1 Tesaloniyani 5 - The Keyagana NT and 25 OT books

Ala kava neʼmo eminesiyaʼaeʼmo alo huta maigetao, huno huʼniya gemae

¹ Konagatimogitapae, huta, hainu afinaʼmo afole aisifi hainu afinaʼmo eminesifi huta ani kavafeʼmo avoʼmo kaesuna gemo alagi ohaneʼniye. Lapakaemo ago afiʼnayaʼmofeʼmae.

² Ago afiʼnayana kava noʼyagaiya haniʼilagamo kumaya vayaʼmo neʼaya kava huno Ala kava neʼmo afinaʼmo afole aigiye.

³ Vayaʼmogi, alagepa huta neʼmaunanageta ani kavakeʼmo huta maigune, huʼa nehisagenoʼaeʼmo malage huno hosu kavaʼmo apakaeteʼmo afole aiteno alino hano huno apategaiye. Aʼnemogimo mafaʼnemo aliʼa apatesayafeʼmo huʼnaya afinaʼmo fikumo maiʼnagenoʼaeʼmo malage huno apakafu nekiya agufa kavaʼmo apakaeteʼmo afole aisigeʼapaeʼmo faiʼa kasalo opaegae.

⁴ Konagatimogitapae, huta, faiʼa kasalo opaegayaʼmonanafa kumaya vayaʼmo neʼageʼapaeʼmo hapau neʼaiya kava hutapa lapakaemo hanipiʼmo oʼmaiʼnayaʼmofeʼmo ani afinaʼmo lapakaetegamo afole aisigetapaeʼmo lapau oʼaigae.

⁵ Lagaemo hanipiʼmo oʼmaige haniʼilagamo umenitata nehaya vayakana huta oʼmaige huʼnone. Mukiʼamogitapamo ha le yategamo maiʼnetapa felugamo umenitata nehaya vayakana hutapa maiʼnae.

⁶ Maiʼnonaʼmofeʼmo mago vayaʼmo apau kaleʼa neʼmaiya kava huta lagaemo lau kaleta oʼmaita laipa lagesaleʼmo yagaita lateteta maigetao.

⁷ Apakaemo haniʼilagamo apau kalege haniʼilagamo aniʼmo neteʼa negi nagi huge nehayaʼmonanafa

⁸ lagaemo feluga umenitata nehaya vayakana huta laipa lagesaleʼmo yagaita lategetao. Ati vayaʼmogimo kame vayaʼapimogimo ohapaesayafeʼmo lokiya aeni siotimo neʼvaiya kava huta lagesamo afita fatago nehuta lahau layamopafiʼmo lahaino. Ati vayaʼmogi lokiya aeni kakolitamo neʼmalaya kava huta Gotiʼa lagufamo alino katino latesiyafeʼmo agava maiʼneta lavayagunagu huta maigetao.

⁹ Gotiʼa aipamo leno lateteno kayoʼmo lamisiyafeʼmo lekana paino olateʼnifa Ala kava netimo Yesu Kalaisitetiʼmo laha maesiyafeʼmo lekana paino lateʼniye.

¹⁰ Falitesunageno eminesifi afaʼa maiʼnisunageno eminesifigeta agaeʼeʼmo magokepi lokaeta maisunafeʼmo falino lateʼniye.

¹¹ Huʼniyaʼmofeʼmo lapakaemo nehaya agufa kavaʼmo hutapa konagatapimogimo magoʼe hutapa hapa maetapa apaipamo alita lokiya vaitapa apatetetapa alita falu fala hutapa apateyo.

Ge atupa gemo huʼniya gemae

¹² Konagatimogitapae, huta, lapao ke honanagi lapakae folagapiʼmo aliʼyaʼmo alige yagaiʼa lapatege aliʼa api aiʼa lapatege huʼa neʼmaiya vayaʼaifeʼmo, lagae kava vayatimo maiʼnae, hutetapa apakaefeʼmo alagepa hutapa lapakesamo afiyo.

¹³ Goti aliʼyaʼmo neʼaliyaʼmofeʼmo alagepa vayaʼmo maiʼnae, hutetapa apakaefeʼmo lapau lapayamopafiʼmo lapaino. Magoke lapaipa lapakesamo alitetapa magokepi lokaetapa maiyo.

¹⁴ Konagatimogitapae, huta, lapao ke honanagi alagaʼmo nehapaegeʼa afaʼa neʼmaiya vayaʼaifeʼmo, ehetapiye, huta, alagaʼmo olapaeno, hutapa hapa paiyo. Koli nehaya vayaʼai apaipamo alita lokiya vaitapa apateyo. Lokiya noʼvaiya vayaʼaina hapa maeyo. Muki vayaʼaitegamo vase vase hutapa falu fala kavaʼmo hiyo.

¹⁵ Vayaʼmogi hosu kavaʼmo anonaʼapilefeʼmo aeʼa atagaina huʼa osisayafeʼmo alagepa huta yagaitapa apateyo. Lapakaemo muki afinaʼmo konagatapimogitegaʼe muki vayaʼaitegaʼeʼmo lapayamukiki hutapa alagepa kavaʼmo hiyo.

¹⁶ Muki afinaʼmo lapamogaga aiyo.

¹⁷ Muki afinaʼmo oʼataletapa nunumuʼmo hiyo.

¹⁸ Muki agufa kavatefeʼmo Gotifekeʼmo hao ke heyo. Kalaisi Yesupiʼmo maiʼnetapaeʼmo ani kavaʼmo hisayafeʼmo Gotiʼa hauʼniye.

¹⁹ Goti Aunemeʼamoʼmo ata legekana huno aliʼyaʼmo neʼaliyanagi aetapa yu oseyo.

²⁰ Ani kavatefeʼmo vayaʼmogimo Goti Aunemeʼaletiʼmo lapa nepaiya geeʼmo ina agufa gemo nehae, hutapa osiyo.

²¹ Osutapa muki kavaʼe geʼeʼmo alita fako hutapa agege afige hutetapa alagepa kavaʼe alagepa geʼeʼmo atafauta lapaipafiʼmo maleyo.

²² Muki agufa hosu kavaʼamo maita halove hutapa ateyo.

²³ Gotiʼa agaeʼeʼmo magokepi alino lokaeno lateteno laipamo alino falu huno nelateya vekamoʼmo alino alagepa huno lapateʼniyanagi alagi lapaoteʼmo maiyo. Agaemo muki lapaunelapametenagi lapagupi mafaʼnelenagi lapakufalenagi huno yagaino lapateʼnisigeno Ala kava netimo Yesu Kalaisiʼa eminesiya afinaʼmo mago hosu kavatapimo ohaneʼnisigeno vaiʼmo olapamino.

²⁴ Lapakaefeʼmo keya aeno ge huʼniya vekamoʼmo agaiʼa avayafatiʼmo huʼniya geʼamo akame nehiyaʼmofeʼmo ani kavaʼmo afaʼa hugiye.

²⁵ Konagatimogitapae, huta, nunumuʼmo hutapa lateyo.

²⁶ Muki konagatapimogimo alita falu fala hutapa neʼapatetapaeʼmo lapaote lapaipamo kaliʼnetapa hapaetapa neyo.

²⁷ Nagaemo Ala kava neʼmo himamuʼaletiʼmo huʼnaeʼmo, mani avoʼmo alita lekana paigeʼapao muki apaote konagatimogi afiyo.

²⁸ Ala kava netimo Yesu Kalaisiʼa fikumo lapa maeno lapaminagetapa maiyo. He, lama gemo.