1 Samiyo 20 - The Keyagana NT and 25 OT books

Yonataniʼmo Neviniʼa ha maeʼniya gemae

¹ Soloʼmo Lama taonifiʼmo Naiyoti haopaleʼmo uno avaʼyi huʼnigenoʼaeʼmo Neviniʼmo Lama taonifatiʼmo ataleno aune hetaleno halate Yonatanitegamo uʼniye. Agaemo Yonatanifeʼmo hunoʼaeʼmo, Nagaemo na agufa kavaʼmo huʼnogenoʼaeʼmo afokamoʼmo kamitimo namagisigeʼna falisuvafeʼmo nehiye. Afokamo aulagaleʼmo na agufa hosu kavaʼmo huʼnove, huno ge huno afi geʼniye.

² Yonataniʼmo Nevini geʼaleʼmo aeno atagaina hunoʼaeʼmo, Haʼao, kagaemo afaʼa ofaligane. Afoʼnimoʼmo mago alopa kavaʼmofi aise kavaʼmofi huno afaʼa osugiyaʼmonanafa hogoteno nagaefeʼmo naha paigiye. Na agufa kava hisigenoʼaeʼmo afoʼnimoʼa ani agufa kavafeʼmo fala kino naha opaigiye. Ani agufa kavaʼmo afaʼa osugiye, huno ha paiʼniye.

³ Ha paiʼnigeno Neviniʼmo hunoʼaeʼmo, Ala kava neʼmo alagi afaʼa maige kagaemo afaʼa maige hutana maiʼnaʼana afokamoʼmo aise afinaʼatomo kamitimo namagigiye. Afokamoʼmo kageʼniyana kagaemo nagaefeʼmo kahauʼnigeno kageʼniye. Agaemo hunoʼaeʼmo, Lapakaemo Yonatanifeʼmo ani hisuva kavafeʼmo ha opaiyo. Fiku yanageno aipamoʼmo kana hugiye, huno hapa paiʼniye.

⁴ Yonataniʼmo ani gemo afitenoʼaeʼmo Nevinifeʼmo ha painoʼaeʼmo, Kagaemo na agufa kavaʼmo huʼna kaha maesuvafeʼmo kahauʼnifigeʼna ani kavaʼmo huguve.

⁵ Neviniʼmo ha painoʼaeʼmo, Egamo saufa kaimo hopa afinaʼmogeʼna nagaemo uʼna kini vekaʼeʼmo magokepiʼmo neʼyaʼmo nesuva afinaʼmo haneʼniye. Haneʼniyaʼmonanafa natalegeʼnao nagaemo uʼna afa mopalegamo fala kiʼna maime maime neʼvisugeno napa tali afinaʼmo uneʼmo afole aigiye.

⁶ Nagaemo hiʼyalamuteʼmo fai oʼmaiguvaʼmofeʼmo nagaefeʼmo haiyaʼaleʼmo uʼniye, huno kafi gesigekaeʼmo ina ge huka ha paiyo. Neviniʼmo naha painoʼaeʼmo, Metalehamu kotega noʼnilegamo mani afinaʼmo muki kafugaʼaeʼmo muki afamo anagaʼnimo aliʼa anupa huʼa maiʼneʼa ofalinimo nehayaʼmofeʼmo nagaemo ugesuve. Kanalepiye. Kanalene, huka hisanana afaʼa uguve, huno nafi geʼnigeʼnaeʼmo nagaemo kanalene, huʼna huʼnogeno uʼniye, huka ha paiyo.

⁷ Agaemo hunoʼaeʼmo, Kanalene, huno hisigeʼnaeʼmo alagepa huʼna afaʼa maiguve. Maiguvaʼmonanafa agaemo aipamo lusi kava huno lesigenoʼaeʼmo alino hosu huno nategaiye. Ani agufa kavafeʼmo agesamo neʼafiye.

⁸ Kagaemo nagaeʼe Ala Kava neʼeʼmo kotalakemo hu maleʼnanaʼmofeʼmo nagaetegamo alagepa kavaʼmo huvo. Alagepa huka naha maeganaʼmonanafa naipafiʼmo hosu kavaʼmo haneʼnisiyaʼmoʼmo inagi kagaikageʼmo kamiti nahaegane. Na kava higekaeʼmo navalelika afokamotegamo visanageno kamitimo nahaegaiye, huno ha paiʼniye.

⁹ Ha paiʼniyaʼmonanafa Yonataniʼmo ha painoʼaeʼmo, ani kavafeʼmo kagesamo oʼafika afaʼa ato. Nagaemo ago agesugeno afoʼnimoʼmo alino hosu huno kategefeʼmo hisigeʼnaeʼmo nagaemo afaʼa kaha opaigufiye.

¹⁰ Inagi Neviniʼmo ha painoʼaeʼmo, Afokamoʼmo aipamo lesigenoʼaeʼmo ge nahausigenoʼaeʼmo ina laʼmo eno naha paigiye, huno afi geʼniye.

¹¹ Yonataniʼmo Nevinifeʼmo hunoʼaeʼmo, Eno, afaʼa mopaleʼmo uguʼae, huno huʼnigeʼana anakaemo afa mopaleʼmo uʼnaʼae.

¹² Inagi Yonataniʼmo Nevinifeʼmo ha painoʼaeʼmo, Ala kava neʼmo Isaleli vayaʼmogita Gotitimoʼmo geʼnimo afitenoʼaeʼmo faigoko gemo afaʼa hugiye. Egamofi olagamofi huʼna afoʼnimofeʼmo ge huʼna afi gegauve. Agaemo kagaefeʼmo kanalene, huno hisigenaeʼmo ani gemo hutalesugeno kagaetegamo oʼvisiyaʼmoʼmo Ala kava neʼmoʼa hosu yaʼmo afaʼa namino.

¹³ Ani kavaʼmo huguvaʼmonanafa afoʼnimoʼmo kagaetegamo hosu kavaʼmo hisiyafeʼmo agesamo afiʼnisiyaʼmoʼmo ani gemo hutalesugeno kagaetegamo visigeka afitekaeʼmo afaʼa ugane. Nagaemo aliʼna katesugeka uka alagepa huka afaʼa maigane. Ala kava neʼmoʼa afonimoʼeʼmo magokepiʼmo lokaeno maiʼniya kava huno kagaeʼeʼmo magokepiʼmo lokaeno maino, huno alino auleno ateʼniye.

¹⁴ Afaʼa maiʼnova afinaʼmo ofalisuvafeʼmo Ala kava neʼmoʼa laha neʼmaeya kava huka alagepa huka fiku namiteka naha mao.

¹⁵ Ani kavaʼageʼmo osuganaʼmonanafa muki afinaʼaeʼmo afamo anagaʼnimo oʼapataleka alagepa huka hapa maeme hapa maeme uka maiyo. Ala kava neʼmoʼa muki kame vayakamo ma mopafiʼmo alagi oʼmaisayafeʼmo alino hano huno apatalesigeka afamo anagaʼnimo hapa maeme hapa maeme uvo, huno ha paiʼniye.

¹⁶ Yonataniʼmo ani geletiʼmo Nevini afamo anagaʼaʼeʼmo kotalakemo hu maleʼniye. Agaemo hunoʼaeʼmo, Nevini kame vayaʼmogi ani kotalakemo amagiʼa atalesayaʼmoʼmo Ala kava neʼmoʼa agoti huno apateno, huno huʼniye.

¹⁷ Yonataniʼmo Nevinifeʼmo hau ayamopafiʼmo hauʼniyaʼmofeʼmo Neviniʼmo halate polomasi gemo hisiyafeʼmo ha paiʼniye. Yonataniʼmo agaiʼaeʼmo hauʼniya kava huno Nevinifeʼmo hauʼniye.

¹⁸ Inagi Yonataniʼmo Nevinifeʼmo hunoʼaeʼmo, Egamo saufa kaimo hopa afinaʼmo afole aisigekaeʼmo kagaemo neʼyateʼmo oʼmaisanagenoʼaeʼmo afoʼnimoʼmo siyakamo afaʼa hanesigeno agetenoʼaeʼmo agesa alaʼamo afigiye.

¹⁹ Inagi loleʼe magoʼe afinaʼmo fala kika maiteka ataleka alu afinaʼmo fala kika maiʼnana kotegamo uka alopa yafateʼmo maiyo.

²⁰ Nagaemo eʼna loleʼe magoʼe kevemo ani yafa haneʼniya yategamo afaʼa haegauve.

²¹ Nagaemo mago mafaʼnemoʼmo uno keveʼnimo akaisiyafeʼmo ha paiʼnaeʼmo, Uka keve kahauya huka akaiyo, huʼna ha paiguve. Nagaemo huʼnaeʼmo, Ago, huʼna, magagayagamo haneʼniye. Alikeno, huʼna ha paisuva gemo afitekaeʼmo kagaemo alino hosu huno oʼnatesigeʼna alagepa huʼna maiguve, huka kagesa afigane.

²² Afiganaʼmonanafa nagaemo neya vekaeʼmo ha paiʼnaeʼmo, Ago, huʼna, Kevemo mugagayagamo haneʼniye, huʼna ha paisugeno Ala kava neʼmoʼa alino kateʼniyaʼmofeʼmo he tika alu haopalegamo uvo, huno ha paiʼniye.

²³ Kege huʼnoʼa kavatefeʼmo Ala kava neʼmoʼa huʼnoʼa gemo afiʼniyaʼmofeʼmo muki afinaʼmo faigoko hisiya vekamo maige maige huno maigiye.

²⁴ Inagi Neviniʼmo afa mopaleʼmo fala kino maiʼnigeno egamo kini vekamo Soloʼmo saufa kaimo hopa afina neʼyateʼmo fai maiʼniye.

²⁵ Soloʼmo fai neʼmaiya siyaʼaleʼmo kapamo haopaleʼmo fai maiʼniye. Yonataniʼmo he tiʼnigenoʼaeʼmo Amanaʼmo Solo haopaleʼmo fai maiʼniye. Fai maiʼniyaʼmonanafa Nevini siyamo afaʼa haneʼniye.

²⁶ Neviniʼmo oʼmaiʼniyaʼmonanafa ani afinaʼmo Soloʼmo ge osuʼniye. Agaemo agesamo afinoʼaeʼmo, Neviniʼmo na agufa kavaʼmo huʼnifi. Agaetegamo mago kavaʼmo afole aiʼnigeno Goti aulagaleʼmo aote maiʼniyaʼmofeʼmo oʼmeʼniye, huno agesamo afiʼniye.

²⁷ Egamo saufa kaimo napa tu afinaʼmo halate Nevini siyaʼamo afaʼa haneʼniye. Soloʼmo mafaʼneʼamo Yonatanifeʼmo hunoʼaeʼmo, Na kava higenoʼaeʼmo Neviniʼmo egaʼe hemeniʼeʼmo oʼmeʼniye.

²⁸ Yonataniʼmo geʼaleʼmo aeno atagaina hunoʼaeʼmo, Neviniʼmo naha painoʼaeʼmo, Metalehamu kotega noʼnilegamo ugesugi, kanalepiye, huno lokiya ge huno nafi geʼniye.

²⁹ Agaemo hunoʼaeʼmo, Kahaoke hovanagi afaʼa nategeʼna vino. Afamo anagaʼnimogi ani taonifiʼmo ofalinimo hisunafeʼmo nepuʼnimoʼmo naha painoʼaeʼmo, Ago eno, huno huʼniyaʼmofeʼmae. Kaulagaleʼmo fiku naha maeka namisana kaʼmo ageʼnisanana kahaoke hovanagi nategeʼna uʼna nepuʼnimogi apakegauve, huno huʼniyaʼmofeʼmo kini neʼyateʼmo oʼmeʼniye, huno ha paiʼniye.

³⁰ Soloʼmo ani gemo afitenoʼaeʼmo Yonatanifeʼmo lusi kava huno aipamo leʼnigeno ha painoʼaeʼmo, Hosu a kanomo ge noʼafiya a kanomo mafaʼnemogae. Nagaemo kageʼnovana Yesi mafaʼnemo lekana paika ateʼnane. Itakamoʼe kagaikaʼeʼmo lanavagage hisiyafeʼmo lekana paika ateʼnane.

³¹ Yesi mafaʼnemo ma mopafiʼmo muki afaʼa maiʼniya afinaʼmo kagaemo lokiya vaika oʼmaisanageno yagaika apatesana kavaʼmo afole oʼaigiye. Oʼaigiyaʼmofeʼmo hemenimo alika apategeʼa uʼa avaleliʼa esageʼna kamitimo haesugeno faligiye, huno ha paiʼniye.

³² Yonataniʼmo Solo geʼaleʼmo aeno atagaina hunoʼaeʼmo, Na kava higekaeʼmo kamitimo amagigane. Haiya hosu kavaʼmo huʼniye, huno ha paiʼniye.

³³ Soloʼmo ani gemo afitenoʼaeʼmo hayoʼaletiʼmo aeʼniyana Yonataniʼmo aeno hatagauʼniye. Yonataniʼmo ani kavatetiʼmo ageʼniyana afoʼamoʼmo aipa agesamo afinoʼaeʼmo, Neviniʼmo alagi kamitimo haegauve, huno ageʼniye.

³⁴ Inagi Yonataniʼmo lusi kava huno aipamo leʼnigeno hiʼyalamutetiʼmo ataleno uʼniye. Agaemo ani lole afinaʼmo ani kaileʼmo neʼyaʼmo oʼneʼniye. Afoʼamoʼmo Nevinifeʼmo huno faipa huno ateʼniyaʼmofeʼmo aipamo kana huʼniye.

³⁵ Ega netepiʼmo Yonataniʼmo Nevinifeʼmo lekana paino ateʼniya afinaʼmo afa mopaleʼmo uʼniye. Agaemo mago mafaʼnemo avaleʼnigeʼana lokaeʼana uʼnaʼae.

³⁶ Agaemo ani mafaʼneeʼmo hunoʼaeʼmo, Nagu nagu huka uvo. Keve hetalesugeno visiya kevemo kahauya huka ago, huno ha paiʼnigeno ani mafaʼnemo nagu nagu huno neʼvigenoʼaeʼmo Yonataniʼmo mago kevemo hetalegeno uno mugagayagamo asagauno aiʼniye.

³⁷ Asagauno aiʼniya yateʼmo ani mafaʼnemo uno avaʼyi nehigenoʼaeʼmo Yonataniʼmo keya aeno ge hunoʼaeʼmo, Kagaemo magoʼe huka uvo. Kevemo mugagayagamo haneʼnegaiye.

³⁸ Yonataniʼmo halate ani mafaʼneeʼmo keya aeno ge hunoʼaeʼmo, Malage huka uvo. Kagaemo afaʼa he tika oʼmaiyo, huno huʼniyaʼmofeʼmo ani mafaʼne kanomoʼmo asole kevemo akaino aliteno halate agaetegamo eʼniye.

³⁹ Eʼniyaʼmonanafa ani mafaʼnemoʼmo mago kavaʼmo oʼageʼniye. Haʼao, Yonataniʼe Neviniʼekeʼmo ani gemo aepaʼamo afinaʼae.

⁴⁰ Yonataniʼmo atiʼaʼe keveʼeʼmo ani mafaʼnemo amitenoʼaeʼmo, Kagaemo alinika taonifilagamo halate uvo, huno ha paiʼniye.

⁴¹ Mafaʼnemo ago utegenoʼaeʼmo Neviniʼmo yafaʼmo akamelagamo fala kino maiʼniyatetiʼmo ataleno eno Yonatani haopaleʼmo augosalegatiʼmo mopafiʼmo asagauno aiteno he tino loleʼe magoʼe kanaleʼmo mopaeʼmo ape huno ateʼniye. Anakaemo hanaeʼana neteʼana aviʼyaʼmo huʼnaʼaʼmonanafa Neviniʼmo magoʼe huno aviʼyaʼmo huʼniye.

⁴² Inagi Yonataniʼmo Nevinifeʼmo ha painoʼaeʼmo, Laʼagaemo ago Ala kava neʼmo agiʼaletiʼmo polomasi gemo hu maleʼnoʼaʼmofeʼmo kaipamoʼmo falu huʼninageka afaʼa uvo. Laʼagaemo polomasi gemo ina ge hutaʼaeʼmo laʼagaemo alitaʼa laʼao ya hutaʼa maisuʼa kavaʼmoʼa kaginago vayaʼe naginago vayaʼeʼmo muki afinaʼae afinaʼaeʼmo laʼao vayaʼmo maigae. Ala kava neʼmoʼa ani laʼagaemo huʼnoʼa geleʼmo faigoko hisiya vekamo maiʼniye.