1 Samiyo 8 - The Keyagana NT and 25 OT books

Isaleli vayaʼmogimo mago vekamoʼmo kini vekaʼapimo maisiyafeʼmo huʼnaya gemae

¹ Samiyoʼmo kosunaʼmo leʼniya afinaʼmo lole mafaʼneʼalamoganimo agoti gemo afisaʼafeʼmo anateʼniye.

² Yege mafaʼneʼamo agiʼamo Yoveliʼae. Anile mafaʼneʼamo agiʼamo Amiyaʼae. Anakaemo Misima taonifiʼmo maiʼneʼana agoti geʼapimo afiʼnaʼae.

³ Afiʼnaʼaʼmonanafa anakaemo afoʼanimoʼmo huʼniya kavaʼmo akame osuʼnaʼae. Anakaemo moni alisaʼafeʼmo hosu kavaʼmo huge hosu kavaʼmo hisaʼafeʼmo monimo alige agoti gemo afiʼana hosu huteʼanaeʼmo gemo alagepa huʼana aliʼana api oʼaige huʼnaʼae.

⁴ Hunaʼaʼmofeʼmo Isaleli vayatama vayaʼmo aliʼa anupa huteʼa Lama taonifiʼmo Samiyotegamo eʼnae.

⁵ Apakaemo huʼapaeʼmo, Afiyo, huʼa, kagaemo ago kosuna leʼnanageʼanaeʼmo lole mafaʼnekalaʼmoganimo kagaemo nehana kavaʼmo akame nosaʼae. Hemenimo kagaemo mago kini vekamo lekana paika ategenoʼao yagaino lateno. Agaemo alu nofi vayaʼai kini vayaʼmogi nehaya agufa kavaʼmo huno yagaino lategaiye, huʼa ha paiʼnae.

⁶ Ha paiʼnayaʼmonanafa Samiyoʼmo afigeʼnaya geʼapilefeʼmo amuse osuʼniyaʼmofeʼmo Ala kava nefeʼmo nunumuʼmo huʼniye.

⁷ Ala kava neʼmoʼa ha painoʼaeʼmo, Muki kaha paiʼnaya kavafeʼmo geʼapimo afiyo. Apakaemo apakameʼyamo okamiʼnafa nagaemo yagaiʼna oʼapatesuvafeʼmo apakameʼyamo namiʼnae.

⁸ Nagaemo Isipi kotegatiʼmo aepa faiteʼna apavaleliʼna eʼnova afinatetiʼmo apakaemo hosu kavaʼmo hume hume eʼa hemenimo nehae. Apakaemo apakameʼyamo namiteʼapaeʼmo aigofe gotigitefeʼmo mono huteʼa aliʼyaʼapimo neʼaliye. Apakameʼyamo namiʼnaya kava huʼa apakameʼyamo kamiʼnae.

⁹ Kamiʼnayaʼmofeʼmo geʼapimo afiyo. Afiganaʼmonanafa ehetapiye, huka hapa paikaeʼmo, Yagaino apatesiya kini vekamoʼmo hisiya kavafeʼmo hapa paiyo, huno ha paiʼniye.

¹⁰ Inagi Samiyoʼmo Ala kava neʼmoʼa muki ha paiʼniya gemo kini vekaeʼmo ge huʼa afigeʼnaya vayaʼaifeʼmo hapa paiʼniye.

¹¹ Ina gemo huno hapa painoʼaeʼmo, Yagaino lapatesiya kini vekamoʼmo ani agufa kavaʼmo lapakaetegamo hugiye. Agaemo ve mafaʼne anagatapimogi kame hisayafeʼmo lekana paino apatesigeʼa magoʼamogi kame talalafiʼmo he tiʼa maige magoʼamogi hosileʼmo fai maige huʼneʼa kamemo hugae. Kini vekamoʼmo mago haopalegamo ugefeʼmo hisiya afinaʼmo mago ve mafaʼne anagatapimogi hogoteʼa nagu nagu huʼa ugae,

¹² Kini vekamoʼmo mago vayaʼmo lekana paino apatesigeʼa vani tauseniʼa ati vayaʼaiteʼmo yagaiʼa apatege fifitiʼa ati vayaʼaiteʼmo yagaiʼa apatege hisaya kavaʼmo hugiye. Mago ve mafaʼne anagatapimogimo hoyaʼamo aiʼyumo aige magoʼamogimo hoyaʼafatiʼmo afu lesiya neʼyaʼmo alige magoʼamogimo kame hisaya yaʼmo alo huge magoʼamogimo kame talalaʼafatiʼmo kame hisaya yaʼmo alo huge hugae.

¹³ Agaemo magoʼamogi lapakae a mafaʼne anagaʼmo apavalesigeʼa aeto aeto agufa sinaʼamo alo huge magoʼamogi neʼyaʼamo alo huteʼa kaege magoʼamogi peleti mayaʼamo kaege hugae.

¹⁴ Agaemo hogote alagepa neʼya hoyatapigi nofi hoyatapigi olivi yosa hoyatapigi huno aliyaʼamo alisaya vayaʼaina alino apamigiye.

¹⁵ Agaemo teniʼa viti hayafatiʼe teni nofi alaga hetamafatiʼeʼmo alino fako huno magoke yaʼmo agaemo aliteno ani neʼyaʼmo alino yagaiʼa neʼapataya vayaʼe aliʼyaʼamo neʼaliya vayaʼeʼmo apamigiye.

¹⁶ Agaemo aliʼyatapimo neʼaliya ve anagaʼe aʼne anagaʼeʼmo apavalege hogote alagepa neya vayatapimo apavalege nokitapimo apavalege huteno alino agaiʼa aliʼyateʼmo apategaiye.

¹⁷ Agaemo muki teniʼa sipisipi anagatapifatiʼmo magoke magoke sipisipitapimo avalegaiye. Lapakaemo aliʼyaʼamo aligae.

¹⁸ Muki ani agufa kavaʼmo afole aitesigetapaeʼmo lapakaemo Ala kava nefeʼmo lapa maesiyafeʼmo lekana paitapa ateʼnaya kini vekatapimoʼmo hisiya kavafeʼmo alagi olapauʼninagetapa alopa gefatiʼmo keya aegayaʼmonanafa ani afinaʼmo Ala kava neʼmoʼa getapimo oʼafigiye, huno hapa paiʼniye.

¹⁹ Samiyoʼmo ani gemo hapa paiʼniyaʼmonanafa oʼafiʼa haʼao, huʼa, yagaino latesiya kini vekatimo alagi maigiye.

²⁰ Muki alu kotega vayaʼmo maiʼnaya agufa kava huta maigesune. Kini vekatimoʼa agoti getimo afige yagaino latege kame vayatiʼeʼmo kamemo huge hisiya kini vekaeʼmo lahauʼniye, huʼa huʼnae.

²¹ Inagi Samiyoʼmo ani vayaʼmogi muki huʼnaya gemo afitenoʼaeʼmo agaemo uno Ala kava nefeʼmo ani gemo ha paiʼniye.

²² Inagi Ala kava neʼmoʼa Samiyofeʼmo ina ge huno ha paiʼniye. Kanalene, huno, geʼapimo afiteka mago kini vekaʼapimo alika he tika ato, huno ha paiʼniye. Ha paiʼnigenoʼaeʼmo Samiyoʼmo uno Isaleli vayaʼaifeʼmo hapa painoʼaeʼmo, Mukiʼamogitapae, huno, notapilegamo viyo, huno hapa paiʼniye.