1 Timoti 2 - The Keyagana NT and 25 OT books

Nunumuʼmo hisaya kavafeʼmo huʼniya gemae

¹ Nagaemo huʼnaeʼmo, Goti vayaʼamogimo hogoteʼa muki vayaʼaifeʼmo Gotifekeʼmo ge huʼa afige nunumuʼmo huge nunumuʼmo huʼa apatege hao ke hege huʼa maiyo, huʼna lokiya gefatiʼmo nehuve.

² Gamani vayaʼe muki yagaiʼa neʼapataya vayaʼefeʼmo nunumuʼmo huta apategetao alagepa huta magokepi lokaeta maiʼneta Gotifeʼmo mono nehuta muki vayaʼaitegamo fatago kavaʼmo hugunanagi.

³ Lagufamo alino katino nelateya Gotiʼa ani kavafeʼmo hauʼnigenoʼaeʼmo kanale kavaʼmo haneʼniye, huno nehiye.

⁴ Agaemo muki vayaʼai apakufamo alino katino apatesigeʼa lama geʼamo afiʼa aeto hisayafeʼmo hauʼniye.

⁵ Gotiʼa magoke vekamo maiʼnigeta lagaemo maiʼnonanageno agaeʼeʼmo magokepi lokaeta maisunafeʼmo ani magoke vekamo folagapi vekamoʼmo Kalaisi Yesuʼa vayaʼmo maiʼniye.

⁶ Agaemo muki vayaʼmo miya faino hatu maeno apatesiyafeʼmo agaiʼa agufamo Gotina amiʼnigeʼapaeʼmo Gotiʼa lekana pai maleʼniya afinaʼmo geʼamo aeʼa hakalo huʼa hapa paigae.

⁷ Ani kavatefeʼmo lekana paino nateʼnigeʼna geʼamo aeʼna hakalo huʼna hapa nepauva vekamoʼmo maiʼneʼna apa vekaʼamoʼnamo alu nofi vayaʼmogimo apakesamo afiʼa fatago hisayafeʼmo lama geʼamo aliʼna apaya neʼmalova vekamo maiʼnove. Aigofe gemo nosufa alagi lama gemo nehuve.

⁸ Nahauʼniyanageʼa muki ve anagaʼmogimo lole apakesamo oʼafiʼneʼa apaote kavaʼmo huʼa apaipamo neleya kavaʼmo ataleʼa alagepa huʼa maiʼneʼa muki haopalegamo maiʼneʼapaeʼmo nunumuʼmo hugae.

Aʼne anagaʼaifeʼmo huʼniya gemae

^9-10 Ani kavafeʼmo nahauʼniyanageʼa aʼnemogimo vayaʼmogi apakesayafeʼmo kukena yaʼapimo oʼvaiʼa alagepa huʼa apakesamo afiteʼa kukenamo vaigae. Apayokapiʼmo konali alige apakufaleʼmo konali alige lusi moniletiʼmo miya nefaiya kukena yaʼmo aliʼa vaige osugayaʼmonanafa Goti mafaʼnemo maiʼnone, huʼa nehayaʼmofeʼmo alagepa kavaʼmo nehaya aʼne anagaʼmogi vaisaya kukena yaʼmo vaigae.

¹¹ Aʼnemogi Goti gemo afiteʼapaeʼmo ge osuʼa mono vayaʼai apaiyafiʼmo maigae.

¹² Nagaemo aʼnemogi aliʼa apaya malege ve anagaʼaiteʼmo yagaiʼa apatege hisayafeʼmo aliʼna oʼapateʼnovanageʼa ge osuʼa afaʼa maigae.

¹³ Gotiʼa hogoteno Atamuʼmo alo huteno Iviʼmo alo huno ateʼniyaʼmofeʼmae.

¹⁴ Sataniʼmo Atamuʼa humi oʼateʼnifa Ivikeʼmo humi ateʼnigeno Goti keʼaepa geʼamo ago amagino ataleʼniye.

¹⁵ Amagino ataleʼniyaʼmofeʼmo aʼnemogi apakesamo afiʼa fatago huge hapau apayamopafiʼmo hapauge apaote kavaʼmo huge vayaʼmogi apakesayafeʼmo apamoʼya aige huʼa maime maime neʼvisagenoʼaeʼmo Gotiʼa mafaʼneʼamo alino ateʼnigeno emineʼniya kavatetiʼmo apakufamo alino katino apateteno hapau vaigiye.