimo haneʼniya vayaʼaifeʼmo hukaeʼmo, lapakufamo avalelita ohaitapa hano hisiya moniʼeʼmo alita amufa oʼamitapa muki yaʼamo lamogaga aisunafeʼmo nelamiya vekamo afaʼa maiʼniya Gotifeʼmo alitapa amufa amiyo, huka hapa paiyo.

¹⁸ Kagemi yaʼapiʼe vayaʼmo asole alagepa kavaʼmo kagemi yaʼapigana huʼa malesayafeʼmo alagepa kavaʼmo nehuʼapaeʼmo fikumo apamige kagemi yaʼapimo fako huʼa apamisayafeʼmo hapauge huʼa maiyo.

¹⁹ Ani kavaʼmo nehisayana alagepa yaʼapimo henagaʼamo hapa maesiya afinafeʼmo neʼmalayanageʼa maige maige huʼa maisaya yaʼapimo aligae.

²⁰ Timotiyo, huʼna, Gotiʼa yagaika atesanafeʼmo alagepa faigoko geʼamo kamiʼniya geʼaleʼmo alagepa huka yagaika ato. Mago vayaʼmogimo Gotifeʼmo mono osuʼa afa geletiʼmo Goti geʼaleʼmo huʼa aeʼa ati nekae. Mani geeʼmo ageteʼa afiʼnaya gemae, huʼa nehayaʼmonanafa aigofe geʼapimo haneʼniye.

²¹ Apakaemo huʼapaeʼmo, mani gemo akame nehune, huʼa nehaya geletiʼmo lagesamo afita fatago nehuna gemo atale uʼeʼa huʼa maiʼnae. Ani kavatefeʼmo maika halove huka maiyo. Gotiʼa fikumo lapa maeno lapamino. He, lama ge.