1 Tesaloniyani 1 - The Keyagana NT and 25 OT books

¹ Poloʼnamogi Silivenisiʼagi Timotiʼagi huta Tesaloniyani siosi vayaʼmogitapamo afotimo Gotipiʼe Ala kava netimo Yesu Kalaisipiʼeʼmo maiʼnaya vayaʼmogitapaeʼmo mani gemo avoʼmo nekaone. Afotimo Gotiʼe Ala kava netimo Yesu Kalaisiʼeʼmo fikumo lapa maeʼana lapamisaʼageno lapaipamoʼmo falu hino.

Tesaloniyani vayaʼmogi apakesamo afiʼa fatago huteʼa alagepa huʼa maiʼnaya kavafeʼmo huʼniya gemae

² Lagaemo mukiʼamogitapaeʼmo Gotifeʼmo muki afinaʼmo nunumuʼmo huta hao ke nehone.

³ Lapakesamo afita fatago huʼnetapaeʼmo alagepa kavaʼmo nehae. Lapau lapayamopafiʼmo lapauʼnigetapaeʼmo lokiya aliʼyaʼmo neʼaliye. Ala kava netimo Yesu Kalaisifeʼmo agava maiʼnetapa lapavayagunagu nehutapaeʼmo oʼataletapa atafauta alagi hutapa neʼmaiye. Lagaemo Afotimo Goti aulagaleʼmo ani kavatapieʼmo lagesamo afitetaeʼmo muki afinaʼmo olapataleta nunumuʼmo huta nelapatone.

⁴ Gotiʼa hau ayamopafiʼmo hauʼniya konagatimogitapae, huta, Gotiʼa agaiʼamo lekana paino lapateʼniye, huta lapakeʼnone.

⁵ Alagepa faigoko geʼamo aeta hakalo huta lapa paiʼnonagenoʼaeʼmo lapaipafiʼmo geʼageʼmo afole oʼaiʼnifa himamuʼaʼe geʼaletiʼmo aliʼyaʼmo aliteno alino afole aino ateʼniye. Aote Aunemeʼaletiʼmo lapa paiʼnonagetapaeʼmo, he, lama gemo nehae, hutapa magoke lapaipa lapakesamo afiʼnae. Lapa maesunafeʼmo lapakaeʼeʼmo magokepi lokaeta maiʼneta haiya agufa kavaʼmo huta aliʼyaʼmo aliʼnopi huta ago lageʼnae. Ani kavaʼmo lapakaeteʼmo afole aiʼniyaʼmofeʼmo Gotiʼa lekana paino lapateʼniye, huta lapakeʼnone.

⁶ Goti geʼamo alagepa hutapa afitetapa lusi kava hutapa kana yaʼmo aliʼnageno Goti Aunemeʼamoʼmo lapa maeʼnigetapa lapamogaga neʼaitapaeʼmo lakame huge Ala kava neʼmo akame huge huʼnae.

⁷ Lapakaemo ani kavaʼmo nehutapaeʼmo lapakame hisaya agufa kavaʼmo apakesamo afiʼa fatago huʼnaya vayaʼmo Masetoniya kotega vayaʼe Akaiya kotega vayaʼeʼmo alitapa apave liʼnae.

⁸ Ala kava neʼmo geʼamo lapakaetetiʼmo Masetoniya kotegaʼe Akaiya kotegaʼeʼmo aino atagu faeno uneno osuʼnifa muki kotegaʼeʼmo aino atagu faino uneno huʼnigeʼapaeʼmo lapakesamo afitapa fatago huʼnaya kavafeʼmo lapava gemo afiʼnayaʼmofeʼmo magoʼe huta hapa paisuna gemo ohaneʼniye.

⁹ Ani vayaʼmogimo lagaefeʼmo huʼapaeʼmo, apakaemo Tesaloniyani vayaʼaitegamo uʼnageʼapaeʼmo aigofe gotiʼapimogi apataleʼa aiʼa afe leʼa Gotitegamo eʼa afaʼa neʼmaiya lama ge Goti aliʼyaʼamo neʼaliye.

¹⁰ Maiʼneʼapaeʼmo Gotiʼa alino he tino ateʼniya Mafaʼneʼamoʼmo Gotiʼa aipamo leno nelateyanageno kayoʼmo lamisiya kavategatiʼmo lagufamo alino katino nelateya Mafaʼneʼamo kokuʼnapatiʼmo eminesiyafeʼmo agava neʼmaiye, huʼa nehae.