1 Samiyo 27 - The Keyagana NT and 25 OT books

Neviniʼmo Filisatini vayaʼeʼmo alino ao yaʼmo huteno magokepiʼmo lokaeno maiʼniya gemae

¹ Neviniʼmo aipafiʼmo agesamo afinoʼaeʼmo, Soloʼmo mago afinaʼmo kamitimo nahaesigeʼna faliguve. Faliguvaʼmofeʼmo nagaemo naune heʼna uʼna Filisatini kotegamo maiʼnisugeno Soloʼmo alagaʼmo haesigeno magoʼe huno nagaefeʼmo kahauya osugiye. Nagaemo ani kavatetiʼmo faiʼna kasalo paegauve, huno agesamo afiʼniye.

² Inagi Neviniʼmo agaeʼeʼmo maiʼnaya sigisi hataletiʼa vayaʼaʼeʼmo Gati kini vekamo Akisiʼmo Maoki mafaʼnelegamo uʼnae.

³ Neviniʼe vayaʼaʼe afamo anagaʼapiʼeʼmo Gati taonifiʼmo maiʼnae. Neviniʼmo lole aʼalaʼmo agaeʼeʼmo magokepiʼmo lokaeʼa maiʼnae. Mago aʼmo agiʼamo Ahinovimiʼmo Yesali taonifi a kanomo maiʼnigeno alu aʼmo Amigeʼmo Kamo taonifi aʼmo ani hogote anauʼamoʼmo Neʼmo ago faliʼniya a kanomae.

⁴ Soloʼmo Nevinifeʼmo faigoko gemo afiʼniye. Neviniʼmo aune hetaleno uno Gati taonifilagamo maiʼniye, huʼa ha paiʼnageno magoʼe huno avegala oʼaiʼniye.

⁵ Inagi Neviniʼmo Akisifeʼmo ha painoʼaeʼmo, Kagaemo nao vekamo maiʼnisanaʼmoʼmo afaʼa natalegeʼna mago taonifilagamo uʼna maiguve. Fiku yanageʼna aliʼyakamo neʼaluva vekamoʼna kini vayaʼai taonifiʼmo kagaeʼeʼmo lokaeʼna maiguve, huno ha paiʼnigeno.

⁶ Akisiʼmo Nevini gemo afitenoʼaeʼmo Sikalagi taonimo amiʼniye. Amiʼniyaʼmofeʼmo Sikalagi taonimo Yuta kini vayaʼmogi taonimo haneʼnigeʼa hemeniʼeʼmo afaʼageʼmo maiʼnae.

⁷ Neviniʼmo Filisatini kotegamo magoke kafugaʼe loleʼe loleʼe kaiʼeʼmo maiʼniye.

⁸ Ani afinaʼmo Neviniʼe vayaʼaʼeʼmo uʼa Gesu vayanagi Gaya vayanagi Emaleki vayaʼenagi huʼa kamemo huʼnae. Ani nofi vayaʼmogimo akeyaʼvilagamo ani mopaleʼmo maiʼnae. Apakae mopamo Su kotegamo hanege hulinuno Isipi hakuteʼmo avaʼyi huʼniye.

⁹ Neviniʼe vayaʼaʼeʼmo kamemo huteʼapaeʼmo muki ve anaganagi aʼne anaganagi huʼa kamitimo hapaeteʼapaeʼmo sipisipiʼapigi ve pulumakaʼapigi nokiʼapigi kamoluʼapigi kukena yaʼapigi huʼa aliteʼa Ekisitegamo halate atagineʼa eʼnae.

¹⁰ Eʼnagenoʼaeʼmo Nevinifeʼmo ina ge huno ge huno afinoʼaeʼmo, Hemenimo lapakaemo haiyategamo uta kamemo huʼnae, huno ge huno afigeʼnigeno Neviniʼmo ha paiʼniye. Mago afinaʼmo ha painoʼaeʼmo, Lagaemo hoga kotegamo uta Yuta vayaʼeʼmo kamemo huʼnone, huno huge, mago afinaʼmo ha painoʼaeʼmo hoga kotegamo uta Yelami vayaʼeʼmo kamemo huʼnone, huno huge mago afinaʼmo ha painoʼaeʼmo, Lagaemo hoga kotegamo uta Keni vayaʼeʼmo kamemo huʼnone, huno ha paiʼniyaʼmonanafa aigofe gemo ha paiʼniye.

¹¹ Neviniʼmo agesamo afinoʼaeʼmo fiku yanageno mago vekamoʼmo uno Gati taonifiʼmo maiʼnaya vayaʼaifeʼmo nagaeʼe vayaʼniʼeʼmo nehuna kavafeʼmo hapa paigiye, huno agesamo afiʼniyaʼmofeʼmo mago hapa paisiya vekamo oʼmaisiyafeʼmo muki vayaʼmo ve anagaʼe aʼne anagaʼeʼmo kamitimo apamagiʼniye. Muki afinaʼmo Neviniʼmo Filisatini koteʼmo maiʼnenoʼaeʼmo ani kavaʼmo huʼniye.

¹² Inagi Ekisiʼmo Neviniʼa ha paiʼniya geeʼmo aipafiʼmo agesamo afinoʼaeʼmo, Lama ge hiye, huno afiʼniyaʼmofeʼmo ina gemo hunoʼaeʼmo, Neviniʼmo Isaleli vayaʼamogiʼeʼmo kamemo nehiyaʼmofeʼmo apakaemo lusi kava huʼa apaini huʼa ategae. Apaini huʼa atesageno Neviniʼmo aliʼyaʼnimo neʼaliya vekamo maige maige huno maigiye, huno huʼniye.