1 Samiyo 26 - The Keyagana NT and 25 OT books

Neviniʼmo napa tu afinaʼmo Solona agegeno ateʼniya gemae

¹ Mago Sifa nofi vayaʼmo Gimeya taonifiʼmo eʼa Solofeʼmo ha paiʼapaeʼmo, Neviniʼmo Yuta vayaʼai mopaleʼmo Hakila avemo yahaofilagamo fala kino maiʼniye, huʼa ha paiʼnayaʼmofeʼmo

² Soloʼmo tali tauseniʼa alagepa Isaleli ati vayaʼmo apavalelino Sifa yahaofilagamo uno Nevinifeʼmo kahauya huʼnae.

³ Soloʼmo Hakila aveleʼmo ka haopaleʼmo maige kumategamo havaege huno maiʼniye. Maiʼniyaʼmonanafa Neviniʼmo yahaofilagamo maiʼnenoʼaeʼmo Soloʼmo nagaefeʼmo kahauya hisiyafeʼmo yahaofilagamo eʼniye, huno afiʼniye.

⁴ Afiʼniyaʼmofeʼmo agaemo Soloʼmo ago eʼnifi oʼmeʼnifi huʼa apamasa huʼa kahauya huʼa agesayafeʼmo mago vayaʼmo alino apateʼnigeʼa uʼa ageʼnayana ago eʼniye, huʼa ageʼnae.

⁵ Inagi Neviniʼmo he tino Soloʼmo kumategamo neʼyaʼmo nege havaige huno maiʼniyategamo uno Soloʼe ami vayaʼaleʼmo neʼyagaiya vekamo Amina Ne mafaʼneʼeʼmo nehavaʼa yaʼmo ageno alagepa huʼniye. Soloʼmo mopafiʼmo folagapiʼmo havaeʼnigeʼa ati vayaʼamo havaeʼa vego huʼa ateʼnae.

⁶ Inagi Neviniʼmo Ahimalekiʼmo Hiti nofi vekaʼe Amisaiʼmo Yeluya mafaʼnemo Yomu aganaʼamoʼeʼmo hana painoʼaeʼmo, Lanakaepatiʼmo ina laʼmo nagaeʼeʼmo lokaetaʼa Soloʼmo neʼmaiya yategamo uguʼae, huno anafi geʼnigeno Amisaiʼmo hunoʼaeʼmo, Nagaemo kagaeʼeʼmo uguʼae, huno huʼniye.

⁷ Inagi ani haniʼilagamo Neviniʼe Amisaiʼeʼmo Soloʼmo mopafiʼmo havaeʼniya yategamo uʼana lamiʼnaʼae. Anakaemo agaʼana Soloʼmo ati vayaʼai folagapiʼmo havaeʼnigeno hayoʼamo agenopamo haopaleʼmo mopafiʼmo aeno he ti maleʼnigeʼana ageʼnaʼae. Aminaʼe ati vayaʼaʼeʼmo Soloteʼmo havaeʼa vego huʼa ateʼnae.

⁸ Inagi Amisaiʼmo Nevinifeʼmo hunoʼaeʼmo, Hemenimo Gotiʼa kagae kayapiʼmo kamekamo avaleno ateʼniye. Kahaoke hovanagi afaʼa natenegeʼna agaiʼa hayoletiʼmo haegauve. Lole afinaʼmo ohaegauve, huno ha paiʼniye.

⁹ Huno ha paiʼniyaʼmonanafa Neviniʼmo agaefeʼmo ha painoʼaeʼmo, Haʼao, alika hosu huka oʼato. Ala kava neʼmoʼa lekana paino ateʼniyaʼmofeʼmo mago vekamoʼmo amagisiyaʼmoʼmo hosu kavaʼmo anonaʼamo alagi hanegaiye, huno huteno

¹⁰ magoʼe huno ina gemo hunoʼaeʼmo, Ala kava neʼmoʼa afaʼa maiʼniya kava huno faligiye. Ala kava neʼmoʼa Soloʼmo amagisifi falisiya afinaʼmo afole aisigeno falisifi kame vayaʼmogimo kamefatiʼmo kamitimo haesafi hugae.

¹¹ Ala kava neʼmoʼa lekana paino ateʼniya vekamo amagisuva kaʼmo akani maleno. Oʼamagiganaʼmonanafa hayoʼaʼe ani keʼaʼeʼmo agenopamo haopaleʼmo haneʼniya yaʼmo alita uguʼae, huno ha paiʼniye.

¹² Inagi Neviniʼmo hayoʼaʼe ani keʼaʼeʼmo Solo agenopa haopaleʼmo haneʼnigeno alinino uʼniye. Anakaemo neʼvaʼageno mago vekamo anakaemo oʼanakege ani anakaemo huʼnaʼa kavaʼmo oʼagege he otige maiʼniye. Ala kava neʼmoʼa muki vayaʼamo alagi havaesayafeʼmo alino apateʼnigeʼa havaeʼnae.

¹³ Neviniʼmo lole avelaʼmo kagoʼmuʼmo aino lakaeno uno afagitega aveleʼmo he tino maiʼniye.

¹⁴ Agaemo Solo ami vayaʼalegaʼe Aminategaʼeʼmo keya aeno ge huʼniye. Agaemo ina ge hunoʼaeʼmo, Amanao, huʼna, Kagaemo keya neʼaova geʼnimo afiʼnapiye, huno huʼnigeno Aminaʼmo keya aeʼniye. Kagaemo ina lagamo kini vekaeʼmo keya neʼane.

¹⁵ Neviniʼmo Aminafeʼmo hunoʼaeʼmo, Isaleli vayapiʼmo haiya vekamoʼmo kagaekana huno maiʼniye. Kagaemo aeka apaka seʼnanaʼmofeʼmo na kava higeka kagaemo ala kini vekakaleʼmo alagepa huka yagaika noʼatane. Hemenitomo mago vekamoʼmo kini vekamo kamitimo haesiyafeʼmo havaeʼnayategamo uʼniye.

¹⁶ Kagaemo alagepa huka aliʼyaʼmo noʼaline. Muki afinaʼmo neʼmaiya Ala kava neʼmo agiʼaletiʼmo nagaemo alagi lama gemo huʼnaeʼmo, Ala kava neʼmoʼa kini vekamo lekana paino ateʼniya kini vekakaleʼmo alagepa huka yagaika oʼateʼnanaʼmofeʼmo hosu kavaʼmo anonakalefeʼmo afaʼa faligane. Kagaemo kini vekamo agenopamo haopaleʼmo haneʼniya hayoʼe ani keʼeʼmo ageyo. Afaʼa haneʼniyana hemenimo ohaneʼniye.

¹⁷ Soloʼmo ani Nevini agemo afitenoʼaeʼmo Nevinifeʼmo keya aeno ge huʼniye. Neviniyo, Mafaʼneʼnimogae, huʼna, Kagae gepiye, huno ge huno afi geʼnigenoʼaeʼmo Neviniʼmo hunoʼaeʼmo, Ala vekaʼnimogae, huʼna, he kini vekae, huʼna, nagae geʼmae.

¹⁸ Ala vekaʼnimogae, huʼna, Na kava higekaeʼmo aliʼyakamo neʼaluva vekamo natafausanafeʼmo kahauya nehane. Na agufa hosu kavaʼmo huʼnove.

¹⁹ Kini vekae, huʼna, kahaoke hovanagi geʼnimo afiyo. Ala kava neʼmoʼa alika hosu huka natesanafeʼmo alino he tino kateʼnisiyaʼmoʼmo ofalinimo amiguve. Vayaʼmogimo kagesamo faiʼnisayaʼmoʼmo Ala kava neʼmoʼa lifana huno apateno. Apakaemo Ala kava neʼmoʼa agae vayaʼaina fikumo neʼapamiya yapatiʼmo oʼalisuvafeʼmo naha faiʼa nataleʼnae. Apakaemo huʼapaeʼmo, Kagaemo uka alu gotigitefeʼmo mono hiyo, huʼa nehae.

²⁰ Inagi Ala kava neʼmo aulagaleʼmo kamitimo oʼnamagiyo. Kagaemo apakenopafi namamo atafaugefeʼmo nehapiye. Eka avelegamo mago namamo haegapiye.

²¹ Soloʼmo ani gemo afitenoʼaeʼmo Nevinifeʼmo hunoʼaeʼmo, Nagaemo hosu kavaʼmo huʼnove. Neviniyo mafaʼneʼnimogae, huʼna, Kagaemo halate nagaetegamo eno. Kagaemo kolanilefeʼmo kagesamo afikaeʼmo, alopa monimo aeno agaseʼniya yaʼmo haneʼniye, huka kagesamo afiʼnanaʼmofeʼmo magoʼe huʼna aliʼna hosu huʼna okatalegauve. Negi kavaʼmo huʼnaeʼmo lusi kava huʼna hosu kavaʼmo huʼnove, huno ha paiʼniye.

²² Neviniʼmo geʼaleʼmo aeno atagaina hunoʼaeʼmo, Kini hayoʼmo manileʼmo haneʼnigi mago neya vekamo alika ategeno eno alino.

²³ Ala kava neʼmoʼa hemenimo kavaleno nayapiʼmo kateʼniyaʼmonanafa Ala kava neʼmoʼa kagaemo kini vekamo maisanafeʼmo lekana paino kateʼniyaʼmofeʼmo aliʼna hosu huʼna okateʼnove. Ala kava neʼmoʼa muki vayaʼmogi fatago kavaʼe geʼapimo oʼataleʼa akame nehaya kavaʼeʼmo anonaʼapilefeʼmo alagepa miyaʼmo apamino.

²⁴ Nagaemo kolakaeʼmo nagesamo afiʼnaeʼmo alopa monileʼyaʼmo aeno agaseʼniya yaʼmo haneʼniye, huʼna nagesamo afiʼnova kavaʼmo Ala kava neʼmoʼa nagaetegamo hino. Agaemo muki hanageke kavapatiʼmo nagufamo alino katino nateno.

²⁵ Inagi Soloʼmo Nevinifeʼmo ina ge huno ha painoʼaeʼmo, Neviniyo mafaʼneʼnimogae, huʼna, Gotiʼa kaha maeno. Kagaemo lusi kavaʼmo huka aeka apaka seka maigane, huno ha paiʼnigeno Neviniʼmo ataleno uʼnigeno Soloʼmo halate koʼalegamo uʼniye.