1 Samiyo 28 - The Keyagana NT and 25 OT books

¹ Henagaʼamo Filisatini vayaʼmogimo Isaleli vayaʼeʼmo kamemo hisayafeʼmo ati vayaʼapimo apavaleʼa aliʼa anupa huʼa maiʼnae. Inagi Ekisiʼmo Nevinifeʼmo ha painoʼaeʼmo, Ago ageʼnanana kagaeʼe vayakaʼeʼmo nagaeʼeʼmo uta kamemo hugune, huno ha paiʼniye.

² Neviniʼmo Ekisifeʼmo ha painoʼaeʼmo, Kagaemo afaʼa hisuva kavaʼmo ago ageʼnane, huno huʼnigeno Ekisiʼmo ha painoʼaeʼmo, Kanalene, huno, muki afinaʼmo yagaiʼa neʼnataya vayaʼaiteʼmo yagaika apategane, huno ha paiʼniye.

³ Akeyaʼvilagamo Samiyoʼmo faliʼnigeʼa muki Isaleli vayaʼmogimo yulagefamo aiteʼa taoniʼamo Lama taonifiʼmo kiʼa ateʼnae. Ani afinaʼmo akeyaʼvilagamo faliʼnaya vayaʼai apauneʼeʼmo kege nehaya ve anaganagi aʼne anaganagi huno mukiʼamo ago alino hapa faino apataleʼniye.

⁴ Filisatini ami vayaʼmogimo aliʼa anupa huteʼa uʼa Sunemi taonifilagamo uʼnayaʼmofeʼmo Soloʼmo Isaleli ati vayaʼmo apavaleno alino Gimova taonileʼmo anupa huno apateʼniye.

⁵ Soloʼmo Filisatini ami vayaʼmo apaketenoʼaeʼmo koli huteno aipafiʼmo atete huʼniye.

⁶ Soloʼmo Ala kava nefeʼmo ge huno afi geʼniyaʼmonanafa Ala kava neʼmoʼa ha opaiʼniye. Agaemo mago alagamuna oʼamige hisaya kavaʼmo neʼagaya yafatetiʼmo Soloʼmo alino ave olige polofeti geʼapiletiʼmo ha opaige huʼniye.

⁷ Inagi Soloʼmo aliʼyaʼamo neʼaliya vayaʼaifeʼmo hapa painoʼaeʼmo, Lapakaemo uta mago faliʼnaya vayaʼai apauneʼeʼmo kege nehiya a kanolegamo afi ge huʼna afi gesuvafeʼmo kahauya hiyo, huno hapa paiʼnigeʼa apakaemo ha paiʼapaeʼmo, Ani agufa a kanomo Eno taonifiʼmo maiʼniye, huʼa ha paiʼnae.

⁸ Inagi Soloʼmo vayaʼmogimo ageʼa aeto osisayafeʼmo kini kukenaʼamo asagino maleteno alu kukenamo alino vaiʼniye. Haniʼilagamo agaemo aliʼyaʼamo neʼaliʼa vekalaʼmo anavaleʼnigeʼa uʼa ani a kanomo ageʼnae. Soloʼmo ani a kanoeʼmo ha painoʼaeʼmo, Mago faliʼniya vekamo auneʼamo avalelika haikeno. Agiʼamo aeʼna kaha paiguve, huno ha paiʼniye.

⁹ Inagi a kanomoʼmo hunoʼaeʼmo, Afiyo, huno, Soloʼmo huʼniya kavaʼmo ago ageʼnane. Agaemo muki Isaleli vayaʼmogimo faliʼnaya vayaʼai apauneʼeʼmo kege nehaya vayaʼmo ago alino hapa faino apataleʼniye. Na kava higekaeʼmo kagaemo humi nateʼnananageno Soloʼmo kamitimo namagigiye.

¹⁰ Soloʼmo agoʼyamo ataleteno polomasi gemo huno ha painoʼaeʼmo, Ala kava neʼmo agiʼaletiʼmo alagi kayoʼmo okamigae, huno ha paiʼnigeno

¹¹ A kanomoʼmo ina ge huno ge huno afi geʼniye, Ina laʼmo avaleliʼna hai nesuve, huno huʼnigeno Soloʼmo hunoʼaeʼmo, Samiyoʼmo avalelika haikeno, huno ha paiʼniye.

¹² Inagi a kanomoʼmo Samiyoʼmo avalelino haineʼniyaʼmonanafa ani a kanomo agetenoʼaeʼmo alopa gefatiʼmo keya aeno Solofeʼmo ha painoʼaeʼmo, Na kavaʼmo higekaeʼmo humi nateʼnane. Kagaemo Sologamae.

¹³ Kini vekamoʼmo hunoʼaeʼmo, Kagaemo koli osuvo. Kagaemo na agufa yaʼmo ageʼnane, huno huʼnigeno a kanomoʼmo Solofeʼmo ha painoʼaeʼmo, Nagaemo mago auneʼmo mopafatiʼmo haineʼnigeʼna ageʼnove.

¹⁴ Soloʼmo agaefeʼmo ge huno afi geʼniye, Haiya agufa auneʼmo maiʼniye, huno huʼnigeno a kanomoʼmo hunoʼaeʼmo, Agaemo kosuna vekamoʼmo yatala kukenamo vaino aliteno haine neʼe, huno ha paiʼniye. Inagi Soloʼmo ageʼniyana Samiyogeʼmae, huteno mopafiʼmo aleʼyamo faiʼneno ape huʼniye

¹⁵ Samiyoʼmo Solofeʼmo ha painoʼaeʼmo, Nagaemo alagepa huʼna maiʼnogi na kava higekaeʼmo navalelika haikekane, huno huʼnigeno Soloʼmo geʼaleʼmo aeno atagaina hunoʼaeʼmo, Nagaemo alopa kana yaʼnimo haneʼniye. Filisatini vayaʼmogimo eʼa nagaeʼeʼmo kamemo hugefeʼmo maiʼnae. Gotiʼa ago nataleʼniye. Nagaemo uʼna ge huʼna afigeʼnovana geʼnileʼmo aeno atagaina huno naha nopaiye. Agaemo polofeti geʼapiletiʼmo naha opaige alagamuna kavatetiʼmo alino nave olige huʼniye. Ani kavaʼmo huʼniyaʼmofeʼmo hisuva kavaʼmo alika nave lisanafeʼmo kagaefeʼmo keya aeʼnove.

¹⁶ Inagi Samiyoʼmo agaefeʼmo ha painoʼaeʼmo, Ala kava neʼmoʼa katalenuno kamekamo hamaleʼniyaʼmofeʼmo na kava higeka ge huka nafi keʼnane.

¹⁷ Ala kava neʼmoʼa nagae navayafatiʼmo kaha paiʼniya kavaʼmo ago huʼniye. Agaemo kayapatiʼmo Isaleli vayaʼaiteʼmo yagaika apatesana himamukamo alino kahafaleno ataleteno kahaopaleʼmo maiʼniya vekamo Nevinina amiʼniye.

¹⁸ Kagaemo Ala kava neʼmo geʼamo amagika ataleteka Ala kava neʼmoʼa Emaleki vayaʼaifeʼmo aipamo leno apateteno kagaefeʼmo hunoʼaeʼmo, Muki Emaleki vayaʼmo alino hosu huno apatalesiyafeʼmo kaha paiʼniya gemo akame osuʼnanaʼmofeʼmo hemenimo Ala kava neʼmoʼa kagaetegamo ani kavaʼmo huʼniye.

¹⁹ Ala kava neʼmoʼa magoʼe kavaʼmo huno kagaeʼe Isaleli vayaʼeʼmo lapavaleno Filisatini vayaʼai apayapiʼmo apamigiye. Egamo kagaeʼe mafaʼne anagakaʼeʼmo emiʼeʼa nagaeʼeʼmo lokaeta maigune. Ala kava neʼmoʼa magoʼe kavaʼmo huno Isaleli ami vayaʼmo Filisatini vayaʼai apayapiʼmo apavaleno apamigiye, huno ha paiʼniye.

²⁰ Soloʼmo ani gemo afitenoʼaeʼmo lusi kava huno koli huteno malageʼatomo mopafiʼmo asagauno aiteno havaeno maiʼniye. Soloʼmo ani afinaʼmo neteʼe uneʼe haniʼinagaʼeʼmo neʼyaʼmo oʼneʼniyaʼmofeʼmo lokiyaʼamo ohaneʼniye.

²¹ Ani a kanomoʼmo Solotegamo uno ageʼniyana lusi kana yaʼmo aliʼniye, huno agetenoʼaeʼmo, Afiyo, huno, aliʼyakamo neʼaluva a kanomoʼna gekamo akame huʼnove. Falisuva agufa kavaʼmo huʼnaeʼmo naha paiʼnana gemo afiteʼnaeʼmo huʼnove.

²² Huʼnovaʼmofeʼmo hemenimo aliʼyakamo neʼaluva aʼmoʼna geʼnimo afiyo. Kahao ke hove, nagaemo mago neʼyaʼmo kamisugeka negane. Kagaemo ago neka lokiya vaitekaeʼmo halate afaʼa ugane.

²³ Ani gemo huʼniyaʼmonanafa Soloʼmo hunoʼaeʼmo, Haʼao, neʼyaʼmo oʼnegauve, huno huʼnigeʼa aliʼyaʼamo neʼaliʼa vekalaʼe ani a kanoʼeʼmo Solofeʼmo haʼao, huʼa, neʼyaʼmo no, huʼa huʼnae. Agaemo huʼnaya gemo afiteno he tino hipaleʼmo fai maiʼniye.

²⁴ Ani a kanomoʼmo malage huno afayaʼaʼe aikeli pulumakaʼamo amagiteno ameʼamo kaeʼniye. Agaemo falaovaʼmo alino aeno apafu noleya peleti mayamo alo huteno kaeʼniye.

²⁵ Neʼyaʼmo ago leʼnigenoʼaeʼmo ani a kanomoʼmo alinino Solotegaʼe aliʼyaʼamo neʼaliʼa vekalaʼeʼmo apamiʼnigeʼa neʼnae. Ago neteʼapaeʼmo ani haniʼilagakeʼmo he tiʼa uʼnae.