1 Samiyo 22 - The Keyagana NT and 25 OT books

Soloʼmo mono huʼa nepapataya vayaʼmo kamitimo hapaeʼniya gemae

¹ Ani kavaʼmo afole aiʼniyaʼmofeʼmo Neviniʼmo Gati taonifatiʼmo ataleno aune he taleno uno Analami taonimo haopaleʼmo mago alopa yafa kapiʼmo uno maiʼniye. Nepuʼamogiʼe muki afoʼamo afamo anagaʼeʼmo, ani kotegamo maiʼniye, huʼa huʼnaya gemo afiteʼapaeʼmo agaetegamo uʼa agaeʼeʼmo maiʼnae.

² Muki alu kana ya alu kana yaʼapimo haneʼniya vayanagi muki anonaʼapimo haneʼniya vayanagi apakaeteʼmo afole aiʼniya kavafeʼmo ohapauʼniya vayanagi huʼa uʼa agaeʼeʼmo aliʼa anupa huʼa maiʼnae. Fo hataletiʼa agufa vayaʼmo agaeʼeʼmo magokepiʼmo lokaeʼa maiʼnae.

³ Inagi Neviniʼmo ani haopalegatiʼmo ataleno itaʼa afoʼamogimo apavalelino uno Movapu kotegamo Misipa taonifiʼmo apateʼnigeʼa maiʼnae. Agaemo Movapu kini vekaeʼmo ina ge hunoʼaeʼmo, kahaoke hove. Kagaemo itaʼnimoʼe afoʼnimoʼeʼmo anategeʼanao eʼana kagaeʼeʼmo magokepiʼmo maigaʼae. Kagaeʼeʼmo maime maime visaʼageʼna Gotiʼa nagaetegamo na kavaʼmo hisifigeʼna agegauve.

⁴ Movapu kini vekamoʼmo Neviniʼmo huʼniya gelefeʼmo kanalene, huno huʼniyaʼmofeʼmo Neviniʼmo itaʼa afoʼalaʼmoganimo anavalelino uno Movapu kini vekaʼeʼmo anateteno yafa kapiʼmo fala kino maiʼniye.

⁵ Inagi mago polofeti vekamo Gatiʼmo Nevinitegamo eno ha painoʼaeʼmo, kagaemo yafa kapiʼmo magoʼe huka oʼmaiyo. He tika uka Yuta nofi vayaʼmogi mopaleʼmo maiyo, huno ha paiʼnigeno Neviniʼmo ataleno uno alopa yahaoʼmo agiʼamo Heleti yahaofiʼmo maiʼniye.

⁶ Ani afinaʼmo Soloʼmo Gimeya kotegamo aise avefiʼmo mago alopa yosamo aepafiʼmo maiʼneno hayoʼamo ayapiʼmo aliʼniye. Muki aliʼyaʼamo neʼaliya vayaʼmo haopaleʼmo he tiʼa faiʼa vego huʼa ateʼnae. Mago vekamoʼmo Solofeʼmo hunoʼaeʼmo, Mago vayaʼmogi Neviniʼe maiʼnaya vayaʼmo apakeʼnae, huno ha paiʼniye.

⁷ Ha paiʼnigeno Soloʼmo aliʼyaʼamo neʼaliya vayaʼaifeʼmo hapa painoʼaeʼmo, Lapakaemo Menisameni vayane, huno, afiyo. Neviniʼmo Yesi mafaʼnemoʼmo mukiʼamogitapamo hoyamo lapamige nofi hoyamo lapamige hisifiye. Agaemo mukiʼamogitapamo vani tauseniʼa ati vayaʼaiteʼmo neʼyagaiya vayaʼmo alino lapatege vani hataletiʼa ati vayaʼaiteʼmo neʼyagaiya vayaʼmo alino lapatege huno lapatesifiye.

⁸ Mukiʼamogitapamo nagaemo kini vekamo oʼmaisuvafeʼmo gemo huta fala ki maleʼnae. Lapakaepatiʼmo mago vekamoʼmo nagaefeʼmo hunoʼaeʼmo, Mafaʼnekamoʼmo Neviniʼeʼmo kotalakemo hu maleʼniye, huno naha opaige mago vekamoʼmo hau huno oʼnatege magoke vekamoʼmo hunoʼaeʼmo, Mafaʼnekamoʼmo aliʼyakamo neʼaliya vekamo Neviniʼmo kamitimo kamagisiyafeʼmo alino he tino atege huʼniye, huʼa naha opaiʼnae.

⁹ Ani afinaʼmo Inomi vekamo Nogiʼmo Solo aliʼyaʼamo neʼaliya vayaʼaiteʼmo neʼyagaiya vekamoʼmo Solofeʼmo ha painoʼaeʼmo, Nagaemo Nomi taonifiʼmo maiʼneʼnaeʼmo ageʼnovana Neviniʼmo Ahimalekiʼmo Ahitami mafaʼnelegamo uʼnigeʼna ageʼnove.

¹⁰ Ahimalekiʼmo Neviniʼa haiya kateʼmo visifi huno Ala kava nefeʼmo ge huno afigeʼniye. Agaemo ha maesiyafeʼmo ge huno afige neʼyaʼmo amige Filisatini vekamo Golaiyati naipemo amige huʼniye, huno ha paiʼniye.

¹¹ Kini vekamoʼmo ani gemo afitenoʼaeʼmo agaemo mago vayaʼmo alino apateʼnigeʼa uʼa mono huno neʼapateya vekamo Ahimalekiʼe Nomi taonifiʼmo maiʼneʼa mono huʼa neʼapataya vayaʼeʼmo kinitegamo apavaleliʼa eʼnae.

¹² Inagi Soloʼmo Ahimalekifeʼmo hunoʼaeʼmo, Ahimalekiyo, huno, afiyo, huno huʼnigeno Ahimalekiʼmo ha painoʼaeʼmo, Ala vekae, huno, afiguve, huno ha paiʼniye.

¹³ Soloʼmo ha painoʼaeʼmo, Na kava higetanaeʼmo kagaeʼe Yesi mafaʼneʼeʼmo alitana hosu hutana natalesaʼafeʼmo gemo hutana hayae maleʼnaʼae. Kagaemo neʼyaʼmo amige mago naipemo amige Ala kava neʼmoʼa ha maesiyafeʼmo ge huka afige huʼnane. Ha maeʼnanageno hemenimo kesi kateʼmo eno kamitimo namagigefeʼmo hauʼnigeno maiʼniye.

¹⁴ Ahimalekiʼmo geʼaleʼmo aeno atagaina hunoʼaeʼmo, Neviniʼmo alagi alagepa aliʼyaʼmo neʼaliya vekamo maiʼneno gekamo akame nehiye. Kayemokamoʼmo maiʼneno gekamo afiteno aliʼyakamo alagepa huno neʼaliye. Mago aliʼyakamo neʼaliya vekamoʼmo agaemo aeno oʼagaseʼniye. Afamo anaga vayaʼmogi ala agiʼamo neʼamiye.

¹⁵ Nagaemo ha maesuvafeʼmo Gotifeʼmo ge huʼna afigeʼnofiye. Alagi haʼao. Ani kavaʼmo nagaeteʼe afamo anagaʼnileʼeʼmo oʼmalo. Nagaemo aliʼyakaleʼmo neʼaluva vekamoʼnaeʼmo naha paiʼnana kavatefeʼmo aise kavaʼmo huʼna oʼageʼnove.

¹⁶ Kini vekamoʼa hunoʼaeʼmo, Ahimalekiyo, huno, kagaeʼe muki afokamo afamo anagaʼaʼeʼmo faligae, huno ha paiʼniye.

¹⁷ Inagi kini vekamoʼmo yagaiʼa atesayafeʼmo haopaleʼmo he tiʼa maiʼnaya vayaʼaifeʼmo hapa painoʼaeʼmo, Mono huʼa neʼapataya vayaʼmogi Neviniʼmo ha maeʼa aune heʼniya kavaʼmo ageʼnayaʼmonanafa naha opaiʼnayaʼmofeʼmo kamitimo apamagiyo, huno hapa paiʼniyaʼmonanafa Ala kava neʼmo mono huʼa neʼapataya vayaʼmogi kamitimo apamagisayafeʼmo apayaʼmo aliʼa oʼasagauʼnae.

¹⁸ Oʼapamagiʼnayaʼmofeʼmo kini vekamoʼmo Nogifeʼmo ha painoʼaeʼmo, Kagaemo uka mono huʼa neʼapataya vayaʼmo kamitimo apamagiyo, huno ha paiʼnigeno Itomi nofi vekamo Nogiʼmo uno ani afinaʼmo eiti faefuʼa vayaʼmo mono huʼa neʼapataya vayaʼmo kamitimo apamagiʼniye.

¹⁹ Soloʼmo ati vayaʼamo alino apateʼnigeʼa uʼa Nomu taonifiʼmo maiʼnaya vayaʼmo mono huʼa neʼapataya vayaʼmo ve anaganagi aʼne anaganagi mafaʼne anaganagi nuʼmo neʼnaya mafaʼne anaganagi ve pulumaka anaganagi sipisipi anaganagi noki anaganagi huʼa kamitimo apamagiʼnae.

²⁰ Apamagiʼnayaʼmonanafa mago vekamo Ahimaleki mafaʼnemo Amiyataʼmo faino kasalo paeno Nevinitegamo uʼniye.

²¹ Amiyataʼmo Nevinifeʼmo ha painoʼaeʼmo, Soloʼmo Ala kava netefeʼmo mono huʼa neʼapataya vayaʼamo kamitimo apamagiʼniye, huno huʼniye.

²² Neviniʼmo Amiyatafeʼmo hunoʼaeʼmo, Itomu vekamo Nogiʼmo Nomu taonifiʼmo maiʼniya afinaʼmo nagaemo afiʼnovana Nogiʼmo Solofeʼmo ha paigiye, huʼna ago afiʼnove. Nagaetefeʼmo muki afokamo afamo anagaʼapimo ago falinae.

²³ Nagaeʼeʼmo magokepiʼmo lokaeka maiteka koli osuvo. Namagigefeʼmo hauʼniya vekamoʼmo kamagigefeʼmo hauʼniyaʼmonanafa nagaeʼeʼmo lokaeka maisanana afaʼa maigane.