1 Samiyo 30 - The Keyagana NT and 25 OT books

Neviniʼe ati vayaʼaʼeʼmo uʼa Amaleki vayaʼeʼmo kamemo huʼnaya gemae

¹ Neviniʼe ati vayaʼaʼeʼmo loleʼe magoʼe afinaʼmo uʼa Sikalagi taoniʼapifiʼmo avaʼyi huteʼapaeʼmo apakaemo ageʼnayana Sikalagi taonimo hosuʼnigeʼa ageʼnae. Amaleki vayaʼmogi Yuta kotega hoga haopalega uʼa kamemo huteʼa Sikalagi taonimo ata kaeʼa ataleʼnae.

² Amaleki vayaʼmogi magoʼamo kamitimo ohapaeʼnayaʼmonanafa Sikalagi taonifiʼmo maiʼnaya aʼne anaganagi ina agufa vayanagi apaki haneʼniya vayanagi kalavusi huʼa apateteʼa apava leliʼa uʼnae.

³ Neviniʼe ati vayaʼaʼeʼmo Sikalagi taonifiʼmo uʼa avaʼyi huteʼapaeʼmo agayana taonimo ago ata leʼnigeʼa aʼne anagaʼapigi mafaʼne anagaʼapigi a mafaʼne anagaʼapigi huʼa apatafauʼa apavaleliʼa uʼnae.

⁴ Inagi Neviniʼe avagi huʼa uʼnaya vayaʼeʼmo lusi kava huʼa aviʼyaʼmo hume hume uʼnageno aviʼyaʼmo hisaya lokiyaʼapimo ago hano huʼniye.

⁵ Apakaemo Nevini aʼalaʼmo Ahinovamiʼagi Amigeʼagi huʼa anavaleliʼa uʼnae.

⁶ Muki vayaʼamogi ve mafaʼneʼapilefenagi a mafaʼneʼapilefenagi huʼa apakesamo afiteʼapaeʼmo hosu apaipamo kaliʼniyaʼmofeʼmo apakaemo huʼapaeʼmo, Yafa kayotetiʼmo Neviniʼmo kamitimo amagigune, huʼa hagenoʼaeʼmo Neviniʼmo lusi kana yaʼmo aliʼniye. Kana yaʼmo alitenoʼaeʼmo Neviniʼmo agaiʼamo Ala kava neʼmo Gotiʼamotetiʼmo lokiya vaino ateʼniye.

⁷ Inagi Neviniʼmo mono huno neʼapateya vekamo Amiyataʼmo Ahimeleki mafaʼneeʼmo ha painoʼaeʼmo, Kahoke hove, huno, Mono huʼa neʼapataya lavolavomo alinikeno Gotiʼa hisuna kavaʼmo alino laveligiye, huno huʼnigeno alinino eʼniye.

⁸ Neviniʼmo Ala kava nefeʼmo ina ge huno ge huno afinoʼaeʼmo, Nagaemo uʼna ani vayaʼmo apavegala aegaufiye. Visuvana apakaetegamo uʼna avaʼyi hisufiye, huno ge huno afigeʼnigenoʼaeʼmo, Uka apavegala ao. Kagaemo uka apakaetegamo avaʼyi hutekaeʼmo muki kagemi yatapimo halate alige ane anagatapiʼe mafaʼne anagatapiʼeʼmo halate apavalege hugane, huno ha paiʼniye.

⁹ Huno ha paiʼniyaʼmofeʼmo Neviniʼe sigisi hataletiʼa vayaʼeʼmo uʼa Emaleki vayaʼmo apavegala aeʼnae. Apakaemo Mesoli aise aniteʼmo uʼa avaʼyi huteʼapaeʼmo mago vayaʼamo magoʼe huʼa afaʼa oʼuʼnae. Tu hataletiʼa agufa vayaʼmo apakufafilagatiʼmo lusi kava huno alagaʼmo hapaeʼnigeʼapaeʼmo aniʼmo lakaeʼa afaʼa oʼuʼnae.

¹⁰ Neviniʼe fo hataletiʼa vayaʼaʼeʼmo alagaʼmo hapaeʼniya vayaʼmo apataleʼneʼa apavegala aeʼnae.

¹¹ Neʼuʼapaeʼmo mago Isipi neya vekamo ageteʼapaeʼmo avaleliʼa Nevinitegamo eʼnae. Apakaemo mago peleti mayamo amiʼnageno neʼniye. Ateʼnageno aniʼmo neʼniye.

¹² Apakaemo mago fiki alagamo vaiʼniya hayagi vaiʼniya nofi alagamo lole hayalanagi huʼa amiʼnageno ago netenoʼaeʼmo halate lokiya vaiʼniye. Agaemo loleʼe magoʼe afinaʼmo neʼyaʼmo oʼnege aniʼmo oʼnege huʼniyaʼmofeʼmo neʼyafeʼmo fali kavaʼmo huʼnigeno lokiyaʼamo ohaneʼniyaʼmofeʼmae.

¹³ Inagi Neviniʼmo ina ge huno ge huno afi geʼniye. Kagaemo yagaino nekateya vekamo ina laʼae. Kagaemo haiya kotega vekamae. Agaemo hunoʼaeʼmo, Nagaemo Isipi neya vekamoʼnamo mago Emaleki vekamo aliʼyaʼamo neʼaluva vekamae. Nagaemo kaitaʼmo nahauʼnigenoʼaeʼmo aliʼyaʼnimo afoʼamoʼmo nataleno uʼnigeʼnaeʼmo nagaiʼnigeʼmo loleʼe magoʼe afinaʼmo maiʼnove.

¹⁴ Lagaemo lamaga haopalegamo Yuta kotegamo uta Keleti vayanagi Kelepi vayaʼenagi huta kame huteta Sikalagi taonimo kaeʼnone, huno ha paiʼniye.

¹⁵ Huno ha paiʼnigeno Neviniʼmo ge huno afinoʼaeʼmo, Kagaemo afaʼa navalelika ani Emaleki vayaʼaitegamo ugapiye, huno ge huno afi geʼnigenoʼaeʼmo, Kagaemo Goti agiʼaletiʼmo polomasi gemo hukaeʼmo, Nagaemo kamitimo okamagige yagaino nekateya vekamo kavaleʼna oʼamige huguve, huka hutegeʼnao, nagaemo kavaleliʼna uguve.

¹⁶ Ani Isipi vekamoʼmo Neviniʼmo avalelino Emaleki vayaʼaitegamo uʼniye. Emaleki vayaʼmo aiʼa atagu faiʼa muki mopaleʼmo neʼyaʼmo nege aniʼmo nege ogefage huge huʼnae. Apakaemo Filisatini vayaʼaitegatiʼe Yuta vayaʼaitegetiʼeʼmo asole kagemiya alige pulumaka anagaʼmo apavalege sipisipimo anagaʼmo apavalege huʼnayaʼmofeʼmo lusi kava huʼa yagita huʼa neʼa apamogaga aiʼnae.

¹⁷ Inagi Neviniʼe ati vayaʼaʼeʼmo haniʼmo nehisigenoʼaeʼmo kamemo hume hume uno egamo haniʼmo nehisigenoʼaeʼmo kamemo huʼa hano huʼnae. Apakaemo muki Emaleki vayaʼmo kamitimo hapaeʼnayaʼmonanafa fo hataletiʼa neya vayaʼmogi kamo afuleʼmo fai maiʼneʼa faiʼa kasalo paeʼnae.

¹⁸ Neviniʼmo muki yaʼmo Emaleki vayaʼmogi aliniʼa uʼnaya yaʼmo halate alige halate lole aʼalaʼmo anavalege huʼniye.

¹⁹ Neviniʼmo muki yaʼmo alige vayaʼe afuʼeʼmo halate apavalege hulino eʼniye. Magoke yaʼapimo alagi lageso osuʼniye. Muki vayaʼmogi muki ve mafaʼne anagaʼapimo a mafaʼne anagaʼapimo afaʼa maiʼnageʼa apavaleʼnae.

²⁰ Apakaemo Emaleki vayaʼmogi apavaleliʼa uʼnaya pulumaka anagaʼapigi sipisipi anagaʼapigi huʼa apavaleliʼuʼa hogoteʼnaya afu anagaʼaifeʼmo Neviniʼmo hunoʼaeʼmo, Ani afu anagaʼmo nagaiʼni afue, huno hapa paiʼniye.

²¹ Apakaemo ani tu hataletiʼa vayaʼmo Neviniʼeʼmo lokaeʼa visaya lokiyaʼapimo ohaneʼnigeʼa Mesoli aniteʼmo apakava maiʼnaya yateʼmo uʼa avaʼyi huʼnae. Apakaemo ani vayaʼmo eʼa Neviniʼe ve aʼneʼeʼmo fotu huʼnagenoʼaeʼmo Neviniʼmo eno gemo apamamaeʼniye

²² Inagi mago alagi hosu vayaʼmogi Neviniʼeʼmo magokepi lokaeʼa uʼnaya ati vayaʼmogimo huʼapaeʼmo, Ani vayaʼmogi lagaeʼeʼmo magokepiʼmo oʼuʼnayaʼmofeʼmo lagaemo kamemo huteta kamefatiʼmo alinita eʼnona yapatiʼmo oʼaligae. Apakaemo aʼne mafaʼneʼapigekeʼmo apavaleliʼa ugae, huʼa huʼnae.

²³ Ani gemo huʼnayaʼmonanafa Neviniʼmo hunoʼaeʼmo, Konagaʼnimogitapae, huno, Lapakaemo Ala kava neʼmoʼa fikumo lamiʼniya yatefeʼmo ani gemo osiyo. Ala kava neʼmoʼa alagepa huno yagaino lateteno lagaeʼeʼmo kamemo hisaya vayaʼmo apavaleno layapiʼmo apateʼniye.

²⁴ Ina laʼmo lapakae gelefeʼmo hunoʼaeʼmo, Kanale gemo nehae, huno hugiye. Lagaemo alagepa huta alita fako huta muki vayaʼaina magoke aiyaya huta apamigune. Apakaemo kagemiyatileʼmo yagaiʼa maiʼnaya vayaʼmogiʼe kamefiʼmo uʼnaya vayaʼmogiʼeʼmo magoke aiyaya huʼa aligae, huno hapa paiʼniye.

²⁵ Neviniʼmo ani kavatefeʼmo huʼniya gemo alino Isaleli vayaʼmogimo muki afinaʼmo akame hisaya keʼaepa gemo hu maleʼniye.

²⁶ Neviniʼmo halate Sikalagi taonifiʼmo eʼniya afinaʼmo kamefatiʼmo mago aliʼnaya yaʼmo ao vayaʼmo Yuta nofi vayaʼaiteʼmo neʼyagaiya vayaʼaina apamitenoʼaeʼmo, Ala kava neʼmo kame vayaʼamogi yaʼmo aliʼnona yapatiʼmo lapamune, huno huʼniye.

²⁷ Neviniʼmo ani fiku apamiʼniya yaʼmo muki mani taoniʼafiʼmo maiʼnaya vayaʼaina apamiʼniye. Meto taonifi maiʼnaya vayanagi lamaga Lamoti taonifi maiʼnaya vayanagi Yati taonifi maiʼnaya vayanagi

²⁸ Alove taonifi maiʼnaya vayanagi Sifamoti taonifi maiʼnaya vayanagi Esatemova taonifi maiʼnaya vayanagi

²⁹ Leka taonifi maiʼnaya vayanagi Yelami taonifi maiʼnaya vayanagi kini vayaʼmogi taonifi maiʼnaya vayanagi

³⁰ Homa taonifi maiʼnaya vayanagi Kolasa taonifi maiʼnaya vayanagi Etaki taonifi maiʼnaya vayanagi

³¹ Himaloni taonifi maiʼnaya vayanagi huno apamiʼniye. Agaemo mago yaʼamo agaeʼe ati vayaʼaʼeʼmo uʼeʼa huʼa maiʼnaya kote maiʼnaya vayaʼaina apamiʼniye.