1 Samiyo 15 - The Keyagana NT and 25 OT books

Soloʼmo Goti geʼamo amagino ataleʼniya gemae

¹ Samiyoʼmo Solofeʼmo ina ge huno ha painoʼaeʼmo, Ala kava neʼmoʼa Isaleli vayaʼaleʼmo kini vekamo maiʼneka yagaika apatesanafeʼmo alino nateʼnigeʼna uʼna uvelimo faleʼna kateʼnove. Kateʼnovaʼmofeʼmo hemenimo kagaemo Ala kava neʼmo geʼamo afiteka akame huvo.

² Ala kava neʼmo muki lokiyaʼamo haneʼniya vekamoʼa ina gemo hunoʼaeʼmo, Amaleki vayaʼmogi Isaleli vayaʼaitegamo huʼnaya kavatefeʼmo kayoʼmo apamiguve. Laginago vayaʼmo Isipi kotegatiʼmo ataleʼa neʼageʼapaeʼmo Amaleki vayaʼmogi kafo maleʼneʼa Isaleli vayaʼmo kame hapaeʼnae.

³ Kamemo hapaeʼnayaʼmofeʼmo kagaeʼe ati vayakaʼeʼmo uta Amaleki vayaʼeʼmo kamemo hutetapa muki yaʼapimo alita hano hiyo. Lapakaemo apakegetapa oʼapateyo. Lapakaemo muki ve anaganagi aʼne anaganagi mafaʼne anaganagi nute mafaʼne anaganagi pulumaka anaganagi sipisipi anaganagi kamo anaganagi noki anaganagi hutapa alagi kamitimo hapaeyo, huno hapa paiʼniye.

⁴ Soloʼmo ani gemo afitenoʼaeʼmo Teleyimi taonifiʼmo ati vayaʼamo alino anupa huno apateʼneno lekana paiʼniye. Yuta nofi ati vayaʼmo teni tauseniʼa vayaʼmo maiʼnageʼa Isaleli nofi ati vayaʼmo tu hataleti tauseniʼa vayaʼmo maiʼnae.

⁵ Inagi Soloʼmo ati vayaʼamo apavalelino uʼnigeʼa Amaleki vayaʼai taonimo haopaleʼmo uʼa fala kiʼnae.

⁶ Soloʼmo Kinaiti vayaʼaifeʼmo hapa painoʼaeʼmo, Lapakaemo Amaleki vayaʼmo apataletapa viyo. Fiku yanageta lagaemo Amaleki vayaʼe lapakaeʼeʼmo lahapaegune. Lapakaemo Isaleli vayaʼmogita laginago vayaʼmo Isipi kotegatiʼmo ataleʼa eʼnaya afinaʼmo apakaetegamo huʼnaya alagepa kavafeʼmo lagesamo neʼafune, huno hapa paiʼnigeʼa Kinaiti vayaʼmo Amaleki vayaʼmo apataleʼa uʼnae.

⁷ Soloʼmo Amaleki vayaʼeʼmo hulineno Havila kotegatiʼmo aepa faiteno kamemo uno Suva kotega hau huʼniya koteʼmo kamemo huno aeno apaka seʼniye. Suva koʼmo hanetegeno yegemo haine neʼeya haopalegamo Isipi koʼmo haneʼniye.

⁸ Soloʼmo Amaleki vayaʼai kini vekamo agiʼamo Egagiʼmo atafauʼniye. Isaleli vayaʼmogimo muki Amaleki vayaʼmo alagi kamiti hapaeʼnae.

⁹ Hapaeʼnayaʼmonanafa apakaemo Egagiʼmo agegeʼa atege hogote alagepa sipisipi anaganagi hogote alagepa pulumaka anaganagi hogote aikeli pulumaka anaganagi hogote aikeli sipisipi anaganagi huʼa apakegeʼa apatege huʼnayaʼmonanafa muki ohapauʼniya afu anagaʼe alagi hosu afu anagaʼeʼmo alagi aliʼa hano huʼa apataleʼnae.

Gotiʼa Soloʼmo magoʼe huno kini vekamo oʼmaigiye, huno huʼniya gemae

¹⁰ Inagi ani afinaʼmo Ala kava neʼmo geʼamo Samiyotegamo emineʼniye. Ani gemoʼmo hunoʼaeʼmo,

¹¹ Afiyo, huno, Soloʼmo magoʼe huno nakame osuʼnifa nataleno atagi neno uʼniye. Agaemo huvo, huʼna ha paiʼnova gemo osuʼnifa geʼnimo amagino ataleʼniyaʼmofeʼmo kini vekamo aliʼna hamaleʼna ateʼnova kavafeʼmo lusi kava huʼna nahau huve, huno ha paiʼniye. Samiyoʼmo ani gemo afitenoʼaeʼmo aipamo kana huʼnigeno muki ani haniʼilagamo nunumuʼmo hume hume uʼniye.

¹² Gotilamiyapiʼmo Samiyoʼmo he tino Soloʼeʼmo fotu hisiyafeʼmo uʼnigeno mago vekamoʼa ha painoʼaeʼmo, Soloʼmo uno Kamo taonifiʼmo ani kamemo huno aeno apaka seʼniya kavatefeʼmo ala agiʼamo alisiyafeʼmo mago alagena kavaʼmo huʼniyana yafaʼmo faino ateʼniye. Agaemo ago faino atetenoʼaeʼmo inagi Giligo taonifiʼmo uʼniye, huno ha paiʼniye.

¹³ Inagi Samiyoʼmo Solotegamo uʼnigeno Soloʼmo agaefeʼmo ge amamaeʼniye. Ala kava neʼmoʼa alino auleno kateno. Nagaemo Ala kava neʼmoʼa huvo, huno naha paiʼniya geʼamo ago huʼnove, huno ha paiʼniye.

¹⁴ Ha paiʼniyaʼmonanafa Samiyoʼmo agaefeʼmo ha painoʼaeʼmo, Ala kava neʼmo geʼamo akame huʼnisanaʼmoʼmo na agufa kavaʼmo hageʼnaeʼmo nagaemo sipisipi anagaʼmogi apakeʼe pulumaka anagaʼmogi apakeʼeʼmo afiʼnove, huno ha paiʼniye.

¹⁵ Soloʼmo geʼaleʼmo ina ge huno aeno atagaina hunoʼaeʼmo, Apakaemo ati vayaʼnimogimo Amaleki vayaʼaitegatiʼmo apavaleliʼa eʼnae. Apakaemo muki sipisipi anagaʼe muki pulumaka anagaʼeʼmo kamitimo hapaeʼnayaʼmonanafa hogote alagepa afuʼamo Ala kava neʼmo Gotikamotefeʼmo ofalinimo hisayafeʼmo apavaleliʼeʼnae, huno ha paiʼniye.

¹⁶ Inagi Samiyoʼmo agaefeʼmo ha painoʼaeʼmo, Ge osuʼno. Ala kava neʼmoʼa ega haniʼilagamo naha paiʼniya kavafeʼmo kaha paiguve, huno huʼnigeno Soloʼmo hunoʼaeʼmo, Kanalenagi naha paiyo, huno huʼniye.

¹⁷ Inagi Samiyoʼmo Solofeʼmo hunoʼaeʼmo, Hogoteka kagaemo kagesamo afikaeʼmo, ina agufa vekamo maiʼnove, huka huʼnanaʼmonanafa muki Isaleli nofi vayaʼaiteʼmo yagaika oʼapateʼnapiye. Ala kava neʼmoʼa Isaleli vayaʼai kini vekamo maisanafeʼmo uvelimo faleno okateʼnifiye.

¹⁸ Hemenimo Ala kava neʼmoʼa aliʼyaʼamo alisanafeʼmo alino kateʼniye. Agaemo kaha painoʼaeʼmo, Kagaemo uka muki Amaleki vayaʼmo hosu kavaʼmo nehaya vayaʼeʼmo kamemo hume hume uka hapaeka hano huka apatalo, huno huʼniye.

¹⁹ Huʼniyaʼmofeʼmo na agufa kavaʼmo higekaeʼmo Ala kava neʼmo geʼamo akame osuʼnane. Na kava higekaeʼmo malage huka uka Amaleki vayaʼai yaʼmo aliʼnane. Ala kava neʼmoʼa ani huʼnana kavafeʼmo alagi ohauʼniye, huno huʼniye.

²⁰ Huno huʼniyaʼmonanafa Soloʼmo Samiyofeʼmo hunoʼaeʼmo, Haʼao, huno, Nagaemo Ala kava neʼmo geʼamo akame huʼnovana nagaemo alino nateʼniya aliʼyaʼamo alisuvafeʼmo uʼna Amaleki vayaʼeʼmo kamemo huteʼna alagi kamitimo hapaege Amaleki vayaʼai kini vekaʼapimo Egagiʼmo avaleliʼna ege huʼnove.

²¹ Huʼnovaʼmonanafa apakaemo Isaleli vayaʼmo Amaleki vayaʼai yapatiʼmo kamitimo apamagisuna agufa hogote alagepa sipisipi anagaʼe hogote alagepa pulumaka anagaʼeʼmo Ala kava neʼmo Gotikamotefeʼmo ofalinimo hisayafeʼmo apavaleliʼa eʼnae.

²² Samiyoʼa Solofeʼmo ha painoʼaeʼmo, Ala kava neʼmo geʼamo akame hisana kavafeʼmo magoʼe huno hauʼnigeno amogaga aiʼnifi sipisipi heka ofalinimo amisana kavafeʼmo magoʼe huno hauʼnigeno amogaga aiʼniye. Afiyo, Goti geʼamo akame nehaya kavaʼmoʼa ofalinimo neʼamiya kavaʼmo ago aeno age seʼniye.

²³ Goti geʼamo amagiʼa neʼatalaya kavaʼmoʼa apaune gemo neʼafiya agufa kavakana huno haneʼniye. Himuʼnamu kavaʼmoʼa hosu kavakana huno hanege aigofe gotigitefeʼmo mono nehaya agufa kavakana huno haneʼniye. Kagaemo Ala kava neʼmo geʼamo amagika ataleʼnanaʼmofeʼmo agaemo kaha faino kataleʼniyanageka kini vekamo oʼmaigane, huno ha paiʼniye.

²⁴ Inagi Soloʼmo Samiyofeʼmo hunoʼaeʼmo, Nagaemo Isaleli vayaʼaifeʼmo koli huteʼnaeʼmo geʼapimo afiʼnovaʼmofeʼmo Ala kava neʼmo keʼaepa geʼe kagae geʼeʼmo amagiʼna ataleteʼna hosu kavaʼmo huʼnove.

²⁵ Hosu kavaʼmo huʼnovaʼmonanafa kahaoke hovanagi, hosu kavaʼnimo alika ataleteka Ala kava nefeʼmo mono hisuvafeʼmo Giligali taonifilagamo aita atagi netaʼa uguʼae, huno ha paiʼnigeno

²⁶ Samiyoʼmo hunoʼaeʼmo, Kagaemo Ala kava neʼmo geʼamo amagika ataleʼnanagenoʼaeʼmo Ala kava neʼmoʼa kini vekamo maisanafeʼmo ohauʼnigeno akameʼyamo kamiʼniye, huno huʼniyaʼmofeʼmo kagaeʼeʼmo oʼuguve, huno ha paiʼniye.

²⁷ Samiyoʼmo visiyafeʼmo aino afe leʼnigenoʼaeʼmo Soloʼa Samiyo kukena yaʼamo atupaleʼmo atafauʼnigeno aino apake aiʼniye.

²⁸ Samiyoʼmo hunoʼaeʼmo, Hemenimo Ala kava neʼmoʼa Isaleli vayaʼaiteʼmo yagaika apatesana kavaʼmo kayapatiʼmo aliteno kahaopaleʼmo maiʼniya vekamo aeno kagaseʼniya vekamo amiʼniye.

²⁹ Gotiʼa Isaleli vayaʼai lokiyaʼapimo maiʼnenoʼaeʼmo aigofe gemo osuno alu aipa agesamo oʼafigiye. Ma mopafi vekamo oʼmaiʼniyaʼmofeʼmae, huno ha paiʼniye.

³⁰ Inagi Soloʼmo hunoʼaeʼmo, Nagaemo hosu kavaʼmo huʼnovaʼmonanafa kagaemo Isaleli vayatama vayaʼai apaulagaleʼe muki Isaleli vayaʼai apaulagaleʼeʼmo ala nagimo namiyo. Nagaemo Ala kava neʼmo Gotikaeʼmo mono hisuvafeʼmo Giligali taonifilagamoaitaʼa atagi netaʼa uguʼae.

³¹ Inagi Samiyoʼmo Soloʼeʼmo uʼnigeno Soloʼa uno Ala kava nefeʼmo mono huʼniye.

³² Henagaʼamo Samiyoʼmo hunoʼaeʼmo, Lapakaemo Egagiʼmo Emaleki vayaʼai kini vekaʼapimo avalelitapa eyo, huno hapa paiʼnigeno Egagiʼmo vase vase huno neʼenoʼaeʼmo, kamitimo namagisaya afinaʼmo hano huʼniye, huno huʼniye.

³³ Ani gemo huʼniyaʼmonanafa Samiyoʼmo ha painoʼaeʼmo, Kagaemo asole vayaʼmo kamitimo apamagiʼnana vayaʼmogi itaʼapimogimo mafaʼneʼapimo oʼmaiʼnaya kava huno itakamo mafaʼneʼamo oʼmaigiye, huno huteno Samiyoʼmo naipeletiʼmo heno hatagauno aise aise huʼniye.

³⁴ Inagi Samiyoʼmo Lama taonifiʼmo uʼnigeno Soloʼmo Gimeya taonifiʼmo uno noʼafiʼmo uno haiʼniye.

³⁵ Henagaʼamo Samiyoʼmo Soloʼmo uno oʼageniye. Afaʼa maime maime neʼvigenoʼaeʼmo Soloʼmo faliʼniye. Agesiyafeʼmo oʼuʼniyaʼmonanafa Solofeʼmo yulagefa aiʼniye. Ina kava huno Ala kava neʼmoʼa Soloʼmo Isaleli vayaiteʼmo yagaino apatesiyafeʼmo kini vekamo lekana paino ateʼniya kavafeʼmo aipamoʼmo kana huʼniye.