1 Samiyo 17 - The Keyagana NT and 25 OT books

Neviniʼmo Golaiyatiʼeʼmo kame huteno kamitimo amagiʼniya gemae

¹ Filisatini ami vayaʼmogimo kame hisayafeʼmo eʼa Soko taonimo mago Yuta vayaʼai taonifiʼmo aliʼa anupa huteʼa Ifesi-Namimi koteʼmo Soko taoniʼe Aseka taoniʼeʼmo hanetegeno folagapiʼmo seli noʼapimo aliʼa he tiʼa ateʼnae.

² Soloʼe Isaleli ami vayaʼeʼmo eʼa Ila kagoʼmu koteʼmo aliʼa anupa huteʼa seli noʼapimo ani koteʼmo aliʼa he tiʼa ateteʼa Filisatini vayaʼeʼmo kamemo hisayafeʼmo alo huʼa maiʼnae.

³ Filisatini ati vayaʼmo mugagayaga mago aveleʼmo he tiʼa maiʼnageʼa magayagamo Isaleli ati vayaʼmo mago aveleʼmo he tiʼa maiʼnageno folagapiʼmo kagoʼmu koʼmo haneʼniye.

⁴ Ani afinaʼmo mago lokiya vaino kamemo nehiya vekamo agiʼamo Golaiyatiʼmo Gati taonifi vekamo Filisatini vayaʼmo seli noʼapimo aliʼa he tiʼa ateʼnaya yategatiʼmo ataleneno Isaleli vayaʼmogimo agesayafeʼmo afole yateʼmo he tino maiʼniye. Yatalaʼamo tali mitamo hogo huʼniye.

⁵ Agaemo aeni kakolitamo maleteno kame kukenaʼamo haesa aeniletiʼmo alo huʼnaya kukenamo kanaʼamoʼmo fifiti kilo haneʼniye.

⁶ Agaemo aiyalateʼmo haesa aeniletiʼmo aino ati kae maleʼniye. Agaemo agiʼnaleʼmo mago haesa aeni hayoʼmo kofino aliʼniye.

⁷ Hayoʼamo alopa hayokefamo haneʼniye. Hayoʼmo akoyaʼaʼe aveʼaʼeʼmo aeniletiʼmo alo hu maleʼnigeno kanaʼamoʼmo seveni kilo agufa yaʼmo haneʼniye. Mago ati vekamoʼmo Golaiyati haleguʼaleʼmo aliteno uno hogoteʼniye.

⁸ Inagi Golaiyatiʼa he tino Isaleli ami vayaʼaifeʼmo alopa gefatiʼmo hunoʼaeʼmo, Na kavaʼmo higetapaeʼmo lapakaemo kame hisayafeʼmo he tita kale kaeta maiʼnae. Lapakaemo Solo afa aliʼyaʼamo neʼaliya vayaʼageʼmo maiʼnayana nagaemo Filisatini vekamo oʼmaiʼnofiye. Lapakaemo mago vekamo lekana paita ategenoʼa eno nagaeʼeʼmo kamemo hino.

⁹ Agaemo nagaeʼeʼmo kame huteno kamitimo nahaesigeʼna falisuvaʼmoʼmo inagi lagaemo lapakaeteʼmo afa aliʼyaʼmo alisuna vayaʼmo maigunaʼmonanafa nagaemo aeʼna aga sesuvaʼmoʼmo inagi lapakaemo lagaeteʼmo afa aliʼyaʼmo alisaya vayaʼmo maigae.

¹⁰ Ani Filisatini vekamoʼa magoʼe gemo hunoʼaeʼmo, Afa vayaʼmogitapae, huʼna, Lapakaemo mago vekamo lekana paita ategenoʼa nagaeʼeʼmo kamemo hino, huno lame lame gemo huno hapa paiʼniye.

¹¹ Soloʼe muki ati vayaʼaʼeʼmo ani gemo afiteʼapaeʼmo apakaemo lusi kava huʼa koli huteʼa kame hisaya lokiyaʼapimo hano huʼniye.

Neviniʼmo Isaleli ami vayaʼmogi kame hisayafeʼmo aliʼa anupa huʼa maiʼnaya yategamo uʼniya gemae

¹² Neviniʼmo Ifalata vekamo agiʼamo Yesi mafaʼnemo maiʼnigeno Yesiʼa Metelehamu taonifi Yuta koteʼmo maiʼniye. Maiʼnenoʼaeʼmo eitiʼa ve mafaʼne anagaʼamo maiʼnagenoʼaeʼmo Soloʼmo kini vekamo maiʼniya afinaʼmo Yesiʼa ago kosuna leʼniye.

¹³ Yesi ve mafaʼne anagaʼmo Soloʼmo akame huʼa kameleʼmo uʼnaya vayaʼmo yege mafaʼnemo agiʼamo Iliʼamuʼagi anile mafaʼnemo agiʼamo Aminanapuʼagi eno anile mafaʼnemo agiʼamo Samaʼagi huʼa uʼnae.

¹⁴ Neviniʼmo Yesi henaga ve mafaʼneʼamae. Yesi hogote ve mafaʼne anagaʼamo loleʼe magoʼe mafaʼnemogi Soloʼmo akame huʼa kameleʼmo uʼnae.

¹⁵ Neviniʼmo mago afinaʼae afinaʼaeʼmo apataleno halate Metelehamu taonilagamo uno afoʼamo sipisipileʼmo yagaino apatesiyafeʼmo maiʼniye.

¹⁶ Golaiyatiʼmo fotiʼa afinaʼmo muki neteʼae uneʼaeʼmo eno afole yateʼmo he tino maiʼnenoʼaeʼmo Isaleli vayaʼaifeʼmo kame hisayafeʼmo hapa paiʼniye.

¹⁷ Mago afinaʼmo Yesi mafaʼnemo Nevinifeʼmo hunoʼaeʼmo, Ani naya loleʼa kilo vitimo aliteka ani naya loleʼa peleti mayamo aliteka malage huka alinikuka Isaleli vayaʼmogi seli noʼmo aliʼa he tiʼnaya yategamo uvo.

¹⁸ Ani naya loleʼa sisiʼmo alika nepukamogimo vani tauseniʼa ati vayaʼapileʼmo yagaino apateʼniya vekamo amiyo. Nepukamogimo alagepa huʼa maiʼnisafi oʼmaiʼnisafigi apaketeka eka apakaefeʼmo faigoko gemo naha paiyo.

¹⁹ Ani afinaʼmo Soloʼagi Nevini nepuʼamogimogi muki ati vayanagi huʼa Ila kagoʼmu koteʼmo Filisatini vayaʼeʼmo kamemo nehae, huno ha paiʼniye.

²⁰ Inagi Neviniʼmo gotilamiyapiʼmo he tino alu vekaeʼmo, sipisipi anagateʼmo yagaiʼno, huno ha paiʼniye. Agaemo neʼyaʼmo aliteno Yesiʼmo ha paiʼniya agufa kavaʼmo huno seli noʼapimo aliʼa he tiʼa ateʼnaya yategamo uʼniye. Isaleli ati vayaʼmogi kame gemo alopa gefatiʼmo keya aeʼa ge huteʼa neʼvagenoʼaeʼmo Neviniʼa uno avaʼyi huʼniye.

²¹ Filisatini ami vayaʼe Isaleli ami vayaʼeʼmo mugagayagamo aliʼa kale kaete magayagamo aliʼa kale kaete huteʼa kamemo hisayafeʼmo alo huʼnae.

²² Neviniʼmo neʼyaʼapileʼmo neʼyagaiya vekamo neʼyaʼmo amitenoʼaeʼmo ami vayaʼaitegamo nagu nagu huno uno nepuʼamogifeʼmo ge apamamaeʼniye.

²³ Agaemo apakaeʼeʼmo kege nehigenoʼaeʼmo Golaiyatiʼmo lokiya vaino kame nehiya vekamo Filisatini vekamo Gati taonifi vekamoʼa Filisatini ami vayapatiʼmo eno Isaleli vayaʼaifeʼmo huʼniya agufa gemo huʼnigeno Neviniʼmo afiʼniye.

²⁴ Muki Isaleli vayaʼmogimo ani vekamo ageteʼapaeʼmo lusi kava huʼa koli huteʼa ataleʼa apaune heʼnae.

²⁵ Isaleli vayaʼmogimo huʼapaeʼmo, Eno haiʼniya vekamo ageʼnafiye. Agaemo lagaeʼeʼmo kamemo hisiyafeʼmo lame lame gemo huno maisiyafeʼmae. Kini vekamoʼa ina gemo huno laha paiʼniye. Ani Filisatini vekamo kamitimo haesiya vekamo asole monimo amiteʼna ani vekamo afaʼa atesugeno a mafaʼneʼnimo aligiye. Ani vekamo afamo anagatetiʼmo takesi monimo oʼaligune, huno huʼniye, huʼa huʼnae.

²⁶ Neviniʼmo agae haopaleʼmo maiʼnaya vayaʼaifeʼmo ina ge huno ge huno apafi geʼniye. Inagi kini vekamoʼmo ani Filisatini vekamo kamitimo haesigenoʼaeʼmo lagaemo Isaleli vayaʼmo alopa lavagage yaʼmo afole neʼaiya kavaʼmo alino atalesiya vekalegamo na agufa kavaʼmo hugiye. Ani Filisatini vekamo malaga afa vekageʼmae. Ina laʼmo afaʼa maiʼniya Goti ami vayaʼaeʼmo lame lame gemo nehiye.

²⁷ Apakaemo agaefeʼmo kini vekamoʼmo Filisatini vekamo kamitimo haesiya vekalegamo muki hisiya kavafeʼmo huʼniya gemo ha paiʼnae.

²⁸ Ilaiyamuʼa yege vekamo Nevini nepuʼamoʼmo Neviniʼa vayaʼeʼmo kege nehigeno afitenoʼaeʼmo aipamo leʼnigeno Nevinifeʼmo hunoʼaeʼmo, Na kava higekaeʼmo manileʼmo eʼnane. Kagaemo ina laʼmo magoke magoke sipisipi anagakaleʼmo yagaino apatesiyafeʼmo kaʼme kotegamo eʼnane. Nagaemo kageʼnovana himuʼnamu kavaʼmo huge ge oʼafige huka maiʼnekaeʼmo kame hisuna kavakeʼmo agesanafeʼmo eʼnane, huno ha paiʼniye.

²⁹ Neviniʼa hunoʼaeʼmo, Hemenimo na agufa hosu kavaʼmo huʼnove. Loka huʼna afiʼnekove, huno ha paiʼniye.

³⁰ Ha paiteno aino afe leno alu vayaʼaifeʼmo magoke agufa gemo huno ge huno apafigeʼnigeʼa hogoteʼa ha paiʼnaya vayaʼmogi ha paiʼnaya agufa gemo huʼa ha paiʼnae.

³¹ Mago vayaʼmogimo Neviniʼa huʼniya gemo afiteʼapaeʼmo uʼa Solofeʼmo ha paiʼnageno Soloʼa Nevinifeʼmo ge huʼnigeno agaetegamo uʼniye.

³² Neviniʼa Solofeʼmo hunoʼaeʼmo, Fiku yanageʼa mago ami vayaʼmogi lusi kava huʼa koli huteʼa faliʼnaya vayakana huʼa maigae. Nagaemo aliʼyakamo neʼaluva vekamoʼna uʼna ani Filisatini vekaʼeʼmo kame huguve, huno ha paiʼnigeno.

³³ Soloʼa Nevinifeʼmo hunoʼaeʼmo, Kagaemo neya vekamo maiʼnanageno ani Filisatini vekamo neya mafaʼnemo maiʼniya afinatetiʼmo ati vekamo maime maime eno hemeniʼeʼmo maiʼniyaʼmofeʼmo kagaemo agaeʼeʼmo afaʼa kame osugane, huno ha paiʼniye.

³⁴ Ha paiʼniyaʼmonanafa Neviniʼa Solo geʼaleʼmo aeno atagaina hunoʼaeʼmo, Aliʼyakamo neʼaluva vekamoʼna afoʼnimo sipisipi anagateʼmo yagaiʼnove. Mago afinaʼmo afela laiyoni afumomofi afela meya afumomofi huno eno sipisipimo anaʼaumo hanilino uʼniye.

³⁵ Inagi nagaemo avegala aeliʼnuʼna amagiʼna avayafatiʼmo sipisipi anaʼaumo hafaleteʼna kamitimo amagiʼnove.

³⁶ Nagaemo laiyoniʼe meyaʼeʼmo kamiti anamagiʼnova kava huʼna malaga Filisatini vekamo kamiti amagiguve. Agaemo afaʼa maiʼniya Goti ami vayaʼaeʼmo lame lame gemo huno huno faipa huno apateʼniyaʼmofeʼmae.

³⁷ Ala kava neʼmoʼa laiyonimoʼa nahaesiyafeʼmo huʼniya kavapatiʼe meyamoʼa nahaesiyafeʼmo huʼniya kavapatiʼeʼmo nagufamo alino katino nateʼniya kava huno ani Filisatini vekamo ayapatiʼmo nagufamo alino katino nategaiye, huno ha paiʼnigeno Soloʼa hunoʼaeʼmo, Afaʼa uvo. Ala kava neʼmoʼa kagaeʼeʼmo lokaeno maino, huno ha paiʼniye.

³⁸ Inagi Soloʼa kame kukenaʼamo alino Neviniʼmo vaino ateʼniye. Haesa aeni kakolitamo agenopaleʼmo maleno ateteno aeniletiʼmo alo huʼnaya kame siotiʼamo vaino ateʼniye.

³⁹ Neviniʼa Solo naipemo kame siotileʼmo aeno aliteno amalageka huno uno agegeʼniye. Agegeʼnigenoʼaeʼmo kanale osuʼniye. Neviniʼa Solofeʼmo hunoʼaeʼmo, Nagaemo kamemo huʼnaeʼmo amalageka huʼna oʼageʼnovaʼmofeʼmo vailiʼneʼna kamemo osuguve, huno huteno asagino ataleʼniye.

⁴⁰ Neviniʼa hayopa kayoʼamo aliteno mago aise ani kategamo uno naya magokayagaʼa aise monu yafaʼmo alino kuʼafiʼmo ku aiʼniye. Agaemo nofitetiʼmo nehaeya atimo aliteno Filisatini vekaʼeʼmo kame hisaʼafeʼmo uʼniye.

Neviniʼa Golaiyatiʼmo kamitimo amagiʼniya gemae

⁴¹ Filisatini vekamo Nevinitegamo eʼnigeno haleguʼamo aliʼniya vekamo eno hogoteʼniye.

⁴² Agaemo Nevini haopaletiʼmo eno ageyana Neviniʼa neya vekamo alagepa augosaʼe vekamo maiʼnigeno agetenoʼaeʼmo, ina agufa neya kanomo maiʼniye.

⁴³ Agaemo Nevinifeʼmo hunoʼaeʼmo, Na agufa kavaʼmo higekaeʼmo ani kayoʼmo aliteka neʼane. Nagaemo kalamo maiʼnovanageka namagigapiye, huno huteno gotiʼamofeʼmo lifana gemoʼmo Neviniteʼmo asagauno aisiyafeʼmo keya aeno ge huʼniye.

⁴⁴ Nevinifeʼmo ha painoʼaeʼmo, Egeʼnao kamagiʼna kagufaʼamo nama anagaʼe afela afu anagaʼeʼmo apamisugeʼa negae, huno huʼniye.

⁴⁵ Neviniʼa geʼaleʼmo aeno atagaina hunoʼaeʼmo, Kagaemo naipekamo alige hayokamo alige huteka nagaetegamo neʼane. Neʼanaʼmonanafa nagaemo Ala kava neʼmo agiʼaletiʼmo muki lokiyaʼamo haneʼniya Gotiʼa agiʼaletiʼmo Isaleli ami vayaʼmogitaleʼmo yagaino nelateya Goti agiʼaletiʼmo kagaetegamo neʼove. Kagaemo ani Gotifeʼmo huka faipa huka ateteka yagaino nelateya ami vayaʼaifeʼmo lame lame gemo huka laha paiʼnane.

⁴⁶ Hemeni mani afinaʼatomo Ala kava neʼmoʼa nayapiʼmo kavaleno katesigeʼna kamiti kamagiteʼna lugokamo heʼna hatagauguve. Ani afinaʼmo muki ma mopafi vayaʼmogimo agesayana Isaleli vayaʼai Gotiʼapimoʼmo maiʼniye, huʼa agesayafeʼmo nagaemo Filisatini ati vayaʼai apakufaʼamo nama anagaʼe afela afu anagaʼeʼmo apamisugeʼa negae.

⁴⁷ Muki manileʼmo maiʼnaya vayaʼmogimo ageʼapaeʼmo Ala kava neʼmoʼa hayoletiʼe keveletiʼeʼmo apakufamo alino katino noʼapate, huʼa agegae. Agaiʼageʼmo kamemo huno aeno neʼapakaseyanageno layapiʼmo alino lapategaiye.

⁴⁸ Inagi Filisatini vekamo Nevini haopaleʼmo neʼegenoʼaeʼmo Neviniʼa malage huno Filisatini vekaʼeʼmo kamemo hisiyafeʼmo nagu nagu huno uʼniye.

⁴⁹ Neviniʼa kuʼafatiʼmo magoke yafaʼmo hefino nofipi ku aiteno aino vego vego huteno yaga auno amagiʼniye. Yafaʼmoʼa Golaiyati hanileʼmo amagiteno agenopafilagamo uno haiʼnigeno augosalegatiʼmo mopafiʼmo asagauno aiʼniye.

⁵⁰ Ina kavatetiʼmo Neviniʼa Filisatini vekamo nofi atiletiʼe yafatetiʼeʼmo kamiti haeteno aeno aga seʼniye. Nevini ayapiʼmo mago naipemo oʼaliʼniye.

⁵¹ Naipemo oʼaliʼniyaʼmofeʼmo Neviniʼa nagu nagu huno uno haopaleʼmo he tino maiʼnenoʼaeʼmo Filisatini vekamo agaiʼa naipemo asagino lugoʼamo heno hatagauʼnigeno faliʼniye. Filisatini vayaʼmogimo ageʼnayana ani aeno apakaseʼniya hogote ati vekaʼapimo ago faliʼnigeʼa apaune heʼnae.

⁵² Inagi Isaleli vayaʼe Yuta vayaʼmogiʼeʼmo alopa gefatiʼmo keya aeʼa ge huteʼa Filisatini vayaʼaina apavegala aeʼa hapaiʼnae. Apavegala aeliʼa kagoʼmufilagamo uge Ekaloni taonile kegiʼya kipateʼmo uge huʼnae. Filisatini vayaʼmogimo hapaeʼnaya vayaʼmo Seyaleyimi taoni kateʼmo asagauʼa aiteʼa uʼa Gati taonifiʼe Ekaloni taonifiʼeʼmo asagauʼa aiʼnae.

⁵³ Isaleli vayaʼmogimo ago apavegala aeliʼa uʼa apataleteʼa Filisatini vayaʼmo seli noʼmo aliʼa he tiʼa ateʼnaya yateʼmo aiʼa atagineʼa eʼa Filisatini vayaʼai kagemi yaʼapimo ataleʼa uʼnaya yaʼmo seli noʼapifatiʼmo aliʼnae.

⁵⁴ Neviniʼa Filisatini vekamo Golaiyati agenopamo Yulusalemu taonifiʼmo alinino uʼniyaʼmonanafa kame kukena yaʼamo seli noʼafiʼmo maleʼniye.

⁵⁵ Hogoteno Soloʼa ageyana Neviniʼmo Golaiyatiʼeʼmo kame hisaʼafeʼmo uʼnigenoʼaeʼmo agaemo Isaleli ami vayaʼaiteʼmo yagaino apateʼniya vekamo Amanafeʼmo ge huno afigeʼniye. Amanao huno, ani neya vekamo ina la mafaʼneʼmae, huno afi geʼnigenoʼaeʼmo, kini vekae, huno, nagaemo oʼageʼnove.

⁵⁶ Ani gemo huʼniyaʼmofeʼmo Soloʼa ha painoʼaeʼmo, kagaemo uka vayaʼaifeʼmo ge huka apafigeka eka naha paiyo.

⁵⁷ Neviniʼa Golaiyatiʼmo kamiti amagiʼnigeno falitegenoʼaeʼmo aino atagineno neʼegenoʼaeʼmo Amanaʼmo avalelino Solotegamo uʼniye. Neviniʼa Golaiyati agenopaʼeʼmo aliteno uʼniye.

⁵⁸ Soloʼa Nevinifeʼmo hunoʼaeʼmo, Neya vekae, huno, kagaemo ina la mafaʼnemo maiʼnane, huno afi geʼnigeno Neviniʼa ha painoʼaeʼmo, kini vekae, huno, nagaemo aliʼyakamo neʼaliya vekamo mago Metalehamu taonifi vekamo Yesi mafaʼnemo maiʼnove, huno ha paiʼniye.