1 Samiyo 21 - The Keyagana NT and 25 OT books

Neviniʼmo Solotegatiʼmo ataleno aune heʼniya gemae

¹ Neviniʼmo aune hetaleno uno Nami taonifiʼmo mono huno neʼapateya vekamo Ahimalekiʼmo ageʼniye. Ahimalekiʼmo Nevina agetenoʼaeʼmo koli huteno Nevinifeʼmo ina ge huno ha painoʼaeʼmo, Na kava higekaeʼmo kagaikageʼmo eʼnanageno kavagi vekamo kagaeʼeʼmo oʼmeʼniye, huno ge huno afigeʼniye.

² Neviniʼmo mono huno neʼapateya vekamo Ahimalekifeʼmo hunoʼaeʼmo, kini vekamoʼmo mago aliʼyaʼmo namiʼniye. Naha painoʼaeʼmo, Mago vekaeʼmo hisana kavafeʼmo alagi hapa opaiyo, huno alino huteno nateʼnigeʼna eʼnove. Nagaemo neya vayaʼnimo aliʼna apateʼnogeʼa mago koteʼmo uʼnae.

³ Inagi na agufa neʼyaʼmo haneʼniye. Mago peleti mayamo haneʼnisiyaʼmoʼmo naya mago kayagaʼamo namiyo. Ohaneʼnisiyaʼmoʼmo afaʼa haneʼnisiya neʼyaʼmo namiyo, huno ha paiʼnigenoʼaeʼmo

⁴ mono huno neʼapateya vekamoʼmo ha painoʼaeʼmo, Mago afa peleti mayamo ohaneʼniye. Ohaneʼniyaʼmonanafa mago mono peleti mayamo aote peleti mayamo haneʼniye. Neya vayakamogimo mani afinaʼmo aʼneʼeʼmo magokepi lokaeʼa ohavaeʼnisiyaʼmoʼmo inagi ani peleti mayamo alitapa negae, huno ha paiʼniye.

⁵ Neviniʼmo geʼaleʼmo aeno atagaina hunoʼaeʼmo, Lama gemo huve. Loleʼe magoʼe afinaʼmo aʼneʼeʼmo lokaeta ohavaeʼnone. Neya vayaʼnimo apaote maiʼnageno muki yaʼapimo aote haneʼniye. Peleti mayamo alika aote huka maleʼnanaʼmonanafa saufa peleti mayamo aimuʼyaleʼmo maleʼnanaʼmofeʼmo ani peleti mayamo hemenimo afa peleti mayamo haneʼniye.

⁶ Inagi mono huno neʼapateya vekamoʼmo aote peleti mayamo alino amiʼniye. Egamo ani atafa peleti mayamo alino ataleteno saufa peleti mayamo Ala kava neʼmo aulagaleʼmo hiʼyalamuteʼmo maleʼniye. Magoʼe peleti mayamo ohaneʼniyaʼmofeʼmo ani aliʼniya aote peleti mayamo Nevinina amiʼniye.

⁷ Ani afinaʼmo mago Inomi vekamo agiʼamo Nogiʼmo Goti mono nopiʼmo maiʼniye. Agaemo Solo aliʼyaʼamo neʼaliya vekamo pulumakaleʼmo neʼyagaiya vayaʼaiteʼmo yagaino neʼapateya vekamo maiʼniye.

⁸ Neviniʼmo peleti mayamo alitenoʼaeʼmo Ahimalekifeʼmo ina gemo ha painoʼaeʼmo, Mago hayoʼmofi naipemofi huno haneʼnifi ohaneʼniye. Kini vekamo aliʼyaʼamo malage huta alisuna aliʼyaʼmo haneʼniyaʼmofeʼmo nagaemo kamemo hisuva yaʼmo naipeʼe alu kamemo hisuva yaʼeʼmo oʼaliʼnove, huno ha paiʼniye.

⁹ Mono huno neʼapateya vekamoʼmo hunoʼaeʼmo, Kagaemo Ela kagoʼmu kotegamo Filisatini vekamo Golaiyatiʼmo kamitimo amagiʼnana vekamo naipemo haneʼniye. Apakaemo lavolavofiʼmo hayaeteʼa mono huʼa neʼapataya vayaʼmogi kukena yaʼmo maleʼnaya akamelegamo maleʼnae. Kagaemo kahauʼnisiyana ani naipemo aliyo, huno ha paiʼnigeno Neviniʼmo hunoʼaeʼmo, Mago naipemo ani naipegana huno ohaneʼniye. Ani naipemo namiyo, huno ha paiʼniye.

¹⁰ Inagi Neviniʼmo Solofeʼmo koli huteno aune heno Gati taonifi kini vekamo Ekisitegamo uʼniye.

¹¹ Apakaemo kini vekamo Ekisi aliʼyaʼamo neʼaliya vayaʼmogimo kini vekaeʼmo huʼapaeʼmo, Ani vekamo Neviniʼmo koʼaleʼmo neʼyagaiya kini vekamoʼmo maiʼniye. Aʼne anagaʼmogimo yokemo huʼa ateʼapaeʼmo ina ge huʼa yoke huʼapaeʼmo, Soloʼmo tauseni tauseniʼa vayaʼmo kamitimo apamagiʼniye. Neviniʼmo teni tauseni teni tauseniʼa vayaʼmo kamitimo apamagiʼniye, huʼa huʼnae.

¹² Neviniʼmo ani gemo afitenoʼaeʼmo lusi kava huno agesamo afiteno Gati taonifi kini vekamo Ekisifeʼmo lusi kava huno koli huʼniye.

¹³ Koli huʼniyaʼmofeʼmo apaulagaleʼmo aeto agufa kavaʼmo huʼniye. Agaemo aigofe negi nagi kavaʼmo huʼniye. Agaemo taoni kegiʼya kipateʼmo avoʼmo kaege avayafatiʼmo afaʼa ateʼnigeno avanumoʼmo emineno avenanapa ayokateʼmo uno lamige huʼniye.

¹⁴ Inagi Ekisiʼmo agetenoʼaeʼmo aliʼyaʼamo neʼaliya vayaʼaifeʼmo ina ge huno hapa painoʼaeʼmo, Ageyo, ani vekamo negi nagi kavaʼmo nehiya vekamo maiʼniye. Na kava higetapaeʼmo nagaetegamo avalelitapa eʼnae.

¹⁵ Negi nagi nehaya vayaʼmogi aliʼyaʼnimo alisafiye. Na kava higetapaeʼmo lapakaemo ani vekamo avalelitapa nagae naulagaleʼmo eʼnagenoʼaeʼmo ani negi nagi kavaʼmo nehiye. Ani vekamo noʼnifiʼmo uno haisifiye, huno hapa paiʼniye.