1 Samiyo 14 - The Keyagana NT and 25 OT books

Yonataniʼmo Filisatini vayaʼeʼmo kamemo huteno huno aeno apaka seʼniya gemae

¹ Mago afinaʼmo Yonataniʼmo neya ati vekamoʼmo kame hisiya yaʼaleʼmo neʼaliya vekaeʼmo ha painoʼaeʼmo, Filisatini ati vayaʼmogi seli noʼapilegamo ugetaʼao, huno ha paiʼniyaʼmonanafa Solofeʼmo ha opaiʼniye.

² Ani afinaʼmo Soloʼmo Gimeya taonimo atupaleʼmo pamagalaneti yosamo aepafiʼmo fai maiʼnigeʼa sigisi hataletiʼa agufa ati vayaʼmo agaeʼeʼmo maiʼnae.

³ Mono huno neʼapateya vekamo Ahaiyaʼmo Ahaitama mafaʼnemo Aikama nepuʼamoʼmo Finiyasi mafaʼneʼmae. Finiyasiʼmo Ilai mafaʼnemo ani vekamo akeyaʼvilagamo Sailo taonifiʼmo maiʼneno Ala kava netefeʼmo mono huno neʼapateya vekamae. Ahaiyaʼmo hapiliʼneno mono huno neʼapateya kenamo hapiteno apakaeʼeʼmo magokepiʼmo maiʼniye. Inagi Yonataniʼmo kame hisiyafeʼmo ago uʼniyaʼmonanafa vayaʼmogimo oʼageʼnae.

⁴ Yonataniʼe avagi huno uʼniya neya vekamoʼeʼmo Filisatini ati vayaʼmogi seli noʼapilegamo visaʼafeʼmo kateʼmo uʼnaʼae. Ani kaʼmo lole avelaʼmo folagapiʼmo haneʼnigeno lole alopa akoʼya yafaʼmo haneʼniye. Kaʼmo hoga haopalega yafaʼmo hanete lamaga haopalega yafaʼmo hanete huʼniye. Mago yafaʼmo agiʼamo Mosese yafane huno haneʼnigeno mago yafaʼmo agiʼamo Sene yafane huno haneʼniye.

⁵ Kaʼmo lamaga haopalega haneʼniya yafaʼmo aulagamo Mikimasi taonilegamo haneʼniye. Kaʼmo hoga haopalega haneʼniya yafaʼmo aulagamo Gimeya taonilegamo haneʼniye.

⁶ Inagi Yonataniʼmo kame hisaya yaʼamo neʼaliya neya vekaeʼmo ha painoʼaeʼmo, Eno, huno, laʼagaeʼmo malaga vayaʼmo Goti gemo noʼafiya ati vayaʼai seli noʼapilegamo uguʼae. Ala kava neʼmoʼa laʼaha maesifigetaʼae. Ala kava neʼmoʼa asole vayaʼaitetiʼmo mukiʼamogita lagufamo alino katino latesifi aise vayaʼaitetiʼmo mukiʼamogita lagufamo alino katino latesifi hugiyaʼmofeʼmo mago yaʼmoʼa kaʼmo afaʼa akanino oʼategaiye, huno ha paiʼniye.

⁷ Ha paiʼnigenoʼaeʼmo Yonataniʼmo kame hisiya yaʼamo aliʼniya vekamoʼmo hunoʼaeʼmo, Kaipa kagesafi kavaʼmo huvo. Kahauʼniya kavatefeʼmo nagaemo kagaeʼeʼmo magokepiʼmo lokaeʼna maiʼnove, huno ha paiʼniye.

⁸ Ha paiʼnigeno Yonataniʼmo hunoʼaeʼmo, Kanalene, huno, Ani ati vayaʼmogimo laʼagesayafeʼmo afaʼa uguʼae.

⁹ Apakaemo laʼaha paiʼapaeʼmo, lagava maiʼniʼageta eno, huʼa hisayaʼmoʼmo mani haopalegageʼmo he titaʼa maiguʼae. Apakaetegamo oʼuguʼae.

¹⁰ Oʼuguʼaʼmonanafa apakaemo huʼapaeʼmo, Lanakaemo eʼao, huʼa hisagetaʼaeʼmo laʼagaemo apakaetegamo uguʼae. Ala kava neʼmoʼa laʼayapiʼmo apavalelineno apateʼniyaʼmofeʼmo ani kavaʼapimo alagena yaʼmo haneʼniyanagetaʼa agegauʼae.

¹¹ Inagi anakaemo uʼana afole yateʼmo he tiʼana maiʼnaʼageʼapaeʼmo Filisatini ati vayaʼmogi huʼapaeʼmo, Anakeyo, huʼa, Himulu vayaʼmo yafa kapiʼmo fala kiʼa maiʼnayatetiʼmo emiʼae, huʼa huʼnae.

¹² Huteʼapaeʼmo Filisatini ati vayaʼmogimo Yonataniʼe kame hisiya yaʼaleʼmo aliʼniya vekaʼefeʼmo keya aeʼa ge huʼapaeʼmo, Lanakaemo haiteʼao. Lagaemo mago yaʼmo alita lanaveligune, huʼa huʼnae. Inagi Yonataniʼmo ani gemo afitenoʼaeʼmo kame hisiya yaʼaleʼmo aliʼniya vekaeʼmo hunoʼaeʼmo, Kagaemo nakame huka egetaʼao laʼagaemo uguʼae. Ala kava neʼmoʼa Isaleli vayaʼai apayapiʼmo apavaleno apateʼniyaʼmofeʼmae, huno ha paiʼniye.

¹³ Inagi Yonataniʼmo mago hosuʼniya yapilagamo aiyaletiʼe ayatetiʼeʼmo alime alime uno haiʼnigenoʼaeʼmo kame hisiya yaʼaleʼmo aliʼniya vekamo akame huno uno haiʼniye. Anakaemo Filisatini vayaʼmo maiʼnaya yateʼmo uʼa haiʼana avaʼyi huteʼanaeʼmo Yonataniʼmo apamagiʼnigeʼa mopafiʼmo asagauʼa aiʼnagenoʼaeʼmo kame hisiya yaʼaleʼmo aliʼniya vekamoʼmo naipeletiʼmo kamitimo apaiʼniye.

¹⁴ Yonataniʼe avagi huʼniya vekamoʼeʼmo ani kamemo huteʼanaeʼmo tuvetiʼa agufa vayaʼmo anakaemo kamitimo apamagige apaige huʼnaʼae. Ani kamemo yokalo nelaya mopagana huno haneʼniya mopaleʼmo afole aiʼniye.

¹⁵ Apakaemo Filisatini ati vayaʼmo seli noʼapilegamo maiʼnaya vayanagi kamemo hisayafeʼmo uʼnaya vayanagi muki vayanagi huʼa koli huteʼa atete huʼnae. Imimamo aliʼnigeno mopamoʼmo lusi kava huno atete huʼnigeʼapaeʼmo vayaʼmogimo lusi kava huʼa koli huteʼa atete huʼnae.

¹⁶ Inagi Solo ati vayaʼamo Gimeya taonifiʼmo yagaiʼa maiʼnaya ati vayaʼmogimo aulu heʼa apakeʼnayana asole vayaʼmo aliʼa anupa huʼa maiʼnayapatiʼmo nagu nagu huʼa uteʼa eteʼa huʼnageʼa apakeʼnae.

¹⁷ Inagi Soloʼmo agaeʼeʼmo maiʼnaya ati vayaʼaifeʼmo hunoʼaeʼmo, Ati vayatimo lekana paigetao ina lagimo oʼmaiʼnisafigeta agegaune. Apakaemo ani kavaʼmo huʼa lekana paiʼa ageʼnayana Yonataniʼe kame hisiya yaʼaleʼmo neʼaliya vekaʼeʼmo anakaemo oʼmaiʼnaʼae.

¹⁸ Ani afinaʼmo Goti kotalake kesiʼamo Gimeya taonifiʼmo maiʼnaya Isaleli vayaʼeʼmo haneʼniye. Haneʼniyaʼmofeʼmo Soloʼmo mono huno neʼapateya vekamo Ahaiyafeʼmo hunoʼaeʼmo, Kotalake kesimo alinika eno, huno ha paiʼniye.

¹⁹ Soloʼmo ani mono huno neʼapateya vekaeʼmo ge nehigeʼapaeʼmo Filisatini ati vayaʼmo seli noʼapilegamo maiʼnaya ati vayaʼmogi magoʼe magoʼe huʼa alopa gefatiʼmo ge huʼnae. Huʼnayaʼmofeʼmo Soloʼmo afitenoʼaeʼmo mono huno neʼapateya vekaeʼmo, afaʼa ato, huno ha paiʼniye.

²⁰ Afaʼa ato, huno hutegeʼa Soloʼe ati vayaʼaʼeʼmo aliʼa anupa huteʼa kamemo hisayafeʼmo uʼnae. Apakaemo Filisatini vayaʼmo apakeʼnayana vayatimo maiʼnafi kame vayatimo maiʼnafi huʼa apakeʼa aeto osuʼnayaʼmofeʼmo apakaiʼapi apakaiʼapimo kame huʼnae. Oʼapakesaya agufa alopa kavaʼmo afole aiʼniyaʼmofeʼmo malage huʼa ika ika huteʼa kamemo huʼnae.

²¹ Hogoteʼa mago Himulu vayaʼmo muki haopalegatiʼmo eʼa Filisatini vayaʼmo hapa maesayafeʼmo seli noʼapileʼmo uʼa magokepiʼmo lokaeʼa maiʼnaya Himulu vayaʼmogi Filisatini vayaʼmo apataleʼa uʼa Soloʼagi Yonataniʼagi muki Isaleli vayaʼenagi huʼa aliʼa anupa huteʼa hapa maeʼa kame huʼnae.

²² Ina kava huʼa muki Isaleli vayaʼmo Ifalemu nofi vayaʼai avefiʼmo fala kiʼa maiʼnaya vayaʼmogi afiʼapaeʼmo, Filisatini ati vayaʼmo apaune heʼnae, huʼa huʼnaya gemo afiteʼapaeʼmo Filisatini vayaʼeʼmo kamemo hisayafeʼmo apavegala aeʼnae.

²³ Apavegala aeliʼuʼa Meti Eveni taonifilagamo akame huʼa huʼnae. Ani afinaʼmo Ala kava neʼmoʼa ani kavatetiʼmo Isaleli vayaʼai apakufamo alino katino apateʼniye.

Soloʼmo agoʼyamo ataleteno hosu gemo huʼniya gemae

²⁴ Ani afinaʼmo Soloʼmo ani gemo hunoʼaeʼmo, Hemenitogeʼmo nagaemo kame vayaʼnimogi hosu kavaʼapimo anonaʼapilefeʼmo kayoʼmo apamiguve. Hemenimo neʼyaʼmo oʼneta afaʼa maiʼnigeno yegemo uno lamino faleno. Neʼyaʼmo nesiya vekamo lifana huʼna ategauve, huno huʼniye. Huno huʼniyaʼmofeʼmo magoke vekamoʼmo neʼyaʼmo oʼneʼnigeʼapaeʼmo muki Isaleli vayaʼmo ani kana yaʼmo aliteʼa lokiyaʼapimo ohaneʼniye.

²⁵ Inagi muki vayaʼmo uʼa mago yahaofiʼmo avaʼyi huteʼapaeʼmo agayana mopafiʼmo asole lumemo anuʼamo hanelinuneno huʼnigeʼa ageʼnae.

²⁶ Ageʼnayaʼmonanafa oʼneʼnae. Soloʼmo agoʼyamo ataleteno lokiya gemo huʼnigeʼa koli huʼnayaʼmofeʼmo oʼneʼnae.

²⁷ Koli huʼnayaʼmonanafa Yonataniʼmo afoʼamoʼmo ati vayaʼaifeʼmo agoʼyamo ataleteno huʼniya gemo oʼafiʼniyaʼmofeʼmo mago lumemo anuʼamo kayoʼmo atupaletiʼmo faino lanupaino neʼniye. Agaemo netenoʼaeʼmo lokiya vaiʼniye.

²⁸ Mago vekamoʼmo Yonatanifeʼmo hunoʼaeʼmo, Mukiʼamogita laga teʼnigenoʼaeʼmo lokiyatimo ohaneʼniyaʼmonanafa afokamoʼmo agoʼyamo ataleteno hunoʼaeʼmo, Hemeni afinaʼmo neʼyaʼmo nesiya vekamo lifana vekamo maigiye, huno huʼniye.

²⁹ Inagi Yonataniʼmo hunoʼaeʼmo, Afoʼnimoʼmo vayatimo hanageke yaʼmo alino apamiʼniye Lapakaemo nageyo. Nagaemo lumemo anuʼamo aiseʼamo neʼnovaʼmofeʼmo halate lokiya vaiʼnove.

³⁰ Lagaemo kame vayatimogi yaʼmo aliʼnona yapatiʼmo lahauʼniya neʼyaʼmo neʼnonesinana magoʼe huta asole Filisatini vayaʼmo kamemo hapaeʼnonesine, huno hapa paiʼniye.

³¹ Ani afinaʼmo apakaemo Filisatini vayaʼeʼmo kamemo Mikimasi taonifatiʼmo aepa faiʼa huteʼa huliʼa Aiyaloni taonifiʼmo uʼnayaʼmofeʼmo apaunena aiʼniye.

³² Yegemo ago uno lamino faleʼnigeʼapaeʼmo inagi apakaemo malage huʼa uʼa kame vayaʼapimogi apavaleʼa aliʼnaya sipisipi anagaʼe pulumaka anagaʼeʼmo apamagiʼa ameʼamo lagauʼa kaeteʼapaeʼmo kolaʼamo afaʼa haneʼnigeʼa neʼnae.

³³ Mago vayaʼamogimo uʼa Solofeʼmo ha paiʼapaeʼmo, Apako, huʼa, vayaʼmogimo ameʼafiʼmo kolaʼmo afaʼa haneʼnigeʼa neʼnayaʼmofeʼmo Ala kava netegamo hosu kavaʼmo huʼnae, huʼa ha paiʼnageno Soloʼmo ani gemo afitenoʼaeʼmo, Vae, huno, lapakaemo Gotiʼmo lapakameʼyamo amiʼnae. Lapakaemo uta mago alopa yafaʼmo alita heleve heleve hulitapa nagaetegamo eyo.

³⁴ Henagaʼamo lapakaemo ati vayaʼmogi folagapiʼmo uteta nehutapaeʼmo hapa paisageʼa pulumakaʼe sipisipiʼeʼmo apavaleliʼa egae. Ani yafateʼmo apamagiʼa kaeteʼa negae. Fiku yanageʼa apakaemo kolaʼmo haneʼnisiya ameʼamo nesayaʼmoʼmo Ala kava netegamo hosu kavaʼmo hugae, huno hapa paiʼniye. Huno hapa paiʼniyaʼmofeʼmo ani haniʼilagageʼmo pulumakaʼapimo apavaleliʼeʼa ani yateʼmo amagiʼnae.

³⁵ Inagi Soloʼmo ani haopalegamo mago ofalinimo hisiya yafa hiʼyalamuʼmo huʼniye. Ani yafa hiʼyalamuʼmo Soloʼmo hogote afinaʼmo huʼniye.

³⁶ Henagaʼamo Soloʼmo vayaʼaeʼmo hapa painoʼaeʼmo, Lagaemo haniʼilagamo uta lamita Filisatini vayaʼmo hapaeteta muki yaʼapimo aligetao. Kame nehapaesunageno yegemo haiʼnegaiye. Lagaemo magoke vekamo afaʼa maisiyafeʼmo oʼategaune, huno hapa paiʼnigeʼapaeʼmo, Kahauʼnisiya kavaʼmo huvo, huʼa ha paiʼnae. Huʼa ha paiʼnayaʼmonanafa mono huno neʼapateya vekamoʼmo hunoʼaeʼmo, Lagaemo manileʼmo Goti haopaleʼmo magokepiʼmo lokaeta egetao, huno huʼniye.

³⁷ Ani gemo huʼniyaʼmofeʼmo Soloʼa Gotifeʼmo ina ge huno ge huno afi geʼniye. Lagaemo uta lamita Filisatini vayaʼeʼmo kamemo hisupiye. Kagaemo apavalelikeka Isaleli vayaʼai apayapiʼmo apategapiye, huno ge huno afi geʼniyana ani afinaʼmo Gotiʼa geʼaleʼmo aeno atagaina huno ge osuʼniye.

³⁸ Osuʼniyaʼmofeʼmo Soloʼmo Isaleli vayaʼaiteʼmo yagaiʼniya vayaʼaifeʼmo hapa painoʼaeʼmo, Eyo, huno, Hemenimo haiya agufa hosu kavaʼmo afole aiʼnifigeta kahauya huta agegaune.

³⁹ Ala kava neʼmoʼa Isaleli vayaʼamo apakufamo alino katino neʼapateya vekamo alagi afaʼa maiʼniya kava huno ani hosu kavaʼmo huʼniya vekamo alagi faligiye. Haiya vekamoʼmo ani hosu kavaʼmo huʼnifigeno faligiye. Yonataniʼmo mafaʼneʼnimoʼmo ani hosu kavaʼmo huʼnisiyaʼmoʼmo afaʼageʼmo faligiye, huno huʼniyaʼmonanafa magoke vekamoʼmo geʼaleʼmo aeno atagaina huno ge osuʼniye.

⁴⁰ Inagi Soloʼmo muki Isaleli vayaʼaifeʼmo hapa painoʼaeʼmo, Mukiʼamogitapamo uta mugagayagamo he tiyo. Nagaeʼe Yonataniʼeʼmo manileʼmo he tiguʼae, huno hapa paiʼnigeʼapaeʼmo, Kanalene, huʼa, Kahauʼnisiya kavaʼmo huvo, huʼa huʼnae.

⁴¹ Soloʼmo Ala kava neʼmo Isaleli vayaʼai Gotiʼapimofeʼmo hunoʼaeʼmo, Ala kava nene, huno, Alika laveliyo, huno ha paiʼnigeno Yonataniʼe Soloʼeʼmo lekana paino anateʼniye.

⁴² Inagi Soloʼmo hunoʼaeʼmo, Ina laʼmo hosu kavaʼmo huʼnifigi alika laveliyo. Nagaemo huʼnofi Yonataniʼmo huʼnifigi alika laveliyo, huno huʼnigeno Yonataniʼmo lekana paino ateʼniye.

⁴³ Soloʼmo Yonatanifeʼmo ge huno afinoʼaeʼmo, Kagaemo na agufa kavaʼmo huʼnane, huno afi geʼnigeno Yonataniʼmo hunoʼaeʼmo, Nagaemo kayoʼmo atupaʼaletiʼmo lumemo anuʼamo aisetoʼamo aliʼna neʼnove. Neʼnovaʼmofeʼmo hemenimo afaʼa faliguve, huno ha paiʼniye.

⁴⁴ Soloʼmo ha painoʼaeʼmo, He, huno, Nagaemo huʼnaeʼmo, Yonataniʼmo kamitimo amagiyo, huʼna osisuvaʼmoʼmo Gotiʼa kamitimo namagigiye. Yonataniyo, huno, Alagi faligane, huno ha paiʼniye.

⁴⁵ Ha paiʼniyaʼmonanafa Isaleli vayaʼmogi Solofeʼmo ha paiʼapaeʼmo, Yonataniʼmo Isaleli vayaʼmo kame vayatimogi apayapatiʼmo lagufamo alino katino lateʼniya vekamo falisifiye. Alagi haʼao. Ofaligiye. Ala kava neʼmo afaʼa maiʼniya kava huno alagi ofaligiye. Mago agufa hosu kavaʼmo agaetegamo osugune. Hemenimo agaemo Gotiʼeʼmo aliʼyaʼmo aliʼniyaʼmofeʼmae, huʼa huʼnae. Apakaemo ani geʼapiletiʼmo Yonatani agufamo aliʼa katiʼa ateʼnageno ofaliʼniye.

⁴⁶ Inagi ani kavaʼmo hutagenoʼaeʼmo Soloʼmo magoʼe huno apavegala oʼaeʼniyaʼmonanafa apataleno eʼniye. Apakaemo Filisatini vayaʼmo halate koʼapilegamo uʼnae.

Soloʼmo kamemo huʼniya kavafeʼmo ava gemo huʼniya gemae

⁴⁷ Inagi Soloʼmo kini vekamo maiʼnenoʼaeʼmo Isaleli vayaʼaiteʼmo yagaino apateʼnigeʼapaeʼmo agaeʼe ati vayaʼaʼeʼmo muki haopalega maiʼnaya kame vayaʼapiʼeʼmo kamemo huʼnae. Apakaemo Movapu vayaʼeʼmo kame huge Amoni vayaʼeʼmo kame huge Itomi vayaʼeʼmo kame huge Filisatini vayaʼeʼmo kame huge Soma vayaʼai kini vayaʼapiʼeʼmo kame huge huʼnae. Soloʼmo muki haopalegamo uneno huno alino hosu huno apataleʼniye.

⁴⁸ Soloʼmo kame hisayafeʼmo ati vayaʼamogi apaipafiʼmo huno fugali huʼnigeʼapaeʼmo apakaemo magoʼe huʼa lokiya vaiʼa kame huʼa Amaleki vayaʼaina aeʼa apaka seʼnae. Apakaemo kamemo huʼapaeʼmo Isaleli vayaʼmogi kagemi yaʼapimo kumaya aliʼnaya vayaʼai apayapatiʼmo hatu maeʼa apateʼnae.

Kini vekamo Soloʼe afamo anagaʼaʼeʼmo huʼniya gemae

⁴⁹ Soloʼmo ve mafaʼnemo anagaʼamo Yonataniʼagi Isuvaiʼagi Malakaisavaʼagi huʼa maiʼnae. Lole a mafaʼneʼalaʼmogani anakiʼanimo haneʼniye. Yege a mafaʼneʼamo Melapiʼagi anile a mafaʼneʼamo Maikoʼagi huʼana maiʼnaʼae.

⁵⁰ Solo aʼmo agiʼamo Ahinovamiʼmo Ahaimaʼasi a mafaʼnemae. Solo ami vayaʼaleʼmo yagaino apateʼniya vekamo Apanaʼmo Neʼmo mafaʼnemae. Neʼmoʼmo Solo avuʼamoʼmae.

⁵¹ Solo afoʼamoʼmo Kisiʼmae. Kisiʼe Neʼeʼmo anakaemo Amaiyo mafaʼnelane.

⁵² Soloʼmo muki afinaʼmo kini vekamo maiʼniya afinaʼmo ati vayaʼamogimo Filisatini vayaʼeʼmo lokiya vaiʼa kamemo huʼnae. Soloʼmo muki afinaʼaeʼmo lokiya vayaʼmo apakege kame hisayafeʼmo koli nosaya vayaʼmo apakege huteno apavaleʼnigeʼa ati vayaʼamo hamaleʼnae.