1 Tesaloniyani 2 - The Keyagana NT and 25 OT books

Poloʼa Tesaloniyani vayaʼaitegamo uno aliʼyaʼmo aliʼniya kavafeʼmo huʼniya gemae

¹ Konagatimogitapae, huta, lapakaemo ago lageʼnayana lapakaetegamo uta maiʼnetaeʼmo afa aliʼyaʼmo oʼaliʼnonana aliʼyaʼmo aliʼnonagenoʼaeʼmo neʼyaʼmo ago afole aiʼniye.

² Lapakaemo ago afiʼnayana Filipai taonifiʼmo nagaeʼe Silivenisiʼeʼmo uʼnoʼageʼapaeʼmo lusi kava huʼa laʼamagiʼnayaʼmonanafa lapakaetegamo uʼnoʼae. Laʼagaeʼe Timotiʼeʼmo uta maiʼnonageno Gotiʼa laha maeno lokiya vaino lateʼnigeʼapaeʼmo mago vayaʼmogi lusi kava huʼa kame huʼa lateʼnayaʼmonanafa koli osuta Gotitegati alagepa faigoko geʼamo aliniteta aeta hakalo huta lapa paiʼnone.

³ Lapa paiʼnona gemo aigofe geletiʼmo afole oʼaige amega lagufaleʼmo lamogaga aisuna agufa kavatetiʼmo afole oʼaige humiʼnami getiletiʼmo afole oʼaige huʼniye.

⁴ Afole oʼaiʼniyaʼmonanafa Gotiʼa lageno aeto hutenoʼaeʼmo alagepa faigoko geʼaleʼmo yagaita ateʼneta aliʼyaʼamo alisunafeʼmo lekana paino lateʼnigeta maiʼnone. Aliʼyaʼamo neʼalunaʼmofeʼmo vayaʼmogi amuse huʼa latesaya agufa gemo osuta Gotiʼa laipafiʼmo lageteno alino fako huno nelateya vekamoʼmo amuse huno latesiyafeʼmo mani gemo nehune.

⁵ Lapakaemo ago afiʼnayana aigofe gemo hutapa lahao ke hesayafeʼmo huta lapao ke oseʼnone. Mago vayaʼmogi hapaʼye nehiya kavaʼapileʼmo geʼapiletiʼmo huʼa aeʼa ati nekaya agufa gemo osuʼnone. Gotiʼa ago lageʼniyanageno laha maesiya faigoko gemo afaʼa hugiye.

⁶ Lagaemo lapakaemofi muki alu vayaʼmogimofi huʼa lagitileʼmo aliʼa asaga huʼa latesayafeʼmo mago kavaʼmo osuʼnone. Kalaisi apa vayaʼamo maiʼneta lokiyaʼamo aliʼnonaʼmofeʼmo lapakaefeʼmo hutaeʼmo, ani yaʼmo lamiyo, huta huge mani aliʼyaʼmo alitapa lateyo, huta huge hisuna gemo afaʼa haneʼniyaʼmonanafa osuʼnone.

⁷ Lokiya gemo osuta lapakaeʼeʼmo magokepi kanale huta lokaeta maiʼnetaeʼmo vase vase kavaʼmo huta aʼnemogimo inamu mafaʼnemo apanu kiʼa alagi huʼa neʼmaiya kava huta yagaita lapateʼnone.

⁸ Lapakaefeʼmo lahauʼniyaʼmofeʼmo Gotitegati alagepa faigoko geʼageʼmo lapamisunafeʼmo osuʼnopa lagufaʼaʼeʼmo lapamisunafeʼmo huʼnone.

⁹ Konagatimogitapae, huta, alagepa faigoko gemo aeta hakalo huta lapa paita maiʼnetaeʼmo laha maetapa kana yaʼmo oʼalisayafeʼmo felugaʼe haniʼilagaʼeʼmo lokiya vaita aliʼyaʼmo aliʼnonagetapa ago lageʼnae.

¹⁰ Lagaemo lapakesamo afita fatago nehaya vayaʼmogitapaʼeʼmo lokaeta maiʼnetaeʼmo Gotitegamo alagepa kavaʼmo huge vayaʼaitegamo alagepa kavaʼmo huge vaiʼmo olamisaya agufa kavaʼmo huge huta maiʼnonagetapaeʼmo lapakaeʼe Gotiʼeʼmo ago lageʼnayanagetapa laha maesiya faigoko gemo afaʼa hugae.

¹¹ Afoʼapimogimo mafaʼneʼapileʼmo yagaiʼa neʼapataya kava huta lapakaeteʼmo yagaiʼneta ani kavaʼmo hiyo, huta huge lapaipamo alita lokiya vaita lapatege lokiya gefatiʼmo lapa paige huta maiʼnonagetapa lageʼnae.

¹² Gotiʼa yagaino neʼapateya koteʼmo uta haitapa maiʼnetapaeʼmo ha le konali yaʼamo alisayafeʼmo keya aeno ge huʼniya agufa kavaʼmo hutapa maiye.

¹³ Goti geʼamo lapa paiʼnonagetapa afitetapaeʼmo, ma mopafi vayaʼai gemo ohaneʼnifa Goti geʼamo haneʼniye, hutapa huʼnayaʼmofeʼmo Gotifekeʼmo hao ke hege hege huta maiʼnone. He, lapakaemo lama gemo huʼnae. Afiʼnaya gemo Goti geʼageʼmo haneʼniye. Mani gemoʼa lapakesamo afita fatago nehaya vayaʼmogitapa lapaipafiʼmo lokiya vaino aliʼyaʼmo neʼaligenoʼaeʼmo neʼyaʼmo afole neʼaiye.

¹⁴ Yutiya kotega vayaʼmo Kalaisi Yesupiʼmo maiʼnaya siosi vayaʼmogimo kana yaʼmo aliʼnae. Yu vayaʼmo vayaʼapimogimo kana yaʼmo aliʼa apamiʼnaya kava huʼa vayatapimogimo kana yaʼmo aliʼa lapamiʼnae. Konagatimogitapae, huta, ani kavaʼmo hutapa maiʼnetapaeʼmo Goti siosi vayaʼamo apakame hutapa maiʼnae.

¹⁵ Yu vayaʼmogimo akeyaʼvilagamo Gotitegati gemo alini eʼa aeʼa hakalo huʼa hapa nepaiya vayaʼapimo kamitimo apamagige Ala kava neʼmo Yesuʼa kamitimo amagige huteʼapaeʼmo hemenimo lagaefeʼmo apaini huʼa nelatae. Apakaemo Gotiʼa alagi ohauʼniya agufa kavaʼmo nehuʼapaeʼmo muki vayaʼaifeʼmo kame huʼa neʼapatae.

¹⁶ Lagaemo Yu nofi vayapatiʼmo oʼmaiʼnaya vayaʼaifeʼmo ge hisunageno Gotiʼa apakufamo alino katino apatesiya kaʼmo aliʼa akani maleʼnae. Muki afinaʼmo ani kavaʼmo nehagenoʼaeʼmo hosu kavaʼapimoʼmo lusi kava huno havai teʼniye. Gotiʼa apakava maiʼniyaʼmonanafa hemenimo lusi kava huno aipamo leno apateteno kayoʼmo apamiʼniye.

Poloʼa, halate lapakesuvafeʼmo uguve, huno huʼniya gemae

¹⁷ Konagatimogitapae, huta, vayaʼmogimo aliʼa laha faitalageta lapataleta eta aise afinaʼmo laote maiʼnonaʼmonanafa lapakaefeʼmo lagesamo afita neʼmaune. Halate lapakaefeʼmo uta lapakesunafeʼmo lusi kava huno lahauʼnigeta uta lapakesuna kafeʼmo layamukiki huta kahauya nehune.

¹⁸ Lapakaetegamo ugefe nehutaeʼmo nagaemo Poloʼnamo alu afina alu afinaʼmo ugefe huʼnovana Sataniʼmo ka akanino lateʼniye.

¹⁹ Ala kava netimo Yesu Kalaisiʼa eminesiya afinafeʼmo agava maiʼneta lavayagunagu huge lamogaga aige miyatimo alisunafeʼmo lamogaga aige nehuna kavaʼmo aepa vayaʼmo ina lagiye. Lapakaitapigemae.

²⁰ Kalaisi aulagaleʼmo maiʼnetaeʼmo lapakaetetiʼmo ala lagitimo aliteta lamogaga aigune.