1 Samiyo 31 - The Keyagana NT and 25 OT books

Soloʼe mafaʼne anagaʼaʼeʼmo kamefatiʼmo faliʼnaya gemae

¹ Filisatini vayaʼmogimo Isaleli vayaʼeʼmo Gimova avefiʼmo kamemo huteʼapaeʼmo mago Isaleli vayaʼamo Gimova avefiʼmo faliʼnae. Mago Isaleli vayaʼamo kamefatiʼmo ataleʼa apaune heʼnae.

² Soloʼe mafaʼne anagaʼaʼeʼmo apaune heʼnayaʼmonanafa Filisatini vayaʼmogimo apavegala aeliʼuʼa Soloʼmo loleʼe magoʼe mafaʼne anagaʼamo Yonataniʼagi Aminanapiʼagi Makisuvaʼagi huʼa kamitimo hapaeʼnageʼa faliʼnae.

³ Filisatini ati vayaʼmogi Soloʼeʼmo lusi kava huʼa kamemo huteʼa keveletiʼmo aeʼnageno falisiya kavaʼmo huʼniye.

⁴ Faligefeʼmo hunoʼaeʼmo neya vekamoʼmo kame nehiya yaʼaleʼmo neʼaliya vekaeʼmo ha painoʼaeʼmo, naipekaletiʼmo nagaemo naigeʼna falino. Fiku yanageʼa Goti gemo noʼafiya vayaʼmo malaga vayaʼmogi eʼa nagaetefeʼmo apamogaga aiʼa nagufaleʼmo hosu kavaʼmo hugae, huno ha paiʼniye. Huno ha paiʼniyaʼmonanafa ani neya vekamoʼmo lusi kava huno koli huteno Soloʼmo naipeletiʼmo oʼaeʼniye. Oʼaeʼniyaʼmofeʼmo Soloʼmo agaiʼa naipemo akoʼyaʼaleʼmo asagauno aino yagalu neteno faliʼniye.

⁵ Ani neya vekamoʼmo ageʼniyana ago faliʼnigeno agetenoʼaeʼmo agaiʼamo naipemo akoʼyaʼaleʼmo asagauno aino yagalu neteno Soloʼeʼmo magokepiʼmo faliʼniye.

⁶ Ani afinakeʼmo Soloʼe loleʼe magoʼe mafaʼne anagaʼagi ani neya vekagi muki ati vayanagi huʼa ago faliʼnae.

⁷ Kagoʼmu koʼmo mugagayaga aveleʼmo maiʼnaya vayaʼmogi apakeʼnayana Isaleli ati vayaʼmo apaune heʼnageʼa apakege Soloʼe mafaʼne anagaʼaʼeʼmo faliʼnageʼa apakege huteʼa taoniʼapifatiʼmo ataleʼa apaune heʼnae. Apakaemo taoniʼapimo ataleʼnageʼapaeʼmo Filisatini vayaʼmogimo eʼa ani taonimo aliteʼa maiʼnae.

⁸ Kamemo ago huʼa hano huteʼapaeʼmo egaʼamo Filisatini vayaʼmo eʼa faliʼnaya Isaleli vayaʼai yaʼapimo alisayafeʼmo eʼa apakayana Soloʼe loleʼe magoʼe mafaʼne anagaʼamogi huʼa ago faliʼnageʼa apakeʼnae.

⁹ Apakaemo Solo agenopamo heʼa hatagauteʼa kame kukenaʼamo asagiʼa maleʼnae. Apakaemo mago vayaʼmo aliʼa apateʼnageʼa Filisatini kotegamo uʼeʼa huʼa ani faigoko gemo aigofe gotigi nopiʼmo aeʼa hakalo huʼa hapa paige muki vayaʼaifeʼmo hapa paige huʼnae.

¹⁰ Apakaemo Solo kame kukenaʼamo aigofe goti a kanomo agiʼamo Asatalo mono nopiʼmo maleteʼa Solo agufaʼe loleʼe magoʼe mafaʼneʼamogi apakufaʼeʼmo aliniʼuʼa Metasani taonimo kegiʼyaleʼmo nili aiʼnae.

^11-12 Yemesi–Giliyati taonifiʼmo maiʼnaya vayaʼmogimo Filisatini vayaʼmogimo Solotegamo huʼnaya kavafeʼmo ava gemo afiteʼapaeʼmo koli osuʼa lokiya vayaʼmogi he tiʼa muki haniʼilagamo uʼa Metasani taoni kegiʼyaletiʼmo Solo agufaʼe mafaʼne anagaʼmogi apakufaʼeʼmo akaiʼa taoniʼapilegamo aiʼa atagineʼa eʼa apakufaʼamo atafiʼmo kaeʼnae.

¹³ Apakaemo kaeteʼa apayamufamo Yemesi taonifiʼmo mago yosa aepafiʼmo kiʼa apateteʼa seveniʼa afinaʼmo neʼyaʼmo mosiʼa maiʼnae.