1 Samiyo 12 - The Keyagana NT and 25 OT books

Isaleli vayaʼmogi Soloʼa kini vekaʼapimo aliʼa afole aiʼa ateʼnaya afinaʼmo Samiyoʼmo mago gemo aeno hakalo huno hapa paiʼniya gemae

¹ Henagaʼamo Samiyoʼmo muki Isaleli vayaʼaifeʼmo ina gemo huno hapa painoʼaeʼmo, Nagaemo lapakaemo naha paiʼnaya gemo alagi afiteʼnaeʼmo yagaino lapatesiya kini vekatapimo avaleʼna lapamiʼnove.

² Hemenimo yagaino lapatesiya vekamae. Nagaemo ago kosuna leʼnogeno yaveyave nayokamo aeʼnigeʼa ve mafaʼne anagaʼnimogimo lapakaeʼeʼmo maiʼnae. Nagaemo mafaʼnemo maiʼnova afinatetiʼmo lapakaeteʼmo yagaiʼna lapateme lapateme eʼna hemenimo maiʼnove.

³ Hemenimo manileʼmo maiʼnove. Nagaemo mago hosu kavaʼmo lapakaetegamo huʼnisuvaʼmoʼmo Ala kava neʼmo aulagaleʼe lekana paino ateʼniya kini vekamo aulagaleʼeʼmo agoti hutapa nateyo. Nagaemo ina la ve pulumakaʼamofi nokiʼamofi huʼna avaleʼnove. Ina lafeʼmo aigofe gemo huteʼna kumaya aliʼnove. Nagaemo ina laʼmo kana yaʼmo amiteʼna aliʼna hosu huʼna ateʼnove. Ina laʼmo nagaemo hosu kavaʼmo hisuvafeʼmo mago yaʼmo fikumo namiʼniye. Nagaemo mago ani agufa kavaʼmo lapakaetegamo huʼnisuvaʼmoʼmo ani kava huʼnisuva anonatapilefeʼmo aliʼna alagepa huʼna lapamiguve.

⁴ Inagi apakaemo huʼapaeʼmo, Haʼao, huʼa, kagaemo lagaefeʼmo aigofe gemo osuge mago yatimo kumaya oʼalige alika hosu huka olatege huʼnane. Kagaemo mago hosu kavaʼmo hisanafeʼmo layapatiʼmo mago yaʼmo oʼaliʼnane, huʼa ha paiʼnae.

⁵ Ha paiʼnageno Samiyoʼmo hunoʼaeʼmo, Ala kava neʼmoʼe lekana paino ateʼniya kini vekamoʼeʼmo lapakaemo ani huʼnaya gemo afiteʼanaeʼmo lapakaemo mago hosu kavaʼnimo oʼageʼnae, huno hapa paiʼnigeʼa apakaemo huʼapaeʼmo, He, Ala kava neʼmoʼa getimo ago afiʼniye, huʼa ha paiʼnae.

⁶ Inagi Samiyoʼmo muki vayaʼaifeʼmo hunoʼaeʼmo, Ala kava neʼmoʼa Moseseʼe Eloniʼeʼmo alino he tino anateteno lapakinago vayaʼmo Isipi kotegatiʼmo apavalelino eʼniye.

⁷ Inagi lapakaemo alagepa hutapa lapaketafo hiyo. Nagaemo Ala kava neʼmo aulagaleʼmo Ala kava neʼmoʼa lapakaetegaʼe lapakinago vayaʼaitegaʼeʼmo huʼniya fatago kavatefeʼmo agoti huʼna lapategauve.

⁸ Laginago vekamo Yekopuʼe afamo anaga vayaʼaʼeʼmo uʼa Isipi kotegamo maiʼnageʼapaeʼmo henagaʼamo Isipi vayaʼmogi nofi vayaʼapimogimo lapakinago vayaʼaitegamo hosu kavaʼmo huʼnae. Huʼnageʼapaeʼmo apakaemo Ala kava neʼmoʼa hapa maesiyafeʼmo keya aeʼa ge huʼnagenoʼaeʼmo agaemo Moseseʼe Eloniʼeʼmo alino anateʼnigeʼana lapakinago vayaʼmo Isipi kotegatiʼmo apavaleliʼana eʼana mani koteʼmo apateʼnaʼae.

⁹ Lapakinago vayaʼmo mani koteʼmo maiʼnayaʼmonanafa apakaemo Ala kava neʼmo Gotiʼapimofeʼmo apake kaniʼnigeno agaemo maketi huteno Heso taonifi ami vayaʼaiteʼmo yagaino apateʼniya vekamo Sisela ayapinagi Filisatini vayaʼai apayapinagi Movapu kini vekamo ayapinagi huno apavaleno apateʼnigeʼa Isaleli vayaʼeʼmo kamemo huʼnae.

¹⁰ Kame hapaeʼnageʼa Isaleli vayaʼmogi Ala kava nefeʼmo keya aeʼa ge huʼapaeʼmo, Lagaemo kagaemo kataletuta aigofe gotigimo Meligitefenagi aʼne gotigimo Asatalotigitefenagi huta monoʼmo huʼnonaʼmofeʼmo hosu kavaʼmo huʼnone. Hosu kavaʼmo huʼnonaʼmonanafa kame vayatimogi apayapatiʼmo lagufamo alika katika lategetao kagaetefeʼmo mono huteta aliʼyakamo aligune.

¹¹ Inagi Ala kava neʼmoʼa nunumuʼmo huʼnaya gemo afitenoʼaeʼmo Yelamameliʼagi Mitaniʼagi Yepataʼagi Samiyoʼagi huno alino apateʼnigeʼa magoke magoke huʼa kame vayaʼai apayapatiʼmo lapakufamo aliʼa katiʼa lapateʼnagetapa alagepa huta maiʼnae.

¹² Muki ani afinaʼmo Ala kava neʼmo Gotitapimoʼmo kini vekatapimo maiʼniyaʼmonanafa lapakaemo ageʼnayana Nehasiʼmo Amoni kini vekamoʼmo eno lapakaeʼeʼmo kamemo huʼnigetapaeʼmo nagaefeʼmo hutapaeʼmo, Haʼao, mago kini vekamoʼmo yagaino lategaiye, hutapa naha paiʼnae.

¹³ Inagi ani gemo naha paiʼnayaʼmofeʼmo lapakaemo ani lekana paitapa ateʼnaya kini vekamoʼmae. Lapauʼniya kini vekamo agaemae. Afiyo, huʼna, Ala kava neʼmoʼa yagaino lapatesiyafeʼmo ani kini vekamo lapakaemo lapamiʼniye.

¹⁴ Lapakaemo Ala kava nefeʼmo koli hutetapa aiyafiʼmo maiʼnetapa geʼamo akame hutetapa Ala kava neʼmo keʼaepa gemo amagita oʼataleʼnisayaʼmoʼmo lapakaeʼe yagaino lapateʼniya kini vekatapiʼeʼmo Ala kava neʼmo Gotitapimoʼmo akame hutetapaeʼmo alagepa hutapa maigae.

¹⁵ Alagepa hutapa maigayaʼmonanafa Ala kava neʼmo geʼamo akame osuge keʼaepa geʼamo amagitapa atalege hisayaʼmoʼmo inagi Ala kava neʼmoʼa lapakinago vayaʼmo apamiʼniya agufa kayoʼmo lapamigiye.

¹⁶ Inagi hemenimo afiyo. Lapakaemo aiseʼamo agava maiʼnigenoʼao Ala kava neʼmoʼa alopa kavaʼmo hisigetapa agegae.

¹⁷ Lapakaemo ago ageʼnayana hemenimo vitimo ago leʼnigeta nehatagauna afinaʼmogeno koʼmo noʼaiya afinaʼmae. Haneʼniyaʼmonanafa hemenimo Ala kava nefeʼmo keya aeʼna ge hisugeno hiyapatiʼmo hakalu huteno koʼmo alino atalesigeno ailino eminegaiye. Lapakaemo ani kavaʼmo ageteta afigayana Ala kava nefeʼmo mago kini vekatimo lamiyo, hutapa ge huta afi geʼnaya afinaʼmo Ala kava neʼmo aulagaleʼmo alopa hosu kavaʼmo huʼnone, hutapa agegae.

¹⁸ Inagi Samiyoʼmo Ala kava nefeʼmo keya aeno ge huʼnigeno ani afinakeʼmo Ala kava neʼmoʼa hiyapatiʼmo hakalu nehigeno koʼmo ailino emineʼniye. Emineʼnigeʼa muki vayaʼmogimo ageteʼapaeʼmo Ala kava neʼe Samiyoʼeʼmo lusi kava huʼa koliʼanimo huʼnae.

¹⁹ Muki vayaʼmogimo Samiyofeʼmo huʼapaeʼmo, Lagaemo asole hosu kavaʼmo ago hutetaeʼmo hemenimo ageʼnonana lagaemo Ala kava nefeʼmo kini vekatimo lamiyo, huta ge huta kafi geʼnona kavaʼe magoʼe huta alu hosu kavaʼeʼmo huʼnone. Huʼnonaʼmofeʼmo kagaemo Ala kava neʼmo Gotikamofeʼmo lagaemo aliʼyakamo neʼaluna vayakamogitaeʼmo nunumuʼmo huka lato. Fiku yanageta faligune, huʼa ha paiʼnae.

²⁰ Inagi Samiyoʼmo muki vayaʼaifeʼmo hapa painoʼaeʼmo, Lapakaemo koli osiyo. Lapakaemo muki ani hosu kavaʼmo huʼnayaʼmonanafa Ala kava neʼmo oʼataletapa akame hutetapa muki lapaipafatiʼmo aliʼyaʼamo aliyo.

²¹ Ala kava neʼmo oʼataleyo. Atalesayaʼmoʼmo afaʼa ina agufa yaʼmo alisayafeʼmo lahapaugiye. Ina agufa yaʼmo haneʼniyaʼmofeʼmo lapakaemo akamelegatiʼmo magoʼe yaʼmo afaʼa oʼaligae. Lapa oʼmaesiya yaʼmo haneʼniye.

²² Ala kava neʼmoʼa agaiʼamo hauʼnigeno ala agiʼalefeʼmo agaiʼa vayaʼamo alino lapatesiyafeʼmo alino hamaleno lapateʼniyaʼmofeʼmo Ala kava neʼmoʼa vayaʼamo apataleno oʼugiye.

²³ Nagaiʼnieʼmo huʼnaeʼmo, Fiku yanageʼna magoʼe huʼna nunumuʼmo huʼna olapatesuvaʼmoʼmo Ala kava netegamo hosu kavaʼmo huguve. Nagaemo alagepa kavaʼe fatago kavaʼeʼmo hisayafeʼmo aliʼna lapaya malegauve.

²⁴ Lapakaemo Ala kava neʼmoʼa lokiya kavaʼmo huno lapa maeʼniya kavafeʼmo lapakesa afifi hutapa maiyo. Maiʼnetapaeʼmo Ala kava nefekeʼmo koli huʼnetapa muki lapaipafatiʼmo lama ge kavaʼmo hutapa aliʼyaʼamo aliyo.

²⁵ Aligayaʼmonanafa lapakaemo magoʼe hosu kavaʼmo hisayaʼmoʼmo Ala kava neʼmoʼa lapakaeʼe kini vekatapiʼeʼmo alino hano huno lapatalegaiye.