1 Samiyo 7 - The Keyagana NT and 25 OT books

¹ Inagi apakaemo Kiyati-Yilami taonifi ve anagaʼmogimo eʼa Ala kava neʼmo kotalake kesimo halate aliniʼuʼa mago aise avefiʼmo Aminanapi nopiʼmo maleteʼa mafaʼneʼamo Eliyesaʼmo kesileʼmo yagaisiyafeʼmo aliʼa aote ateʼnae.

Samiyoʼmo Isaleli vayaʼaiteʼmo yagaino apateʼniya gemae

² Ala kava neʼmo kesiʼamo yatala afinaʼmo tuvetiʼa kafugamo Kiyati-Yilami taonifiʼmo haneʼnigeʼa Isaleli vayaʼmogimo Ala kava neʼmoʼa hapa maesiyafeʼmo yulagefa aiʼa nunumu gefatiʼmo keya aeʼnae.

³ Inagi Samiyoʼmo muki Isaleli vayaʼaifeʼmo hapa painoʼaeʼmo, Lapakaemo lapaipamo alagi alita afe letetapa Ala kava netegamo halate esayana malaga vayaʼai aigofe gotiʼapimogi alita atalege a kanomo goti auneʼamo mono nehaya auneʼamo alita atalege hiyo. Lapakaemo Ala kava netefekeʼmo lapaipamo alo hutetapa agaiʼageʼmo akame hisayana Filisatini vayaʼai apayapatiʼmo lapakufamo alno katino lapategaiye, huno hapa paiʼniye.

⁴ Inagi Isaleli vayaʼmogimo Samiyoʼa huʼniya gemo afiteʼapaeʼmo aigofe goti aunemeʼamo Meliʼmo aliʼa atalege Asataloti auneʼamo aliʼa atalege huteʼa Ala kava nefekeʼmo mono huʼnae.

⁵ Samiyoʼmo hunoʼaeʼmo, Muki Isaleli vayaʼmo eta Misipa taonifiʼmo alita anupa hutapa maiʼnigeʼnao Ala kava nefeʼmo nunumuʼmo huʼna lapategauve, huno hapa paiʼniye.

⁶ Inagi apakaemo eʼa Misipa taonifiʼmo aliʼa anupa huʼa maiʼneʼa kelifatiʼmo aniʼmo hefiʼa Ala kava neʼmo ani aniʼmo ofalinimo amigekana agufa kavaʼmo huʼa mopafiʼmo lakiʼnae. Apakaemo neteʼe uneʼeʼmo neʼyaʼmo oʼneʼa mosiʼa maiʼneʼa ina gemo huʼapaeʼmo, Ala kava netegamo hosu kavaʼmo huʼnone, huʼa huʼnae. Samiyoʼmo Misipa taonifiʼmo Isaleli vayaʼaiteʼmo yagaino apateʼniye.

⁷ Filisatini vayaʼmogimo Isaleli vayaʼmo Misipa taonifiʼmo aliʼa anupa huʼa maiʼnae, huʼa huʼnaya gemo afiʼnae. Afiteʼapaeʼmo Filisatini kini vayaʼmogimo ati vayaʼapimo apavaleliʼa Isaleli vayaʼeʼmo kamemo hisayafeʼmo uʼnae. Isaleli vayaʼmogimo ani kavafeʼmo ava gemo afiteʼapaeʼmo koli huʼnae.

⁸ Koli huteʼapaeʼmo Samiyofeʼmo ha paiʼapaeʼmo, Kagaemo Ala kava neʼmo Gotitimoʼmo oʼataleka Filisatini vayaʼai apayapatiʼmo lagufa alino katino latesiyafeʼmo nunumuʼmo huka lato, huʼa huʼnae.

⁹ Inagi Samiyoʼmo nuʼmo neʼneya aikeli sipisipimo amagino atafiʼmo kaeno Ala kava neʼmo ofalinimo amiʼniye. Amitenoʼaeʼmo Ala kava nefeʼmo Isaleli vayaʼaitefeʼmo lokiya vaino nunumuʼmo huno apateʼnigenoʼaeʼmo Ala kava neʼmoʼa afitenoʼaeʼmo hapa maeʼniye.

¹⁰ Samiyoʼmo ofalinimo nehigeʼapaeʼmo Filisatini vayaʼmo Isaleli vayaʼeʼmo kamemo hisayafeʼmo ago eʼa hogo huʼnageno Ala kava neʼmoʼa Filisatini vayaʼaitegamo alopa gefatiʼmo hakalu huteno Filisatini vayaʼmogi apaipa apakesa afi yaʼmo alino hosuʼnigeʼa Isaleli vayaʼmogi kame huʼa aeʼa apakaseʼnae.

¹¹ Isaleli vayaʼmo Misipa taonifatiʼmo eʼa Filisatini vayaʼmo apavegala aeʼa asole Filisatini vayaʼmo kategamo kamitimo hapaeliʼuʼa Meti-Ka koʼmo haopaleʼmo uʼa avaʼyi huʼnae.

¹² Inagi Samiyoʼmo mago alopa yafaʼmo alino Misipa taoniʼe Seni koʼmoʼe folagapiʼmo ani yafaʼmo faino atetenoʼaeʼmo mani yafaʼmo agiʼamo Emanisa yafane, huʼna ateʼnove. Ala kava neʼmoʼa laha maeme laha maeme eno manileʼmo laha maeʼniye. Ani yafaʼmo agimo aepaʼamo laha maeʼniya yafane, huno ateʼniye.

¹³ Ala kava neʼmoʼa ani kavatetiʼmo Filisatini vayaʼmo alagi apatafauno apateʼnigeʼapaeʼmo Samiyoʼmo yagaino apateʼniya afinaʼmo eʼa Isaleli vayaʼmogi koteʼmo halate kamemo osuʼnae.

¹⁴ Akeyaʼvilagamo Filisatini vayaʼmogimo Isaleli vayaʼai taonimo Ekiloni taoniletiʼmo hanelinuno Gati taonileʼmo utegeno muki folagapi haneʼniya taonimo aliʼnae. Aliʼnayaʼmonanafa ani afinaʼmo halate Isaleli vayaʼaina apamiʼnae. Apakaemo Isaleli vayaʼmogi Emo vayaʼeʼmo magoʼe huʼa kame osuʼa alagepa huʼa magokepiʼmo lokaeʼa maiʼnae.

¹⁵ Samiyoʼmo Isaleli vayaʼaiteʼmo yagaino apateme apateme uno agaemo faliʼniye.

¹⁶ Agaemo kafugaʼae kafugaʼaeʼmo noʼamo ataleno uno Meto taonifinagi Giligo taonifinagi Misipa taonifinagi huno uneno huno Isaleli vayaʼmogi agoti geʼapimo afiteno alino api aino apateʼniye.

¹⁷ Agaemo ani kotegamo aliʼyaʼmo alino hano hutenoʼaeʼmo agaemo halate agaiʼa taonimo Lama taonifiʼmo uʼniye. Ani taonifiʼmo agoti gemo afiʼniye. Ani taonifiʼmo Ala kava netefeʼmo ofalini yafa hiyalamuʼamo huʼniye.