1 Timoti 1 - The Keyagana NT and 25 OT books1 Nagaemo Poloʼnamo Yesu Kalaisi apa vekaʼamo maiʼnove. Lagufamo alino katino nelateya vekamo Gotiʼe lavayagunagu huta agava neʼmauna vekatimo Ala kava neʼmo Yesu Kalaisiʼeʼmo, apa vekatiʼamo maiyo, huʼana naha paiteʼana lekana paiʼana nateʼnaʼae. 2 Kagesamo afika fatago nehana mafaʼneʼnimo lama ge Goti mafaʼneʼamo Timotigaeʼmo mani avoʼmo nekaove. Afotimo Gotiʼe Ala kava neʼmo Yesu Kalaisiʼeʼmo fikumo kaha maeʼana kamiteʼana hanau huʼana katesaʼageno kaipamoʼmo falu hino. Hosu gemo nehaya vayaʼaifeʼmo, ge osuta afaʼa maiyo, huka hapa paiyo, huno ha paiʼniya gemae 3 Nagaemo Masetoniya kotegamo visuvafeʼmo huʼnaeʼmo, Efasasi taonifiʼmo maiʼneka mago hosu gemo nehaya vayaʼaifeʼmo, alu gemo alita apaya oʼmaleyo, huka hapa paiyo. 4 Kaitene geʼe lapakinago vayaʼmogi apakiʼapilefeʼmo apava gemo huliʼa neʼvaya agufa geʼeʼmo lapakesamo alaʼamo oʼafiyo, huka hapa paiyo, huʼna ago kaha paiʼnovanageʼna hemeniʼeʼmo halate magoʼe gemo huʼna kaha nepauve. Ani agufa gemoʼmo Gotifeʼmo alagepa huʼa mono hisayafeʼmo lokiya vaino noʼapatefa geletiʼmo kaveta hisaya kavakeʼmo alino afole aino neʼate. 5 Kagaemo hapa paisanageʼa afiteʼapaeʼmo hapau apayamopafiʼmo hapausiyafeʼmo hapa paiyo, huʼna ago kaha paiʼnove. Inagi hapau apayamopafiʼmo nehapaiya kavaʼmo yaveyave apaipafatiʼmo afole aige alagepa huno alino fako huno neʼapateya apakupi mafaʼnefatiʼmo afole aige lama ge huʼa apakesamo afiʼa fatago nehaya kavatetiʼmo afole aige nehiye. 6 Magoʼamogimo ani alagepa kaʼmo ago atale uʼa afa gelefeʼmo ge huge afige huteʼa afa kavatefekeʼmo mono nehae. 7 Apakaiʼapimo Goti keʼaepa geʼamo aliʼa apaya neʼmalaya vayaʼmo maisayafeʼmo hapauʼniye. Apakaemo lokiya gemo nehayaʼmonanafa apakaiʼapimo nehaya gemo aepaʼamo alagepa huʼa oʼafiʼneʼa na agufa gemo nehupi, huʼa noʼafiye. 8 Lagaemo ago afiʼnonana vayaʼmogi Goti keʼaepa geʼamo alagepa huʼa aliʼa apaya neʼmalesayana alagepa gemo haneʼniye, huta afiʼnone. 9 Afiʼnonaʼmonanafa Gotiʼa fatago vayaʼaitefeʼmo keʼaepa geʼamo osuʼnifa hosu kavaʼmo nehaya vayaʼaitefekeʼmo hu maleʼniye. Keʼaepa gemo amagiʼa ataleteʼa noʼafiya vayaʼaitefenagi mono osuʼa hosu kavaʼmo nehaya vayaʼaitefenagi apaote kavaʼmo osuʼa ma mopafi kavaʼmo akame nehaya vayaʼaitefenagi itaʼapi afoʼapimogi kamitimo neʼapamagiya vayaʼaitefenagi vayaʼmo nehapaya vayaʼaitefenagi huno hu maleʼniye. 10 Kumai kavaʼmo nehaya vayaʼaitefenagi vemogi ve apafalugi neʼaliya vayaʼaitefenagi vayaʼmo kumayaʼmo neʼapavalaya vayaʼaitefenagi aigofe gemo nehaya vayaʼaitefenagi apagoʼyamo ataleteʼa aigofe gemo nehaya vayaʼaitefenagi huno hu maleʼniye. Inagi mani hosu kavatefenagi muki alu hosu kava alu hosu kavatefenagi huno hu maleʼniye. Kaitaʼmo haugekana gemo ohaneʼneno vayaʼmo alino hapageno neʼapateya geʼamo ago amagiʼa neʼatalaya kavateʼefeʼmo hu maleʼniye. 11 Mani gemo alagepa faigoko gemo haneʼniyana aliʼa auleʼa neʼataya Goti geʼamo ha le konali faigoko geʼamo haneʼniye. Gotiʼa mani geleʼmo yagaiʼna atesuvafeʼmo namiʼnigeʼna alinineʼna aeʼna hakalo huʼna hapa nepauve. Poloʼa Gotifeʼmo amuse huno ateʼniya gemae 12 Ala kava netimo Kalaisi Yesuʼa nagaefeʼmo agesamo afinoʼaeʼmo, aliʼyaʼnimo oʼataleno muki afinaʼmo alagepa huno aliʼyaʼmo aligiye, huno huteno lokiya vaino nateteno aliʼyaʼaleʼmo navaleno nateʼniyaʼmofeʼmo hao ke nehove. 13 Hogoteʼna Yesufeʼmo huʼna faipa huʼna atege vayaʼaeʼmo naini huʼna apatege kamemo huʼna apatege huʼna maiʼnovaʼmonanafa hau huno nateʼniye. Alagepa huʼna oʼafige nagesamo afiʼna fatago osuge huʼnovaʼmofeʼmo hau huno nateʼniye. 14 Ala kava netimoʼa lusi kava huno fikumo naha maeno namiʼnigeʼna Kalaisi Yesupiʼmo maiʼneʼnaeʼmo nagesamo afiʼna fatago nehuʼnaeʼmo nahau nayamopafiʼmo nahauʼniye. 15 Mani lama geeʼmo apakesamo afiʼa fatago huteʼa alisaya gemo haneʼniyana Kalaisi Yesuʼa hosu vayaʼai apakufamo alino katino apateteno hapau vaisiyafeʼmo ma mopafiʼmo emineʼniye, huta nehune. Inagi nagaemo hosu kavaʼmo nehaya vayaʼmo magoʼe huʼna ago aeʼna apakaseʼna hogote hosu vekamo maiʼnove. 16 Maiʼnovaʼmonanafa Yesu Kalaisiʼa maige maige huʼa maisaya yaʼmo alisayafeʼmo apakesamo afiʼa fatago hisaya vayaʼmo hogoteno nagaemo nageno nataleʼniya kavaʼamo alino apave lisiyafeʼmo hau huno nateʼniye. Alino apave lisigeʼa ageteʼapaeʼmo, alagi hosu vekaleʼmo huʼniya agufa alagepa kavaʼmo lagaeteʼeʼmo afaʼa hugiye, huʼa apakesamo afisayafeʼmo hau huno nateʼniye. 17 Ala kini vekamo ofalino maige maige huno neʼmaiya vekamo noʼagona vekamo agaiʼageʼmo ageteno afiʼniya vekamo ala agiʼaʼe ha le konali yaʼaʼeʼmo muki afinaʼmo hanege hanege huno haneno. He, lama ge. Lokiya vaika kame huka apato, huno ha paiʼniya gemae 18 Mafaʼneʼnimo Timotiyo, huʼna, Hogoteʼa mago vayaʼmogi Gotitegati gemo alini eʼa aeʼa hakalo huʼa hapa nepaiya vayaʼmogi kagaefeʼmo ge huʼnae. Geʼapilefeʼmo huʼnaeʼmo, Geʼapiletiʼmo lokiya vaika alagepa kamemo huka apato. 19 Kamemo nehukaeʼmo kagesamo afika fatago huteka kagupi mafaʼnemo geʼamo afiyo. Mago vayaʼai apakupi mafaʼnemoʼmo, hosu kavaʼmo nehae, huno nehigeʼapaeʼmo noʼafigenoʼaeʼmo apakesamo afiʼa fatago huʼnaya kavaʼapimo alagi alino atagaeno neʼatale. 20 Ani agufa kavaʼmo Haimeniyasiʼe Alekasanaʼeʼmo huʼana maiʼnaʼae. Afiteʼana Goti agiʼaleʼmo huʼana faipa huʼana oʼatesaʼafeʼmo Satani ayapiʼmo aliʼna anateʼnove. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.