1 Samiyo 18 - The Keyagana NT and 25 OT books

¹ Neviniʼmo Solofeʼmo gemo ha paino hano hutegenoʼaeʼmo Yonataniʼmo Nevinifeʼmo aipamo amitenoʼaeʼmo agaemo agaiʼaeʼmo nehaiya agufa kavaʼmo huno lusi kava huno Nevinifeʼmo hauʼniye.

² Ani afinaʼmo Soloʼa Neviniʼmo avaleʼnigeno agaeʼeʼmo magokepiʼmo lokaeno maiʼnigeno Soloʼmo halate noʼalegamo ataleneno oʼuʼniye.

³ Yonataniʼmo agaiʼaeʼmo nehaiya agufa kavaʼmo huno Nevinifeʼmo hauʼniyaʼmofeʼmo agaeʼe Neviniʼeʼmo kotalakemo hu maleʼnaʼae.

⁴ Yonataniʼmo yatala kukenaʼamo asagino ataleteno ani kukena yaʼe muki kame hisiya yaʼeʼmo Nevinina amiʼniye. Agaemo naipeʼagi atiʼagi mapuluʼagi huno amiʼniye.

⁵ Soloʼmo Neviniʼa haiya kotega alino ateʼnifi uno muki geʼamo afiteno alu kotegaʼe alu kotegaʼeʼmo uʼneno huno afiteno ageʼniya kavaʼmo huʼniye. Soloʼmo Neviniʼa ami vayaʼaiteʼmo yagaino apatesiya vekamo maisiyafeʼmo ateʼniye. Ateʼnigeʼa muki vayaʼmogiʼe Solo aliʼyaʼamo neʼaliya vayaʼmogiʼeʼmo ageteʼapaeʼmo alagepa apaipamo kaliʼniye.

Soloʼmo Nevinifeʼmo hosu aipamo kalino ateʼniya gemae

⁶ Neviniʼa Golaiyatiʼmo kamitimo amagitegeʼapaeʼmo Isaleli ati vayaʼe Neviniʼeʼmo halate koʼapilegamo neʼageʼapaeʼmo muki Isaleli vayaʼai taonifatiʼmo aʼne anagaʼmogimo emiʼeʼa kategamo kini vekamo Soloʼeʼmo fotu hisayafeʼmo eʼnae. Apakaemo magokepiʼmo apamogaga aige yokemo huʼa ogefage huge tamolini amagige alu yoke nehaya nahaya yatetiʼe yatetiʼeʼmo yoke huge huliʼa eʼnae.

⁷ Apakaemo ogefage nehuʼapaeʼmo ina ge huʼa yokemo huʼapaeʼmo, Soloʼmo tauseni tauseniʼa kame vayatimo kamitimo hapaeʼniye. Neviniʼmo teni tauseni teni tauseniʼa kame vayatimo kamitimo hapaeʼniye, huʼa huʼnae.

⁸ Soloʼmo ani huʼnaya yokemo afitenoʼaeʼmo alagi ohauʼnigeno aipamo leʼnigenoʼaeʼmo Neviniʼmo teni tauseni teni tauseniʼa vayaʼmo kamiti hapaeʼniye, huʼa nehayaʼmonanafa nagaemo tauseni tauseniʼa kame vayaʼatogeʼmo kamiti hapaeʼnove, huʼa nehae. Agaemo ani ala agimo ago aliʼniyaʼmofeʼmo magoʼe huno ala agimo oʼaligiyaʼmonanafa kini vekamo hamalesiyana magoʼe huno ala agimo aligiye, huno huʼniye.

⁹ Soloʼmo ani afinatetiʼmo Neviniʼmo yagaino atetenoʼaeʼmo haiya agufa hosu kavaʼmo nagaetegamo hugiye, huno agesamo afiʼniye.

¹⁰ Egaʼamo Soloʼmo noʼafiʼmo maiʼnigenoʼaeʼmo Ala kava neʼmoʼa mago hosu auneʼmo alino ateʼnigeno agaeteʼmo emineʼnigeno noʼafiʼmo aune gemo huʼniye. Ani afinaʼmo Neviniʼmo gitamo amagino ateʼniyaʼmonanafa Solo ayapiʼmo hayoʼmo haneʼniye.

¹¹ Soloʼmo agesa afinoʼaeʼmo, Nagaemo yosaʼeʼmo aeʼna kamaeʼna ategauve, huteno hayoʼamo yaga auʼniyana aeno hatagauʼniye. Aeno hatagauʼniyaʼmofeʼmo Neviniʼmo lole afinaʼmo faino kasalo paeʼniye.

¹² Soloʼmo ageʼniyana Ala kava neʼmoʼa Neviniʼeʼmo magokepi lokaeno maiʼniye, huno agesamo afiʼniyaʼmonanafa Ala kava neʼmoʼa Soloʼmo ataleno uʼniyaʼmofeʼmo Soloʼa Nevinifeʼmo koli huʼniye.

¹³ Soloʼmo koli huʼniyaʼmofeʼmo Neviniʼmo magoʼe huno noʼafiʼmo afaʼa ategeno magokepiʼmo lokaeno oʼmaiʼniye. Soloʼmo Neviniʼa vani tauseniʼa ami ati vayaʼaiteʼmo yagaino apatesiya vekamo ateʼnigeno Neviniʼa muki vayaʼai apaulagaleʼmo aliʼyaʼamo aliʼniye.

¹⁴ Neviniʼmo muki aliʼyaʼamo afiteno ageʼniya kavaʼaletiʼmo aliʼnigenoʼaeʼmo Ala kava neʼmoʼa magokepiʼmo lokaeno maiʼniye.

¹⁵ Soloʼmo ageyana lusi kava huno afiteno ageʼniya kavaʼmo huʼnigeno agetenoʼaeʼmo agaefeʼmo koli huʼniye.

¹⁶ Huʼniyaʼmonanafa Neviniʼmo kame hisayafeʼmo alagepa huno yagaino apateʼniyaʼmofeʼmo muki Isaleli nofi vayaʼmogiʼe Yuta nofi vayaʼmogiʼeʼmo hapauʼniye.

Neviniʼmo Solo a mafaʼnemo aliʼniya gemae

¹⁷ Inagi Soloʼmo Nevinifeʼmo ha painoʼaeʼmo, Nagaemo Melapiʼmo yege a mafaʼneʼnimo kamisugeka aligane. Miya ofaiganaʼmonanafa nagaetefeʼmo koli osuka lokiya vaika Ala kava neʼmo kame vayaʼaʼeʼmo kame hiyo, huno ha paiʼniye. Soloʼmo aipafiʼmo agesamo afinoʼaeʼmo, Nagaemo kamitimo ohaegauvaʼmonanafa Filisatini ati vayaʼeʼmo kame huteʼa kamitimo haegae, huno agesamo afiʼniye.

¹⁸ Inagi Neviniʼmo ani gemo afitenoʼaeʼmo Solofeʼmo hunoʼaeʼmo, Nagaemo ina agufa vekageʼmo maiʼnogeʼa afamo anaga vayaʼnimo ala apaki vayaʼmo oʼmaiʼnae. Haiya kava huʼna kini vekamo ayemoʼamoʼna maiguve, huno ha paiʼniye.

¹⁹ Ha paiʼniyaʼmonanafa Soloʼmo a mafaʼneʼamo Melapiʼa Nevinina amisiya afinaʼmo oʼamiʼniyana Etaliyeʼmo Mehola taonifi vekamo aʼamo maisiyafeʼmo amiʼniye.

²⁰ Inagi Soloʼmo alu a mafaʼneʼamo Maikoʼa Nevinifeʼmo alagi lusi kava huno hauʼnigenoʼaeʼmo agaeteʼmo asagauno aiʼniye. Apakaemo Solofeʼmo ani kavafeʼmo ha paiʼnageno afitenoʼaeʼmo amogagamo aiʼniye.

²¹ Afitenoʼaeʼmo nagaemo Maikoʼmo avaleʼna Neviniʼmo amisugeno aneʼmu aegekana huno maigiye. Maikoʼmo ani kava huno maisigeʼa Filisatini vayaʼmogimo agaeʼeʼmo kame hugae, huno agesamo afitenoʼaeʼmo napa tu afinaʼmo Nevinifeʼmo hunoʼaeʼmo, Hemenimo kagaemo nayemoʼnimogamo maigane, huno ha paiʼniye.

²² Soloʼmo aliʼyaʼamo neʼaliya vayaʼaifeʼmo hapa painoʼaeʼmo, Lapakaemo utapa Neviniʼmo agesageno agaiʼamo magokeʼageʼmo maiʼnisigetapaeʼmo ina ge huta agesamo faiyo. Ago, hutapa, kini vekamoʼmo kagaefeʼmo amogagamo neʼaigetaeʼmo lagaemo muki aliʼyaʼamo neʼaluna vayaʼmogitaʼeʼmo kagaefeʼmo lahauʼniye. Ani kavatefeʼmo kini vekamo ayemoʼamogamo maiyo, hutapa ha paiyo huno hapa paiʼniye.

²³ Inagi apakaemo uʼa Nevinifeʼmo ani gemo ha paiʼnayaʼmonanafa Neviniʼa hunoʼaeʼmo, Nagaemo kini vekamo ayemoʼamoʼnamo maisuva kavaʼmo aise kavaʼmo haneʼniye, hutapa lapakesamo neʼafifiye. Haʼao, kagemi yaʼnimo ohanege ala nagimo ohanege huʼniye, huno hapa paiʼniye.

²⁴ Apakaemo uʼa Solofeʼmo Neviniʼmo huʼniya gemo ha paiʼnae.

²⁵ Inagi Soloʼmo hunoʼaeʼmo, Nevinifeʼmo ina ge hutapa ha paiyo, Kini vekamo ina gemo hunoʼaeʼmo, Aʼmo miya faisiya yaʼmo oʼnamigiyaʼmonanafa Neviniʼmo Filisatini vayaʼeʼmo kame huteno kini kame vayaʼmogi hosu kavaʼapimo anonaʼapilefeʼmo kamitimo hapaeteno vani hataletiʼa vayaʼai apakufa atupaʼamo lagauno alinino nagaetegamo egaiye, huno hapa paiʼniye. Soloʼmo agesamo afinoʼaeʼmo, Filisatini vayaʼmogi Neviniʼa kamitimo haegae, huno agesamo afiʼniye.

²⁶ Solo aliʼyaʼamo neʼaliya vayaʼmo uʼa Nevinifeʼmo Soloʼmo huʼniya gemo ha paiʼnae. Neviniʼmo ani gemo afitenoʼaeʼmo kini vekamo ayemoʼamoʼmo maisiyafeʼmo lusi kava huno hauʼniye. Neviniʼa ani kavaʼmo hisiya afinaʼmo hano osuno afaʼa haneʼniye.

²⁷ Ani afinaʼmo hano osuʼniyaʼmofeʼmo Neviniʼe ati vayaʼaʼeʼmo uʼa Filisatini vayaʼmo tu hataletiʼa vayaʼmo kamiti hapaeteʼa apakufa atupaʼamo lagauʼa amiʼnageno Neviniʼa alinino kini vekalegamo uno amiʼnigeʼa lekana paiʼnae. Ayemoʼamoʼmo maisiyafeʼmo lekana paiteʼapaeʼmo haine, huʼa huʼnae. Inagi Soloʼmo a mafaneʼamo Maikoʼmo Neviniʼa amiʼnigeno aʼamo hamaleʼniye.

²⁸ Ani kavatetiʼmo Soloʼmo ageyana Ala kava neʼmoʼa Neviniʼeʼmo magokepiʼmo lokaeno maige a mafaʼneʼnimo Maikoʼa Nevinifeʼmo hauʼnigeno agaeteʼmo asagauno aige huʼniye, huno ageʼniye.

²⁹ Agetenoʼaeʼmo Soloʼmo magoʼe huno Nevinifeʼmo koli huʼniye. Inagi Soloʼmo muki afinaʼaeʼmo kameʼamo hamaleʼniye.

³⁰ Asole afinaʼmo Filisatini ati vayaʼaiteʼmo yagaiʼa apateʼnaya vayaʼmogimo ati vayaʼapimo apavaleliʼa eʼa Isaleli vayaʼeʼmo kameno huʼnayaʼmonanafa Neviniʼa afiteno ageʼniya kavaʼamo alopa yaʼmo haneʼnigeno muki Solo aliʼyaʼamo neʼaliya vayaʼe ati vayaʼeʼmo aeno apaka seteno ala agiʼamo aliʼniye.