1 Samiyo 3 - The Keyagana NT and 25 OT books

Ala kava neʼmoʼa hogote afinaʼmo Samiyofeʼmo ge huʼniya gemae

¹ Neya mafaʼnemo Samiyoʼmo Ala kava neʼmo aliʼyaʼamo aliʼnigeno Ilaiʼa yagaino ateniya afinaʼmo Ala kava neʼmoʼa Isaleli vayaʼaifeʼmo magoke magoke afinaʼatomo gemo hapa paiʼniye. Ala kava neʼmoʼa apamiʼniya alagamuna oʼageʼnayaʼmofeʼmo muki vayaʼmogimo Ala kava neʼmo geʼamo oʼafiʼnae.

² Ani agufa afinaʼmo mago haniʼilagamo Ilaiʼmo mono noʼafiʼmo nehavaeya yateʼmo havaeʼniye. Aulagamo fali kaeʼniyaʼmofeʼmo alagepa huno oʼageʼniye.

³ Samiyoʼmo Goti kotalake kesiʼamo haneʼniya yapiʼmo havaeʼnigeno kotisiyafeʼmo hogo huʼniyaʼmonanafa lamumoʼmo leʼniye.

⁴ Inagi Ala kava neʼmoʼa Samiyofeʼmo ge hunoʼaeʼmo, Samiyo, huno huʼnigeno ve, huno, nagaemo maiʼnove, huno huʼniye.

⁵ Agaemo he tino nagu nagu huno Ilaitegamo uno hunoʼaeʼmo, Nagaefeʼmo ge huʼnanaʼmofeʼmo eʼnove, huno huʼniyaʼmonanafa Ilaiʼmo hunoʼaeʼmo, Kagaefeʼmo ge osuʼnove. Halate uka havao, huno hapaiʼnigeno uno havaeʼniye.

⁶ Ala kava neʼmoʼa halate agaefeʼmo ge huʼnigenoʼaeʼmo Samiyoʼmo he tino uno Ilaifeʼmo hunoʼaeʼmo, Kagaemo nagaefeʼmo ge huʼnanaʼmofeʼmo nagaemo eʼnove, huno huʼniyaʼmonanafa Ilaiʼmo hunoʼaeʼmo, Mafaʼneʼnimogae, huno, nagaemo kagaefeʼmo ge osuʼnove. Kagaemo halate uka havao, huno ha paiʼniye.

⁷ Inagi hogoteno Ala kava neʼmoʼa Samiyofeʼmo ge osuʼniyaʼmofeʼmo Samiyoʼa Ala kava neʼmo oʼageʼniye. Ala kava neʼmoʼa geʼamo alino ave oliʼnigeno oʼafiʼniye.

⁸ Ala kava neʼmoʼa henagaʼamo halate napa tali afinaʼmo Samiyofeʼmo ge huʼnigeno he tino Ilaitegamo uno hunoʼaeʼmo, Nagaefeʼmo ge huʼnanaʼmofeʼmo eʼnove, huno ha painiye. Inagi Ilaiʼmo afiʼniyana Ala kava neʼmokeʼmo Samiyofeʼmo ge nehiye, huno afiʼniye.

⁹ Afiʼniyaʼmofeʼmo Ilaiʼmo ha painoʼaeʼmo, Kagaemo uka halateʼmo havao. Havaeʼnisanagenoʼaeʼmo kagaefeʼmo ge hisigekaeʼmo inagi kagaemo ani gemo huka huvo. Ala kava nene, huka, aliʼyakamo neʼaluva vekamoʼna gekamo nagetafo huʼna afiʼnovaʼmofeʼmo naha paiyo, huka huvo, huno ha paiʼnigeno Samiyoʼa uno hipaleʼmo havaeʼniye.

¹⁰ Ala kava neʼmo eno he tiʼnenoʼaeʼmo hogoteno agaefeʼmo ge huʼniya agufa gemo huno, Samiyo, Samiyo, huno ge huʼniye. Samiyoʼa geʼaleʼmo aeno atagaina huno, Aliʼyakamo neʼaluva vekamoʼnamo afiʼnovanagi huvo, huno ha paiʼniye.

¹¹ Huno ha paiʼnigeno Ala kava neʼmoʼa Samiyofeʼmo hunoʼaeʼmo, Afiyo, huno, nagaemo mago kavaʼmo Isaleli vayaʼmogi folagapiʼmo huguvanageʼa ani kavafeʼmo ava gemo afisaya afinaʼmo lusi kava huʼa hapau aigae.

¹² Ani afinaʼmo muki hosu kavafeʼmo Ilai afamo anagafeʼmo gemo huʼnova agufa kavaʼmo aepa faiʼna huʼna hano huguve.

¹³ Lole mafaʼneʼalaʼmo alagi hosu vekalaʼmo aliʼana anateʼnaʼanageno Ilaiʼmo anatafauno oʼanateʼniyaʼmofeʼmo nagaemo ha paiʼnaeʼmo, Ageʼnana hosu kavatefeʼmo afamo anagakamo agoti huʼna apatesugeʼa muki afinaʼmo hosu kavategamo maige maige huʼa maigae,

¹⁴ Huʼniyaʼmofeʼmo nagaemo nagoʼyamo ataleʼna Ilai afamo anagafeʼmo hapa paiʼnaeʼmo, Ofalinimo hisaya kavatetiʼmo hosu kavatapimo aliʼna oʼatalesugeno hanege hanege huno hanegaiye, huʼna hapa paiʼnove.

¹⁵ Inagi Samiyoʼmo ani gemo afitenoʼaeʼmo havaeʼnigeno kotiʼniye. Samiyoʼmo he tinuno Ala kava neʼmo mono noʼafiʼmo kitamo yakiʼniye. Samiyoʼmo Ilaifeʼmo ani alagamuna agegekana huno afiʼniya gemo ha paisiyafeʼmo koli huʼniye.

¹⁶ Inagi Ilaiʼmo Samiyofeʼmo keya aenoʼaeʼmo, Samiyo mafaʼneʼnimogae, huno huʼnigeno he, huno, maiʼnove, huno huʼniye.

¹⁷ Ilaiʼmo agaefeʼmo hunoʼaeʼmo, Ala kava neʼmoʼa na agufa gemo kaha paiʼniye. Kagaemo mago gemo nagaefeʼmo fala kika oʼnato. Kagaemo mago kaha paiʼniya gemo fala kisanaʼmoʼmo Gotiʼa kagaetegamo alopa hosu kavaʼmo hino, huno ha paiʼniye.

¹⁸ Inagi Samiyoʼmo mago gemo fala okino muki geʼamo ha paiʼnigeno Ilaiʼmo afitenoʼaeʼmo, Agaiʼageʼmo Ala kava neʼmae. Hauʼnisiya kavaʼmo afaʼa hugiye.

¹⁹ Samiyoʼmo ko nesigenoʼaeʼmo Ala kava neʼmoʼa agaeʼeʼmo magokepiʼmo lokaeno maiʼneno ha maeʼnigeno Samiyo geʼamo mopafiʼmo fiku asagauno oʼaiʼniye.

²⁰ Muki haopalegamo maiʼnaya Isaleli vayaʼmogimo Neni taonifatiʼe Miyasipa taonifatiʼeʼmo eʼa maiʼnaya vayaʼmogimo Samiyoʼmo ageʼapaeʼmo Ala kava neʼmoʼa agaiʼalegati gemo alinineno aeno hakalo hisiya vekamo maisiyafeʼmo alagi alino he tino ateʼnigeʼa ageʼnae.

²¹ Ageʼnageno Ala kava neʼmoʼa Sailo taonifiʼmo halate Samiyotegamo afole aiʼniye. Ala kava neʼmoʼa Sailo taonifiʼmo emineno geʼaletiʼmo agaiʼamo alino aveliʼnigeno Samiyoʼmo ageʼniye. Inagi Samiyo geʼamo muki Isaleli vayaʼaitegamo afole aiʼniye.