1 Samiyo 13 - The Keyagana NT and 25 OT books

Soloʼmo osisiya agufa ofalinimo huʼnigeʼa Isaleli vayaʼmogimo Filisatini vayaʼeʼmo kamemo huʼnaya gemae

¹ Soloʼmo fotiʼa kafugamo maiteno kini vekamo maiʼniya afinaʼmo lole kafugamo maiʼniye.

² Soloʼmo Isaleli vayapatiʼmo ati vayaʼamo tali tauseniʼa vayaʼmo maisayafeʼmo lekana paino apateteno alu vayaʼmo noʼapilegamo alino apateʼnigeʼa uʼnae. Tu tauseniʼa ati vayaʼmo Meto aveleʼmo Mikimasi taonifiʼmo Soloʼeʼmo maiʼnageʼa vani tauseniʼa vayaʼmo Menisameni vayaʼai mopaleʼmo Gimeya taonifiʼmo Yonataniʼeʼmo maiʼnae.

³ Inagi Yonataniʼe ati vayaʼaʼeʼmo uʼa Gima taonifiʼmo Filisatini ati vayaʼai seli noʼapilegamo maiʼnaya vayaʼeʼmo kame huʼnageʼa alu Filisatini vayaʼmogimo ani kavafeʼmo ava gemo afiʼnae. Soloʼmo mago vayaʼmo alino apateʼnigeʼa muki Isaleli haopalegamo uʼeʼa huʼa Soloʼmo kame huʼa ha maesayafeʼmo pikulimo huʼa keya aeʼnae.

⁴ Mago vayaʼmogi huʼapaeʼmo Soloʼmo Filisatini vayaʼeʼmo kame huʼnigeʼa Filisatini vayaʼai apaulagaleʼmo alagi hosu faipa vayaʼmo hamaleʼnae, huʼa hapa paiʼnageʼa muki Isaleli vayaʼmogi afiʼnae. Afiteʼapaeʼmo eʼa Giligo taonifiʼmo Soloʼeʼmo aliʼa anupa huʼnae.

⁵ Ani afinaʼmo Filisatini vayaʼmo Isaleli vayaʼeʼmo kamemo hisayafeʼmo eʼa aliʼa anupa huʼnae. Apakaemo kamemo nehaya talalamo teti tauseniʼa talalagi sigisi tauseniʼa ati vayaʼmo hosileʼmo fai maige lusi asole ati vayaʼmo ani kahaepagana agufa vayanagi huʼa eʼnae. Apakaemo Mikimasi taonifiʼmo eteʼa seli noʼapimo aliʼa he tiʼa ateʼnae. Metaveni taonimo haneʼnigeno yegemo haine neʼeya haopalegamo Mikimasi taonimo haneʼniye.

⁶ Isaleli vayaʼmogimo ageteʼapaeʼmo falisuna kavaʼmo afole aiʼniye, huʼa apakesamo afiʼnagenoʼaeʼmo apaipamoʼmo kana huʼniye. Inagi Isaleli vayaʼmo apaune heʼa uʼa kelifiʼmo fala kige kahaufilagamo uʼa fala kige yafakapiʼmo uʼa fala kige alopa yafaʼmo folagapiʼmo uʼa fala kige huʼnae.

⁷ Mago Isaleli vayaʼmo apaune heʼa Yoneni aniʼmo lakaeʼa Gati nofi vayaʼai mopaleʼmo uteʼa Giliyati taonifiʼmo uʼnae. Soloʼmo oʼuno Giligo taonifikeʼmo maiʼnigeʼa magokepiʼmo lokaeʼa maiʼnaya vayaʼmogi koli huteʼa atete huʼnae.

⁸ Hogoteno Samiyoʼmo Solofeʼmo hunoʼaeʼmo, Seveniʼa afinaʼmo nagava maiyo, huno huʼniyaʼmofeʼmo Soloʼmo seveniʼa afinaʼmo agava maiʼniyaʼmonanafa Samiyoʼmo Giligo taonifiʼmo oʼmeʼnigeʼa vayaʼmo Soloʼa ataleʼa uʼeʼa huʼnae.

⁹ Samiyoʼmo oʼmeʼniyaʼmofeʼmo Soloʼa hunoʼaeʼmo, Atamoʼmo leno saga lisiya ofaliniʼe Gotiʼeʼmo magoke laipamo alisuna ofaliniʼeʼmo alinita nagaetegamo eyo, huʼniye. Aliniʼa eʼnagenoʼaeʼmo Soloʼmo ani ofalinimo huʼniye.

¹⁰ Muki ani ofalinimo huʼniya aliʼyaʼmo hano hutegenoʼaeʼmo Samiyoʼmo eno avaʼyi huʼnigeno Soloʼa agaeʼeʼmo fotu huteno gemo amamaesiyafeʼmo nopatiʼmo kumategamo uno lamiʼniye.

¹¹ Samiyoʼmo Solofeʼmo ha painoʼaeʼmo, Kagaemo na kavaʼmo huʼnane, huno ge huno afi geʼnigenoʼaeʼmo Soloʼmo hunoʼaeʼmo, Nagaemo apakovana vayaʼmo ago nataleʼa muki haopalegamo uʼeʼa huʼnageka kagaemo egauve, huka lekana paiʼnana afinaʼmo oʼmeʼnanageʼa Filisatini vayaʼmo Mikimasi taonifiʼmo aliʼa anupa huʼa maiʼnayaʼmofeʼmo nagesa alaʼamo afiʼnove.

¹² Nagesamo afiʼnaeʼmo Filisatini vayaʼmo eʼa kamemo nahaesayafeʼmo Giliga taonifiʼmo maiʼnovategamo egayaʼmonanafa nagaemo Ala kava neʼmoʼa naha maesiyafeʼmo haoke heʼna nunumuʼmo osuʼnovaʼmofeʼmo nagesamo afiʼnaeʼmo ofalinimo huguve, huʼna nagesamo afiteʼna ofalinimo huʼnove, huno ha paiʼniye.

¹³ Inagi Samiyoʼmo ha painoʼaeʼmo, Kagaemo negi kavaʼmo huʼnane. Kagaemo Ala kava neʼmo Gotikamoʼmo huvo, huno kaha paiʼniya gemo akame osuʼnane. Kagaemo akame huʼnanesinana Isaleli vayaʼaiteʼmo kagaeʼe kaginago vayaʼeʼmo muki afinaʼae afinaʼaeʼmo yagaitapa apateme apateme uʼnaesine.

¹⁴ Akame osuʼnanaʼmofeʼmo yagaika apateme apateme oʼugane. Ala kava neʼmoʼa hauʼniya kavaʼmo hisiya agufa vekamo agaiʼalefeʼmo kahauya huno ageʼniye. Agaemo ani vekaeʼmo hunoʼaeʼmo, Vayaʼnileʼmo yagaika apato, huno ha paiʼniye.

¹⁵ Samiyoʼmo ani gemo huno ha paiteno he tino Giliga taonifatiʼmo ataleno Menisameni vayaʼai mopaleʼmo Gimiya taonifiʼmo uʼniye. Inagi Soloʼmo agaiʼaʼeʼmo maiʼnaya ati vayaʼmo lekana paiʼniyana sigisi hataletiʼa agufa vayaʼatogeʼmo maiʼnae.

¹⁶ Soloʼagi mafaʼneʼamo Yonataniʼagi anakaeʼeʼmo maiʼnaya ati vayaʼenagi huʼa Menisameni vayaʼai mopaleʼmo Gimiya taonifiʼmo magoʼe afinaʼmo maiʼnayaʼmonanafa Filisatini vayaʼmo Mikimasi taonifiʼmo seli noʼapileʼmo maiʼnae.

¹⁷ Filisatini ati vayaʼmo aliʼa fako huʼa loleʼe magoʼe aluʼmo aiʼa maiʼneʼa uʼa Isaleli vayaʼeʼmo kame hisayafeʼmo mago aluʼmo Ofila taonifiʼmo Suvali kotega uʼniya kateʼmo uʼnae.

¹⁸ Mago aluʼmo Meti Holoni taonifiʼmo uʼniya kateʼmo uge mago aluʼmo mopamo hakuteʼmo uʼniya kateʼmo uge huʼnae. Mopamo hakuteʼmo maisiya vekamoʼa Semovimi kagoʼmumo kaʼme kotegamo afaʼa agegaiye.

¹⁹ Ani afinaʼmo magoke vekamoʼmo muki Isaleli kotegamo aeniletiʼmo alo nehaya yaʼmo alo nehiya vekamo oʼmaiʼniye. Filisatini vayaʼmogimo apakesamo afiʼapaeʼmo, Fiku yanageʼa Himulu vayaʼmogi naipeʼe hayoʼeʼmo alo huʼnegae, huʼa apakesamo afiteʼa Isaleli vayaʼaifeʼmo, ani agufa yaʼmo alo osiyo, huʼa hapa paiʼnae.

²⁰ Huʼnayaʼmofeʼmo muki Isaleli vayaʼmo Filisatini vayaʼaitegamo uʼa lamiʼnageʼapaeʼmo Filisatini vayaʼmogi aiʼyumo aisaya aenilenagi koʼnelenagi naipelenagi huʼa kuʼme kaneʼa apateʼnae.

²¹ Ani agufa aliʼyatefeʼmo miyaʼamo sigisi kina haneʼniye. Aiʼyumo aisaya alopa aenilenagi sipetilenagi koʼnelenagi aise kevemo pulumakamoʼmo aliʼyaʼmo alisigeʼapaeʼmo malagene, huʼa hisaya aenilenagi huʼa kuʼme kaneʼa apatesaya miyaʼamo haneʼniye.

²² Ani afinaʼmo kamemo hisaya afinaʼmo Soloʼe Yonataniʼekeʼmo hayoʼaniʼe naipeʼaniʼeʼmo haneʼniyana Isaleli ati vayaʼmo ohaneʼniye.

²³ Ani afinaʼmo Filisatini vayaʼmogimo mago aluʼmo Mikimasi katetiʼmo uʼa lole kagoʼmuleʼmo fotu huʼa neʼvaya kateʼmo faiʼa vego huʼnae.