1 Timoti 3 - The Keyagana NT and 25 OT books

Vayatama vayaʼaifeʼmo huʼniya gemae

¹ Mani gemo lama gemo haneʼniyana mago vekamoʼmo siosi vayaʼaiteʼmo yagaisuva vayatama vekamo maigesuve, huno hisiyaʼmoʼmo alagepa aliʼyafeʼmo hauʼniye.

² Ani vayatama vekamo vaiʼmo noʼamisageno afaʼa neʼmaisiya vekamoʼmo magoke aʼmo aliʼnisiya vekamokeʼmo maigiye. Agufaleʼmo alagepa huno yagaino atege aipa agesaleʼmo alagepa huno yagaino atege alagepa kavaʼmo huge nata vayaʼaiteʼmo alagepa huno yagaino apatege afaʼa alino apaya malege nehiya vekamokeʼmo maigiye.

³ Lusi aniʼmo neteno negi nagi osuge kaveta osuge monieʼmo haʼye osuge huteno yagu yaga huno maige ge neʼvaiya kavafeʼmo ohauge ma mopafi yafeʼmo lusi kava huno ohauge hisiya vekamoʼmo maigiye.

⁴ Agaemo afamo anagaʼaleʼmo alagepa huno yagaino apateteno mafaʼneʼamo muki kavatefeʼmo alagepa kavatetiʼmo alino aiyafiʼmo apatesiya kavaʼmo haneʼniye.

⁵ Mago vekamoʼmo afamo anagaʼaleʼmo alagepa huno yagaino apatesiyafeʼmo oʼageʼnisiyana haiya kava huno Goti siosi vayaʼaleʼmo yagaino apategaiye.

⁶ Saufamo Goti mafaʼnemo hamaleʼnisiya vekamoʼmo vayatama vekamo oʼmaigiye. Sataniʼa himuʼnamu agesamo afiʼnigenoʼaeʼmo Gotiʼa hunoʼaeʼmo, hosu kagesamo afiʼnane, huno huʼniya agufa gemo huno saufamo agesamo afino fatago huʼnisiya Goti mafaʼnemoʼmo agufamo avalelino nehaisigenoʼaeʼmo Gotiʼa, hosu kavaʼmo huʼnane, huno hugiye.

⁷ Malaga vayaʼmogiʼeʼmo huʼapaeʼmo, alagepa vekamo maiʼniye, huʼa hisageno neʼmaisiya vekamo maigiye. Fiku yanageno hosu agiʼamo amisageno Satani aneʼaifiʼmo hegekana huno atafaugiye.

Nikeni vayaʼaifeʼmo huʼniya gemae

⁸ Ani kavaʼmo huʼa mono aliʼyaʼmo neʼaliya nikeni vayaʼmogimo alagepa huʼa neʼyagaiya yahauve vayaʼmo maigae. Lole gemo osuno magoke gemo huteno lusi aniʼmo neteno negi nagi osuno monieʼmo haʼye nosisiya vekamoʼmo maigiye.

⁹ Alagepa huno agupi mafaʼnemo maiʼninageno lagesamo afita fatago nehuna gemo hogoteno alino fala ki maleʼneno henagaʼamo ago alino lave liʼnigeta ageʼnona geleʼmo atafauno alagi huʼneno akame nehisiya vekamo maigiye.

¹⁰ Ani kavaʼmo huʼa hogoteʼa amalageka huʼa agesagenoʼaeʼmo alagepa kavaʼmo nehisiya vekamo nikeni aliʼyaʼmo alino.

¹¹ Ani kavaʼmo huno aʼamoʼmo alagepa huno yagaisiya agufa a kanogeʼmo maigiye. Hosu faigoko gemo osuno agufaleʼmo alagepa huno yagaino atege muki kavatefeʼmo alagepa kavaʼmo huge nehisiya a kanomoʼmo maigiye.

¹² Nikeni aliʼyaʼmo aligefe hisiya vekamo magoke a kanomo aliʼnisiya vekamoʼmo maigiye. Agaemo aʼne mafaʼneʼaleʼmo alagepa huno yagaino neʼapatesiya vekamoʼmo maigiye.

¹³ Alagepa nikeni aliʼyaʼmo alisiyana ala agimo aliteno agesamo afino fatago nehuno lokiya vaino maigiye.

Mono gemo aepaʼaeʼmo huʼniya gemae

¹⁴ Aise afinaʼmo maiteʼna kagaetegamo visuvafeʼmo nahauʼniye.

¹⁵ Aise afinaʼmo maigeʼna oʼvisugekaeʼmo Goti nopiʼmo maiʼnekaeʼmo hisana kavaʼmo agesanafeʼmo mani gemo avoʼmo nekaove. Ani noʼmo afaʼa neʼmaiya Goti siosiʼamo haneʼnigeno lama geʼamoʼmo hanege hanege huno hanesiyafeʼmo noʼmo posilekeʼmo nehaneya kava huno lama geʼamo siosiʼaleʼmo haneʼniye.

¹⁶ Mono kavatimo hogote kavaʼmo alopa kavaʼmo haneʼnigeno alino fala ki maleʼneno alino lave liʼnigeta ani mono kavaʼmo nehune. Mani geeʼmo hutaeʼmo, Gotiʼa agufamo aliteno vayaʼai apaulagaleʼmo afole aiʼniye. Goti Aunemeʼamoʼmo hunoʼaeʼmo, fatago vekamae, huno huʼniye. Enisole vayaʼmogi ageʼnae. Alu nofi vaya alu nofi vayaʼaifeʼmo agaefeʼmo alagepa faigoko geʼamo aeʼa hakalo huʼa hapa paiʼnae. Ma mopafi vayaʼmogimo agaefeʼmo apakesamo afiʼa fatago huʼnae. Gotiʼa avalelino uno haino kokuʼnapi ateʼnigeno maiʼniye, huta nehune.