1 Timoti 4 - The Keyagana NT and 25 OT books

Henagaʼamo hosu gemo aliʼa apaya malesaya vayaʼaifeʼmo huʼniya gemae

¹ Goti Aunemeʼamoʼmo hunoʼaeʼmo, henagaʼamo mago vayaʼmogi hosu apaune vayaʼai gemo afige hosu enisole vayaʼmogi aliʼa apaya malesaya gemo afige huteʼa siosi vayaʼmogi apakesamo afiʼa fatago nehaya gemo ataleʼa ugae, huno huʼniye.

² Apavayaletiʼmo aigofe gemo hugayaʼmonanafa apakupi mafaʼnemo faliʼnegekana huno maiʼniye.

³ Apakaemo, aʼmo oʼalige veleʼmo oʼmaige neʼyaʼmo mosige hiyo, huʼa aliʼa apaya malegae. Gotiʼa apakesamo afiʼa fatago huge lama geʼamo afiʼa aeto huge nehisaya vayaʼmogimo neʼyaʼmo aliʼneʼa agaefekeʼmo hao ke heteʼa nesayafeʼmo muki neʼyaʼamo alo hu maleʼniye.

⁴ Muki alo huʼniya yaʼamo alagepa yaʼageʼmo haneʼniyanageta lagaemo alita atalesuna yaʼmo ohaneʼnifa aliʼnetaeʼmo Gotifeʼmo hao ke heteta nesuna yaʼmo haneʼniye.

⁵ Gotiʼa hunoʼaeʼmo, afaʼa negae, huno huʼniyanageta nunumuʼmo huteta afaʼa negaune.

Timotifeʼmo alagepa huka aliʼyaʼmo aliyo, huno ha paiʼniya gemae

⁶ Kagaemo konagatimogifeʼmo ani kavafeʼmo alika apaya malesanana Yesu Kalaisi alagepa aliʼyaʼamo neʼalina vekamo maigane. Lagesamo afita fatago nehuna gemo alagepa huka akame huʼnana gemo neʼyaʼmo negekana huka nesanagenoʼaeʼmo lokiya vaino kategaiye.

⁷ Kategaiyaʼmonanafa ma mopafi gemo aote ohaneʼniya gemo anekalo aʼnemogi kaitene gemo oʼafika yokalo leʼa aeʼa apakasesayafeʼmo teleninimo nehaya kava huka Gotifeʼmo alagepa huka mono hisanafeʼmo teleninimo huvo.

⁸ Apakufaletiʼmo teleninimo nehaya kavaʼmoʼmo aiseʼamo hapa maegaiyaʼmonanafa mono kavaʼmoʼa muki alagepa kavatefeʼmo laha maegaiye. Gotiʼa hunoʼaeʼmo, alagepa mono nehaya kavaʼmoʼa afaʼa maisaya kavatefeʼmo hemeniʼe afole aisiya afinaʼeʼmo lapa maegaiye, huno polomasi gemo huʼniye.

⁹ Mani nehuna geeʼmo lama gemo apakesamo afiʼa fatago huteʼa alisaya gemo haneʼniye.

¹⁰ Ani gelefeʼmo aliʼyaʼmo neʼalune. Gotiʼa muki vayaʼmo hapa neʼmaeyaʼmonanafa apakesamo afiʼa fatago nehaya vayaʼai apakufamo alino katino apateteno hapau neʼvaiya vekaeʼmo alita amufa amiʼnonaʼmofeʼmo huʼa faipa huʼa nelatagetaeʼmo aliʼyaʼamo neʼalune.

¹¹ Ani kavaʼmo hiyo, huka huge alika apaya malege hiyo.

¹² Kagaemo apakesamo afiʼa fatago nehaya vayaʼmogi kakame hisayafeʼmo alagepa gemo huge alagepa kavaʼmo huge kahau kayamopafiʼmo kahauge kayamukiki huge alagepa huka kagesamo afika fatago huge yaveyave kavaʼmo huge huka maigeʼapao afa neya vekamo maiʼniye, huʼa osiyo.

¹³ Kagaemo Goti geʼamo alagepa huʼa lekana paige ani kavaʼmo hiyo, huʼa aeʼa hakalo huʼa hapa paige aliʼa apaya malege hisayafeʼmo yagaika apateme apateme neʼugeʼna egauve.

¹⁴ Yagaiʼa neʼapataya vayatama vayaʼmogi kagaeteʼmo apayaʼmo maleʼa kateteʼa Gotitegatiʼmo aliʼnaya geletiʼmo aliʼyaʼamo alisanafeʼmo lokiyaʼamo kamiʼnae. Fiku yanageno kamiʼnaya yaʼmo afaʼa hanegaiyanagi kamiʼnaya yatetiʼmo aliʼyaʼmo aliyo.

¹⁵ Ani kavatefeʼmo kagesamo afifi huka maiʼnekaeʼmo lokiya vaika aliʼyaʼmo aligeʼa alagepa kavakamoʼmo kosime kosime neʼviya kavakamo mukiʼamogimo ageyo.

¹⁶ Kagaikaleʼmo alagepa huka yagaiʼneka alika apaya neʼmalana kavateʼmo yagaiyo. Yagaime yagaime neʼukaeʼmo kagaika kagufamo alika katika kateteka gekamo neʼafiya vayaʼai apakufamo alika katika apategane.