1 Samiyo 11 - The Keyagana NT and 25 OT books

Soloʼmo Yemesi-Giliyati taonifiʼmo maiʼnaya vayaʼai apakufamo alino katino apateʼniya gemae

¹ Henagaʼamo Nehasiʼmo Amoni vayaʼai kini vekamoʼmo ati vayaʼamo apavalelino Isaleli vayaʼmogi taonimo Yemesi-Giliyati taonifiʼmo kamemo hisayafeʼmo eʼa taonileʼmo faiʼa vego huʼnae. Inagi muki Yemesi taonifi ve anagaʼmogimo Nehasifeʼmo huʼapaeʼmo, Kagaemo lagaeʼeʼmo kotalakemo hugetao afaʼa kaiyafiʼmo maiʼneta aliʼyakamo aligune, huʼa ha paiʼnae.

² Amoni vekamo Nehasiʼmo hunoʼaeʼmo, Magoke kaʼatomo haneʼniyanageʼna nagaemo lapakaeʼeʼmo kotalakemo hu malegauve. Nagaemo muki Yemesi vayaʼmo lamaga lapaulagamo aliʼna katiʼna atalesugeʼapaeʼmo muki Isaleli vayaʼmo apavagage hugiye.

³ Yemesi taonifi vayatama vayaʼmogi ani gemo afiteʼapaeʼmo Nehasifeʼmo ha paiʼapaeʼmo, Kagaemo afaʼa seveniʼa afinaʼmo lagava maiʼnegetao lagaemo vayaʼmo alita apatesunageʼa muki Isaleli haopalegamo uʼeʼa huʼa eʼa laha maesayafeʼmo ge huʼa apafigegae. Lagufamo aliʼa katiʼa latesaya vayaʼmo oʼmaisayaʼmoʼmo afaʼa katesunageka yagaika lategane.

⁴ Inagi apakaemo mago vayaʼmo aliʼa apateʼnageʼa Gimeya taonifiʼmo Soloʼmo maiʼniya taonifiʼmo uʼa avaʼyi huteʼa apakaetegamo afole aiʼniya kavafeʼmo ava gemo huʼa hapa paiʼnae. Gimeya vayaʼmogimo ani gemo afiteʼapaeʼmo lusi kava huʼa aviʼyaʼmo huʼnae.

⁵ Ani afinaʼmo Soloʼmo hoyafilagatiʼmo ataleno eno aliʼyaʼmo neʼaliya ve pulumaka anagaʼmo apakame huno neʼenoʼaeʼmo agaemo vayaʼmogimo aviʼyaʼmo nehageno afiʼniye. Afitenoʼaeʼmo, na agufa kavaʼmo higetapaeʼmo mukiʼamogitapamo aviʼyaʼmo nehae, huno ge huno apafi geʼniye. Inagi apakaemo Yemesi vayaʼmogi hapa paiʼnaya gemo ha paiʼnae.

⁶ Soloʼmo ani gemo ago afiʼnigenoʼaeʼmo Goti Aunemeʼamoʼmo Soloteʼmo emineʼnigeno lusi kava huno aipamo leʼniye.

⁷ Inagi Soloʼmo lole pulumakalaʼmo anamagino anameʼageʼmo lagauno lagauno maleʼniye. Agaemo ani ameʼamo alino vayaʼaina apamiteno muki Isaleli haopalegamo mani ameʼamo alinituta vayaʼaina apaveliyo. Haiya vayaʼmogimo Soloʼe Samiyoʼeʼmo Amoni vayaʼeʼmo kamemo osisafi ani vayaʼmogi pulumakaʼapimo amagino ani ameʼamo lagauʼniya agufa kavaʼmo huno lagaugiye, hutapa hapa paiyo. Vayaʼmogimo ani gemo afiʼnagenoʼaeʼmo Ala kava neʼmoʼa koli yaʼmo alino apamiʼnigeʼapaeʼmo muki vayaʼmo magokepiʼmo he tiʼa eʼnae.

⁸ Eʼa Miseki taonifiʼmo aliʼa anupa huʼa maiʼnageno Soloʼmo Isaleli vayaʼmo apakeno lekana paiʼniya vayaʼmo tali hataleti tauseniʼa vayaʼmo maiʼnae. Ina kava huno Yuta vayaʼmo apakeno lekana paiʼniya vayamo teti tauseniʼa vayaʼmo maiʼnae.

⁹ Apakaemo eʼnaya vayaʼaifeʼmo hapa paiʼapaeʼmo, Lapakaemo uta Yemesi-Giliyati vayaʼaifeʼmo hapa paitapaeʼmo, Lagaemo egamo yegemo haine neʼesigetaeʼmo eta lapa maegune, huʼa hae, hutapa hapa paiyo. Inagi ani eʼnaya vayaʼmogimo uʼa Yemesi-Giliyati vayaʼaifeʼmo ani huʼnaya gemo hapa paiʼnae. Apakaemo afiteʼapaeʼmo apamogaga aiʼnae.

¹⁰ Apamogaga aiteʼa Nehasifeʼmo ha paiʼapaeʼmo, Lagaemo egamo kagaetegamo esunagekaeʼmo na agufa kavaʼmo lagaetegamo huguve, huka hisapi ani kavaʼmo afaʼa hugane.

¹¹ Netepiʼmo ko otiʼnigenoʼaeʼmo Soloʼmo ati vayaʼamo alino fako huno loleʼe magoʼe aluʼmo aino apateʼnigeno kotino alino ha nelegeʼapaeʼmo malage huʼa uʼa Amoni vayaʼeʼmo kamemo huʼnae. Apakaemo hapaeme hapaeme neʼvageno uno felugakukuʼmo huʼniye. Apakaemo magoke magoke Amoni vayaʼmo ohapaeʼnaya vayaʼmo apaote apaote huʼa apaune heʼa uʼeʼa huʼnae.

¹² Apaune heʼnageʼapaeʼmo Isaleli vayaʼmogi Samiyofeʼmo huʼapaeʼmo, Haiya vayatimogi huʼapaeʼmo, Soloʼmo kini vekatimo oʼmaigiye, huʼa hisafigi kagaemo apavalelika eno. Kamitimo hapaegune, huʼa ha paiʼnae.

¹³ Ha paiʼnayaʼmonanafa Soloʼmo hunoʼaeʼmo, Haʼao, huno, lagaemo mago vayatimo kamitimo hapaesunageʼa ofaligae. Mani hemenitomo Ala kava neʼmoʼa Isaleli vayaʼmo kame vayatimogi apayapatiʼmo lagufamo alino katino lateʼniyaʼmofeʼmo magoke vekamo kamitimo ohaegaune, huno huʼniye.

¹⁴ Huno hutenoʼaeʼmo Isaleli vayaʼaifeʼmo hunoʼaeʼmo, Lagaemo Giligo taonifiʼmo uta Soloʼmo kini vekatimo maiʼniye, huta halate huta haleta hapa paigune.

¹⁵ Inagi mukiʼamo Giligo taonifiʼmo uʼa Ala kava neʼmo aulagaleʼmo apakaemo huʼapaeʼmo, Soloʼmo kini vekatimae, huteʼa huʼa haleʼa huʼnae. Apakaemo Gotiʼe magoke apaipamo kalisiya ofalinimo huʼnae. Ani haopalegamo Soloʼe muki Isaleli vayaʼmogiʼeʼmo ani kavafeʼmo lusi kava huʼa apamogaga aiʼnae.