1 Samiyo 1 - The Keyagana NT and 25 OT books

Elakenaʼe afamo anagaʼaʼeʼmo mono hisayafeʼmo Sailo taonifiʼmo uʼnaya gemae

¹ Mago vekamo maiʼniya vekamo agiʼamo Elakenaʼae. Agaemo Ifalemi nofi vayapati vekamogeno Ifalemi aveleʼmo Lema taonifiʼmo maiʼniye. Elakenaʼmo Yelohami mafaʼnemo maiʼnigeno Yelohamiʼmo Ilaihu mafaʼnemo maiʼnigeno Ilaihuʼmo Tohu mafaʼnemo maiʼnigeno Tohuʼmo Yufi mafaʼnemo maiʼniye.

² Elakenaʼmo lole atalaʼmo Hanaʼe Penainaʼeʼmo aliʼniye. Penainaʼmo mafaʼnemo alino apateʼniyaʼmonanafa Hanaʼmo mafaʼnemo alino oʼapateʼniye.

³ Elakenaʼmo muki kafugaʼae kafugaʼaeʼmo taoniʼafatiʼmo ataleno Sailo taonifiʼmo uno asole vayaʼaiteʼmo neʼyagaiya Ala kava netefeʼmo mono huteno ofalinimo huʼniye. Lole vekalaʼmo Hafaniʼe Finiyasiʼeʼmo Ilai mafaʼnelaʼmoganimo Ala kava netefeʼmo monoʼmo huʼana neʼapataʼa vekalaʼmo ani taonifiʼmo maiʼnaʼae.

⁴ Elakenaʼmo ofalinimo hisiya afinaʼmo afole aiʼnigenoʼaeʼmo agaemo ofalini ameʼamo alino fako huno magoke magoke huno aʼamo Penainaʼmo amige mafaʼne anagaʼamo apamige huʼniye.

⁵ Huʼniyaʼmonanafa Elakenaʼmo Hanafeʼmo hauʼniyaʼmofeʼmo lole agufa yaʼmo Hanaʼmo amiʼniye. Ala kava neʼmoʼa Hana aipamo alino akani maleʼnigeno mafaʼnemo alino oʼateʼniyaʼmonanafa Elakenaʼmo Hanafeʼmo lusi kava huno hauʼniye.

⁶ Ala kava neʼmoʼa Hana aipamo alino akani maleʼniyaʼmofeʼmo Penainaʼmo Hanaʼmo aipamoʼmo kana hisiya kavaʼmo alisiyafeʼmo lusi kava huno huʼniye.

⁷ Inagi Penainaʼmo muki kafugaʼae kafugaʼaeʼmo Ala kava neʼmo mono notegamo uno haiʼniya afinaʼmo ani agufa hosu kavaʼmo Hanategamo huʼnigenoʼaeʼmo Hanaʼmo alino amalagino aviʼyaʼmo huteno neʼyaʼmo oʼneʼniye.

Hanaʼmo Ala kava nefeʼmo hunoʼaeʼmo, Mago ve mafaʼnemo namisanageʼna aliʼyakamo alisiyafeʼmo kamiguve, huno huʼniya gemae

⁸ Anauʼamoʼmo Elakenaʼmo Hanafeʼmo hunoʼaeʼmo, Hanao, huno, Na agufa kavaʼmo higekaeʼmo aviʼyaʼmo huteka neʼyaʼmo oʼneʼnane. Na kava higekaeʼmo kaipamoʼmo kana nehiye. Nagaemo kagaetefeʼmo naya loleʼa ve mafaʼnemo aeʼna oʼapaka seʼnofiye, huno ha paige ha paige huno maiʼniye.

⁹ Inagi apakaemo Sailo taonifiʼmo maiʼneʼapaeʼmo neʼyaʼmo ago neteʼapaeʼmo Hanaʼmo he tino uno Ala kava neʼmo mono noʼamo haopaleʼmo avaʼyi huʼnigeno mono huno neʼapateya vekamo Ilaiʼmo Ala kava neʼmo seli mono noʼmo kipateʼmo siyaʼaleʼmo fai maiʼniye.

¹⁰ Hanaʼmo ani kana yaʼmo aliteno lusi kava huno alino amalagino aviʼyaʼmo nehunoʼaeʼmo Ala kava nefeʼmo nunumuʼmo huʼniye.

¹¹ Ani afinaʼmo agaemo mago alagi lokiya polomasi gemo ina ge huno Ala kava nefeʼmo hunoʼaeʼmo, O Ala kava nene, huʼna, Muki vayaʼaiteʼmo yagaiʼnane. Kagaemo aliʼyakamo neʼaluva akanomo kana aliʼnova kavafeʼmo kagesamo afiteka nagaefeʼmo kage kanika oʼnataleka nagaefeʼmo kagesamo afiteka aliʼyakamo neʼaluva a kanomo mago ve mafaʼnemo namisanageʼnaeʼmo inagi agaemo kamisugeno aliʼyakamo alime alime uno faligiye. Apakaemo ayokaʼmo lagauʼa oʼategae, huno huʼniye.

¹² Agaemo nunumuʼmo nehigenoʼaeʼmo Ilaiʼa Hana avayaleʼmo ageno maiʼniye.

¹³ Hanaʼmo aipa agesaʼafikeʼmo nunumuʼmo huʼnigeno Ilaiʼa agaemo ageyana avayamoʼmo kanage kanage huʼnigeno ageʼniyaʼmonanafa Hanaʼa ge huʼniya geʼamo oʼafiʼniye. Oʼafiʼniyaʼmofeʼmo Ilaiʼmo agesamo afinoʼaeʼmo Hanaʼa aniʼmo neteno negi nagi nehiye, huno hutenoʼaeʼmo,

¹⁴ Kagaemo hainu afinaʼmo negi nagi kavakamo atalegane. Lokiya aniʼmo alika atalo, huno huʼnigeno

¹⁵ Hanaʼmo geʼaleʼmo aeno atagaina hunoʼaeʼmo, Ala vekae, huno, nagaemo negi nagi nosuve. Nagaemo nofi alagafati aniʼmo oʼnege miya aniʼmo oʼnege huʼnove. Haʼao, naipamoʼmo kana nehiyaʼmofeʼmo Ala kave nefeʼmo kana aliʼnova yaʼnimo aeʼna hakalo huʼna nunumuʼmo nehuve.

¹⁶ Kagaemo nagaefeʼmo mago hosu a kanomae, huka kagesamo oʼafiyo. Nagaemo lusi kava huʼna aliʼna namalagiʼnogenoʼaeʼmo naipa nagesamoʼmo lusi kana huʼniyaʼmofeʼmo nagaemo nunumuʼmo nehugekaeʼmo ani kavaʼnimo nageʼnane, huno ha paiʼniye.

¹⁷ Inagi Ilaiʼmo ha painoʼaeʼmo, Kaipamoʼmo falu huʼninageka uvo. Isaleli vayaʼmogita Gotitimoʼmo ani ge huka afigeʼnana yaʼmo afaʼa kamino, huno ha paiʼnigeno

¹⁸ agaemo hunoʼaeʼmo, Nagaemo aliʼyakamo neʼaluva aʼmo maiʼnove. Fikumo naha maeka namisanafeʼmo nahauʼniye, huno ha paiteno ataleno uʼniye. Agaemo neʼyaʼmo netenoʼaeʼmo henagaʼamo magoʼe huno aipamoʼmo kana osuʼniye.

Hanaʼmo ve mafaʼnemo alino atetenoʼaeʼmo Gotina amiʼniya gemae

¹⁹ Inagi Elakenaʼe afamo anagaʼaʼeʼmo Sailo taonifiʼmo havaeteʼapaeʼmo netepiʼmo he tiʼa Ala kava nefeʼmo mono huteʼapaeʼmo halate noʼapilegamo Lema taonifiʼmo uʼnae. Elakenaʼmo aʼaʼeʼmo lokaeno havaeʼnigeno Ala kava neʼmoʼa Hanaʼmo nunumuʼmo huʼniya geeʼmo agesamo afiʼniye.

²⁰ Mago afinaʼmo utegeno Hanaʼa aipaguʼeʼmo maiteno ve mafaʼnemo alino ateʼniye. Agaemo hunoʼaeʼmo, Nagaemo Ala kava nefeʼmo namiyo, huʼna ge huʼna afigeʼnovaʼmofeʼmo agiʼamo Samiyoʼae, huʼna ategauve. Samiyoʼae agimo aepaʼamo Gotiʼa geʼnimo afiʼniye.

²¹ Henagaʼamo Elakenaʼe afamo anagaʼaʼeʼmo muki kafugaʼae kafugaʼaeʼmo nehaya agufa kavaʼmo huʼa Ala kava netefeʼmo ofalinimo huge polomasi geʼamo akame huge hisayafeʼmo Sailo taonifiʼmo uʼnae.

²² Uʼnayaʼmonanafa Hanaʼa apakaeʼeʼmo oʼuʼniye. Agaemo anauʼamofeʼmo ha painoʼaeʼmo, Mafaʼnemo nuʼmo mosisigeʼnaeʼmo avaleliʼna visugeno Ala kava neʼmo aulagaleʼmo he tino muki afinaʼmo mono aliʼyaʼmo alige alige huno maigiye, huno ha paiʼniye.

²³ Elakenaʼmo hunoʼaeʼmo, Kanalene, huno huteno, Alagepa kavaʼmo haneʼniye, huka kagesamo afiʼnisanana ani kavaʼmo huvo. Nuʼmo mosisiyafeʼmo agava maiyo. Ateʼnegenoʼa Ala kava neʼmoʼa geʼamo alino afole aino ateno, huno ha paiʼniye. Inagi Hanaʼmo noʼapileʼmo maiʼneno nuʼmo amime amime uʼnigenoʼaeʼmo nuʼmo mosiʼniye.

²⁴ Mafaʼnemo nuʼmo ago mosiʼniya afinaʼmo Hanaʼmo avalelino Sailo taonifiʼmo Ala kava neʼmo mono nopiʼmo uʼniye. Agaemo ofalinimo hisiya yaʼeʼmo alinino uʼniya yaʼmo ve pulumakagi naya loleʼa kilo falaovagi magoke kuʼmo mememo agufaletiʼmo alo huʼniya kupiʼmo nofi alagafati aniʼmo lakiʼniya kunagi huno alinino uʼniye. Mafaʼnemo alagi neya mafaʼnemo maiʼniye.

²⁵ Apakaemo uʼa avaʼyi huteʼapaeʼmo magoke pulumakamo amagiteʼa ani mafaʼnemo avaleliʼa Ilaitegamo uʼnae.

²⁶ Hanaʼmo Ilaifeʼmo hunoʼaeʼmo, Ala kava vekae, huʼna, alagi lama gemo huve. Nagaemo mani a kanomoʼnamo manileʼmo eʼna kaulagaleʼmo he tiʼneʼna Ala kava nefeʼmo nunumuʼmo huʼnove.

²⁷ Nagaemo huʼnaeʼmo, Mago ve mafaʼnemo namiyo, huʼna ge huʼna afi geʼnogenoʼaeʼmo afitenoʼaeʼmo mani mafaʼnemo namiʼniye.

²⁸ Namiʼniyaʼmofeʼmo nagaemo agaemo Ala kava neʼmo amiʼnove. Ala kava neʼmo aliʼyaʼamo alime alime uno faligiye, huno ha paiʼniye. Inagi apakaemo anileʼmo Ala kava nefeʼmo mono huʼnae.