1 Samiyo 10 - The Keyagana NT and 25 OT books

¹ Inagi Samiyoʼmo mago aise olivi uvelimo alino Solo agenopafiʼmo lakino ateteno haeno netenoʼaeʼmo ina gemo huno ha painoʼaeʼmo, Ala kava neʼmoʼa agaiʼa vayaʼaiteʼmo yagaika apatesanafeʼmo lekana paino kateʼniyaʼmofeʼmo uvelimo lakiʼna kateʼnove, huno ha paiʼniye.

² Hemenimo kagaemo natalekuka Selasa taonifiʼmo Menisameni vayaʼai mopaleʼmo avaʼyi huteka Lesoʼmo kiʼa ateʼnaya haopaleʼmo lole vekalaʼeʼmo fotu hugane. Anakaemo kagaefeʼmo kaha paiʼanaeʼmo, Kagaemo ani kahauya nehana noki anagaʼmo ago apakeʼa apavaleʼnae. Afokamoʼmo hemenimo magoʼe huno noki anagafeʼmo agesamo oʼafiʼniyaʼmonanafa hemenimo agaemo kagaefeʼmo agesa alaʼamo afitenoʼaeʼmo, Nagaemo haiya kava huʼna mafaʼneʼnimo kahauya huʼna agegauve, huno nehiye, huʼana kaha paigaʼae.

³ Inagi kagaemo anataleka neʼukaeʼmo Temo kotegamo alopa yosamo aepaleʼmo uka avaʼyi nehukaeʼmo loleʼe magoʼe vayaʼeʼmo fotu hugane. Apakaemo Meto taonifilagamo uʼa Gotiʼmo ofalinimo amisayafeʼmo neʼugae. Mago vekamoʼmo loleʼe magoʼe aikeli mememo apavalelino esigeno alu vekamoʼmo loleʼe magoʼe peleti mayamo alinino esigeno napa tali vekamoʼmo meme agufa kepiʼmo nofi alagafati aniʼmo lakino alinino esigeʼa hugae.

⁴ Apakaemo kagaemo ge kamamaeteʼapaeʼmo lole peleti mayalaʼmo kamisageka aligane.

⁵ Kagaemo apatalekukaeʼmo Goti aise aveleʼmo Filisatini ati vayaʼmogi noʼapimo haneʼniya aveleʼmo ugane. Kagaemo taoni haopaleʼmo uka hogo nehukaeʼmo mago Gotitegati gemo aliniʼeʼa aeʼa hakalo nehaya nofi vayaʼmo aise aveletiʼmo emi neʼesageka fotu hugane. Apakaemo gita amagige tamolini amagige kepatiʼmo feliyopaʼmo huge nehuʼapaeʼmo Gotitegati gemo aliniʼeʼa aeʼa hakalo huge hugae.

⁶ Inagi Ala kava neʼmo Aunemeʼamo kagaeteʼmo eminesigeka apakaeʼeʼmo magokepiʼmo Gotitegati gemo alinikeka aeka hakalo hugane. Kagaemo aeto agufa vekamo hamalegane.

⁷ Ani alagena kavaʼmo kagaeteʼmo ago afole aitesigekaeʼmo hisana agufa kavaʼmo huvo. Gotiʼa kagaeʼeʼmo magokepi lokaeno maiʼniyaʼmofeʼmo afaʼa hugane.

⁸ Kagaemo uka hogoteka Giligo taonifiʼmo seveniʼa afinaʼmo nagava maiʼnegeʼnao nagaemo hisana kavaʼmo aliʼna kaveliguve. Inagi eʼna atamoʼmo leno saga lisiya ofalinimo huge Gotiʼeʼmo magoke laipamo kalisuna ofalinimo huge huguve, huno ha paiʼniye.

⁹ Soloʼmo ani gemo afitenoʼaeʼmo Samiyoʼmo ataleno aino afe nelegenoʼaeʼmo Gotiʼa alu aipa agesamo amiʼniye. Muki ani alagena kavaʼmo ani afinaʼmo afole aiʼnigeno ageʼniye.

¹⁰ Soloʼe aliʼyaʼamo neʼaliya vekaʼeʼmo Goti aise avefiʼmo uʼnaʼageʼa mago Gotitegati gemo aliniʼeʼa aeʼa hakalo nehaya vayaʼe Soloʼeʼmo fotu huʼnageno Goti Aunemeʼamoʼmo agaeteʼmo emineno maiʼnigenoʼaeʼmo Goti geʼamo aeno hakalo huno hapa paiʼniye.

¹¹ Agaemo akeyaʼvilagamo ageʼnaya vayaʼmogimo ageʼnayana Gotitegati gemo aliniʼeʼa aeʼa hakalo nehaya vayaʼeʼmo magokepiʼmo ani agufa kavaʼmo huʼnigeʼa ageteʼapaeʼmo apakaiʼapimo ani ge huʼa ge huʼa apafi geʼnae. Kisi ve mafaʼneleʼmo na agufa kavaʼmo afole aiʼniye. Soloʼmo polofeti vayapiʼmo maiʼnifiye, huʼa huʼnae.

¹² Mago ani kote vekamoʼmo geʼapileʼmo ina ge huno aeno atagaina hunoʼaeʼmo, Nehayaʼmonanafa afoʼapimoʼmo ina laʼae, huno huʼniye. Ani kavaʼmo afole aiʼniyaʼmofeʼmo asole vayaʼmogi huʼapaeʼmo, Soloʼmo polofeti vayapiʼmo maiʼnifiye, huʼa huge huge huʼa maiʼnae.

¹³ Soloʼmo ani polofeti agufa kavaʼmo huno hano huteno aise avefiʼmo uno haiʼniye.

¹⁴ Henagaʼamo Soloʼmo avuʼamoʼeʼmo fotu huʼnaʼagenoʼaeʼmo avuʼamoʼmo agaeʼe aliʼyaʼamo neʼaliya vekaʼeʼmo ina ge huno ge huno anafi geʼniye. Lanakaemo haiyaʼalegamo uʼnaʼae, huno anafigeʼnigeno Soloʼmo ha painoʼaeʼmo, Laʼagaemo utaʼa noki anagafeʼmo kahauya huʼnoʼae. Kahauya hume hume unoʼaʼmonanafa oʼapakeʼnoʼaʼmofeʼmo Samiyotegamo uʼnoʼae, huno ha paiʼniye.

¹⁵ Inagi Solo avuʼamoʼmo hunoʼaeʼmo, Kahaoke hovanagi Samiyoʼmo kagaefeʼmo huʼniya gemo naha paiyo.

¹⁶ Soloʼmo hunoʼaeʼmo, Apakaemo noki anagaʼmo ago apakeʼa apavaleʼnae, huno huno afole aino laʼaha paiʼniye, huno ha paiʼniyaʼmonanafa kini vekamo maigane, huno huʼniya gemo ha opaiʼniye.

Soloʼmo kini vekamo hamaleʼniya gemae

¹⁷ Inagi Samiyoʼmo muki Isaleli vayaʼmo eʼa Misipa taonifiʼmo Ala kava neʼmo aulagaleʼmo aliʼa anupa hisayafeʼmo keya aeno ge huʼniye.

¹⁸ Apakaemo eʼa aliʼa anupa huʼa maiʼnagenoʼaeʼmo ani gemo hapa painoʼaeʼmo, Ala kava neʼmo Isaleli vayaʼmogita Gotitimoʼmo hunoʼaeʼmo, Nagaemo Isipi kotegatiʼmo lapavaleliʼna eʼnove. Nagaemo Isipi vayaʼai apayapatiʼe muki kana yaʼmo lapamiʼnaya gamani vayaʼai apayapatiʼeʼmo lapakufamo aliʼna katiʼna lapateʼnove.

¹⁹ Aliʼna katiʼna lapateʼnovaʼmonanafa hemenimo lapakaemo muki kana yatapifatiʼe hanageke yapatiʼeʼmo lapakufamo alino katino lapateʼniya Gotitapimoʼmo lapakameʼyamo amiʼnae. Lapakaemo agaefeʼmo hutapaeʼmo, Haʼao, yagaino latesiya kini vekamo avaleka lamiyo, hutapa ha paiʼnae. Inagi hemenimo lapakaemo Ala kava neʼmo aulagaleʼmo nofi vayatapiʼe afamo anagatapiʼeʼmo etapa he tiyo, huno huʼniye.

²⁰ Samiyoʼmo ani geletiʼmo muki Isaleli nofi vayaʼmo aino apavayu hulineno haopaleʼmo apateʼnigeno Ala kava neʼmoʼa Menisameni nofi vayaʼmo lekana paino apateʼniye.

²¹ Agaemo Menisameni nofi vayaʼmo haopaleʼmo aino apavayu hulineno apateʼnigeno Matali afamo anagaʼmo lekana paino apateʼniye. Ani afamo anagapatiʼmo Soloʼmo Kisi mafaʼnemo lekana paino ateʼniye. Agaefeʼmo apakaemo kahauya huʼnayaʼmonanafa oʼageʼnae.

²² Oʼageʼnayaʼmofeʼmo apakaemo Ala kava nefeʼmo ina ge huʼa ge huʼa afi geʼnae, Ani vekamo manileʼmo eʼnifi oʼmeʼniye, huʼa afi geʼnae. Ala kava neʼmoʼa geʼapileʼmo aeno atagaina hunoʼaeʼmo, Agaemo kagemi yatapimo folagapiʼmo fala kino maiʼniye.

²³ Inagi apakaemo ani gemo afiteʼapaeʼmo nagu nagu huʼa uʼa Soloʼmo avaleliʼa eʼnae. Agaemo apakaeʼeʼmo magokepiʼmo he tino maiʼnigeʼapaeʼmo muki vayaʼmogimo ageʼnayana muki vayaʼmo aginaʼaleʼmo uʼa haiʼa maiʼnageno agenopaʼamoʼmo ago alino apaka seʼniye.

²⁴ Ageʼnagenoʼaeʼmo Samiyoʼmo hapa painoʼaeʼmo, Ani vekamo Ala kava neʼmoʼa lekana paino ateʼniyanagi ageyo. Mago vekamoʼmo agaeʼeʼmo magoke aiyaya osuʼniye, huno hapa paiʼnigeʼa muki vayaʼmogimo alopa gefatiʼmo huʼapaeʼmo, ani kini vekatimoʼmo muki afinaʼaeʼmo alagi maige maige huno maino, huʼa huʼnae.

²⁵ Inagi Samiyoʼmo muki vayaʼmogimo kini vekalegamo hisaya kavafenagi kini vekamoʼmo muki vayaʼaitegamo muki hisiya kavafenagi huno ge huno haleno hapa paiʼniye. Hapa paiteno mago mukufiʼmo ani gemo avoʼmo kaeteno Ala kava neʼmo mono nopiʼmo maleʼniye. Maleteno muki vayaʼmo noʼapilegamo alino apateʼnigeʼa uʼnae.

²⁶ Soloʼmo noʼalegamo Gimeya taonifilagamo uʼniye. Gotiʼa kame hisayafeʼmo mago koli nosaya vayaʼmogi apaipa apakesamo alino he tino apateʼnigeʼapaeʼmo apakaemo Soloʼeʼmo magokepiʼmo uʼnae.

²⁷ Uʼnayaʼmonanafa mago faipa vayaʼmogimo huʼapaeʼmo, Haiya agufa kavaʼmo huno lagufamo alino katino lategaiye, huʼa huʼnae. Huteʼa apakaemo huʼapaeʼmo, Ina agufa vekae, huʼa apakesamo afiteʼa mago yaʼmo fikumo oʼamiʼnae. Oʼamiʼnayaʼmonanafa Soloʼmo mago gemo osuʼniye.