1 Samiyo 25 - The Keyagana NT and 25 OT books

Samiyoʼmo faliʼniya gemae

¹ Inagi Samiyoʼmo faliʼnigeʼapaeʼmo Isaleli vayaʼmo eʼa aliʼa anupa huʼneʼa yulagefa aiʼa ateʼnae. Apakaemo noʼamo haopaleʼmo Lama taonifiʼmo kiʼa ateʼnae. Kiʼa atetagenoʼaeʼmo Neviniʼe vayaʼaʼeʼmo uʼa Palani yahaofilagamo maiʼnae.

Neviniʼe Nemo aʼmo amigeʼefeʼmo huʼniya gemae

^2-3 Maoni taonifi vekamo agiʼamo Nemoʼmo Kelepi nofi vekamo maiʼniye. Agaemo lusi kagemi yaʼaʼe vekamo maiʼnigeʼapaeʼmo tali tauseniʼa sipisipi anagaʼmo maige vani tauseniʼa meme anagaʼamo maige huʼnae. Aʼamo agiʼamo Amigeʼae. Agaemo alagepa huno afino aeto huʼniya a kanomo alagepa apaulagamo ageʼnaya a kanomo maiʼniye. Maiʼniyaʼmonanafa anauʼamoʼmo gemo nehapaiya vekamo hosu kavaʼmo nehiya vekamo maiʼniye. Mago mopaʼamo Kamo taonimi haopaleʼmo haneʼnigeʼa apakaemo ani koteʼmo sipisipi anagaʼamo apayokaʼmo lagauʼa maiʼnae.

⁴ Neviniʼmo yahaofilagamo maiʼnenoʼaeʼmo afiʼniyana Nemoʼmo sipisipi anagaʼamo apayokaʼmo nelagae, huʼa huʼnageno afiʼniye.

⁵ Afitenoʼaeʼmo naya loleʼa neya vayaʼaifeʼmo hapa painoʼaeʼmo, Kamo kotegamo utapa Nemofeʼmo nagiʼniletiʼmo ge amamaeyo.

⁶ Lapakaemo alagepa huno maiʼniya vekamo Nemofeʼmo ina hutapa ha paiyo. Kagaegi afamo anagakagi muki yakagi huno alagepa huno hanege alagepa huʼa maige hiyo.

⁷ Neviniʼmo ago afiʼniyana vayaʼmogimo kagae sipisipi anagaʼmogi apayokaʼmo nelagae, huno afiʼniye. Sipisipikaleʼmo neʼyagaiya vayaʼmo lagaeʼeʼmo Kamo kotegamo magokepiʼmo lokaeta maiʼnona afinaʼmo lagaemo alita hosu huta oʼapatege kumayaʼmo oʼapavalege huta maiʼnone.

⁸ Kagaemo neya vayakaeʼmo ge huka apafi gesanaʼmoʼmo apakaemo ani kegeʼmo kaha paigae. Lagaemo alopa neʼyaʼmo yagita nehana afinaʼmo kagaetegamo eʼnonaʼmofeʼmo Neviniʼmo amuse huka latesanafeʼmo hauʼniye. Kahao ke hone. Kahauʼnisiyaʼmoʼmo aliʼyakamo neʼaluna vayaʼe mafaʼnekamo Neviniʼeʼmo laha maeka lamiyo.

⁹ Inagi Nevini vayaʼamogimo uʼa ani gemo huʼa Nemofeʼmo Nevini agiʼaletiʼmo ha paiteʼa yagaiʼa maiʼnae.

¹⁰ Nemoʼmo Nevini aliʼyaʼamo neʼaliya vayaʼai geʼapileʼmo ina ge huno aeno atagaina huno hapa painoʼaeʼmo, Neviniʼmo ina laʼae. Yesi mafaʼnemo ina laʼae. Hemenimo asole aliʼyaʼmo neʼaliya vayaʼmo yagaiʼa neʼapataya vayaʼaitegatiʼmo apataleʼa apaune nehae.

¹¹ Lapakaemo haiyategatiʼmo eʼnafi huʼna oʼageʼnovaʼmofeʼmo nagae peleti mayagi nagae aninagi nagaemo amagiʼnova afugi huʼna sipisipi anagaʼnimogi apayokaʼmo nelagaya vayaʼaina apamisuva yaʼmo oʼapakeʼnova vayaʼaina apamisufiye, huno ge huno apafi geʼniye.

¹² Nevini neya vayaʼamogimo ani gemo afiteʼapaeʼmo ge osuʼa aiʼa afe leʼa apakameʼyamo amiteʼa halate Nevinitegamo uʼa Nemoʼmo muki huʼniya geʼamo ha paiʼnae.

¹³ Inagi Neviniʼmo vayaʼaeʼmo hunoʼaeʼmo, Mukiʼamogitapamo naipetapimo aliteta alo hiyo, huno hapa paiʼnigeʼa mukiʼamogimo naipeʼapimo aliteʼa alo huʼnageno Neviniʼeʼmo naipeʼamo aliteno alo huʼniye. Fo hataletiʼa agufa vayaʼmo Neviniʼeʼmo uʼnageʼa tu hataletiʼa vayaʼmogimo muki yaʼapileʼmo yagaiʼa maiʼnae.

¹⁴ Ani afinaʼmo mago vekamo Nemo aliʼyaʼamo neʼaliya vekamoʼmo uno Nemo aʼmo Amigefeʼmo ha painoʼaeʼmo, Afiyo, huno, Neviniʼmo yahaofilagatiʼmo mago apa vayaʼmo alino apateʼnigeʼa eʼa yagaino nelateya vekamo gemo amamaeʼnae. Amamaeʼnageno apakaefeʼmo lokiya gefatiʼmo hosu gemo huno hapa paiʼniye.

¹⁵ Ani vayaʼmogi lagaetegamo hosu kavaʼmo osuʼnayaʼmonanafa lagaetegamo alagepa kavaʼmo huʼnae. Yahaoleʼmo apakaeʼeʼmo magokepiʼmo lokaeta maiʼnona afinaʼmo mago yatimo lageso osuʼniye.

¹⁶ Muki afinaʼmo lagaemo sipisipileʼmo yagaiʼnonageʼapaeʼmo Nevini vayaʼamogimo felugaʼe haniʼilagaʼeʼmo mago yafa kegiʼyagana huʼa maiʼneʼa alagepa huʼa yagaiʼa lateʼnae.

¹⁷ Aliʼyaʼmo afoʼamoʼmo himuʼnamo vekamo ge noʼafiya vekamo maiʼniyaʼmofeʼmo Neviniʼe vayaʼaʼeʼmo eʼa lagaemo ala vekatiʼe muki afamo anagaʼaʼeʼmo aliʼa hosu huʼa apategae. Kagaemo alagepa huka kagesamo afitekaeʼmo afole aisiya hanagekeyaʼmo atafauka ato, huno ha paiʼniye.

¹⁸ Inagi Amigeʼmo ani gemo afitenoʼaeʼmo malage huno tu hataletiʼa peleti mayagi lole meme agufa ketalapiʼmo nofi alagafati aniʼmo lakiʼa havaite maleʼnaya ketalanagi naya magokayagaʼa sipisipimo amagiteʼa heʼa kalopaeʼa ataleʼa afa kaeʼnaya sipisipigi sevetiniʼa kilo vitimo kae maleʼnaya vitigi hau huʼnageno vaiʼniya nofi alagamo vani hataletiʼa hayagi leno vaiʼniya fiki alagamo tu hataletiʼa hayagi huno agaemo muki ani neʼyaʼmo alino mago noki anagateʼmo maleʼniye.

¹⁹ Agaemo aliʼyaʼamo neʼaliya vayaʼaifeʼmo hapa painoʼaeʼmo, Lapakaemo noki anagaʼmo apavalelitapa uta hogoteyo. Nagaemo lapakame huʼna uguve, huno hapa paiʼniyaʼmonanafa anauʼamofeʼmo ha opaiʼniye.

²⁰ Amigeʼmo mago nokileʼmo fai maiteno mago kateʼmo akame huno Neviniʼmo kahauya huno agesiyafeʼmo uʼniye. Neviniʼe vayaʼaʼeʼmo ani katekeʼmo eʼa emiʼeʼnae. Amigeʼmo mago avemo kagekaʼmo aino vego huno uʼniya kateʼmo akame huno uno Neviniʼeʼmo fotu huʼniye.

²¹ Neviniʼmo ago hunoʼaeʼmo, Na kava higeʼnaeʼmo ani vekamo muki yateʼmo yahaofilagamo alagepa huʼna yagaiʼna ateʼnove. Muki yaʼamo lageso osuge afela osege huteno alagepa huno hanege alagepa huʼa maige huʼniye. Nagaemo agaetegamo alagepa kavaʼmo huʼnovaʼmonanafa nagaetegamo anonaʼnilefeʼmo hosu kavaʼmo huʼniye.

²² Nagaemo ani haniʼilagamo muki ani vekamo ve anagaʼamo kamitimo apamagiguve. Ani kavaʼmo osisuvaʼmoʼmo Gotiʼa kame vayaʼnimo kamitimo apamagino.

²³ Amigeʼmo Neviniʼa agetenoʼaeʼmo malage huno nokiletiʼmo ataleno Nevini aulagaleʼmo mopafiʼmo asagauno aino lamiʼniye.

²⁴ Agaemo Nevini aiyafiʼmo asagauno aiteno aleʼyamo faiʼneno ape huʼniye. Agaemo Nevinifeʼmo ha painoʼaeʼmo, Ala vekae, huno, Kagaeteʼmo afole aiʼniya hanageke kavaʼmo nagaeteʼmo hanegaiye. Natesanageʼna aliʼyakamo neʼaluva aʼmoʼnamo kaha paisuva gemo afiyo.

²⁵ Kagaemo hosu vekamo Nemofeʼmo kagesamo oʼafiyo. Agiʼamo aepaʼamo haneʼniyana negi vekamo maiʼniye. Kavaʼamoʼmo ani agufa kavaʼmo haneʼniye. Nagaiʼnimo kagaemo alika apateʼnageʼa lagaetegamo eʼnaya neya vayakamo oʼapakeʼnove.

²⁶ Ala kava neʼmoʼa kagaemo katafauno kateʼnigeka kame vayakamogimo kagaetegamo huʼnaya hosu kavaʼmo anonaʼapilefeʼmo aeka atagaina huka kamitimo oʼapamagiʼnane. Inagi Ala vekaʼnimogae, huʼna, Ala kava neʼmo afaʼa maiʼnigeka kagaemo afaʼa maiʼnana kavaʼmo haneʼniyana Gotiʼa Nemoʼmo amisiya agufa kayoʼmo kame vayakamo apamino.

²⁷ Inagi nagaemo aliʼyakamo neʼaluva a kanomo mani fikumo kamiʼnova yaʼmo aliteka Ala vekamo kakame nehaya neya vayaʼaina apamiyo.

²⁸ Nagaemo hosu kavaʼmo huʼnisuvaʼmoʼmo kahao ke hovanagi alika atalo. Ala vekaʼnimogamo Ala kava neʼmo kame vayaʼaʼeʼmo kamemo huge maiʼnekaeʼmo hosu kavaʼmo osuge huka maiʼnanaʼmofeʼmo Ala kava neʼmoʼa kini vekamo alino katesigeʼapaeʼmo Isaleli kini vayaʼmo kagae kaginago vayapatiʼmo afole aigae.

²⁹ Afole aigayaʼmonanafa hemenimo kamekamo afole aiteno kamitimo kahaesiyafeʼmo kahauya nehiyaʼmonanafa Ala kava neʼmo Gotikamoʼmo alagepa huno yagaino katesigeka afaʼa maigane. Afaʼa maiganaʼmonanafa kamekamogi alino yaga auno apatalegaiye.

^30-31 Ala kava neʼmoʼa kagaetegamo muki alagepa kavaʼmo huguve, huno kaha paiʼniya gemo akame huteno Isaleli vayaʼmogi kini vekaʼapimo alino katesigeka mago vayaʼmogi fiku kamitimo oʼapamagika mago vayaʼaitegamo hosu kavaʼmo oʼsuʼnisanana kaipamoʼmo kana osuge kavagage yaʼmo oʼalige huka maigane. Ala vekaʼnimogae, huʼna, Ala kava neʼmoʼa kagaetegamo alagepa kavaʼmo hisiya afinaʼmo nagaemo aliʼyakamo neʼaluva akanoeʼmo kagesamo afiyo, huno ha paiʼniye.

³² Neviniʼmo ani gemo afitenoʼaeʼmo Amigefeʼmo ha painoʼaeʼmo, Ala kava neʼmo Isaleli vayaʼmogita Gotitimoʼmo alino kateʼnigeka eka nagaeʼeʼmo fotu huʼnanaʼmofeʼmo aliʼna auleʼna ateʼnove.

³³ Nagaemo kamitimo apamagiʼna hosu kavaʼmo anonaʼalefeʼmo nagae nayapatiʼmo kamitimo hapaesugeʼa falisaya kavaʼmo osisuvafeʼmo natafauka nateʼnanaʼmofeʼmo aliʼna auleʼna kateʼnove.

³⁴ Ala kava neʼmoʼa aliʼna hosu huʼna okatesuvafeʼmo natafauno nateʼniya agiʼaletiʼmo nagaemo alagi lama gemo huʼnaeʼmo kagaemo malage huka nagaetegamo oʼmeʼnanesinana gotilamiyapiʼmo Nemo ve vayapatiʼmo magoke vekamo alagi afaʼa oʼmaiyesine, huno ha paiʼniye.

³⁵ Ha paiteno Neviniʼmo Amigeʼmo alinino eʼniya yaʼamo alitenoʼaeʼmo agaefeʼmo hunoʼaeʼmo, Kagaemo halate nokalegamo uka kaipamoʼmo falu hino. Alagepa a kanomo maiʼnanageʼna gekamo afiʼnove, huno ha paiʼniye.

³⁶ Inagi Amigeʼmo Nemotegamo uno avaʼyi huteno ageyana Nemoʼmo alopa neʼyaʼmo kini vayaʼmogimo nehaya agufa kavaʼmo huno yagitamo nehigeno ageʼniye. Nemoʼmo lokiya aniʼmo neteno lusi kava huno negi nagi kavaʼmo huteno amogaga aiʼniyaʼmofeʼmo mago gemo ha opaime opaime uno maiʼnigeno gotilamiyapiʼmo afole aiʼniye.

³⁷ Kotiʼnigenoʼaeʼmo Nemo agenopamoʼmo halate haleʼnigenoʼaeʼmo Amigeʼmo afole aiʼniya kavafeʼmo ha paiʼnigeno lutunopamo faliʼnigeno Nemoʼmo yafakana huno hamaleʼniye.

³⁸ Naya loleʼa afinaʼmo utegeno Ala kava neʼmoʼa Nemoʼmo kamitimo amagiʼnigeno faliʼniye.

³⁹ Neviniʼmo Nemoʼmo ago faliʼniya gemo afitenoʼaeʼmo ina gemo hunoʼaeʼmo, Ala kava nefeʼmo alita auleta ateyo. Agaemo Nemoʼmo nagaetegamo huʼniya hosu kavaʼmo anonaʼalefeʼmo aeno atagaina huno amiʼniye. Agaemo aliʼyaʼamo neʼaluva vekamoʼnamo hosu kavaʼmo osisuvafeʼmo kaʼmo akanino nateʼniye, huno huʼniye. Inagi Neviniʼmo aliʼyaʼamo neʼaliya vayaʼmo alino apateʼnigeʼa uʼa Neviniʼmo Amigeʼa alisiyafeʼmo ha paiʼnae.

⁴⁰ Apakaemo kamo kotegamo Amigetegamo uʼa avaʼyi huteʼapaeʼmo Amigefeʼmo ina ge huʼa ha paiʼapaeʼmo, Neviniʼmo kagaemo alisiyafeʼmo hauʼniyaʼmofeʼmo alino lateʼnigeta eʼnone, huʼa ha paiʼnae.

⁴¹ Amigeʼmo ani gemo afitenoʼaeʼmo he tino aleʼyamo faiʼneno ape huʼniye. Agaemo hunoʼaeʼmo, Nagaemo agaeteʼmo afa aliʼyaʼmo neʼaluva akanokana huʼna maiʼnove. Nagaemo ani ala vekaʼnimo aliʼyaʼamo neʼaliya vayaʼai apaiyamo sese huguve, huno huʼniye.

⁴² Huteno malage huno he tino nokiʼaleʼmo haino fai maiʼniye. Naya magokayagaʼa a mafaʼne anagaʼmo yagaiʼa atesayafeʼmo magokepiʼmo uʼnae. Apakaemo Nevini apa vayaʼamogi apakame uʼa avaʼyi huteʼapaeʼmo Amigeʼa Nevini aʼmo hamaleʼniye.

⁴³ Neviniʼmo hogoteno Ahinovimu Yesali taonifi a kanomo aliʼniyaʼmofeʼmo ani lole atalaʼmo Nevini atalaʼmo maiʼnaʼae.

⁴⁴ Soloʼmo a mafaʼnemo Maiko Nevini aʼmo maiʼniyaʼmonanafa Soloʼmo avaleno Patiʼmo Leyisi mafaʼnemo Galimi taonifi vekamo amiʼniye.