Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Pita 3 - The Keyagana NT and 25 OT books


Muki ve yalavemogitapamo mani kavaʼmo hiyo, huno huʼniya gemae

1-2 Aʼneʼapimogitapae, huʼna, lapakaemo ani kavaʼmo hutapa anautapimogi apaiyafiʼmo maiʼnetapa geʼapimo afiyo. Lapakaemo ge osisageʼa Goti geʼamo noʼafiya anautapimogimo lapaketeʼapaeʼmo, apauneʼapameʼmoʼa hosu kavafeʼmo ohapauʼnigeʼa Gotifeʼmo koli nehae, huʼa hisagetapaeʼmo alagepa kavatapiletiʼmo Gotitegamo apavalelitapa egae.

3 Alagepa konali yatapimo amega lapakufaleʼmo ohaneno. Konali yatapimo lapayokatetiʼmo nehaya kavatapimo ohanege lapakufaleʼmo neʼaliya konali yatapimo ohanege kukena yaʼmo neʼvaiya kavaʼmo ohanege hisigeno lapaipafikeʼmo fala kino haneno.

4 Lapakaetegamo hosu kavaʼmo afole aisigetapaeʼmo yuna lapaipa falu lapaipamo kaligenoʼao, konali yakana huno hanege hanege huno haneno. Gotiʼa ani kavafeʼmo hunoʼaeʼmo, alagi hogote alagepa kavaʼmo haneʼniye, huteno amuse nehiye.

5 Akeyaʼvilaga apaote aʼnemogimo Gotifeʼmo aliʼa amufa amiʼnaya aʼnemogi anauʼapimogi apaiyafiʼmo maiʼneʼapaeʼmo ani agufa konali yaʼapimo vaiʼa aliʼnae.

6 Selaʼa ani kavaʼmo huno Emalehamu aiyafiʼmo maiʼneno geʼamo afitenoʼaeʼmo, kava vekaʼnimae, huno huʼniye. Lapakaemo atete osutapa alagepa kavaʼmo hutapa maiʼnisayana Sela aʼmafaʼneʼamo maiʼnae.

7 Anauʼapimogitapae, huʼna, aʼnetapieʼmo hutapaeʼmo, apakufamo lokiya oʼvaiʼniye, hutapa lapakesamo afitetapa apakaeʼeʼmo alagepa hutapa magokepi lokaeta maiyo. Gotiʼa maige maige hutapa maisaya yaʼmo fikumo lapa maeno lapamisiya kava huno aʼnetapiʼeʼmo apamigiyaʼmofeʼmo apakiʼapileʼmo alita asaga hutapa apateyo. Fiku yanageno nunumuʼmo hisaya getapimoʼmo alagepa huno afole oʼaigiyanagi mani kavaʼmo hiyo.

8 Nagaemo atupa geʼnimo lapa paiʼnaeʼmo, magoke lapaipa lapakesamo alitetapa magoke agufa lapaipamo kalitapa maiyo. Konagatapieʼmo afalu afalugana agufa kavaʼmo hutapa lapau lapayamopafiʼmo lapaino. Lapau hutapa apateyo. Vayaʼaitegamo himuʼnamu kavaʼmo osutapa vase vase kavaʼmo hiyo.

9 Inagi mago vayaʼmogimo lapakaetegamo hosu kavaʼmo nehisagetapaeʼmo anonaʼapilefeʼmo hosu kavaʼmo osiyo. Mago vayaʼmogimo lifana huʼa lapatesagetapaeʼmo anonaʼapileʼmo alita auleta apateyo. Gotiʼa ani kavaʼmo hisagenoʼaeʼmo alino auleno lapatesiyafeʼmo keya aeno ge huʼniye.

10 Ani kavatefeʼmo Goti mukufi gemoʼmo hunoʼaeʼmo, Alagepa huta maiʼneta lamogaga aisunafeʼmo lahauʼniye, huʼa nehisaya vayaʼmogimo ani agufa kavaʼmo huʼa maisayafeʼmo hosu gemo osuge aigofe gemo osuge huteʼa alagepa huʼa yagaiyo.

11 Hosu kavaʼmo maiʼa halove huʼa ataleʼa alagepa kavakeʼmo hiyo. Alagepa huʼa magokepi lokaeʼa maisaya kavafeʼmo kahauya huʼa ageʼa atafaiyo.

12 Na kava nehiyaʼmofeʼmae. Ala kava neʼmoʼa alagepa kavaʼmo nehaya vayaʼmo aulu hapaeno apaketenoʼaeʼmo agesamo halo aiʼnigeno nunumuʼmo nehaya geʼapimo neʼafiye. Geʼapimo neʼafiyaʼmonanafa hosu kavaʼmo nehaya vayaʼaifeʼmo hosu augosamo kalino neʼapate, huno huʼniye.

13 Lapakaemo alagepa kavaʼmo hisayafeʼmo lapayamukiki nehisageʼapaeʼmo ina lagimo lapakaetegamo hosu kavaʼmo hugae.

14 Osugayaʼmonanafa alagepa kavaʼmo nehisagenoʼaeʼmo mago vekamoʼmo lapakaetegamo hosu kavaʼmo nehisiyana Goti aulagaleʼmo alagepa huta maiʼnayanagetapa afaʼa lapamogaga aigae. Mago geletiʼmo huʼa lapausoli hisaya gemo nehisagetapaeʼmo lapamoʼya aitetapa koli osiyo.

15 Lapamoʼya oʼaitapa Gotifekeʼmo lapaipafiʼmo koli hutetapaeʼmo, Ala kava netie, hutapa lapaipafiʼmo hiyo. Vayaʼmogimo lapakaefeʼmo huʼapaeʼmo, na kava higetapaeʼmo Gotifeʼmo agava maiʼnetapa lapavayagunagu nehae, huʼa lapafi gesagetapaeʼmo geʼapileʼmo aeta atagaina hutapa hapa paisayafeʼmo muki afinaʼmo alo hutapa maiyo. Himuʼnamu gemo osutapa Gotifekeʼmo koli hutetapa alagepa gemo hutapa hapa paiyo.

16 Yuʼilaga mafaʼnemoʼmo hosu kavaʼmo nehae, huno osisiyafeʼmo alagepa kavaʼmo hiyo. Alagepa kavaʼmo nehisageʼapaeʼmo Kalaisiʼmo akame nehaya alagepa kavatapieʼmo huʼa faipa huʼa nelapatesaya vayaʼmogimo lapaketeʼapaeʼmo apavagage hugiye.

17 Gotiʼa hauʼninagenoʼaeʼmo, kana yaʼmo aligae, huno hisigenoʼaeʼmo alagepa kavaʼmo huʼnayaʼmofeʼmo kana yaʼmo alisayana kanale hugiyaʼmonanafa hosu kavatapiletiʼmo alisayana hosugiye.

18 Ani kavatefeʼmo fatago vekamo Kalaisiʼa fatago vayaʼmo oʼmaiʼnaya vayaʼai apaimuʼyaleʼmo muki afinatefeʼmo magoke afinaʼmo ago faliʼniye. Agaemo Gotitegamo lavalelino uno haisiyafeʼmo agufaʼamo faliʼniyaʼmonanafa Goti Aunemeʼamoʼmo ago alino he tino ateʼniye.

19 Agaemo Goti Aunemeʼaletiʼmo Noaʼeʼmo magokepi lokaeʼa maiʼnaya vayaʼaifeʼmo Goti geʼamo aeno hakalo huno hapa paiʼniyaʼmonanafa oʼafiʼa faliteʼapaeʼmo hemenimo apauneʼapameʼamo Goti kalavusifiʼmo neʼmaiye.

20 Noaʼa hogoteno alopa sipimo alo nehigenoʼaeʼmo Gotiʼa vase vase huno apakava maime maime eʼniyaʼmonanafa geʼamo oʼafiʼnae. Gotiʼa hapa oʼmaenifa eitiʼa vayaʼatoʼmo anipiʼmo haneʼniya sipifiʼmo maiʼnaya vayaʼai apakufamo alino katino apateʼniye.

21 Apakaemo sipifiʼmo maiʼnagenoʼaeʼmo Gotiʼa anipatiʼmo apakufamo alino katino apateʼniya kavaʼmo aune kavaʼmo huno Gotiʼa aniʼmo faleʼa nelataya kavatetiʼmo lagufamo alino katino nelate. Fikumo aniʼmo faleʼa neʼapataya kavaʼmoʼa amega apakufale oʼaniʼyaʼageʼmo aeno kalo paeno neʼataleyaʼmonanafa Gotiʼa Yesu Kalaisiʼmo alino he tino ateʼniya kavatetiʼmo yuʼilaga mafaʼnetimo alino alagepa huno lateʼniya mafaʼnetifatiʼmo Goti geʼaleʼmo aeta atagaina huta nehune.

22 Kalaisiʼa he tino kokuʼnapiʼmo uno haino Goti lamaga haopaleʼmo maiʼneno muki vayaʼaiteʼmo yagaino neʼapate. Gotiʼa enisole vayanagi yagaiʼa neʼapataya vayanagi lokiya apauneʼapameʼe vayanagi huno alino Kalaisi aiyafiʼmo apateʼnigeno yagaino neʼapate.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ