1 Samiyo 6 - The Keyagana NT and 25 OT books

Filisatini vayaʼmogi kotalake kesimo aliʼa ataleʼnageʼa halate Isaleli vayaʼaitegamo aliniʼa uʼnaya gemae

¹ Ala kava neʼmo kotalake kesimo Filisatini vayaʼai kotegamo seveniʼa kaimo hanetegeʼapaeʼmo

² apakaemo mono huʼa neʼapataya vayaʼe afole aisiya kavaʼmo neʼagaya vayaʼefeʼmo keya aeʼa ge huʼnageʼa eʼnageʼa ge huʼa apafigeʼnae, Lagaemo Ala kava neʼmo kotalake kesiʼaleʼmo na agufa kavaʼmo hugune. Haiya kava huta alita atesunageno koʼalegamo ugiye, huʼa ge huʼa apafigeʼnae.

³ Mono huʼa neʼapataya vayaʼe afole aisiya kavaʼmo neʼagaya vayaʼeʼmo huʼapaeʼmo, Lapakaemo Isaleli vayaʼmogi Gotiʼapimo kotalake kesimo alita atesageʼa aliniʼa visayaʼmoʼmo ani yaʼageʼmo alita apatesageʼa aliniʼa oʼviyo. Lapakaemo kavatapimo anonatapimo alita hano hisaya ofaliniʼeʼmo amitetapa alita apatesageʼa aliniʼa ugae. Ani kavaʼmo hisayaʼmoʼmo lapakaemo kaitatapimo lahapagesigetapa ageta alagepa hutetapaeʼmo ani hosu kavaʼmo huʼnonagenoʼaekeʼmo Gotiʼa kayoʼmo nelamiye.

⁴ Apakaemo huʼapaeʼmo, Inagi lagaemo na agufa ofalinimo Gotina amisune, huʼa ge huʼa apafigeʼnageʼapaeʼmo, Goliletiʼmo alita lapaya magokayagaʼa lapausageʼmo lapakufaleʼmo lapamaeʼniya auneʼamo alo huge lapaya magokayagaʼa kafamo auneʼamo alo huge hutetapa kotalake kesiʼeʼmo apamigeʼa aliniʼa viyo. Alopa kaitaʼmo lahapauʼniya kava hutapa kini vayatapimo kaitamo hapauʼniyaʼmofeʼmo lapaya magokayagaʼa auneʼamo alo hiyo. Kini vayatapimo lapaya magokayagaʼa vayaʼmo maiʼnaya kavatefeʼmo alo hiyo.

⁵ Hiyaʼmofeʼmo lapausageʼmo auneʼamo alo huge kafa anagaʼmogimo muki kotileʼmo aliʼa hosu huʼa neʼataya kafa anagaʼmogi apauneʼamo alo huge hutetapa Isaleli vayaʼai Gotiʼapimo hale konali yaʼmo amiyo. Agaemo magoʼe huno kayoʼmo olapamige gotitapimogimo kayoʼmo oʼapamige kotapimo alino hosu osuge hugiye.

⁶ Isipi vayaʼe Isipi kini vekaʼeʼmo apaipamo aliʼa lokiya vaiʼa ateʼnayaʼmonanafa Isaleli vayaʼmogi Gotiʼapimoʼmo himamu kavaʼmo Isipi vayaʼaitegamo huʼnigeʼa Isaleli vayaʼmo afaʼa apataleʼnageʼa Isipi kotegatiʼmo ataleʼa oʼuʼnafiye. Na kava higetapaeʼmo lapaipamo alita lokiya vaitapa nelapatae.

⁷ Inagi afiyo. Lapakaemo mago saufa talalamo alo hutetapa aliʼyaʼmo oʼaliʼnaʼa lole a pulumakalaʼmo ananaʼaulaʼmo nuʼmo neʼnaʼaʼmonanafa ananaʼaulaʼmo anavalelituta kegiʼyafiʼmo anateyo. Lapakaemo ani lole pulumakalateʼmo talalamo aeta anateyo.

⁸ Inagi Ala kava neʼmo kotalake kesiʼamo alita ani talalafiʼmo maleyo. Hosu kavatapimo anonatapimo hano hisiya ofalinimo goliletiʼmo alo huʼnaya yaʼmo alita mago kesifiʼmo maletetapa talalafiʼmo kotalake kesimo haopaleʼmo maleyo. Inagi lole a pulumakalaʼmoganimo uteʼana ani talalamo halauliʼana visaʼagetapaeʼmo afaʼa anatesageʼana ugaʼae.

⁹ Lapakaemo talalamo haiya kotegamo visifi hutapa agelitapa viyo. Kotalake kesiʼmoʼa koʼalegamo Metisemesi taoni kateʼmo akame huno visiyaʼmoʼmo lapakaemo Isaleli vayaʼmogi Gotiʼapimoʼmo lagaetegamo ani alopa hosu kavaʼmo huʼniye, hutapa agegae. Agegayaʼmonanafa ani kateʼmo oʼvisiyaʼmoʼmo lapakaemo ani alopa kana yaʼmo Gotiʼa olamiʼnifa agaiʼamo afaʼa afole aiʼniye.

¹⁰ Ani vayaʼmogimo ani gemo afiteʼapaeʼmo akame huʼnae. Apakaemo ani lole a pulumakalaʼmo anavaleʼa talalamo nofi aeʼana anateteʼana ani lole pulumakalaʼmogani ananaʼaulaʼmo anavaleliʼa uʼa kegiʼyafiʼmo anateʼnae.

¹¹ Apakaemo goliletiʼmo alo huʼnaya apausageʼmo auneʼe kafamo auneʼeʼmo mago kesifiʼmo maleteʼa ani kesiʼe kotalake kesiʼeʼmo aliʼa talalafiʼmo maleʼnae.

¹² Aliʼa maletageʼanaeʼmo lole pulumakalaʼmoganimo aepa faiʼana uʼanaeʼmo Metisemesi taonifi uʼniya kateʼmo alagi akame huʼana uʼnaʼae. Anakaemo ani kaʼmo aeʼana oʼagaseʼnaʼae. Kaʼmo ataleʼana hogo haopalega oʼuge lamaga haopalega oʼuge huʼnaʼae. Anakaemo anake aime aime uʼnaʼae. Naya magokayagaʼa Filisatini kini vayaʼmogimo talalamo akame huʼa uʼa Metisemesi hakuteʼmo uʼnae.

Kotalake kesimo Metisemesi taonifiʼmo hanete Kiyati-Yailimi taonifiʼmo hanete huʼniya gemae

¹³ Metisemesi vayaʼmogimo kagoʼmu koteʼmo vitimo hatagauʼa maiʼneʼapaeʼmo kategamo aulu heʼa agayana kotalake kesimo talalafiʼmo eʼnigeʼa ageteʼapaeʼmo apamogaga aiʼnae.

^14-15 Lole pulumakalaʼmoganimo talalamo halauliʼana Yasuvaʼmo mago Metisemesi vekamo mopaleʼmo eʼana mopafiʼmo mago alopa yafaʼmo haneʼniya haopaleʼmo he tiʼana maiʼnaʼae. Livai nofi vayaʼmogi eʼa Ala kava neʼmo kotalake kesiʼaʼe ani goliletiʼmo alo huʼnaya auneʼamo haneʼniya kesiʼeʼmo aliʼa ani alopa yafateʼmo maleʼnae. Inagi talala yosamo aliʼa atamo lagiʼa kaeʼnae. Apakaemo lole a pulumakalaʼmo anamagiʼa atafiʼmo kaeʼa Ala kava netefeʼmo nehaya agufa ofalinimo huʼnae. Ani afinaʼmo Metisemesi vayaʼmogimo magoʼe ofalinimo amiʼnae.

¹⁶ Naya magokayagaʼa Filisatini kini vayaʼmogi ani huʼnaya kavaʼmo ageteʼapaeʼmo ani afinaʼmo Ekiloni taonifilagamo halate uʼnae.

¹⁷ Filisatini vayaʼmogimo ani naya magokayagaʼa goliletiʼmo alo huʼnaya apausageʼmo auneʼaletiʼmo hosu kavaʼapimo anonaʼapimo miya faisayafeʼmo Ala kava neʼmo ofalinimo amiʼnae. Faefuʼa auneʼamo magoke magokeʼamoʼmo Asanoti taonigi Gasa taonigi Asakeloni taonigi Gati taonigi Ekiloni taonigi huno haneʼniya taonilefeʼmo amiʼnae.

¹⁸ Ina kava huʼa kafa anagaʼmogi apauneʼamo magoke magokeʼamogimo muki lokiya yafa kegiʼyamo haneʼniya taonigi aise taonigi huʼa faefuʼa Filisatini kini vayaʼmogi yagaiʼa apateʼnaya kotefeʼmo amiʼnae. Hemenimo ani alopa yafateʼmo kotalake kesimo maleʼnaya yafaʼmo Yasuvaʼmo ani Metisemesi vekamo hoyafiʼmo haneʼniye.

¹⁹ Sevetiʼa Metisemesi ve anagaʼmogi Ala kava neʼmo kotalake kesiʼafiʼmo ageʼnayaʼmofeʼmo Ala kava neʼmoʼa kamitimo apamagiʼniye. Agaemo ani taonifi maiʼnaya vayaʼmo sevetiʼa vayaʼmo kamitimo apamagiʼniyaʼmofeʼmo ani taonifi vayaʼmogi yulagefa aiʼnae. Ala kava neʼmoʼa asole vayaʼmo kamiti apamagiʼniyaʼmofeʼmae.

²⁰ Metisemesi ve anagaʼmogimo huʼapaeʼmo, Haiya vayaʼmogi ani aote Ala kava neʼmo Goti aulagaleʼmo he tiʼa maigae. Lagaemo ani kesimo haiya vayaʼaitegamo alita atalesunageno ugiye, huʼa huʼnae.

²¹ Huʼa huteʼa apakaemo apa vayaʼmo aliʼa apatageʼa uʼa Kiyati-Yilami taonifi vayaʼaifeʼmo huʼapaeʼmo, Filisatini vayaʼmogimo Ala kava neʼmo kotalake kesimo halate aliniʼeʼa lagae koteʼmo maleʼnae. Maleʼnayaʼmofeʼmo lapakaemo emitetapa alinita lapakaetegamo uta haiyo, huʼa huʼnae.