1 Samiyo 16 - The Keyagana NT and 25 OT books

Samiyoʼa Neviniʼmo kini vekamo maisiyafeʼmo uvelimo lakino ateʼniya gemae

¹ Ala kava neʼmoʼa Samiyofeʼmo ina gemo hunoʼaeʼmo, kagaemo na magi afinaʼmo Solofeʼmo yulagefa aime aime ugane. Nagaemo nakameʼyamo amiʼnovanageno Isaleli vayaʼaiteʼmo kini vekamo magoʼe huno oʼmaigiye. Keʼmo alika olivi uvelimo he fika aliteka Yesiʼmo mago Metelehamu taonifi vekalegamo uvo. Yesi mafaʼne anagapatiʼmo nagaiʼnilefeʼmo kini vekamo aliʼna ha maleʼna ateʼnove, huno ha paiʼniye.

² Samiyoʼa hunoʼaeʼmo, Haiya kava huʼna uʼna ani kavaʼmo huguve. Ani kavaʼmo hisuvana Soloʼa afisiyaʼmoʼmo agaemo kamitimo nahaegaiye, huno huʼniyaʼmonanafa Ala kava neʼmoʼa ha painoʼaeʼmo, Mago aikeli a pulumakamo avalelikuka taonifi vayaʼaifeʼmo ani ge huka hapa paiyo. Nagaemo Ala kava netefeʼmo ofalinimo hisuvafeʼmo neʼove.

³ Huka hapa paiteka Yesifeʼmo hukaeʼmo, Ofalinimo hisuvategamo eno, huka ha paiyo. Inagi esigekaeʼmo kagaemo na agufa kavaʼmo hisapigeʼna nagaemo kaha paiguve. Kagaemo agi aesuva vekamo agenopafiʼmo uvelimo lakika ategane, huno ha paiʼniye.

⁴ Inagi Samiyoʼmo Ala kava neʼmo geʼamo akame huno he tino Metelehamu taonifiʼmo uʼniye. Agaemo uno avaʼyi huʼnigeʼapaeʼmo vayatama vayaʼmogimo ageteʼa atete huteʼapaeʼmo, kagaeʼe lagaeʼeʼmo magokepi lokaeta alagepa huta maisuna kavatefeʼmo neʼapiye, huʼa ge huʼa afigeʼnae.

⁵ Samiyoʼmo hunoʼaeʼmo, He, magokepiʼmo alagepa huta lokaeta maisunafeʼmo eʼnovanageʼna Ala kava netefeʼmo ofalinimo huguve. Lapakaemo ofalini kavaʼmo hisayafeʼmo hogoteta alo hutetapa nagaeʼeʼmo viyo, huno hapa paiteno Yesiʼe mafaʼne anagaʼaʼeʼmo apavaleno apaote apateʼniye. Apateʼnenoʼaeʼmo, Gotitefeʼmo ofalinimo hisuvategamo eyo.

⁶ Apakaemo eʼa avaʼyi huʼnagenoʼaeʼmo Samiyoʼa Ilaiyamuʼa agetenoʼaeʼmo, Ala kava neʼmoʼa ani vekageʼmo kini vekamo maisiyafeʼmo lekana paino ateʼniyanageʼna uveliʼmo lakiʼna ategauve, huno agesamo afiʼniye.

⁷ Agesamo afiʼniyaʼmonanafa Ala kava neʼmoʼa Samiyofeʼmo ha painoʼaeʼmo, kagaemo amega agufalefeʼmo kagesamo oʼafika yatala vekaeʼmo alagepa kaulagamo oʼago. Nagaemo kini vekamo maisiyafeʼmo nagesamo oʼafiʼnove. Vayaʼmogi neʼapakaya agufa kavaʼmo huʼna oʼageʼnove. Ma mopafi vayaʼmogi amega apakufaʼalefekeʼmo neʼapakayaʼmonanafa Ala kava neʼmoʼnamo apaipa apakesafikeʼmo neʼapakove.

⁸ Inagi Yesiʼmo napa tu mafaʼneʼamo Aminaʼnapifeʼmo ge huno avalelino Samiyotegamo eʼniyaʼmonanafa Samiyoʼmo hunoʼaeʼmo, Haʼao, huno, Ala kava neʼmoʼa agaeʼeʼmo lekana paino oʼateʼniye, huno ha paiʼinye.

⁹ Inagi Yesiʼmo Samaʼa avalelino eʼniyaʼmonanafa Samiyoʼmo hunoʼaeʼmo, Haʼao, huno, Ala kava neʼmoʼa agaeʼeʼmo lekana paino oʼateʼniye, huno ha paiʼniye.

¹⁰ Inagi Yesiʼmo magoʼe ve mafaʼne anagaʼamo loleʼe loleʼe vayaʼmo apavalelino Samiyotegamo eʼniyana Samiyoʼmo hunoʼaeʼmo, Haʼao, huno, Ala kava neʼmoʼa ani vayapatiʼeʼmo mago vekamo lekana opaiʼniye, huno ha paiʼniye.

¹¹ Inagi Samiyoʼmo Yesifeʼmo hunoʼaeʼmo, Muki neya mafaʼne anagakamo alagi eʼnafiye, huno huʼnigenoʼaeʼmo Yesiʼmo hunoʼaeʼmo, Haʼao, huno, henaga ve mafaʼneʼnimo maiʼniyaʼmonanafa sipisipi anagateʼmo neʼyagaiye. Samiyoʼmo agaefeʼmo ha painoʼaeʼmo, Mago vekamo alika ategenoʼao uno avalelino eno. Agaemo etesigetaekeʼmo lagaemo fai maiʼneta ofalini ameʼamo negaune, huno ha paiʼniye.

¹² Inagi Yesiʼmo mago vekamo alino ateʼnigeno uno ani ve mafaʼneʼamo avalelino eʼniye. Ani vekamo neya vekamogeno kanale alagepa augosamo hanege aulagafatiʼmo aeno ha lege kanale agufamo hanege huʼniye. Inagi Ala kava neʼmoʼa Samiyofeʼmo ina gemo hunoʼaeʼmo, Ani vekamae, huno huteno, he tika uvelimo lakika ato, huno ha paiʼniye.

¹³ Samiyoʼmo ani alinino eʼniya uvelimo alino nepuʼamogi apaulagaleʼmo Nevini agenopafiʼmo lakino ateʼniye. Ani afinaʼmo Ala kava neʼmo aunemeʼamo emineno agaeteʼmo maitenoʼaeʼmo ani afinatetiʼmo agaeteʼmo maige maige huno maiʼniye. Inagi Samiyoʼmo halate Lama taonifiʼmo uʼniye.

Neviniʼmo Solo aliʼyaʼamo aliʼniya vekamo maiʼniya gemae

¹⁴ Ani afinaʼmo Ala kava neʼmo Aunemeʼamo Solotegatiʼmo ataleno uʼnigenoʼaeʼmo Ala kava neʼmoʼa mago hosu aunemeʼmo alino ateʼnigeno eno maiʼnigeno Soloʼmo aipamoʼmo kana huʼniye.

¹⁵ Solo aliʼyaʼamo neʼaliya vayaʼmogimo Solofeʼmo huʼapaeʼmo, Gotiʼa mago hosu aunemeʼmo alino ateʼnigeno eno maiʼnigekaeʼmo kaipamoʼmo kana nehiye.

¹⁶ Kagaemo kahauʼnisiyaʼmoʼmo lagaemo uta mago vekamoʼmo alagepa huno gitaleʼmo amagisiyafeʼmo kahauya huta agegaune. Gotiʼmo hosu aunemeʼmo alino atesigeno eno kagaeteʼmo maisiya afinaʼmo inagi ani vekamoʼmo gita amagisigeno kaipa kagesamo alagepa huno halate hanegaiye, huʼa ha paiʼnae.

¹⁷ Inagi Soloʼmo aliʼyaʼamo neʼaliya vayaʼaifeʼmo hapa painoʼaeʼmo, Lapakaemo uta mago vekamoʼmo gitaleʼmo alagepa huno neʼamagisiya vekamo avalelita nagaetegamo eyo, huno hapa paiʼniye.

¹⁸ Mago aliʼyaʼamo neʼaliya vekamoʼmo Solofeʼmo ha painoʼaeʼmo, Nagaemo mago Yesi mafaʼnemo Metelehamu taonifiʼmo maiʼnigeʼna ageʼnove. Ani neya vekamoʼmo gitaleʼmo neʼamagiya kavaʼmo alagepa huno ageʼniye. Agaemo koli osuno kamemo lokiya vaino nehiya vekamae. Agaemo alagepa huno afiʼniya gemo nehiya vekamo kanale alagepa apaulagamo neʼagaya vekamae. Ala kava neʼmoʼa agaeʼeʼmo magokepi lokaeno maiʼniye.

¹⁹ Soloʼmo ani gemo afitenoʼaeʼmo mago vayaʼmo alino apateʼnigeʼa uʼa Yesifeʼmo ina gemo huʼa ha paiʼnae. Kagaemo mafaʼnekamo Neviniʼmo sipisipileʼmo yagaiʼniyanagi kagaemo alika ategeno nagaetegamo eno.

²⁰ Inagi Yesiʼmo afitenoʼaeʼmo peleti mayamo mago nokimo agotofuleʼmo malege nofi alagafati aniʼmo mago meme agufa kepiʼmo lakino havaiteno malege mago aikeli mememo malege huteno nofi ki maleteno ani nokimo Neviniʼmo amitenoʼaeʼmo, Ani yaʼmo alinikuka Soloʼmo amiyo, huno huteno alino ateʼnigeno uʼniye.

²¹ Neviniʼmo Solotegamo uno avaʼyi hutenoʼaeʼmo aliʼyaʼamo neʼaliya vekamo hamaleʼniye. Soloʼmo Nevinifeʼmo lusi kava huno hauʼnigenoʼaeʼmo Neviniʼa Soloʼmo kame nehiya yaʼmo aliteno Soloʼeʼmo kame hisiyategamo uteno ha maeno kame hisiya vekamo hamaleʼniye.

²² Soloʼmo Yesitegamo mago gemo huno atalegeno uʼniye. Agaemo hunoʼaeʼmo, Nagaemo Nevinifeʼmo nahauʼniyaʼmofeʼmo kagaemo agaemo afaʼa ategenoʼa eno nagae aliʼyaʼmo alino, huno ha paiʼniye.

²³ Inagi Neviniʼmo Soloʼeʼmo lokaeno maiʼnigenoʼaeʼmo Gotiʼa hosu aunemeʼmo alino ateʼnigeno Solotegamo eʼniya afinaʼmo Neviniʼmo gitaleʼmo amagiʼniye. Soloʼmo ani gita agemo neʼafigenoʼaeʼmo hosu aunemeʼmo ataleno uʼnigeno aipa agesamoʼmo kanale huʼniye.