1 Samiyo 5 - The Keyagana NT and 25 OT books

Kotalake kesimo Filisatini kotegamo haneʼniya gemae

¹ Filisatini vayaʼmogimo Goti kotalake kesimo ago aliteʼapaeʼmo apakaemo Emanisa taonifatiʼmo aliteʼa Asanoti taoniʼapifilagamo aliniʼa uʼnae.

² Apakaemo kotalake kesimo aigofe gotiʼapimoʼmo Negoni mono nopiʼmo aliniʼa haiʼa Negoniʼmo yafatetiʼmo alo huʼa maleʼnaya auneʼamo haopaleʼmo maleʼnae.

³ Inagi egaʼamo netepiʼmo Asanoti vayaʼmo he tiʼa agayana Negoni aunemo mopafiʼmo augosalegatiʼmo Ala kava neʼmo kotalake kesi aulagamo asagauno aiʼnigeʼa ageʼnae. Apakaemo Negoniʼmo aliʼa noʼaleʼmo halate he tiʼa ateʼnae.

⁴ Inagi apakaemo haniʼilagamo havaeteʼapaeʼmo netepiʼmo mono notegamo uʼa auneʼamo agayana Ala kava neʼmo kotalake kesi aulagamo halate asagauno aiʼnigeʼa ageʼnae. Negoni agenopaʼe ayaʼeʼmo aino lo aeno kipateʼmo haneʼniye. Negoni alu yaʼageʼmo atupaʼamo haneʼniye.

⁵ Ani kavatefeʼmo mono huʼa neʼapataya vayaʼe Negonifeʼmo mono nehaya vayaʼeʼmo asagauno aiʼniya kipateʼmo apaiyamo oʼaeʼa aeʼa haleʼnae.

⁶ Ala kava neʼmoʼa Asinoti taonifi vayaʼe Asinoti haopaleʼmo maiʼnaya vayaʼeʼmo lusi kana yaʼmo apamiʼnigeno apakufaleʼmo hosu apausageʼmo apamaesiya kavaʼmo huʼniye.

⁷ Asinoti vayaʼmogimo ani kavaʼmo ageteʼa huʼapaeʼmo, Isaleli vayaʼai Gotiʼapimoʼmo lagaeʼeʼmo oʼmaigiye. Agaemo lagaeʼe gotitimoʼmo Negoniʼeʼmo lusi kava huno kayoʼmo lamiʼniye, huʼa huʼnae.

⁸ Huʼnayaʼmofeʼmo apakaemo mago vayaʼmo aliʼa apateʼnageʼa Filisatini kini vayaʼmo naya magokayagaʼa vayaʼaitegamo uʼa aliʼa anupa huʼa apateʼnae. Apakaemo huʼapaeʼmo, Lagaemo Isaleli vayaʼai Gotiʼapimo kotalake kesiʼalegamo na kavaʼmo hisune, huʼa apafi geʼnageʼapaeʼmo, Alinita Gati taonifiʼmo viyo, huʼa geʼapileʼmo aeʼa atagaina huʼnae. Ani gemo huʼnayaʼmofeʼmo apakaemo Isaleli vayaʼai Gotiʼapimo kesiʼamo aliniʼa uʼnae.

⁹ Aliniʼa uʼnageno Ala kava neʼmoʼa ani taonifiʼmo maiʼnaya vayaʼeʼmo lusi kava huno himamuʼaletiʼmo apamagiʼniye. Agaemo afa vayaʼe apaki haneʼniya vayaʼeʼmo hosu apausageʼmo apamaeʼniya kavaʼmo huʼniye.

¹⁰ Huʼniyaʼmofeʼmo apakaemo Goti kesiʼamo aliʼa apamiʼnageʼa Ikaloni taonifiʼmo aliniʼa uʼnae. Kotalake kesimo aliniʼa uʼa avaʼyi nehageʼapaeʼmo Ikaloni vayaʼmogimo alopa gefatiʼmo huʼapaeʼmo, Vaehae, huʼa, lagaeʼe vayatiʼeʼmo kamitimo lamagisiyafeʼmo Isaleli vayaʼai Gotiʼapimo kotalake kesiʼamo alini eʼnae, huʼa huʼnae.

¹¹ Inagi apakaemo Filisatini kini vayaʼaifeʼmo ge huʼnageʼa eʼnageʼapaeʼmo kini vayaʼaifeʼmo huʼapaeʼmo, Lapakaemo Isaleli vayaʼai Gotiʼapimo kesimo halate alita apamigeʼa aliniʼa agaiʼa koʼalegamo viyo. Agaemo lagaeʼe afamo anagatiʼeʼmo kamitimo olamagisiyafeʼmae, huʼa huʼnae. Gotiʼa himamuʼaletiʼmo lusi kava huno taonifiʼmo maiʼnaya vayaʼmo kamitimo apamagiʼniyaʼmofeʼmo ani gemo huʼnae.

¹² Ofaliʼa afaʼa maiʼnaya vayaʼmo apakufaleʼmo apausageʼmo apamaeʼniya vayaʼmogimo yulagefa aiʼnageno taonifatiʼmo yulagefa aiʼnaya gemoʼmo kokuʼnapiʼmo uno haiʼniye.