1 Pita 5 - The Keyagana NT and 25 OT books

Goti mafaʼneʼaiteʼmo yagaiʼa neʼapateya vayatama vayaʼaifeʼmo huʼniya gemae

¹ Nagaemo lapakaeʼeʼmo magokepi lokaeʼa maiʼneʼa yagaiʼa nelapataya vayatama vayaʼaifeʼmo gemo hapa paigesuve. Nagaeʼeʼmo yagaiʼna neʼapatova vayatama vekamo maiʼnove. Naulagafatiʼmo Kalaisiʼa ageʼnogeno kana yaʼmo aliʼnigeʼna ageteʼnaeʼmo aeʼna hakalo huʼna hapa nepauva vekamo maiʼnovanageʼna Kalaisiʼa ha le konali yaʼamo afole aisigeʼnaeʼmo hetamaʼnimo aliguve. Lapao ke hovanagi,

² Gotiʼa sipisipi anaga vayaʼamo apavaleno lapayapiʼmo lapamiʼniya vayaʼaleʼmo alagepa huta yagaitapa apateyo. Lapakaemo ani aliʼyaʼmo alisayafeʼmo olapauʼnisigetapa alisayana kanale osugiye. Lapauʼnisigetapaekeʼmo ani aliʼyaʼmo aliyo. Hosu monimo alisayafeʼmo ani aliʼyaʼmo oʼalitapa lapaipamoʼmo hatu nehinagetapa aliʼyaʼmo aliyo.

³ Gotiʼa apavaleno lapayapiʼmo lapamiʼniya sipisipileʼmo yagaitapa neʼapatetapaeʼmo alita afepi oʼapatetapa lapakame hisayafeʼmo apakaetegamo alagepa kavaʼageʼmo hiyo.

⁴ Hogote vekamo sipisipileʼmo yagaino neʼapateya kava vekamo emineno afole aisigetapaeʼmo ha le konali yatapimo alagi hano osisiya hetamatapimo aligae.

Apaiyafiʼmo maiyo, huno huʼniya gemae

⁵ Neya vayaʼmogitapae, huʼna, vayatama vayaʼai apaiyafiʼmo maiʼnetapa geʼapimo afiyo. He, muki vayaʼamogitapae, huʼna, ina agufa vayaʼmo maiʼnone, nehutapa aliʼyaʼmo neʼaliya vayaʼmogimo aliʼa neʼvaiya kukenamo aliʼa neʼvaiya kava hutapa konagatapimogi apaiyafiʼmo maiʼnetapa geʼapimo afiyo. Na kava nehiyaʼmofeʼmae. Gotiʼa ala vayaʼmo maiʼnone, huʼa apakesamo neʼafiya vayaʼaifeʼmo kame huno neʼapateyaʼmonanafa ina agufa vayaʼmo maiʼnone, huʼa apakesamo neʼafiya vayaʼaina fiku hapa maeno neʼapamiye.

⁶ Ani kavaʼmo nehiyaʼmofeʼmo lapakufamo alino afepi lapatesigetapaeʼmo Gotiʼa lokiya vekamo aiya afeʼalumelaga maiʼnigenoʼao hauʼnisiya afinaʼmo alino asaga huno lapateno.

⁷ Agaemo lapakaefeʼmo hauʼnigeno alagepa huno yagaino nelapateyaʼmofeʼmo lapakesa alaʼamo neʼafitapa lapausoli hisaya kavatapimo alita Gotiʼmo amiyo.

⁸ Kametapimo Sataniʼa kaekae nehiya laiyonigana huno maiʼnenoʼaeʼmo vayaʼmo hapaesiyafeʼmo umenitata nehiyanagi lapau maiʼmai osutapa alagepa huta kava yagaitapa maiyo.

⁹ Gotifekeʼmo magoʼe hutapa lapakesamo afita fatago nehutapaeʼmo kame hutapa ateyo. Ago afiʼnayana lapakaemo kana yaʼmo neʼaliya kava huʼa muki ma mopafi neʼmaiya konagatapimogimo kana yaʼmo neʼaliyanagi he tita lokiya vaitapa maiyo.

¹⁰ Muki yaʼamo fikumo lapa maeno nelapamiya Gotiʼa Yesu Kalaisitetiʼmo alagi hanege hanege huno hanesiya ha le konali yaʼamo alisunafeʼmo lagaefeʼmo keya aeno ge huʼniye. Inagi lapakaemo aise afinaʼmo kana yaʼmo alisagenoʼaeʼmo agaemo alagi alino alagepa huno lapatege alino lokiya vaino lapatege lokiyaʼamo alino lapamige agaiʼaleʼmo faino lapatege hugiye.

¹¹ Agaemo muki afinaʼae afinaʼaeʼmo hale konali yaʼmo alige yagaino apatege huno maige maige huno maino. He, lama ge.

¹² Nagesamo afuvana Silivenisiʼa kanale konagatimoʼmo naha maeʼnigeʼna mani aise avoʼmo nekaove. Aliʼna lokiya vaiʼna lapatesuva agufa gemo huʼna lapa paiʼnaeʼmo, ago afiʼnovana Gotiʼa fikumo hapa maeno neʼapamiya kavafeʼmo ava gemo huʼnaeʼmo, lama gemo haneʼniye, huʼna mani gemo avoʼmo kaeʼna lapa nepauve. Ani kavatefekeʼmo lapakesamo afita fatago huta atafauta alagi hutapa maiyo.

¹³ Gotiʼa ago lekana paino lapateʼniya kava huno Mamiloni kotega siosi vayaʼmo lekana paino apateʼniye. Apakaemo ge lapamamaeʼnae. Mafaʼneʼnimo Makiʼeʼmo ge lapamamaeʼniye.

¹⁴ Konagatapieʼmo lapau lapayamopafiʼmo lapauʼninagetapa ge apamamaetapa hapaeta neyo. Kalaisi Yesupiʼmo maiʼnaya vayaʼmogitapae, huʼna, lapaipamoʼmo falu hino.