1 Samiyo 24 - The Keyagana NT and 25 OT books

Neviniʼmo Soloʼmo afaʼa agegeno ateʼniya gemae

¹ Soloʼmo Filisatini vayaʼmo apavegala aelinuno apataleno eʼnigeno mago vekamoʼmo ha painoʼaeʼmo, Afiyo, huno, Neviniʼmo Eni Geti yahaofilagamo maiʼniye, huno ha paiʼniye.

² Soloʼmo ani gemo afitenoʼaeʼmo ati vayapatiʼmo tali tauseniʼa alagepa ati vayaʼmo lekana paino apavalelino Neviniʼe vayaʼaʼeʼmo kahauya huno apakesiyafeʼmo uʼniye. Apakaemo afela mememogi yafa kaʼmo haneʼniya mopaleʼmo uʼnae.

³ Apakaemo uʼa avaʼyi huʼnageno ka agiʼnaleʼmo sipisipi anagaʼmogi kegiʼyamo haneʼniya haopaleʼmo mago alopa yafa kaʼmo haneʼniye. Soloʼmo aifaʼamo lesiyafeʼmo ani yafa kapiʼmo uno haiʼnigeʼa Neviniʼe vayaʼaʼeʼmo ani yafa kapiʼmo atupaleʼmo fala kiʼa maiʼnae.

⁴ Inagi Nevini vayaʼamogimo Nevinifeʼmo huʼapaeʼmo, Ala kava neʼmoʼa hemenimo afole aiʼniya afina kavafeʼmo kaha paiʼniye. Kaha painoʼaeʼmo, Afiyo, huno, Kagaemo kame vekakalegamo kahauʼnisiya kavaʼmo hisanafeʼmo kamekamo avaleʼna kayapiʼmo ategauve, huno kaha paiʼniye, huʼa ha paiʼnae. Inagi Neviniʼmo vase huno Solo haopaleʼmo uno yatala kukenaʼamo aise atupaʼamo hatagauʼniyaʼmonanafa Soloʼmo oʼageʼniye.

⁵ Henagaʼamo Neviniʼmo Solo kukenaʼamo hatagauʼniya kavafeʼmo lusi kava huno alino amalagiʼniye.

⁶ Agaemo vayaʼalegamo uno hapa painoʼaeʼmo, Ala kava neʼmoʼa kini vekaʼnimo aliʼna hosu huʼna atesuvana afaʼa oʼnatalegaiye. Ala kava neʼmoʼa lekana paino ateteno uvelimo lakino ateʼniyaʼmofeʼmo nagaemo lekana paino ateʼniya kini vekalegamo mago hosu kavaʼmo afaʼa osuguve.

⁷ Neviniʼmo ani gemo huʼniyaʼmofeʼmo vayaʼamogimo afaʼa ataleʼa Soloʼmo kamitimo oʼamagiʼa afa ateʼnae. Inagi Soloʼmo yafa kapatiʼmo he tino uno lamiʼniye.

⁸ Neviniʼmo ani kava huno yafa kapatiʼmo uno laminoʼaeʼmo Solofeʼmo keya aeno ge hunoʼaeʼmo, Ala Kini vekaʼnimogae, huno huʼnigeno Soloʼmo ani gemo afitenoʼaeʼmo aino afeleʼnigenoʼaeʼmo Neviniʼmo ape huno ateʼniye.

⁹ Agaemo hunoʼaeʼmo, Na kava higekaeʼmo kagaemo ani vayaʼmogimo nagaefeʼmo huʼapaeʼmo, Neviniʼmo alino hosu huno katalegaiye, huʼa nehaya gemo kagetafo huʼneka neʼafine.

¹⁰ Ago, huno, Hemenimo ageʼnana yafa kapiʼmo Ala kava neʼmoʼa kagaemo kavalelineno nayapiʼmo kateʼnigeʼa vayaʼnimogimo kamitimo amagiyo, huʼa naha paiʼnayaʼmonanafa afaʼa kagegeʼna kateʼnove. Nagaemo huʼnaeʼmo, Haʼao, Ala kava neʼmoʼa uvelimo lakino ateʼniyaʼmofeʼmo oʼamagiguve, huʼna hapa paiʼnove.

¹¹ Afoʼnimogae, huʼna, Magoʼe gemo afiyo. Kukena yakamo atupaʼaleʼmo ago. Kukenakamo hatagauʼnovaʼmonanafa kamitimo okamagiʼnove. Kagaemo ageka alagepa huteka afiyo. Nagaemo kagaetegamo hosu kavaʼmo huge aliʼna hosu huʼna katege hisuvafeʼmo nagesamo oʼafiʼnove. Nagesamo oʼafiʼnovaʼmonanafa kagaemo kamitimo namagisanafeʼmo nagaefeʼmo kahauya nehane.

¹² Ala kava neʼmoʼa laʼagae kavaʼmo alino fako hino. Ala kava neʼmoʼa nagaetegamo nehana hosu kavaʼmo anonakalefeʼmo kayoʼmo kamigiyaʼmonanafa nagaiʼnimo kagaemo okamagiguve.

¹³ Ani akeyaʼvilaga vayaʼmogi huʼnaya geeʼmo huʼapaeʼmo, Hosu vayaʼmogimo hosu kavaʼmo nehae, huʼa nehaya gemo haneʼniya kava huno hemenimo lama gemo haneʼniye. Haneʼniyaʼmofeʼmo nagaemo okamagiguve.

¹⁴ Isaleli vayaʼmogita kini vekae, huʼna, Kagaemo ina laʼmo avegala neʼane. Navegala neʼapiye. Nagaemo ina laʼnamae. Nagaemo ago faliʼniya kalagana huʼna maiʼnofiye. Nagaemo apakenopafi namagana huʼna maiʼnofiye.

¹⁵ Inagi Ala kava neʼmoʼa laʼagaepatiʼmo ina laʼmo hosu kavaʼmo huʼnifigeno alino fako huno laʼategaiye. Agaemo ani kavatefeʼmo ageteno naha maeno nagufamo alino katino nateno, huno ha paiʼniye.

¹⁶ Neviniʼmo huʼniya gemo ago huno hano huʼnigenoʼaeʼmo Soloʼmo ha painoʼaeʼmo, Neviniyo, mafaʼneʼnimogae, huʼna, kagaikamo ani gemo nehapiye, huno huteno aviʼyaʼmo huʼniye.

¹⁷ Agaemo Nevinifeʼmo ha painoʼaeʼmo, Kagaemo nagaetegamo alagepa kavaʼmo huʼnanaʼmonanafa nagaemo kagaetegamo hosu kavaʼmo huʼnovaʼmofeʼmo fatago kavatefeʼmo ago aeka naga seʼnane.

¹⁸ Ala kava neʼmoʼa navalelineno kagae kayapiʼmo nateʼniyana kamitimo oʼnahaeʼnane. Hemenimo kagaemo ani kavakaletiʼmo nagaetegamo alagepa kavakamo alika nave liʼnane.

¹⁹ Nagaemo ageʼnovana mago vekamoʼmo kameʼamo alino hosu huno atesiya kaʼmo haneʼnisiyaʼmoʼmo afaʼa atalesigeno visifiye. Haʼao. Oʼategaiyaʼmonanafa kagaemo nateʼnanaʼmofeʼmo Ala kava neʼmoʼa nagaetegamo huʼnana kavaʼmo anonakalefeʼmo alino alagepa huno kateno.

²⁰ Hemenimo ago kageʼnovana kagaemo kini vekamo maigane. Kagaemo Isaleli vayaʼaiteʼmo yagaika apatesanageʼa lokiya vaiʼa maigae.

²¹ Maiganaʼmofeʼmo hemenimo kagaemo Ala kava neʼmo agiʼaletiʼmo kagoʼyamo ataleteka polomasi gemo hukaeʼmo, Kaginago vayaʼmogi kamitimo oʼapamagiguve. Kagaeʼe kaginago nofi vayakaʼeʼmo aliʼna hano huʼna oʼapatalegauve, huka naha paiyo, huno ha paiʼniye.

²² Inagi Neviniʼmo agoʼyamo ataleteno polomasi gemo Solofeʼmo ha paiʼnigeno Soloʼmo noʼalegamo uʼniyaʼmonanafa Neviniʼe vayaʼaʼeʼmo kamitimo oʼapamagisayafeʼmo yahaofilagamo uʼa haiʼa maiʼnae.