1 Samiyo 29 - The Keyagana NT and 25 OT books

Filisatini vayaʼmogimo Neviniʼmo hapa maesiyafeʼmo ohapauʼniya gemae

¹ Filisatini vayaʼmogimo ami vayaʼapimo apavaleliʼa eʼa Afeki taonifiʼmo aliʼa anupa huʼnageʼa Isaleli vayaʼmogi Yesali taonifiʼmo aniʼmo haine neʼeya haopaleʼmo aliʼa anupa huʼnae.

² Faefuʼa Filisatini kini vayaʼmogimo ami vayaʼapifatiʼmo aliʼa fako huʼa vani hataleti vani hataleti huʼa aliʼa alu aiʼa maige vani tauseni vani tauseni huʼa aliʼa alu aiʼa maige huʼnaya vayaʼmogi apaulagaleʼmo uʼnae. Filisatini ati vayaʼmo uʼa hogotetageʼa Neviniʼe ati vayaʼaʼeʼmo henagamo kini vekamo Ekisiʼeʼmo uʼnae.

³ Filisatini ati vayaʼaiteʼmo neʼyagaiya vayaʼmogimo huʼapaeʼmo, Ani Himulu vayaʼmo manileʼmo na kavaʼmo nehae, huʼa huʼnageno Ekisiʼmo Filisatini vayaʼaiteʼmo neʼyagaiya vayaʼaifeʼmo hapa painoʼaeʼmo, Ani vekamo Neviniʼmo hogoteno Soloʼmo Isaleli vayaʼai kini vekaleʼmo aliʼyaʼmo aliʼniya vekamo maiʼniyaʼmonanafa Soloʼmo ataleʼneno yatala afinaʼmo agaemo nagaeʼeʼmo magokepi lokaeno maiʼniye. Agaemo muki afinaʼaeʼmo nagaeʼeʼmo magokepiʼmo lokaeno maiʼniyana nagaemo mago hosu kavaʼamo oʼageʼnove.

⁴ Agaemo ani gemo hapa paiʼniyaʼmonanafa Filisatini vayaʼaiteʼmo neʼyagaiya vayaʼmogi Ekisifeʼmo apaipamo leʼnigeʼa Ekisifeʼmo ha paiʼapaeʼmo, Kagaemo halate alika atagineka ategenoʼa amiʼnana taonifiʼmo vino. Agaemo lagaeʼeʼmo magokepi lokaeno kamelegamo oʼvino. Fiku yanageno agaemo lagaeʼeʼmo kamemo lahaegaiye. Agaemo ani kavaʼmo hisiyaʼmoʼmo lahaesiya kavatetiʼmo ala vekaʼaʼeʼmo alino nanu aeno ategaiye.

⁵ Ani Nevinifekeʼmo aʼne anagaʼmogimo ohageteʼapaeʼmo agaefeʼmo yokemo huʼa ateʼapaeʼmo, Soloʼmo tauseni tauseniʼa vayaʼmo kamitimo hapaeʼniyaʼmonanafa Neviniʼmo teni tauseni teni tauseniʼa vayaʼmo kamitimo hapaeʼniye, huʼa huʼnae, huʼa ha paiʼnae.

⁶ Inagi Ekisiʼmo Nevinifeʼmo keya aeno ge huno ha painoʼaeʼmo, Nagaemo maige maige huno neʼmaiya Isaleli vayaʼai Gotiʼapimo agiʼaletiʼmo nagaemo kagaefeʼmo alagi lama gemo huʼnaeʼmo, Kagaemo ati vayaʼmogitaʼeʼmo ukeka nehana afinaʼmo kanale kavaʼmo huʼnane. Kagaemo nagaetegamo eʼnana afinatetiʼmo maime maime uka hemenimo maiʼnana afinaʼmo hosu kavaʼmo kagaepiʼmo oʼageʼnove. Oʼageʼnovaʼmonanafa neʼyagaiya vayaʼmogimo amuse huʼa nokatae.

⁷ Amuse huʼa nokatayaʼmofeʼmo halate ataginekuka nokalegamo alagepa huka maiyo. Fiku yanageʼa Filisatini vayaʼaiteʼmo neʼyagaiya vayaʼmogi hosu apaipamo kaliʼa kategae, huno ha paiʼniye.

⁸ Inagi Neviniʼmo Ekisifeʼmo ha painoʼaeʼmo, Nagaemo na agufa hosu kavaʼmo huʼnove. Na kava higeʼnaeʼmo nagaemo kagaeʼeʼmo lokaeʼna uʼna kamemo osuguve, huno ge huno afigeʼniye.

⁹ Inagi Ekisiʼmo Nevini geʼaleʼmo aeno atagaina hunoʼaeʼmo, Naulagaleʼmo kagaemo Goti enisole vekaʼagana huka maiʼnanageno mago hosu kavakamo ohaneʼniyaʼmonanafa Filisatini vayaʼaiteʼmo neʼyagaiya vayaʼmogi huʼapaeʼmo, Agaemo lagaeʼeʼmo lokaeno kameleʼmo oʼugiye, huʼa huʼnae.

¹⁰ Huʼa huʼnayaʼmofeʼmo egamo kagaeʼe ati vayakaʼeʼmo haniʼilagamo he titapa alita alo hiyo. Inagi lapakaemo gotino hanelesigetapaeʼmo he tita kamiʼnova taonifiʼmo halate viyo, huno ha paiʼniye.

¹¹ Gotilamiyapiʼmo Neviniʼe ati vayaʼaʼeʼmo Filisatini kotegamo visayafeʼmo he tiʼa uʼnageʼa Filisatini vayaʼmogimo Yesali taonilegamo uʼnae.