Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Pita 4 - The Keyagana NT and 25 OT books

1 Kalaisiʼa lagaetefeʼmo kana yaʼmo aliteno agufafatiʼmo lusi kava huno agafu kiʼniye. Lapakaemo ani agufa kava hutapa kana yaʼmo alisayafeʼmo lapakesamo afiʼnetapaeʼmo kame hiyo. Apakufafiʼmo kana yaʼmo aliʼnaya vayaʼmogi hosu kavaʼapimo ataleʼnayaʼmofeʼmo ani kavafeʼmo lapakesamo afitetapaeʼmo kame hiyo.

2 Apakaemo hosu kavaʼapimo ago ataleʼnayaʼmofeʼmo ma mopafiʼmo maime maime neʼeʼapaeʼmo hapaʼye nehiya kavaʼmo ataleʼa Gotiʼa hauʼniya kavakeʼmo akame hisaya kavaʼmo haneʼniye.

3 Lagaemo hogoteta malaga vayaʼmogi hapauʼniya kavakeʼmo alagi huʼnonaʼmonanafa hemenimo magoʼe huta osugune. Hogoteta kumai kavaʼmo hisunafeʼmo apayate alige amega lagufamoʼmo hauʼniya kavaʼmo huge aniʼmo neteta negi nagi kavaʼmo huge ogefagemo huge aniʼmo neteta hosu kigi yokalo gemo huge hutetaeʼmo aigofe gotitefeʼmo hosu monoʼmo huʼnone.

4 Hemenimo lapakaemo Satani vayaʼeʼmo ani agufa hosu kavaʼmo afela vayaʼai kavaʼmo nosayaʼmofeʼmo Satani vayaʼmogi hapau aiteʼa huʼa faipa huʼa nelapatae.

5 Apakaemo Gotiʼa alo huno maiʼniyanageno alino fako huno apatesiya vekamo aulagaleʼmo faliʼnaya vayaʼe afaʼa neʼmaiya vayaʼeʼmo he tisageno hosu kavaʼapieʼmo ge huno apafi gesigeʼapaeʼmo ina kava huʼnove, ina kava huʼnove, huʼa aeʼa hakalo huʼa ha paigae.

6 Ani kavatefeʼmo faliʼnaya vayaʼaifeʼmo alagepa faigoko geʼamo ago aeʼa hakalo huʼa hapa paiʼnae. Apakaemo ma mopafiʼmo maiʼnageʼapaeʼmo, hosu kavaʼmo huʼnae, huʼa aliʼa fako huʼa apateʼnayaʼmonanafa apauneʼapamepatiʼmo Goti geʼamo akame hisayafeʼmo alagepa faigoko geʼamo afiʼnae.


Goti aliʼyaʼamo aliyo, huno huʼniya gemae

7 Muki yaʼamo alagi hano hisiya afinaʼmo ago hogo nehiyaʼmofeʼmo nunumuʼmo nehutapaeʼmo lapakufaleʼmo alagepa hutapa yagaita ateʼnetapa lapaipamo alo hiyo.

8 Hogote kavaʼmo hutapa konagatapieʼmo lusi kava huno lapau lapayamopafiʼmo lapaino. Konagatapieʼmo lapau lapayamopafiʼmo nelapaiya kavaʼmoʼa hosu kavaʼapimo aeno ati kaeno atalegaiyaʼmofeʼmae.

9 Nata vayaʼmo notapileʼmo esagetapaeʼmo ge ohapauge lapaipa kafa ohapaege hutetapa alagepa hutapa neʼyakeʼmo apamiteta yagaitapa apateyo.

10 Kava vekamo aepa vekatapimo yateʼmo neʼyagaiya kava hutapa asole yaʼmo fikumo lapa maeno lapamiʼniya yaʼmo alita fako hutapa apamigeʼapa anonaleʼmo lapamiyo.

11 Goti geʼamo aeʼa hakalo huʼa hapa nepaiya vayaʼmogi Goti avayafati gemo aliʼnayaʼmofeʼmo lokiya vaiʼa aeʼa hakalo huʼa hapa paigae. Hapa neʼmaeya vayaʼmogi Gotiʼa neʼapamiya lokiyaʼaletiʼmo hapa maegeʼapao vayaʼmogimo Yesu Kalaisitetiʼmo Goti agiʼaleʼmo aliʼa asaga huʼa ategae. Gotiʼa ala agiʼamo hanege yagaino neʼapateya lokiyaʼamo hanege huno muki afinaʼmo alagi hanege hanege huno haneno. He, lama ge.


Kalaisi agiʼalefeʼmo kana yaʼmo alisaya kavafeʼmo huʼniya gemae

12 Nahauʼniya vayaʼnimogitapae, huʼna, Kana yaʼmo atagana huno lapamalageka nehisigetapaeʼmo, aeto agufa kavaʼmo lagaetegamo afole neʼaiye, hutetapa lapau oʼaiyo.

13 Kana yaʼmo aliʼniya kava huno kana yaʼmo neʼalitapa agaeʼeʼmo magoke agufa kana yaʼmo aliʼnayaʼmofeʼmo lapamogaga aiyo. Kalaisi ha le konali yaʼamo afole aisiya afinaʼmo lusi kava hutapa lapamogaga aigayaʼmofeʼmo magoʼe hutapa lapamogaga aiyo.

14 Lapakaemo Kalaisiʼmo akame nehayaʼmofeʼmo ge nelapausayana Goti aulagaleʼmo alagepa hutapa maiʼnayaʼmofeʼmo afaʼa lapamogaga aigae. Goti Aunemeʼamo ha le konali Aunemeʼamoʼmo lapakaeteʼmo alagi maiʼniyaʼmofeʼmae. Apakaemo Gotifeʼmo huʼa faipa huʼa neʼatagetapaeʼmo lapakaemo ala agiʼamo neʼamiye.

15 Fiku yanagetapa vayaʼmo nehapaya vayaʼeʼmofi kumayaʼmo neʼaliya vayaʼeʼmofi gamani vayaʼai geʼapimo amagiʼa neʼatalaya vayaʼeʼmofi aliʼyaʼapimo ohaneʼnigeʼa himuʼnamu gemo nehaya vayaʼeʼmofi hutapa maiʼnayaʼmofeʼmo kana yaʼmo aligae.

16 Aligayaʼmonanafa Kalisitini vayaʼmo maiʼnayaʼmofeʼmo kana yaʼmo alisayana lapavagage osutapa ani kavatefeʼmo Goti agiʼaleʼmo alita asaga hiyo.

17 Gotiʼa agoti huno apateteno kayoʼmo apamisiya afinaʼmo ago afole aiʼniyaʼmofeʼmo afamo anagaʼaleʼmo aepa faigiye. Gotiʼa lagaetegamo ago aepa faino agoti huno nelatesiyana alagepa faigoko geʼamo akame nosaya vayaʼmogi atupa afinaʼapimo haiya kava huʼa maigae. Vaehae, huʼna,

18 Ani kavatefeʼmo Goti mukufi gemoʼmo hunoʼaeʼmo, Gotiʼa fatago vayaʼai apakufamo alino katino apatesigeʼa alagi alagepa huʼa maisayafeʼmo uʼa haiʼa hogoʼa metaleʼnayana mono nosaya vayaʼe hosu kavaʼmo nehaya vayaʼeʼmo vaehae, huʼna, haiya kava huʼa maigae.

19 Inagi Gotiʼa hauʼniyanageno, kana yaʼmo aligae, huno nehisaya vayaʼmo alagepa kavaʼmo huteʼa Gotiʼa lapakupi mafaʼneleʼmo yagaino apatesiyafeʼmo alita ayapiʼmo maleyo. Agaemo muki yaʼamo alo hu maleʼniya vekamo huguve, huno hu maleʼniya geʼamo alagi akame nehiya vekamo maiʼniyaʼmofeʼmo lapakupi mafaʼnemo alita ayapiʼmo maleyo.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ