1 Tesaloniyani 4 - The Keyagana NT and 25 OT books

Gotiʼa hauʼniya kavafeʼmo huʼniya gemae

¹ Inagi konagatimogitapae, huta, lagaemo Gotiʼa hauʼniya kavaʼmo hutapa maisayafeʼmo alita lapaya maleʼnone. Ani kava hutapa maiʼnae. Hemenimo Ala kava neʼmo Yesutetiʼmo lokiya gefatiʼmo lapao ke hetaeʼmo, magoʼe hutapa alagepa kavaʼmo hutapa maiyo.

² Ala kava neʼmo Yesutetiʼmo mani kavaʼmo hiyo, huta huʼnona gemo ago afiʼnae.

³ Gotiʼa aote kavaʼmo hume hume neʼutapaeʼmo kumai kavafeʼmo maita halove hutapa atesayafeʼmo hauʼniye.

⁴ Lapakaemo Gotitegamo alagepa kavaʼmo huge vayaʼaitegamo alagepa kavaʼmo huge nehutapaeʼmo lapamete lapamete hutapa atapimo aliyo.

⁵ Malaga vayaʼmo Gotiʼa oʼageʼnaya vayaʼmogimo apakufamoʼmo hauʼniya agufa kavaʼmo huʼa hapaʼye nehigeʼapaeʼmo aʼmo neʼaliya agufa kavaʼmo osiyo.

⁶ Ani kavatefeʼmo fiku yanageʼa mago vayaʼmogi konagaʼapimogifeʼmo humi apateteʼa aliʼa hosu huʼa apategae. Hogoteta hutaeʼmo, Ala kava neʼmoʼa kumai kavaʼmo anonaʼapilefeʼmo apamigiye. Ehetapiye, huta ago lapa paiʼnone.

⁷ Ani kavatefeʼmo Gotiʼa kumai heʼa ugekana agufa kavaʼmo hisunafeʼmo keya aeno ge osuʼnifa laote alagepa kavaʼmo hisunafekeʼmo keya aeno ge huʼniye.

⁸ Keya aeno ge huʼniyaʼmofeʼmo mani gemo oʼafiʼnaya vayaʼmogimo ma mopafi vayaʼmo apakameʼyamo noʼapamifa Aunemeʼamo lamiʼniya Gotikeʼmo apakameʼyamo neʼamiye.

⁹ Gotiʼa konagatapieʼmo lapau lapayamopafiʼmo lapausiyafeʼmo ago alino lapaya maleʼnigetapa afiʼnayanageta lapausiyafeʼmo halate avoʼmo kaesuva kavaʼmo ohaneʼniye.

¹⁰ He, lapakaemo muki Masetoniya kotega maiʼnaya konagatapieʼmo lapau lapayamopafiʼmo lapauʼniyaʼmonanafa konagatimogitapae, huta, lapao ke hetaeʼmo, magoʼe magoʼe huno lapaino, huta nehune.

¹¹ Vase huta alagepa huta maigune, hutapa lapakesamo afitetapa lapakaitapi yateʼmo alagepa hutapa yagaitapa ateʼnetapa aliʼyaʼmo aliyo, huta ago lapa paiʼnone.

¹² Malaga vayaʼaitegamo alagepa kavaʼmo hutetapa kafu osisayafeʼmo aliʼyaʼmo aliyo.

Ala kava neʼmo halate eminesiya kavafeʼmo huʼniya gemae

¹³ Inagi konagatimogitapae, huta, mago vayaʼmogimo, faliʼnaya vayaʼmo he otigae, huʼa apakesamo neʼafiyaʼmofeʼmo apakava oʼmaige apavayagunagu osuge huteʼa lusi kava huʼa yulagefa neʼaiye. Ani agufa kavaʼmo osutapa faliʼnaya vayaʼaifeʼmo lama gemae, hutapa afisayafeʼmo nahauʼniye.

¹⁴ Lagaemo, Yesuʼa ago faliteno he tiʼniye, huta lagesamo afita fatago nehunaʼmofeʼmo Gotiʼa Yesupiʼmo faliʼnaya vayaʼe Yesuʼeʼmo apavalelino eminegaiye, huta lagesamo afita fatago hugune.

¹⁵ Ala kava neʼmoʼa, afaʼa maiʼnaya vayaʼmogimo faliʼnaya vayaʼmo apataleʼa uʼa haiʼa hogo otegae, huno laha paiʼniye.

¹⁶ Ala kava neʼmo kokuʼnapatiʼmo emineʼneʼenoʼaeʼmo alopa gefatiʼmo keya aeno ge nehisigenoʼaeʼmo enisole vayaʼaiteʼmo yagaino neʼapateya enisole vekamoʼa ge nehisigenoʼaeʼmo Goti pikulimo nehisigeno agaiʼamo eminegaiye. Emineʼneʼesigeʼapaeʼmo Kalaisipiʼmo maiʼneʼa faliʼnisaya vayaʼmo hogoteʼa he tigae.

¹⁷ He netisagenoʼaeʼmo agaemo afaʼa maiʼnona vayaʼeʼmo lavalesigeta apakaegiʼeʼmo magokepi lokaeta uta haita hiyapiʼmo Ala kava neʼeʼmo fotu huteta muki afinaʼmo agaeʼeʼmo maige maige huta maigune.

¹⁸ Maigunaʼmofeʼmo mani geletiʼmo konagatapimogi apaipamo alita falu hutapa apateyo.