1 Samiyo 2 - The Keyagana NT and 25 OT books

Hanaʼmo Ala kava nefeʼmo nunumuʼmo huʼniya gemae

¹ Hanaʼmo nunumuʼmo hunoʼaeʼmo, Nagaemo naipafatiʼmo Ala kava nefeʼmo namogaga neʼauve. Ala kava nepiʼmo maiʼnogenoʼaeʼmo lokiya vaino nateteno alino asaga uno nateʼniye. Kagaemo nagufamo alika katika nateʼnanageʼnaeʼmo namogagamo neʼauvaʼmofeʼmo kame vayaʼnieʼmo kigi nehuve.

² Ala kava nene, huʼna, Kagaemo alagi kaote vekamo maiʼnanageno mago vekamo aote vekamo kagaekana huno oʼmaiʼniye. Kagaemo magokeʼageʼmo maiʼnane. Gotitimogamo kagaekeʼmo alopa yafakana huka maiʼnanageta kahaopaleʼmo alagepa huta neʼmaune.

³ Ala kava neʼmoʼa alagi ageno alagepa huʼniya Gotiʼa maiʼneno kavatimo alino fako nehiyaʼmofeʼmo lapakaitapi lapakitapileʼmo alita neʼasagaya gemo huge himuʼnamu gemo huge osiyo.

⁴ Gotiʼa lokiya ati vayaʼmogi atiʼapimo aeno lo aeʼniyaʼmonanafa lokiyaʼapimo ohaneʼniya vayaʼmo lokiya vaino apateʼniye.

⁵ Alopa neʼyaʼmo neʼa apamu huʼnaya vayaʼmogi miyaʼapimo alisayafeʼmo aliʼyaʼmo aliteʼa nesaya neʼyaʼmo neʼaliyaʼmonanafa apaka teʼniya vayaʼmogi hemenimo neʼyaʼmo neʼa apamu nehae. Anamo a kanomoʼa seveniʼa mafaʼnemo alino apateʼniyaʼmonanafa asole mafaʼnemo alino apateʼniya a kanomoʼa hemenimo lokiyaʼamo alagi ohaneʼniye.

⁶ Ala kava neʼmoʼa kamitimo apamagige faliʼnaya vayaʼaina afaʼa maisaya yaʼmo apamige nehiye. Agaemo kanolufiʼmo alino apatege kanolufatiʼmo alino he tino apatege nehiye.

⁷ Ala kava neʼmoʼa mago vayaʼmo kagemi yaʼapimo ohaneʼniya vayaʼmo alino hamaleno apatege mago vayaʼmo kagemi yaʼapiʼe vayaʼmo alino hamaleno apatege nehiye. Agaemo alino afepi apatege alino asagauno apatege nehiye.

⁸ Ma mopamo faino ateʼniya posimo Ala kava neʼmo posi yosamo haneʼniye. Agaemo ma mopamo mani posileʼmo faino ateʼniyaʼmofeʼmo kagemi yaʼapimo ohaneʼniya vayaʼmo mumusopafatiʼmo alino asagauno apatege neʼyafeʼmo aukaya nehaya vayaʼmo laʼnefafatiʼmo alino asagauno apatege nehiyanageʼa ala apaki aliteʼa yagaiʼa apatesayafeʼmae.

⁹ Alino apaote apateʼniya vayaʼamogi kateʼmo visagenoʼaeʼmo yagaino apategaiyaʼmonanafa hosu vayaʼmogimo hani huʼniya yapiʼmo maiʼnayanageʼa ge osuʼa maigae. Lokiya vayaʼmo lokiyaʼapiletiʼmo alagepa huʼa oʼmaigayaʼmofeʼmae.

¹⁰ Ala kava neʼmoʼa kokuʼnapatiʼmo hakalu huteno kame vayaʼamo alagi alino hano huno apatalegaiye. Ala kava neʼmoʼa muki ma mopafi vayaʼmo agoti huno apategaiye. Agaemo lekana paino ateʼniya kini vekamo lokiyaʼamo amigiye. He, uvelimo faleno ateʼniya kini vekamo agiʼaleʼmo alino asagauno ategaiye, huno nunumuʼmo huʼniye.

¹¹ Hanaʼmo nunumuʼmo hutenoʼaeʼmo agaemo Elakenaʼeʼmo Lema taonifiʼmo uʼnayaʼmonanafa aise mafaʼnemo Samiyoʼmo ani koteʼmo maiʼneno Ala kava neʼmo aliʼyaʼamo Ilai aulagaleʼmo aliʼniye.

Ilai mafaʼnelaʼmoganimo hosu kavaʼmo huʼnaʼa gemae

¹² Ilai mafaʼnelaʼmo alagi hosu vekalaʼmo maiʼnaʼae. Anakaemo Ala kava neʼmo oʼageʼnaʼae.

¹³ Mono huʼa neʼapataya vayaʼmogimo Goti gemo akame osuʼnayana mago vekamoʼmo ofalinimo hisiyafeʼmo eʼnigeno ani lole vekalaʼmo aliʼyaʼanimo neʼaliya vekamo ameʼamo alisiyafeʼmo loleʼe magoʼe aveʼmo haneʼniya fokumo alinino eʼniye.

¹⁴ Ani vekamoʼmo fokuletiʼmo haiya agufa ameʼamo samofatiʼmo amuko anipatiʼmo aeno lanu paiʼnigeno ani fokuleʼmo haneʼnifi inagi alinino uʼniye. Anakaemo ani agufa hosu kavaʼmo muki Isaleli vayaʼaitegamo Sailo taonifiʼmo ofalinimo hisayafeʼmo aliniʼa eʼnaya vayaʼaitegamo huʼnaʼae.

¹⁵ Magoʼe hosu kavaʼmo huʼnaʼae. Ofalini afayaʼamo okaeʼnagenoʼaeʼmo ani mono huʼana neʼapataʼa vekalaʼani aliʼyaʼmo neʼaliya vekamoʼmo eno ofalinimo huʼniya vekaeʼmo hunoʼaeʼmo, Mono huno neʼapateya vekamoʼa samofiʼmo nekaya ameʼaeʼmo ohauʼniye. Okaeʼnana ameʼamo amiyo.

¹⁶ Agaemo ani ofalinimo hisiyafeʼmo huʼniya vekamoʼmo hunoʼaeʼmo, Apakaemo hogoteʼa afayaʼamo atafiʼmo kae maleʼnisageka henagaʼamo haiya agufa ameʼaeʼmo kahauʼnisifigeka aligane, huno ha paiʼniyana, haʼao, huno, Kagaemo hemenigeʼmo namiyo. Oʼnamisanana nagaiʼnigeʼmo lokiyaʼniletiʼmo aliguve, huno ha paiʼniye.

¹⁷ Ani Ilai lole neya mafaʼnelaʼmoganimo huʼnaʼa hosu kavaʼmoʼa Ala kava neʼmo aulagaleʼmo alagi hosu kavaʼmo haneʼniye. Ala kava netefeʼmo ofalinimo hisayafeʼmo aliniʼa eʼnaya vayaʼmogimo Ala kava netefeʼmo ofalinimo hisaya kavafeʼmo alagi ohapauʼniye.

Samiyoʼmo aliʼyaʼmo aepa faino aliʼniya gemae

¹⁸ Ani afinaʼmo Samiyoʼmo aise mafaʼnemo maiʼniyaʼmonanafa Ala kava neʼmo aulagaleʼmo agaemo monoʼmo huʼa neʼapataya vayaʼmogimo vaiʼa neʼaliya kukenamo vaino aliʼneno aliʼyaʼmo aliʼniye.

¹⁹ Itaʼamoʼmo muki kafugaʼae kafugaʼaeʼmo mago aise alapaʼage yatala kukenamo aeʼniye. Itaʼafoʼalaʼmoganimo muki kafugaʼaeʼmo ofalinimo hisaʼafeʼmo eʼanaeʼmo itaʼamoʼmo ani alapaʼage yatala kukenamo alinineno Samiyoʼmo amiʼniye.

²⁰ Ani afinaʼmo Ilaiʼa Elakenaʼe aʼaʼeʼmo alino auleno anateteno Elakenafeʼmo hunoʼaeʼmo, Akamoʼmo ani mafaʼnemo Ala kava neʼmo amiʼniyaʼmofeʼmo Ala kava neʼmoʼa ani a kanoletiʼmo asole kaginago vayaʼmo kamino, huno ha paiʼnigeʼana noʼanilegamo uʼnaʼae.

²¹ Ala kava neʼmoʼa eno Hanaʼmo ha maeʼnigeno Hanaʼmo loleʼe magoʼe mafaʼnegi lole a mafaʼnelanagi huno alino apateʼniye. Ani afinaʼmo neya mafaʼneʼamo Samiyoʼmo Ala kava neʼmo aulagaleʼmo ko siʼniye.

Mago vekamoʼa Ilai afamo anaga vayaʼaitegamo afole aisiya kavafeʼmo aune gemo huʼniya gemae

²² Ilaiʼmo alagi ago kosunaʼmo leteno maiʼnenoʼaeʼmo afiʼniyana muki hosu kavaʼmo lole mafaʼneʼalamoganimo Isaleli vayaʼaitegamo huʼnaʼa gemo afiʼniye. Ani agufa hosu kavafeʼmo afiʼniyana anakaemo Goti seli mono noʼamo kipateʼmo aliʼa anupa huʼa maiʼnaya aʼne anagaʼeʼmo lokaeʼa havaeʼnae, huʼa huʼnageno afiʼniye.

²³ Afiʼniyaʼmofeʼmo hana painoʼaeʼmo, Na kava higetanaeʼmo ani hosu kavaʼmo nehaʼae. Muki vayaʼmogimo eʼa lanakae kavafeʼmo naha nepaiye.

²⁴ Nagaemo alagepa lanava gemo noʼafuve. Ala kava neʼmo vayaʼamogimo hosu kavaʼmo hisayafeʼmo alitana afole aitana neʼapataʼae.

²⁵ Mago vekamoʼmo mago vekalegamo hosu kavaʼmo nehisiyaʼmoʼmo agoti gemo neʼafiya vekamoʼa alino fako huno anategaiyaʼmonanafa mago vekamoʼmo Ala kava netegamo hosu kavaʼmo hisiyaʼmoʼmo ina laʼmo ha maegaiye.

²⁶ Ani afinaʼmo Samiyoʼmo kosime kosime haino yatala huʼnigeʼapaeʼmo Ala kava neʼe vayaʼmogiʼeʼmo huʼniya kavafeʼmo magoʼe huno lusi kava huno hapauʼniye.

²⁷ Inagi mago Goti vekaʼamo Ilaitegamo eno ha painoʼaeʼmo, Ala kava neʼmoʼa kaha painoʼaeʼmo, Kagae kaginagomo Eloniʼe afamo anagaʼaʼeʼmo Feloʼmo Isipi kotega kini vekamo kalavusi aliʼyaʼamo aliʼa maiʼnageʼnaeʼmo nageʼa aeto hisayafeʼmo apakaetegamo afole oʼaiʼnofiye.

²⁸ Nagaemo muki Isaleli nofi vayapatiʼmo Eloni nofi vayaʼmogi mono huʼa neʼapataya vayaʼmo maisayafeʼmo lekana paiʼna oʼapateʼnofiye. He, apakaemo yafa hiʼyalamuteʼmo ofalinimo huge alagepa atumo neʼaiya laʼnefamo kaege naulagaleʼmo mono kukenamo vaige hisayafeʼmo lekana paiʼna apateʼnove. Nagaemo hapa paiʼnaeʼmo, Isaleli vayaʼmogimo atafiʼmo muki kaesaya ofalinimo atupaʼamo afaʼa negae, huʼna hapa paiʼnove.

²⁹ Ani kavaʼmo huʼnovaʼmofeʼmo na kavaʼmo higetapaeʼmo mono noʼnifiʼmo ofalinimo hiyo, huʼna lapa paiʼnova ofalini kavateʼmo aitapa lanu paiʼnae. Lapafayaʼe vayaʼmo hamalesayafeʼmo Isaleli vayaʼnimogi neʼnamiya ofalini yapatiʼmo hogote ameʼamo aliʼnae. Kagaemo mafaʼnekalaʼmogani anakiʼanileʼmo alika asaga nehanaʼmonanafa nagiʼnileʼmo alika afepiʼmo neʼnatane.

³⁰ Ani kavaʼmo nehanaʼmofeʼmo Ala kava neʼmoʼnamo Isaleli vayaʼmogi Gotiʼapimoʼnamo huʼnaeʼmo, Hogoteʼna ina ge huʼna kaha paiʼnaeʼmo, Muki afinaʼmo mafaʼnekamogiʼe afokamo mafaʼnemogiʼeʼmo naulagaleʼmo aliʼyaʼnimo aligae, huʼna kaha paiʼnovaʼmonanafa hemenimo ina gemo huve. Haʼao, magoʼe hutapa aliyaʼnimo oʼaligae. Ala nagimo neʼnamiya vayaʼaina ala apakimo apamiguve. Nagaefeʼmo ina agufa gotiʼae, huʼa nehaya vayaʼaifeʼmo, ina agufa vayane, huʼna huguve.

³¹ Afiyo, huʼna, Mago afinaʼmo utegeʼna nagaemo muki neya mafaʼnekamo kamitimo apamagisugeʼa kagae afamo anagapatiʼmo kosuna vayaʼmo oʼmaigae.

³² Agesanana hanageke yaʼmo mono noʼnifiʼmo afole aisigeka agegane. Nagaemo Isaleli vayaʼaitegamo alagepa kavaʼmo nehuvaʼmonanafa hosu yaʼmo agegane. Kagae afamo anagapatiʼmo kosuna vayaʼmo oʼmaigae.

³³ Oʼmaigayaʼmonanafa kamitimo oʼapamagisuva vayaʼmogi kaipa kagesamo aliʼa hosu huʼa katalesagenoʼaeʼmo kaulagamo fali kaegekana hugiye.

³⁴ Mago alagena kavaʼmo afole aisigeka agegane. Lole mafaʼnekalaʼmo Hafaniʼe Finiyasiʼeʼmo anakaemo magoke afinakeʼmo faligaʼae.

³⁵ Falisaʼageʼna nagaemo mago mono huno apatesiya vekamo alagepa aliʼyaʼmo alisiya vekamo aliʼna he tiʼna atesugenoʼaeʼmo agaemo muki naipa nagesafiʼmo haneʼniya kavaʼmo hugiye. Nagaemo aginago vayaʼamo lokiya vaiʼna apatesugeʼa alagi he tiʼa lokiya vaigae. Agaemo uvelimo lakiʼna faleʼna ateʼnova kini vekanimo aulagaleʼmo muki afinaʼmo aliʼyaʼmo aligiye.

³⁶ Henagaʼamo muki kagae nofi vayaʼmogimo agaetegamo eʼa ape huʼneʼa aise moniʼe aise neʼyaʼeʼmo alisayafeʼmo ge huʼa afigegae. Ge huʼapaeʼmo, Kahaoke hove. Aise neʼyaʼmo nesuva aliʼyaʼmo alisuvafeʼmo mono huʼna apatesuva aliʼyateʼmo navaleka nato, huʼa ge huʼa afigegae.