1 Timoti 5 - The Keyagana NT and 25 OT books

Muki vayaʼaitegamo hisiya kavafeʼmo ha paiʼniya gemae

¹ Kagaemo alopa vayaʼaifeʼmo lokiya gemo osuka afokamofeʼmo ha nepaina agufa gemo huka hapa paiteka alika api aika apato. Konagakamogifeʼmo hapa nepaina agufa gemo huka neya vayaʼaifeʼmo hapa paiteka alika api aika apato.

² Itakamofeʼmo ha nepaina agufa gemo huka alopa aʼne anagaʼaifeʼmo hapa paiyo. Kasakamogifeʼmo hapa nepaina agufa gemo huka venemo aʼne anagaʼaifeʼmo alagepa kaipamo kaliʼneka hapa paiyo.

Kogu aʼne anagaʼaitegamo hisaya kavafeʼmo huʼniya gemae

³ Kogu aʼne anagaʼmo yagaiʼa apatesaya vayaʼmo oʼmaiʼnisayana siosi vayaʼmogimo alagepa huʼa yagaiʼa apategae.

⁴ Ani kogu aʼne anagaʼmogi mafaʼneʼapimo maige apakioʼapimogi maige huʼnisayana afaʼa yagaiʼa apategae. Kogu aʼne anagaʼmogi itaʼapi afoʼapimogimo anonaʼapilefeʼmo Gotitefeʼmo mono kavaʼmo huʼa yagaiʼa apategae. Gotiʼa ani kavafeʼmo hauʼnigenoʼaeʼmo, alagepa kavaʼmo haneʼniye, huno nehiye.

⁵ Apakaiʼapigeʼmo maiʼnisaya kogu aʼne anagaʼmogimo Gotifeʼmo aliʼa amufa amiteʼapaeʼmo nunumuʼmo huʼa apatege felugaʼe haniʼilagaʼeʼmo nunumuʼmo huge huʼa neʼmaiye.

⁶ Neʼmaiyaʼmonanafa apakufamoʼmo hauʼniya kavaʼmo nehaya kogu aʼnemogimo afaʼa maiʼneʼapaeʼmo falisaya kavategamo neʼmaiye.

⁷ Vaiʼmo oʼalisayafeʼmo kaha paiʼnova kavaʼmo hiyo, huka hapa paiyo.

⁸ Mago vayaʼmogi konagaʼapimogiteʼmo alagepa huʼa noʼyagaisayana hosu kavaʼmo nehayaʼmonanafa afamo anagaʼapileʼmo yagaiʼa noʼapatesayana magoʼe huʼa hosu kavaʼmo nehae. Ani kavaʼmo nehisaya vayaʼmo mono gemo ataleʼa apakesamo afiʼa fatago nosaya vayaʼmo magoʼe huʼa aeʼa apakaseʼa alagi hosu vayaʼmo maiʼnae.

⁹ Magoke vekaleʼmo maiʼneʼapaeʼmo sigisitiʼa kafugamo aeʼa agaseʼa maiʼnisaya kogu aʼne anagaʼmogi apakiʼapimo avoʼmo kae maleyo.

¹⁰ Apakaefeʼmo, alagepa kavaʼmo nehae, huʼa hisageʼa maiʼneʼa mafaʼneʼapileʼmo yagaiʼa apatege nata vayaʼaiteʼmo yagaiʼa apatege apaote vayaʼai apaiyamo sese huʼa apatege kana yaʼmo aliʼnisaya vayaʼmo hapa maege muki alagepa kavatefeʼmo apayamukiki huge nehisaya kogu aʼne anagaʼmogi apakiʼapimo avoʼmo kaeyo, Siosi vayaʼmogi yagaiʼa apategaiyanagi.

¹¹ Saufa kogu aʼnemogi apakiʼapimo avoʼmo okaeyo. Apakaemo veleʼmo maisaya kavafeʼmo apakesamo afisayaʼmoʼmo Kalaisiʼmo apakameʼyamo amigae.

¹² Kalaisifeʼmo huʼapaeʼmo, ani kavaʼmo hugune, huʼa ha paiʼnaya gemo amagiʼa atalesagenoʼaeʼmo vaiʼmo apamigiye.

¹³ Magoʼe huʼa hosu kavaʼmo huʼa aliʼyaʼmo oʼaliʼa alu nopi alu nopiʼmo uʼeʼa nehuʼapaeʼmo hosu faigoko gemo hulitata huge himuʼnamu kavaʼmo huge nagaekeʼmo ageteʼna afiʼnove, huʼa huge osisaya agufa gemo afaʼa huge nehae.

¹⁴ Ani agufa kavaʼmo hugayaʼmofeʼmo saufa kogu aʼnemogimo halate uʼa veleʼmo maiʼneʼa mafaʼnemo aliʼa apateteʼa noʼapifi yateʼmo yagaisayafeʼmo nahauʼniye. Ani kavaʼmo hisageʼapaeʼmo kame vayatimogimo huʼa faipa huʼa latesaya kaʼmo oʼagegae.

¹⁵ Mani gemo avoʼmo okaeʼnogeʼapaeʼmo hogoteʼa mago kogu aʼne anagaʼmogi malage huʼa alagepa kaʼmo ago atale uʼa Satani akame huʼnae.

¹⁶ Mago apakesamo afiʼa fatago nehaya vayapatiʼmo mago kogu aʼnemo maiʼnisayana ani vayapatiʼmo mago vekamomofi a kanomomofi huno afaʼa yagaino atesiya kavaʼmo haneʼniye. Siosi vayaʼmogimo agaiʼageʼmo maiʼnisiya kogu a kanoleʼmo yagaiʼa atege mago alu kogu aʼne anagaʼaiteʼmo yagaiʼa apatege huʼnisayana ani kogu aʼnemogimo kana yaʼmo afaʼa oʼaligae.

Vayatama vayaʼaitegamo hisaya kavafeʼmo huʼniya gemae

¹⁷ Yagaiʼa neʼapataya vayatama vayaʼmogi alagepa aliʼyaʼmo alisayana siosi vayaʼmogi hapao ke heteʼa alagepa miyaʼapimo apamisaya kavaʼmo huʼnae, huʼa hugae. Goti geʼamo aeʼa hakalo huʼa aliʼa apaya neʼmalaya vayatama vayaʼmo hogoteʼa miyaʼapimo afaʼa apamigae.

¹⁸ Goti mukufiʼmo avoʼmo kae maleʼniya gemoʼa hunoʼaeʼmo, pulumakamogimo viti alagamo haletiʼyaʼamo apaiyaletiʼmo aeʼa nehaleʼapaeʼmo ani neʼyapatiʼmo oʼnesayafeʼmo apavayaleʼmo nofiʼmo kitapa oʼapateyo, huno huteno magoʼe gemo hunoʼaeʼmo, aliʼyaʼmo neʼaliya vayaʼmo miyaʼapimo alisaya kavaʼmo huʼa maiʼnae, huno huʼniye.

¹⁹ Magoke vekamoʼmo yagaino neʼapateya vayatama vekaeʼmo, hosu kavaʼmo nehiye, huno hisiya gemo oʼafiyo. Lole vekalaʼmoganimofi loleʼe magoʼe vayaʼmogimofi huʼa eʼa hisaya gegeʼmo afiyo.

²⁰ Kagaemo muki vayaʼai apaulagaleʼmo hosu kavaʼmo hisiya vayatama vekaeʼmo, hosu kavaʼmo huʼnane, huka ha paigeʼapao muki vayatama vayaʼmogimo afiteʼa koli hiyo.

²¹ Nagaemo Goti aulagalenagi Ala kava netimo Yesu Kalaisi aulagalenagi Gotiʼa lekana paino apateʼniya enisole vayaʼai apaulagalenagi huʼna kaha paiʼnaeʼmo, mani kavaʼmo huka alika fako huka apatesanafeʼmo hukaeʼmo fiku alika fako huka oʼapateka hogoteka ani gemo aepaʼamo afitekaeʼmo mago vayaʼaitegaʼe alu vayaʼaitegaʼeʼmo lole agufa kavaʼmo osuka magoke aiyaya kavakeʼmo huka alika fako huka apato, huʼna kaha nepauve.

²² Siosi vayaʼaiteʼmo yagaiʼa apatesaya vayaʼmo lekana paika apateteka apakaeteʼmo malage huka kayaʼmo maleka oʼapato. Fiku yanageno lekana paika ateʼnisana vekamo hosu kavaʼamoʼmo kagaeteʼmo aino kamaesigeka kagaemo vaiʼmo aligane. Kaotekeʼmo maiteka alagepa huka maiyo.

²³ Kagaemo kaipa kagafuʼmo kige kaitaʼmo kahauge nehigekaeʼmo anilafaʼageʼmo oʼneka nofi alagafati aniʼmo aiseʼamo lakiteka no.

²⁴ Mago vayaʼai hosu kavaʼapimo hogoteno afole aiʼnigeʼa ageteʼapaeʼmo aliʼa fako huʼa neʼapatayaʼmonanafa mago vayaʼai hosu kavaʼapimo aliʼa fako huʼa neʼapataya afinaʼmo henagaʼamo afole neʼaiye.

²⁵ Ani kava huno mago vayaʼai alagepa kavaʼapimo vayaʼai apaulagaleʼmo haneʼniyaʼmonanafa oʼageʼnaya alagepa kavaʼapimo alagi fala kino ohaneno afole aisigeʼa agegae.