1 Samiyo 9 - The Keyagana NT and 25 OT books

Soloʼmo Samiyoʼeʼmo fotu huʼnaʼa gemae

¹ Mago vekamo agiʼamo Kisiʼmo Menisameni nofi vayapati vekamo Amaiyo mafaʼnemo maiʼnigeno Amaiyoʼmo Silo mafaʼnemo maiʼnigeno Siloʼmo Mekolati mafaʼnemo maiʼnigeno Mekolatiʼmo Afaiya mafaʼnemo maiʼniye. Kisiʼmo vayatama vekamo maiʼniye.

² Agaemo mago alagepa mafaʼneʼamogeʼa alagepa apaulagamo neʼagaya mafaʼnemoʼmo muki Isaleli vayaʼaina aeno apaka seʼniye. Ani mafaʼnemo agiʼamo Soloʼae. Yatala vekamogeno he tiʼnigeʼapaeʼmo muki vayaʼmo he tiʼnaya vayaʼmogi agiʼnaʼaleʼmo haiʼa maiʼnae.

³ Mago afinaʼmo Kisiʼmo noki anagaʼamo uʼeʼa huʼnayategamo ago uʼa afela heʼnae. Heʼnayaʼmofeʼmo Kisiʼmo Solofeʼmo hunoʼaeʼmo, Kahaoke hovanagi, mago aliʼyakamo neʼaliya vekamo avaleteka lanakaemo utana noki anagafeʼmo kahauya hiʼao.

⁴ Inagi anakaemo uʼana Ifalemu vayaʼmogi avelegaʼe Salisa mopaleʼeʼmo uʼnaʼaʼmonanafa noki anagaʼmo oʼapakeʼnaʼae. Anakaemo Salami mopaleʼmo folagapiʼmo uʼnaʼaʼmonanafa noki anagaʼmo ani haopalegamo oʼmaiʼnae. Inagi anakaemo Menisameni nofi vayaʼmogi mopamo folagapiʼmo uʼnaʼaʼmonanafa noki anagaʼmo oʼapakeʼnaʼae.

⁵ Anakaemo Sufi mopaleʼmo uʼana avaʼyi huteʼanaeʼmo Soloʼmo aliʼyaʼamo neʼaliya vekaeʼmo ina ge hunoʼaeʼmo, Laʼagaemo halate kotiʼalegamo uguʼae. Fiku yanageno afoʼnimoʼmo laʼagaefeʼmo agesa alaʼamo afiteno magoʼe huno noki anagaʼaeʼmo agesamo oʼafigiye, huno ha paiʼnigeno

⁶ Afiyo, huno, Mago Goti vekaʼamo mani taonifiʼmo maiʼniye. Vayaʼmogimo ala agiʼamo amiʼnageno muki nehiya gemoʼa alagikeʼmo afole neʼaiye. Laʼagaemo utaʼa agetetaʼae. Agaemo haiya kateʼmo akame hutaʼa visuʼafigeno laʼahapaigiye, huno ha paiʼniye.

⁷ Soloʼmo aliʼyaʼamo neʼaliya vekaeʼmo hunoʼaeʼmo, Uguʼaʼmonanafa na agufa yaʼmo afaʼa fikumo amiguʼae. Neʼyatiʼamo ago hano huʼniye, Fikumo amisuʼa yaʼmo ohaneʼniye. Na agufa yaʼmo aliʼnoʼae, huno ge huno afigeʼniye.

⁸ Afigeʼnigenoʼaeʼmo aliʼyaʼamo neʼaliya vekamoʼmo hunoʼaeʼmo, Ago, huno, nagaemo mago aise atupa siluvaʼnimo haneʼniye. Visuʼa kafeʼmo laʼaha paigiye, huno ha paiʼniye.

^9-11 Soloʼmo agaefeʼmo ha painoʼaeʼmo, Alagepa gemo hane. Laʼagaemo uguʼae, huno huʼniyaʼmofeʼmo anakaemo Goti vekaʼamo maiʼniya taonifiʼmo uʼnaʼae. Anakaemo aise aveleʼmo haneʼniya taonifiʼmo uʼana haiʼana mago a mafaʼne anagaʼeʼmo fotu huʼnaʼae. Apakaemo aniʼmo he fisayafeʼmo taonifatiʼmo malagamo emiʼeʼnae. Emiʼeʼnageʼanaeʼmo anakaemo huʼanaeʼmo, Neʼageya vekamo manileʼmo maiʼnifiye, huʼana ge huʼana apafi geʼnaʼae. (Akeyaʼvilagamo mago Isaleli vekamoʼmo Gotifeʼmo ge huno afi gesiyafeʼmo unoʼaeʼmo, Eyo, huno, neʼageya vekalegamo ugune, huno huʼniye, Hemenimo ani agufa vekamo Gotitegati gemo alinineno aeno hakalo nehiya vekae, huʼa agi neʼayaʼmonanafa akeyaʼvilagamo neʼageya vekae, huʼa agi aeʼnae.)

¹² Inagi a mafaʼne anagaʼmogimo lole vekalaʼani geleʼmo ina ge huʼa aeʼa atagaina huʼapaeʼmo, He, huʼa, hemenimo mugalegamo neʼviye. Malage hutana utana haiʼao. Hemenitomo vayaʼmogimo aise avefiʼmo ofalinimo hugayaʼmofeʼmo neʼageya vekamo mani taonifiʼmo eʼniye.

¹³ Lanakaemo taonifiʼmo utana haisaʼa afinaʼmo agaemo agegaʼae. Agesaʼageno agaemo neʼyaʼmo nesiyafeʼmo aise avefiʼmo uno haigiye. Vayaʼmogimo ofalini ameʼamo afaʼa oʼnegae. Hogoteno neʼageya vekamoʼmo ofalinimo alino auleno ategaiye. Atetesigeʼa henagaʼamo keya aeʼnigeʼa eʼnaya vayaʼmogimo neʼyaʼmo negae. Hemenimo afaʼa agegaʼaʼmofeʼmo utana haiʼao, huʼa hana paiʼnae.

¹⁴ Anakaemo ani gemo afiteʼanaeʼmo taonifilagamo uʼana haiʼnaʼae. Kegiʼya kipa haopaleʼmo uʼana avaʼyi huʼnaʼagenoʼaeʼmo Samiyoʼmo anakaetegamo uno lamiteno aveleʼmo uno haisiyafeʼmo anakaetegamo eʼniye.

¹⁵ Egamo Ala kava neʼmoʼa Samiyofeʼmo ha painoʼaeʼmo,

¹⁶ Egamo mani agufa kanaleʼmo nagaemo mago vekamo Menisameni nofi vayapatiʼmo aliʼna atesugeno kagaetegamo egaiye. Kagaemo Isaleli vayaʼnileʼmo yagaino apatesiyafeʼmo uvelimo lakika atesanageno agaemo vayaʼnimo Filisatini vayaʼai apayapatiʼmo apakufamo alino katino apategaiye. Vayaʼnimogimo nagaefeʼmo keya aeʼa ge huʼnayaʼmofeʼmo hapa maesuvafeʼmo apakeʼnove, huno ha paiʼniye.

¹⁷ Inagi egaʼamo Samiyoʼmo ani vekamo ageʼnigenoʼaeʼmo Ala kava neʼmoʼa ha painoʼaeʼmo, Egamo ani vekaegeʼmo kaha paiʼnove. Ageʼnana vekamo agaemae. Agaemo muki vayaʼnileʼmo yagaino apategaiye, huno ha paiʼniye.

¹⁸ Inagi Soloʼmo Samiyoʼeʼmo taonimo kipateʼmo fotu huteʼanaeʼmo agaefeʼmo ina ge huno ge huno afi geʼniye, Neʼageya vekamo noʼamo haiyateʼmo haneʼniye, huno ge huno afigeʼnigeno

¹⁹ Samiyoʼmo geʼaleʼmo aeno atagaina hunoʼaeʼmo, Nagaiʼnigeʼmo ani neʼagova vekamo maiʼnove. Lanakaemo aise aveleʼmo utana hogoʼneteʼageʼnao nagaegiʼeʼmo magokepiʼmo neʼyaʼmo negaune. Egamo netepiʼmo muki kaipa kagesa neʼafina kavafeʼmo kaha paiteʼna aliʼna katesugeka ugane.

²⁰ Noki anagaʼmo hogoteʼa loleʼe magoʼe afinaʼmo afela heʼnaya noki anagafeʼmo kagaemo magoʼe huka kagesa alaʼamo oʼafiyo. Apakaemo ago apakeʼa apavaleʼnae. Inagi muki Isaleli vayaʼmogimo ina lafeʼmo hapauʼniye. Apakaemo kagaeʼe afokamo afamo anaga vayaʼefeʼmo hapauʼniye, huno ha paiʼniye.

²¹ Soloʼmo ani gemo afitenoʼaeʼmo Samiyofeʼmo hunoʼaeʼmo, Nagaemo Menisameni nofi vayapatiʼmo lagaemo aise nofi vayaʼatomo Isaleli nofi vayapiʼmo maiʼnone. Afamo anagaʼnimogi apakiʼapimo ohaneʼniye. Ohaneʼniyana na kava higekaeʼmo ani agufa gemo hane, huno ha paiʼniye.

²² Inagi Samiyoʼmo ani gemo afitenoʼaeʼmo Soloʼe Solo aliʼyaʼamo neʼaliya vekaʼeʼmo anavalelino alopa huʼa aeʼa hanagi maleʼnageno hiʼyalamuʼmo haneʼniya yapilagamo uno haiʼniye. Samiyoʼmo tetiʼa agufa vayaʼaifeʼmo keya aeʼnigeʼa eʼa neʼyateʼmo fai maiʼnae. Samiyoʼmo hana paiʼnigeʼana Soloʼe aliʼyaʼamo neʼaliya vekaʼeʼmo uʼana hogote yateʼmo fai maiʼnaʼae.

²³ Samiyoʼmo neʼyaʼmo nekaeya vekaeʼmo ha painoʼaeʼmo, Ani ameʼaeʼmo maleka maiʼno, huʼna kaha paiteʼna kamiʼnova ameʼamo alikeno, huno ha paiʼniye.

²⁴ Inagi neʼyaʼmo nekaeya vekamoʼmo afumo aumiʼyaʼafiʼmo alagi alagepa ameʼamo haneʼniya aumiʼyaʼamo alinineno hiʼyalamuteʼmo Solo haopaleʼmo maleʼniye. Maleʼnigenoʼaeʼmo Samiyoʼmo Solofeʼmo ha painoʼaeʼmo, Lagaemo ani ameʼamo kagaikageʼmo kateʼnonagi no. Nagaemo vayaʼaifeʼmo keya aeʼna ge huʼnova afinatetiʼmo maleʼnogetaeʼmo kagaefeʼmo kagava maime maime eʼnone, huno huʼniyaʼmofeʼmo Soloʼmo ani afinaʼmo Samiyoʼeʼmo magokepiʼmo neʼyaʼmo neʼniye.

²⁵ Henagaʼamo apakaemo ani aise aveleʼmo haneʼniya kotetiʼmo ataleʼa taonifiʼmo uʼa lamiʼnae. Samiyoʼmo Soloʼa avalelino noʼamo anagamo uno haino Soloʼeʼmo kegeʼmo huʼnaʼae. Soloʼmo haniʼilagamo ani anaga nopiʼmo havaeʼniye.

²⁶ Gotilamiyapiʼmo Samiyoʼmo Solofeʼmo hunoʼaeʼmo, he tiyo. Nagaemo kokalegamo aliʼna katesugeka ugane. Inagi Soloʼmo he tino emineʼnigeʼanaeʼmo agaeʼe Samiyoʼeʼmo notetiʼmo ataleʼana kategamo uʼnaʼae.

Samiyoʼmo Soloʼa kini vekamo maisiyafeʼmo uvelimo lakino ateʼniya gemae

²⁷ Apakaemo uʼa taonimo agiʼnaleʼmo avaʼyi huteʼapaeʼmo Samiyoʼmo Solofeʼmo ha painoʼaeʼmo, Aliʼyakamo neʼaliya vekaeʼmo ha paigenoʼa uno hogotegaiyaʼmonanafa kagaemo aiseʼamo nagaeʼeʼmo he tika maiʼnegeʼnao Goti huʼniya gemo kaha paiguve, huno huʼniye.