1 Pita 2 - The Keyagana NT and 25 OT books

Ala kava neʼmo afaʼa maisaya yafakana huno maiʼniya gemae

¹ Huʼniyaʼmofeʼmo lapakaemo vayaʼaitegamo hosu kavaʼmo osuge aigofe gemo osuge ala lapakitapimo alisayafeʼmo amega lapakufale alagepa kavaʼmo osuge lapaipa kafa ohapaege huta faipa huta oʼapatege hiyo.

² Nute mafaʼnemogimo nufekeʼmo lusi kava huno nehapaiye. Goti geʼamo nukana huno haneʼniyaʼmofeʼmo mani alagepa nufeʼmo lapauʼninagetapa neyo netapa kosigae.

³ Ala kava neʼmoʼa fikumo laha maeno nelamiya vekamo maiʼniye, hutetapa netapa afi geʼnisayaʼmoʼmo nufeʼmo lapaʼye hino.

⁴ Agaemo afaʼa maisaya yafakana huno maiʼnigeʼapaeʼmo afa yafaʼmo haneʼniye, huʼa huʼnayaʼmonanafa Gotiʼa lekana paino atetenoʼaeʼmo, alopa monileʼyaʼmo aeno agaseʼniya yafane, huno huʼnigetapaeʼmo ani vekalegamo eʼnae.

⁵ Lapakaeʼeʼmo afaʼa maisaya yafakana huta maiʼnagenoʼaeʼmo Gotiʼa lapakaetetiʼmo Goti Aunemeʼamo maisiya noʼmo kime kime neʼe. Lapaote vayaʼmo maiʼnetapa lapaipafatiʼmo Gotiʼa amuse huno lapatesiya ofalinimo Yesu Kalaisitetiʼmo Gotiʼa amisayafeʼmo mono hutapa neʼapataya vayaʼmo maiʼnae.

⁶ Goti mukufi gemoʼmo ani kavatefeʼmo hunoʼaeʼmo, Afiyo, huno, Nagaemo yafaʼmo lekana paiʼna ateteʼna noʼmo kisuva yafaʼmo alopa monileʼyaʼmo aeno agaseʼniya yafaʼmo Saiyoni kotegamo maleʼnove. Muki vayaʼmogimo agaefeʼmo apakesamo afiʼa fatago hisayana alagi hapai oʼvaigae, huno hu maleʼniye.

⁷ Lapakesamo afita fatago nehaya vayaʼmogitapamo, alopa monileʼyaʼmo aeno agaseʼniya vekae, hutapa nehayaʼmonanafa apakesamo afiʼa fatago nosaya vayaʼaifeʼmo Goti mukufi gemoʼmo hunoʼaeʼmo, Noʼmo nekiya vayaʼmogi huʼapaeʼmo, ina agufa yafaʼmo haneʼniye, huʼa huteʼa aliʼa yaga auʼa ataleʼnayaʼmonanafa hogote yafaʼmo noʼmo faino atesiya yafaʼmo alino hamaleno ateʼniye, huno huʼniye.

⁸ Magoʼe huno Goti mukufi gemoʼmo hunoʼaeʼmo, Ani yafaʼmoʼa apaiyafiʼmo hapaege vai lamino hapaege hisiyafeʼmo haneʼniye, huno huʼniye. Apakaemo Goti geʼamo noʼafiyaʼmofeʼmo vai lamino nehapae. Gotiʼa ani kavaʼmo hugae, huno hu maleʼniye.

⁹ Huno hu maleʼniyaʼmonanafa ago lekana paino lapateʼniya vayaʼmo maiʼnae. Lapakaemo lapaote nofi vayaʼamo maiʼnae. Mono hutapa neʼapataya kini vayaʼamo maiʼnae. Lapakaemo Goti agaiʼa vayaʼamo maiʼnae. Gotiʼa keya aeno ge huʼnigetapaeʼmo hani huʼniya kavategatiʼmo eta agetetapa lapau aiʼnaya ha le kavaʼalegamo maiʼnae. Agaemo lapakaefeʼmo keya aeno ge huʼniya vekamoʼmo alagepa kavaʼmo huʼniya kavaʼaeʼmo ava gemo aeta hakalo hutapa hapa paisageno ala agiʼamo alisiyafeʼmo lekana paino lapateʼniye.

¹⁰ Hogotetapa afa vayaʼmo maiʼnayaʼmonanafa hemenimo Goti vayaʼamo maiʼnae. Hogoteno Gotiʼa hau huno olapateʼniyaʼmonanafa hemenimo hau huno lapateʼniye.

Goti aliʼyaʼamo neʼaliya vayaʼmo maiyo, huno huʼniya gemae

¹¹ Nahauʼniya vayaʼnimogitapae, huʼna, amega lapakufamoʼmo hauʼniya kavaʼmoʼa lapakupi mafaʼneeʼmo kame huno neʼate. Kalaga vayaʼmo maige etapa maige hutapa maiʼnayaʼmofeʼmo lapao ke hovanagi, ani kavafeʼmo haʼao, hutetapa osiyo.

¹² Lapakaemo ma mopafi vayaʼaitegamo alagepa kavaʼmo hiyo. Apakaemo lapakaefeʼmo huʼapaeʼmo, hosu kavaʼmo nehae, huteʼa huʼa faipa huʼa lapatesaya vayaʼmogimo alagepa kavatapimo agesagenoʼaeʼmo Gotiʼa apakaeteʼmo emineno yagaino apatesiya afinaʼmo agiʼaleʼmo aliʼa asaga hugae.

^13-14 Lapakaemo Ala kava nefeʼmo lapakesamo afitetapaeʼmo muki ma mopafi vayaʼaifeʼmo yagaiʼa neʼapataya vayaʼai geʼapimo afiyo. Hogoteno kini vekamo yagaino neʼapateya vekamo geʼamo afige aliʼyaʼaleʼmo lekana paino apateʼniya vayaʼai geʼapimo afige hiyo. Kini vekamoʼmo apakaemo hosu vayaʼmo kayoʼmo apamige alagepa vayaʼai apakiʼapileʼmo aliʼa asaga huʼa apatege hisayafeʼmo alino apateʼnigeʼa uʼa aliʼyaʼamo neʼaliye.

¹⁵ Lapakaemo alagepa kavatapiletiʼmo oʼafiʼnisaya vayaʼai apavayaleʼmo kitapa halututapa apatesageʼa negi nagi gemo osisayafeʼmo Gotiʼa hauʼniye.

¹⁶ Lapakaemo keʼaepa gemo afeʼalumelaga oʼmaita afa vayaʼmo maiʼnayaʼmofeʼmo hosu kavaʼmo hisaya vayaʼmo oʼmaitapa Goti aliʼyaʼamo neʼaliya vayaʼageʼmo maiyo.

¹⁷ Muki vayaʼai apakiʼapileʼmo alita asaga hiyo. Konagatapieʼmo lapaino. Gotifeʼmo koli hiyo. Ala kini vekamo hogote vekatapimo ala agiʼamo amiyo.

Hanageke yaʼmo alisayafeʼmo Kalaisi akame hiyo, huno huʼniya gemae

¹⁸ Aliʼyaʼmo neʼaliya vayaʼmogitapae, huʼna, aliʼyaʼmo afoʼamofeʼmo koli hutetapa aiyafiʼmo maiyo. Alagepa kavaʼmo huteʼa yuna apaipamo kaliʼneʼa yagaiʼa nelapataya vayaʼai apaiyafikeʼmo oʼmaitapa hosu kavaʼmo huʼa yagaiʼa nelapataya vayaʼai apaiyafiʼeʼmo maiyo.

¹⁹ Mago vekamoʼmo hosu kavaʼmo osuʼnisigeno hanageke yaʼmo amisigenoʼaeʼmo Gotifekeʼmo agesamo afitenoʼaeʼmo, Gotitefeʼmo afaʼa aliguve, huno hisiyana Gotiʼa amuse huno ategaiye.

²⁰ Inagi lapakaemo hosu kavaʼmo nehisageʼapaeʼmo lapamagisagetapaeʼmo, kanalene, hutapa hisayana ala lapakitapimo aligafiye. Haʼao oʼaligayaʼmonanafa alagepa kavaʼmo nehisageʼapaeʼmo lapakaetegamo hosu kavaʼmo hisayana kanalene, hutapa hisagenoʼaeʼmo Gotiʼa amuse huno lapategaiye.

²¹ Gotiʼa ani kavaʼmo hisayafeʼmo lapakaefeʼmo keya aeno ge huʼniye. Kalaisiʼa mani agufa kavaʼmo huʼniyaʼmofeʼmae. Kalaisiʼa lagaetefeʼmo hanageke yaʼmo aliʼniyanageta akame hisuna kavaʼmo ago hu maleʼniyaʼmofeʼmo akame hisuna kavaʼmo huʼniye.

²² Agaemo magoke hosu kavaʼmo osuʼnigeʼa agege avayafatiʼmo magoke aigofe gemo osuʼnigeʼa oʼafige huʼnae.

²³ Huʼa faipa huʼa ateʼnagenoʼaeʼmo geʼapileʼmo aeno atagaina huno huno faipa huno oʼapateʼniye. Kana yaʼmo amige amagige huʼnageno lusi kava huno agafu kiʼnigenoʼaeʼmo, lapamagiguve, huno osuʼniyaʼmonanafa alagepa huno alino fako huno neʼapateya vekamo ayapiʼmo maleʼniye.

²⁴ Agaiʼageʼmo hosu kavatimo agufafiʼmo aliteno malipu yosaleʼmo faliʼniye. Hosu kavatilefeʼmo falitetaeʼmo alagepa kavaʼalefeʼmo afaʼa maisunafeʼmo faliʼniye. Amagiʼnageno fugaginaʼamoʼmo huʼniya kavaʼaletiʼmo Gotiʼa alino auleno lapateʼniye.

²⁵ Hogotetapa lapakaemo kaʼmo ataletapa uteta hutapa afela heʼnaya sipisipigana huʼnayaʼmonanafa hemenimo sipisipileʼmo yagaino nelapateya vekamoʼmo lapakupi mafaʼneleʼmo yagaino nelapateya vekatapilegamo aita ataginetapa eʼnae.