1 Samiyo 19 - The Keyagana NT and 25 OT books

Yonataniʼmo Neviniʼa ha maeʼniya gemae

¹ Inagi Soloʼmo Neviniʼa kamiti haesayafeʼmo mafaʼneʼamo Yonatanifeʼmo ha paige muki aliʼyaʼamo neʼaliya vayaʼaeʼmo hapa paige huʼniyaʼmonanafa Yonataniʼmo Nevinifeʼmo lusi kava huno hauʼnigeno amogaga aiʼniye.

² Inagi Yonataniʼmo Nevinifeʼmo ha painoʼaeʼmo, Afoʼnimoʼmo kagaemo kamitimo kahaesigeka falisanafeʼmo nehiyaʼmofeʼmo kagaikaleʼmo yagaika kateme kateme neʼugenoʼao neteʼmo afole aino. Okagesaya agufa yapilagamo uka fala kiyo.

³ Nagaemo afoʼnimoʼeʼmo kagaemo fala kika maiʼnisana haopalegamo utaʼaeʼmo nagaemo afoʼnimoʼeʼmo ani afa mopaleʼmo he tiʼna maiʼneʼnaeʼmo kagaetefeʼmo ha paiguve. Agaemo na agufa kavaʼmo kagaetegamo hisifigeʼna kaha paiguve, huno ha paiʼniye.

⁴ Inagi Yonataniʼmo Soloʼeʼmo neʼeʼanaeʼmo kege huʼanaeʼmo Yonataniʼmo Nevinifeʼmo alagepa ava gemo huno Solofeʼmo ha painoʼaeʼmo, Neviniʼmo kagaetegamo mago hosu kavaʼmo osuʼnifa kagaetegamo lusi alagepa kavaʼmo huʼniye. Huʼniyaʼmofeʼmo hosu kavanageka kini vekamoga aliʼyakamo neʼaliya vekalegamo hosu kavaʼmo hugane.

⁵ Agaemo Golaiyatiʼmo amagiʼniya afinaʼmo agaiʼa falisiya kavaʼmo huʼniyaʼmonanafa alopa Filisatini vekamo kamitimo amagiʼnigenoʼaeʼmo Ala kava neʼmoʼa muki Isaleli vayaʼmogita lagufamo alino katino lateʼniye. Kagaikamo ago agetekaeʼmo kamogagamo aiʼnane. Na kava higekaeʼmo hosu kava anonaʼamo ohaneʼniya vekalegamo hosu kavaʼmo hugane. Kamiti amagisanafeʼmo Neviniʼmo hosu kavatetiʼmo alino he tino okateʼniye, huno ha paiʼniye.

⁶ Soloʼmo ani gemo afitenoʼaeʼmo Ala kava neʼmo agiʼaletiʼmo agoʼyamo ataleno polomasi gemo hunoʼaeʼmo, Neviniʼmo kamiti amagisugeno ofaligiye, huno huʼniye.

⁷ Ani gemo hutegenoʼaeʼmo Yonataniʼmo Nevinifeʼmo keya aeno afoʼamoʼmo muki huʼniya gemo ha paiʼniye. Inagi Yonataniʼmo Neviniʼa avalelino Solotegamo uʼnigenoʼaeʼmo Neviniʼa kini vekaʼeʼmo hogoteno maiʼniya kava huno maiʼniye.

⁸ Henagaʼamo Filasatini vayaʼe Isaleli vayaʼeʼmo halate kamemo huʼnageʼapaeʼmo Neviniʼe ati vayaʼaʼeʼmo uʼa lokiya vaiʼa Filasatini vayaʼeʼmo kame huteʼa huʼa aeʼa apaka seʼnageʼapaeʼmo Filasatini vayaʼmo ataleʼa apaune heʼnae.

⁹ Hutagenoʼaeʼmo Ala kava neʼmoʼa ani hosu aunemo alino ateʼnigeno Soloteʼmo emineʼnigeno Soloʼmo noʼafiʼmo maiʼneno hayoʼamo ayapiʼmo aliteno maiʼniye. Maiʼnigeno Neviniʼmo eno agaeʼeʼmo lokaeno maiʼneno gita amagino ateʼniye.

¹⁰ Inagi Soloʼmo agesa afinoʼaeʼmo, Nagaemo yosaʼeʼmo aeʼna kamaeʼna ategauve, huteno hayoʼamo yaga auʼniyana aeno hatagauʼnigeno Neviniʼmo faino kasalo paeʼniye. Solo hayoʼamo yosafiʼmo haniʼnigeno Neviniʼmo ani haniʼilagamo faino kasalo paeno aune heʼniye.

¹¹ Ani haniʼilagamo Solo aliʼyaʼamo neʼaliya vayaʼmogi yagaiʼa ateteʼa netepiʼmo Neviniʼmo kamitimo haesayafeʼmo alino apateʼnigeʼa noʼalegamo uʼnae. Nevini aʼmo Maikoʼmo Nevinifeʼmo hunoʼaeʼmo, Hemenimo mani haniʼilagageʼmo kagaemo kaune osesanaʼmoʼmo egamo kamitimo kahaesageka faligane, huno ha paiʼniye.

¹² Huʼniyaʼmofeʼmo Maikoʼmo mago nofiʼmo alino nopatiʼmo mago yasi katetiʼmo aetalegeno lamiʼnigeno Neviniʼmo ani nofiteʼmo alime alime uno lamino mopafiʼmo asagauno aiteno aune hetaleno uʼniye.

¹³ Utegenoʼaeʼmo Maikoʼmo mago yosaletiʼmo alo hu maleʼnaya aunemo alino Nevini hipaleʼmo havaeno ateʼniye. Ateteno mago mememo ayokamo alino aune yaʼmo agenopaleʼmo maleteno kukena yaʼmo alino aino ati kaeno ateʼniye.

¹⁴ Inagi Solo aliʼyaʼamo neʼaliya vayaʼmogimo eʼa Neviniʼmo avalesayafeʼmo huʼnaya afinaʼmo Maikoʼmo hunoʼaeʼmo, Neviniʼmo kaita hauʼniye, huno hapa paiʼniye.

¹⁵ Inagi apakaemo atagineʼa uʼa Solofeʼmo ha paiʼnageno agaemo hapa painoʼaeʼmo, halate ataginetapa uta noʼafiʼmo haitapa hipaʼaletiʼmo avalelitapa egeʼna nagaemo kamitimo haegauve.

¹⁶ Inagi apakaemo halate uʼa agayana auneʼamo haneʼnigeno meme ayokamo agenopagana huno haneʼnigeʼa ageʼnae.

¹⁷ Apakaemo ageteʼapaeʼmo uʼa Solofeʼmo ha paiʼnageno henagaʼamo Soloʼmo Maikofeʼmo ina ge huno ge huno afi geʼnigenoʼaeʼmo, Kagaemo na agufa kavaʼmo higekaeʼmo nagaemo humi natane. Kagaemo kameʼnimo afaʼa ateʼnanageno faino kasalo paeʼniye, huno afi geʼniye. Inagi Maikoʼmo geʼaleʼmo aeno atagaina hunoʼaeʼmo, Agaemo naha painoʼaeʼmo, Na kava higeʼna kamitimo kamagiguve. Afaʼa nato, huno naha paiʼniye.

¹⁸ Neviniʼmo faino kasalo paeno aune heno Lama taonifiʼmo Samiyotegamo uno Soloʼmo agaetegamo huʼniya kavafeʼmo ava gemo huno ha paiʼniye. Inagi agaeʼe Samiyoʼeʼmo uʼana Naiyoti haopaleʼmo maiʼnaʼae.

¹⁹ Mago vayaʼmogimo Solofeʼmo ha paiʼapaeʼmo, afiyo, huʼa, Neviniʼmo Lama taonimo haopaleʼmo Naiyoti taonifiʼmo maiʼniye, huʼa ha paiʼnae.

²⁰ Inagi Soloʼmo mago vayaʼmo alino apateʼnigeʼa Neviniʼmo atafaisayafeʼmo uʼnae. Apakaemo uʼa avaʼyi huteʼa apakeʼnayana mago polofeti vayaʼmogi Goti gemo aeʼa hakalo huʼnageno Samiyoʼmo he tino yagaino apateʼnigeʼa apakeʼnageno Goti Aunemeʼamoʼa apakaeteʼmo emineʼnigeʼa apakaeʼeʼmo Gotitegati gemo aliniʼa aeʼa hakalo huʼnae.

²¹ Soloʼmo ani kavafeʼmo ava gemo afitenoʼaeʼmo alu vayaʼmo alino apateʼnigeʼa uʼnayana apakaeʼeʼmo Gotitegati aliniʼa gemo aeʼa hakalo huʼnae. Inagi Soloʼmo loleʼe magoʼe afinaʼmo magoʼe vayaʼmo alino apateʼnigeʼa uʼnayaʼmonanafa apakaeʼeʼmo Gotitegati gemo aliniʼeʼa aeʼa hakalo huʼnae.

²² Inagi Soloʼmo agaiʼamo Lama taonifilagamo uteno Seku kotega alopa ani keli kotuteʼmo uno avaʼyi huteno Seku vayaʼaifeʼmo apafi genoʼaeʼmo, Samiyoʼe Neviniʼeʼmo haiyaʼaleʼmo maiʼnaʼae, huno ge huno apafi geʼnigenoʼaeʼmo mago vekamoʼmo hunoʼaeʼmo, Anakaemo Lama taoni Naiyoti haopaleʼmo maiʼnaʼae, huno ha paiʼniye.

²³ Inagi Soloʼmo kateʼmo neʼvigenoʼaeʼmo Goti Aunemeʼamoʼa agaeteʼmo emineʼnigenoʼaeʼmo Gotitegati gemo alinineno aeno hakalo hume hume uno Lama taonimo Naoyoti haopaleʼmo uno avaʼyi huʼniye.

²⁴ Agaeʼeʼmo kini kukena yaʼamo asagino ataleʼneno Gotitegati gemo alinineno Samiyo aulagaleʼmo aeno hakalo huteno felugaʼe haniʼilagaʼeʼmo agufaʼalagaʼageʼmo havaeno maiʼniye. Ani agufa kavaʼmo huʼniyaʼmofeʼmo vayaʼmogi ani gemo huʼapaeʼmo, Soloʼeʼmo Gotitegati gemo aliniʼneʼa aeʼa hakalo nehaya vayapatiʼmo maiʼnifiye, huʼa nehae.