1 Tesaloniyani 3 - The Keyagana NT and 25 OT books

¹ Lapakaeʼeʼmo oʼmaiʼnonaʼmofeʼmo laipamoʼmo kana huʼnigeta lagesamo afitaeʼmo magoʼe huta afaʼa oʼmaigune. Mani Atenisi taonifiʼmo maiʼnetaʼaeʼmo

² Timotiʼmo alitaʼa atesuʼageno uno lapakegaiye, hutaʼa huʼnoʼae. Agaemo lagaeʼeʼmo magokepi lokaeno aliʼyaʼmo neʼalino Kalaisifeʼmo alagepa faigoko geʼamo aeno hakalo huno hapa nepaiya konagatimoʼmo maiʼniye. Lapa maeno alino lokiya vaino lapatesigetapa magoʼe hutapa lapakesamo afita fatago hisayafeʼmo alitaʼa ateʼnoʼageno uʼniye.

³ Fiku yanageʼa kana yaʼmo aliʼnonaʼmofeʼmo mago vayaʼmo asagauʼa aigae. Lapakaemo ago afiʼnayana Gotiʼa lagaefeʼmo, ani kana yaʼmo afaʼa aligae, huno agesamo afiteno hu maleʼniye.

⁴ Lapakaeʼeʼmo hogoteta maiʼnetaeʼmo ani gemo hutaeʼmo, kana yaʼmo aligune, huta lapa paiʼnona agufa kana yaʼmo aliʼnonageta ago lageʼnae.

⁵ Ani kavafeʼmo nahausoli huʼnigeʼnaeʼmo, magoʼe huʼna afaʼa oʼmaiguve, huʼna huteʼna Timotifeʼmo, apakesamo afiʼa fatago nehafigi uka apako, huʼna ha paiʼnove. Sataniʼmo apamalageka huteno aliʼyatimo alino hano huno ataleʼnisifi, huʼna huteʼna lusi kava huʼna koli huteʼna aliʼna ateʼnogeno uʼniye.

Timotiʼa halate aino atagi neno eno alagepa apava gemo huno laha paiʼniye, huno huʼniya gemae

⁶ Huʼnovaʼmonanafa Timotiʼa lapakaetegatiʼmo halate lagaetegamo enoʼaeʼmo alagepa lapava gemo huno laha painoʼaeʼmo, alagepa huʼa apakesamo afiʼa fatago nehuʼapaeʼmo hapau apayamopafiʼmo nehapaiye. Lagaemo apakesunafeʼmo nehuna kava huʼa lagaefeʼmo alagepa huʼa apakesamo afiteʼa lagesayafeʼmo nehae, huno laha paiʼniye.

⁷ Konagatimogitapae, huta, kana yaʼmo alige lagafu kige huta maiʼnonagenoʼaeʼmo lapava gemo huno laha painoʼaeʼmo, alagepa huʼa apakesamo afiʼa fatago nehae, huno laha paiʼniya gemoʼmo laipamo alino lokiya vaino lateʼnigeno laipamoʼmo falu huʼniye.

⁸ Lapakaemo Ala kava nepiʼmo maiʼnetapaeʼmo oʼataleta atafautapa alagi huta maiʼnisayaʼmoʼmo alagi alagepa huta neʼmaune.

⁹ Goti aulagaleʼmo lamogaga aige aige huta maiʼnetaeʼmo lapakaetefeʼmo lamogaga neʼauna kavatefeʼmo alagepa huta Gotifeʼmo afaʼa hao ke oseta uta haita ohapaigune.

¹⁰ Lagaemo uta lapa maeta lapakesamo afita fatago huʼnaya kavatapimo alita kosita atesunafeʼmo muki afinaʼmo felugaʼe haniʼilagaʼeʼmo laipafiʼmo nunumuʼmo huta nelapatone.

¹¹ Afotimo Gotiʼe Ala kava netimo Yesu Kalaisiʼeʼmo uta lapakesuna kaʼmo valiʼana latesaʼageta visunafeʼmo lahauʼniye.

¹² Ala kava neʼmoʼa lapa maesigeno magoʼe huno lusi kava huno lapau lapayamopafiʼmo lapaino. Lagaemo lapakaefeʼmo lahau layamopafiʼmo lahauʼniya kavaʼmo huno konagatapimogiʼe muki vayaʼefeʼmo lapau lapayamopafiʼmo lapaino.

¹³ Ala kava neʼmoʼa ani kavatetiʼmo lapa maeno lokiya vaino lapatenagetapa Ala kava netimo Yesu Kalaisiʼe muki vayaʼamogiʼeʼmo eminesiya afinaʼmo Afotimo Goti aulagaleʼmo hosu kavatapimo ohanesigetapa alagi alagepa hutapa maigae.