1 Samiyo 4 - The Keyagana NT and 25 OT books

Filisatini vayaʼmogimo kotalake kesimo aliʼnaya gemae

¹ Isaleli vayaʼmogi Filisatini vayaʼeʼmo kame hisayafeʼmo uʼa Emenisa taonimo haopaleʼmo seli noʼapimo aliʼa he tiʼa ateʼnageʼa Filisatini vayaʼmo Efeki taonifiʼmo seli noʼapimo aliʼa he tiʼa ateʼnae.

² Filisatini ati vayaʼmogimo kame hisayafeʼmo alo huteʼa eʼa Isaleli ati vayaʼeʼmo kamemo huteʼa huʼa aeʼa apaka seteʼa fo tauseniʼa agufa vayaʼmo kamitimo hapaeʼnae.

³ Isaleli ati vayaʼmogi seli noʼapilegamo halate eʼnageʼapaeʼmo Isaleli vayatama vayaʼmogi huʼapaeʼmo, Na kavaʼmo higenoʼaeʼmo Ala kava neʼmoʼa Filisatini vayaʼmo apateʼnigeʼapaeʼmo lagaemo aeʼa lagaseʼnae. Lagaemo mago vayaʼmo alita apatesunageʼa uʼa Sailo taonifatiʼmo Ala kava neʼmo kotalake kesiʼamo aliniʼa egae. Ani kesimoʼmo kame vayatimogi apayapatiʼmo lagufamo alino katino lategaiye, huʼa huʼnae.

⁴ Inagi apakaemo mago vayaʼmo aliʼa apatageʼa Sailo taonifilagamo uʼa Ala kava neʼmo muki vayaʼaiteʼmo yagaiʼniya vekamo lole enisole vekalaʼmogani anauneʼamo folagapiʼmo haneʼnigeʼa kotalake kesiʼamo aliʼnae. Apakaemo kesimo aliniʼa eʼnageʼana Ilai mafaʼnelaʼmo Hafaniʼe Finiyasiʼeʼmo kesileʼmo yagaitaʼageʼapaeʼmo ani vayaʼeʼmo magokepiʼmo lokaeʼa eʼnae.

⁵ Apakaemo seli noʼapimo aliʼa he tiʼa ateʼnaya yateʼmo eʼa avaʼyi huʼnageʼapaeʼmo muki Isaleli ati vayaʼmogimo alopa gefatiʼmo ge huʼnageno mopamoʼmo kanage kanage huʼniye.

⁶ Filisatini vayaʼmogimo ani ge huʼa keya aeʼa ge huʼnaya gemo afiteʼa huʼapaeʼmo, Na kavaʼmo higeʼapaeʼmo Himulu vayaʼmogi ani agufa gemo huʼa lusi kava huʼa ge nehae, huʼa huʼnageʼa mago vayaʼmogi huʼapaeʼmo, Ala kava neʼmo kesiʼamo seli noʼapileʼmo eʼniye, huʼa hapa paiʼnae.

⁷ Ani gemo afiteʼapaeʼmo koli huteʼa ina gemo huʼapaeʼmo, Gotiʼa Isaleli vayaʼmogi seli noteʼmo eʼniye. Vaehae, huʼa, ani agufa kavaʼmo afole oʼaiʼniyaʼmofeʼmo hosu yaʼmo aligune.

⁸ Vaehae, huʼa, Ina laʼmo laha maeno ani lokiya gotigi apayapatiʼmo lagufamo alino katino lategaiye. Ani gotigigeʼmo kaʼme kotegamo Isipi vayaʼmo alu hosu kayoteti alu hosu kayotetiʼmo apamagiʼnae.

⁹ Lokiya vaita maiyo. Ve anagaʼmogimo nehaya agufa kavaʼmo hutapa he tita lokiya vaita maiʼnetapa kamemo hiyo. Apakaemo lagaeteʼmo kalavusi aliʼyaʼmo aliʼnaya agufa kavaʼmo hutapa Himulu vayaʼaiteʼmo kalavusi aliʼyaʼmo aligae. Ve anagakana hutapa kame hiyo.

¹⁰ Inagi Filisatini vayaʼmogi kame huʼa Isaleli vayaʼmo aeʼa apaka seʼnageʼa muki Isaleli vayaʼmo ataleʼa apaune hetaleʼa seli noʼapilegamo uʼnae. Filisatini vayaʼmogi asole vayaʼmo kamitimo hapaeʼnae. Teti tauseniʼa Isaleli ati vayaʼmo alagi kamitimo hapaeʼnageʼa faliʼnae.

¹¹ Apakaemo Ilai lole mafaʼneʼalaʼeʼmo kamitimo hanaeteʼapaeʼmo Ala kava neʼmo kotalake kesiʼamo aliʼnae.

Ilaiʼmo faliʼniya gemae

¹² Mago ati vekamo Menisameni nofi vayapati vekamoʼmo kame nehaya yatetiʼmo ataleno nagu nagu huno ani afinakeʼmo Sailo taonifilagamo eno avaʼyi huʼniye. Agaemo kukenaʼamo alino apake aino ataleteno mopamo alino agenopafiʼmo maleteno eno avaʼyi huʼniye.

¹³ Eno avaʼyi huʼnigeno Ilaiʼmo ka agiʼnaleʼmo siyateʼmo fai maiʼniye. Agaemo Goti kotalake kesiʼaeʼmo agesa alaʼamo afiteno koli huteno yagaino maiʼniye. Inagi ani ati vekamo eno Isaleli vayaʼmo kame huʼa aeʼa apaka seʼnaya kavafeʼmo ava gemo huno vayaʼaifeʼmo hapa paiʼnigeʼa muki taonifiʼmo maiʼnaya vayaʼmogi lusi kava huʼa koli huteʼa alopa gefatiʼmo huʼnae.

^14-15 Ani afinaʼmo Ilaiʼmo naeti eitiʼa kafugamo maiʼnigeno aulagamo alagi fali kaeʼnigeno oʼageʼniye. Inagi Ilaiʼmo vayaʼmogimo apano aeʼnageno afitenoʼaeʼmo agaemo hunoʼaeʼmo, Na kavaʼmo higeʼapaeʼmo apano neʼae, huno apafi geʼnigeno ani ati vekamoʼmo malage huno Ilaitegamo eno ha paiʼniye.

¹⁶ Agaemo hunoʼaeʼmo, Hemenimo nagaemo kamefatiʼmo naune heʼna eʼnove, huno huʼnigeno Ilaiʼmo, Mafaʼneʼnimo, huno, na kavaʼmo afole aiʼniye, huno ge huno afi geʼniye.

¹⁷ Ani eʼniya ati vekamoʼmo geʼaleʼmo aeno atagaina hunoʼaeʼmo, Filisatini vayaʼmogimo lagaeʼeʼmo kame huteta huʼa aeʼa lagaseʼnageta laune he taleta eʼnonageʼa asole vayaʼmo faliʼnae. Apakaemo Hafaniʼe Finiyasiʼeʼmo kamitimo hanaeteʼa Goti kotalake kesiʼamo ago aliʼnae.

¹⁸ Ilaiʼmo Goti kotalake kesimo aliʼnaya kavafeʼmo ava gemo afitenoʼaeʼmo agaemo siyaʼaletiʼmo akamelegatiʼmo kegiʼya kipateʼmo asagauno aiʼnigeno lugoʼamo aeno apalo tiʼnigeno faliʼniye. Agaemo ago kosuna leʼnigeno afayamoʼmo huʼniyaʼmofeʼmo ago faliʼniye. Agaemo fotiʼa kafugamo Isaleli vayaʼaiteʼmo yagaino apateʼniye.

Finiyasi aʼmo faliʼniya gemae

¹⁹ Ani afinaʼmo Ilai anofeloʼamoʼmo Finiyasi aʼmo aipaguʼeʼmo maiʼneno mafaʼnemo alino atesiya kanaʼamo ago hogo huʼniye. Filisatini vayaʼmogimo Goti kotalake kesiʼamo ago alige kanofelokamoʼe anaukamoʼeʼmo anakaemo falige huʼnaʼae, huʼa ha paiʼnageno afiʼniye. Afitenoʼaeʼmo mafaʼnemo alino atesiyafeʼmo agafu kiʼnigeno mafaʼnemo alino ateʼniye.

²⁰ Agaemo falisiya kanaʼamo hogo huʼnigeʼapaeʼmo ha maeʼnaya aʼne anagaʼmogi huʼapaeʼmo, Kagaemo ve mafaʼnemo ago alika ateʼnanaʼmofeʼmo koli osuvo, huʼa ha paiʼnayaʼmonanafa geʼapieʼmo agesamo oʼafino geʼapileʼmo aeno atagaina osuʼniye.

²¹ Osuʼniyaʼmonanafa agaemo hunoʼaeʼmo, Agaemo mafaʼnemo agiʼamo Ikamotiʼae, huno ateʼniye. Ani agimo aepaʼamo hale konali yaʼmo ago lataleno uʼniye. Goti kotalake kesimo ago aliʼnayaʼmofeʼmo Goti ha le konali yaʼamo Isaleli vayaʼmo apataleno uʼniye, huno huʼniye.

²² Agaemo hunoʼaeʼmo, Goti kotalake kesimo ago aliʼnayaʼmofeʼmo Goti ha le konali yaʼamo Isaleli vayaʼmo apataleno uʼniye, huno hapa paiʼniye.