1 Samiyo 23 - The Keyagana NT and 25 OT booksNeviniʼmo Keyila taonifi vayaʼai apakufamo alino katino apateʼniya gemae 1 Inagi mago vayaʼmogimo eʼa Nevinifeʼmo ha paiʼapaeʼmo, Afiyo, huʼa, Filisatini vayaʼmogi Keyila taonifi vayaʼeʼmo kame huteʼapaeʼmo vitiʼamo aliʼa alu ai maleʼnaya vitimo kumayaʼmo neʼaliye. 2 Neviniʼmo ani gemo afitenoʼaeʼmo Ala kava nefeʼmo ge huno afinoʼaeʼmo, Nagaemo uʼna ani Filisatini vayaʼeʼmo kamemo hisufiye, huno ge huno afigeʼnigeno Ala kava neʼmoʼa ha painoʼaeʼmo, Kagaemo uka Filisatini vayaʼeʼmo kame huteka Keyila taoni vayaʼai apakufamo alika katika apato, huno ha paiʼniye. 3 Ani gemo ha paiʼniyaʼmonanafa Nevini ati vayaʼamogi ha paiʼapaeʼmo, Afiyo, huʼa, Lagaemo Yuta mopaleʼmo maiʼneta koli nehune. Lagaemo Filisatini ami vayaʼeʼmo kamemo hisunafeʼmo Keyila taonilegamo visunana magoʼe huta koli hisuna kavaʼmo afole aigiye. 4 Inagi Neviniʼmo Ala kava nefeʼmo halate ge huno afigeʼnigeno Ala kava neʼmoʼa ha painoʼaeʼmo, He tika Keyila taonifilagamo uvo. Nagaemo Filisatini vayaʼmo apavaleliʼneʼna kayapiʼmo apategauve, huno huʼniye. 5 Inagi Neviniʼe vayaʼaʼeʼmo Keyila taonilegamo uʼa Filisatini vayaʼeʼmo kamemo huteʼa asole Filisatini vayaʼmo kamitimo hapaeteʼa pulumakaʼapimo apavaleʼnae. Neviniʼmo ani kavatetiʼmo Keyila taonifi vayaʼai apakufamo alino katino apateʼniye. 6 Ahimaleki mafaʼnemo Amiyataʼmo auno hetaleno Keyila taonifiʼmo Nevinitegamo uʼniya afinaʼmo mono huʼa neʼapataya vayaʼmogi lavolavoleʼmo lole yafatalaʼmo haneʼnigeno afole aisiya kavafeʼmo kahauya huʼa neʼagaya yafatalaʼmo alinino eʼniye. 7 Mago vayaʼmogi Solofeʼmo huʼapaeʼmo, Neviniʼmo uno Keyila taonifiʼmo maiʼniye, huʼa ha paiʼnageno Soloʼmo hunoʼaeʼmo, kanalene, huno, hemenimo Gotiʼa agaemo avaleno nayapiʼmo namiʼniye. Neviniʼmo yafa kegiʼyamo haneʼnigeno lokiya kipaʼmo haneʼniya taonifiʼmo uno haiʼniya kavatetiʼmo agaiʼamo kalavusi huno ateʼniye, huno huʼniye. 8 Inagi Soloʼmo muki ati vayaʼaeʼmo ge huʼnigeʼa eteʼapaeʼmo Keyila taonifiʼmo uʼa Neviniʼe vayaʼaʼeʼmo faiʼa vego hisayafeʼmo uʼnae. 9 Neviniʼmo Soloʼmo nagaetegamo hosu kavaʼmo hisiyafeʼmo aipa agesamo afiʼniye. Agesamo afitenoʼaeʼmo mono huno neʼapateya vekamo Amiyatafeʼmo hunoʼaeʼmo, Mono huʼa neʼapataya vayaʼmo nehapiya kenaʼe lole yafatalaʼeʼmo alinika eno, huno huʼnigeno alinino eʼniye. 10 Inagi Neviniʼmo nunumuʼmo hunoʼaeʼmo, Ala kava neʼmo lagaemo Isaleli vayaʼmogita Gotitimogamo nagaemo aliʼyakamo neʼaluva vekamoʼnamo afiʼnovana Soloʼmo natafausiyafeʼmo Keyila taonifiʼmo eno ani taonimo heno halagape vaigiye, huʼna afiʼnove. 11 Keyila taonifi vayaʼmogimo navaleʼa Soloʼmo amisafiye. Nagaemo afiʼnovana Soloʼmo egaiye, huʼna afiʼnovanageno esifiye. O Ala kava neʼmo Isaleli vayaʼmogita Gotitimogae, huʼna, Aliʼyakamo neʼaluva vekaeʼmo naha paiyo, huno huʼnigeno Ala kava neʼmoʼa hunoʼaeʼmo, Agaemo egaiye, huno ha paiʼniye. 12 Neviniʼmo halate magoʼe huno ge huno afinoʼaeʼmo, Keyila taonifi vayaʼmogimo nagaeʼe vayaʼniʼeʼmo lavaleʼa Soloʼmo amigafiye, huno afi geʼnigeno Ala kava neʼmoʼa hunoʼaeʼmo, Apakaemo lapavaleʼa Soloʼmo amigae, huno ha paiʼniye. 13 Ani gemo afitenoʼaeʼmo Neviniʼe vayaʼaʼeʼmo sigisi hataletiʼa agufa vayaʼmo Keyila taonifatiʼmo ataleʼa uʼa aliʼa fako huʼa muki haopalegamo uʼeʼa huʼnae. Solofeʼmo huʼapaeʼmo, Neviniʼa Keyila taonifatiʼmo faino kasalo paeʼniye, huʼa huʼnageno Soloʼmo afitenoʼaeʼmo kamemo hisiyafeʼmo magoʼe huno agesamo oʼafino ataleʼniye. Neviniʼmo avefiʼmo fala kino maiʼniya gemae 14 Neviniʼmo uno Sifa taonimo haopaleʼmo haneʼniya avefiʼmo alagepa huno maisiya agufa yapiʼmo fala kino maiʼniye. Ataleno oʼuʼnifa afaʼa maiʼniye. Soloʼmo muki afinaʼaeʼmo Nevinifeʼmo kahauya huʼniyaʼmonanafa Gotiʼmo Neviniʼa avalelineno Solo ayapiʼmo oʼateʼniye. 15 Neviniʼmo ageʼniyana Soloʼmo kamitimo namagisiyafeʼmo eʼniye, huno ageteno Sifa yahaofilagamo maiʼniye. 16 Inagi Yonataniʼmo Solo mafaʼnemo Neviniʼmo maiʼniya yahaofilagamo uno Neviniʼmo Gotifeʼmo agesamo afino fatago hisigeno Gotiʼa ha maesiyafeʼmo alino lokiya vaino ateʼniye. 17 Yonataniʼmo ina gemo huno ha painoʼaeʼmo, koli osuvo. Afoʼnimoʼmo kagaemo afaʼa alino hosu huno okategaiye. Afoʼnimoʼmo ago ageʼniyana kagaemo Isaleli vayaʼai kini vekamo maisanageʼnaeʼmo nagaemo napa tu vekamo maiguve, huno ageʼniye, huno ha paiʼniye. 18 Anakaemo Ala kava neʼmo aulagaleʼmo alagi aliʼana anao yaʼmo huʼana maisaʼafeʼmo kotalakemo hu maleʼnaʼae. Neviniʼmo yahaofilagamo maiʼnigeno Yonataniʼmo noʼalegamo uʼniye. 19 Inagi mago Sifa vayaʼmogi Gimeya taonifiʼmo uʼa Solofeʼmo ha paiʼapaeʼmo, kini vekae, huʼa, Neviniʼmo lagae yahaofilagamo fala kino maiʼniye. Agaemo Hakila avefiʼmo maiʼniye. Yuta vayaʼai hoga haopalega yahaofilagamo maiʼniye. 20 Lagaemo kageʼnonana kagaemo Neviniʼmo atafausanafeʼmo lusi kava huno kahauʼniyaʼmofeʼmo kagaemo eka atafauvo. Lagaemo avaleta kayapiʼmo kamigune, huʼa ha paiʼnae. 21 Ha paiʼnageno Soloʼmo hapa painoʼaeʼmo, Lapakaemo nagaefeʼmo lapakesamo afitetapaeʼmo alagepa hutapa nahamaesayafeʼmo nehayaʼmofeʼmo Ala kava neʼmoʼa alino auleno lapateno. 22 Agaemo humi neʼapateya vekamo maiʼniyaʼmofeʼmo lapakaemo utapa fala kino maiʼniya yaʼamo agetetapa ageʼnaya vayaʼmogi apakeyo. 23 Lapakaemo muki fala kino neʼmaiya koʼmo agetapa alagepa hu maletetapaeʼmo nagaetegamo egeʼnao lapakaeʼeʼmo uguve. Agaemo ani koteʼmo maiʼnisiyaʼmoʼmo nagaemo muki Yuta haopalegamo kahauya huʼna agegauve, huno hapa paiʼniye. 24 Inagi apakaemo ataleʼa hogoteʼa Sifa yahaofilagamo uʼnae. Uʼnayaʼmonanafa Neviniʼe vayaʼaʼeʼmo Maonu yahaofilaga Yuta koteʼmo hoga haopalegamo maiʼnae. 25 Soloʼe vayaʼaʼeʼmo Nevinifeʼmo kahauya huʼa agesayafeʼmo uʼnageʼapaeʼmo mago vayaʼmogi Nevinifeʼmo ha paiʼapaeʼmo, Neviniʼmo uno Maonu yahaofilagamo maiʼniye. Soloʼmo afitenoʼaeʼmo Maonu koteʼmo uteno Neviniʼmo akame huno uʼniye. 26 Soloʼe vayaʼaʼeʼmo avemo megagayaga haopalegamo uʼnayaʼmonanafa Neviniʼe vayaʼaʼeʼmo avemo magagayaga haopalegamo uʼnae. Soloʼe vayaʼaʼeʼmo eʼa Neviniʼe vayaʼaʼeʼmo faiʼa vego hisayafeʼmo eʼnayaʼmofeʼmo Neviniʼmo malage huno aune hetaleno uʼniye. 27 Faiʼa vego huʼnayaʼmonanafa mago vekamoʼmo eno Solofeʼmo ha painoʼaeʼmo, Filisatini vayaʼmogimo kame hisayafeʼmo eʼnae. Malage huka atagineka eno, huno ha paiʼniye. 28 Ha paiʼniyaʼmofeʼmo Soloʼe vayaʼaʼeʼmo Neviniʼmo ataleʼa Filisatini vayaʼeʼmo kamemo hisayafeʼmo uʼnayaʼmofeʼmo apakaemo ani kofeʼmo agiʼamo faino kasalo paeʼniya kone, huʼa agi ateʼnae. 29 Inagi Neviniʼmo ani haopalegatiʼmo atalenuno Eni Geti taonimo haopaleʼmo afaʼa maisiyafeʼmo yahaofilagamo maiʼniye. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.